2 Chronicles 23

Ilonggo (Ang Biblia (1982))

← Chapter 22 Jump to: Chapter 24 →

1Apang sa ikapitong tuig nagpangalig-on sa iya kaugalingon si Joiada, kag nagpakigkatipan sia upud sa mga pangolo sang ginatus, kay Azarias nga lalaking anak ni Jeroham, kay Ismael nga lalaking anak ni Jeohanan, kay Azarias nga lalaking anak ni Abed, kay Maasias nga lalaking anak ni Adaya, kag kay Elisafat nga lalaking anak ni Zicri.

2Kag ginlibut nila ang Juda kag gintipon ang mga Levinhon gikan sa tanan nga banwa sang Juda, kag ang mga pangolo sang mga kabaranggayan sang Israel, kag nag-abut sila sa Jerusalem.

3Kag ang bug-os nga katilingban nagpakigkatipan sa hari sa balay sang Dios. Kag si Joiada nagsiling sa ila, “Yari karon, ang anak sang hari! Magahari sia, subong sang napamolong sang Ginoo nahanungud sang mga lalaking anak ni David.

4Amo ini ang butang nga inyo himoon: ang ikatlong bahin sa inyo nga nagasulud sa adlaw nga inugpahuway, gikan sa mga sacerdote kag mga Levinhon mga manginbantay sang mga atangan,

5kag ang ikatlong bahin sa balay sang hari kag ang ikatlong bahin sa Gawang sang Sadsaran; kag ang bug-os nga katawohan sa mga luwang sang balay sang Ginoo.

6Walay bisan sin-o nga magsulud sa balay sang Ginoo, luwas ang mga sacerdote kag ang mga nagaalagad gikan sa mga Levinhon; sila magasulud, kay balaan sila, apang ang bug-os nga katawohan magbantay sang tinulin sang Ginoo.

7Ang mga Levinhon magalibut sa hari sa tanan nga duug, nga ang tagsa ka tawo may iya nga mga hinganiban sa iya kamut; kag ang bisan sin-o nga magsulud sa balay patyon sia. Mag-upud kamo sa hari kon magsulud sia, kag kon maggowa sia.”

8Ang mga Levinhon kag ang bug-os nga Juda naghimo sono sa tanan nga ginsogo ni Joiada nga sacerdote. Ginkuha sang tagsa ka tawo ang iya mga tinawo, ang magasulud sa adlaw nga inugpahuway, upud sang magagowa sa adlaw nga inugpahuway; kay si Joiada nga sacerdote wala magpapauli sang mga kinabon.

9Kag gintugyan ni Joiada nga sacerdote sa mga pangolo sang ginatus ang mga bangkaw kag ang mga kalasag kag ang mga taming nga iya anay ni Hari David, nga yadto sa balay sang Dios;

10kag ginpahamtang niya ang bug-os nga katawohan, nga ang tagsa ka tawo may iya nga hinganiban sa iya kamut, kutub sa kilid nga too sang balay tubtub sa kilid nga wala sang balay, sa ubay sang halaran kag sang balay, sa luyo sang hari palibut.

11Niyan ginpagowa nila ang anak sang hari, kag ginpurungpurungan sia sa olo, kag ginhatagan sing pagpamatuud; kag ginhimo sia nga hari, kag ginhaplas sia ni Joiada kag sang iya mga anak, kag nagsiling sila, “Mabuhi ang hari.”

12Sang nabatian ni Atalia ang ginahud sang katawohan nga nagadalagan kag nagadayaw sang hari, nagkadto sia sa katawohan sa balay sang Ginoo;

13kag sang nagtolok sia, ang hari nagatindug sa luyo sang iya haligi sa salamputan, kag ang mga pangolo kag ang mga manugbudyong sa luyo sang hari, kag ang bug-os nga katawohan sang duta nagakasadya kag nagapatonog sing mga budyong, kag ang mga manug-amba nagalanton sa mga tulunggon sa musica nga nagadumala sang pag-amba sang pagdayaw. Niyan ginkusnit ni Atalia ang iya mga panapton, kag nagsiling, “Budhi! Budhi!”

14Niyan ginpagowa ni Joiada nga sacerdote ang mga pangolo sang ginatus nga ginpadumala sa kasoldadosan, kag nagsiling sa ila, “Pagowaa sia nga ipatunga sa mga kubay; ang bisan sin-o nga nagasonod sa iya patyon sa espada.” Kay ang sacerdote nagsiling, “Dili sia pagpatyon sa balay sang Ginoo.”

15Gani ginhawaan nila sia; kag nagkadto sia sa salamputan sang gawang sang kabayo padolong sa balay sang hari, kag ginpatay nila sia didto.

16Kag si Joiada naghimo sing katipan sa tunga niya kag sang bug-os nga katawohan kag sang hari nga sila manginkatawohan sang Ginoo.

17Niyan ang bug-os nga katawohan nagsulud sa balay ni Baal, kag ginguba ini; ginwagwag nila ang iya mga halaran kag ang iya mga larawan kag ginpatay sa atubangan sang mga halaran si Matan nga sacerdote ni Baal.

18Kag si Joiada nagtangdo sang mga manugdumala sang balay sang Ginoo sa kamut sang mga sacerdote nga mga Levinhon nga ginpanagtag ni David sa balay sang Ginoo, sa pagdolot sang mga halad-nga-sinonog sang Ginoo, sono sa nasulat sa kasogoan ni Moises, nga may kasadya kag may inamba, sono sa sogo ni David.

19Sia nagpahamtang sang mga bantay sa mga gawang sang balay sang Ginoo agud nga indi magsulud ang bisan sin-o nga dimatinlo sa bisan anong bagay.

20Kag ginkuha niya ang mga pangolo sang ginatus, ang mga dungganon, ang mga pangolo-puud sang katawohan, kag ang bug-os nga katawohan sang duta; kag ginpapanaug ang hari gikan sa balay sang Ginoo, nga nagaagi sa naibabaw nga gawang pakadto sa balay sang hari. Kag ginpalingkod nila ang hari sa trono sang ginharian.

21Gani ang bug-os nga katawohan sang duta nagkasadya; kag ang banwa naglinong, sa tapus mapatay sa espada si Atalia.

← Chapter 22 Jump to: Chapter 24 →