2 Chronicles 32

Ilonggo (Ang Biblia (1982))

← Chapter 31 Jump to: Chapter 33 →

1Sa tapus sini nga mga butang kag sini nga pagkatutum nag-abut si Senaquerib nga hari sang Asiria kag nagsulud sa Juda kag nagpahamtang sang dologan batok sa napamakuran nga mga banwa, nga nagahunahuna sa pag-agaw sa ila nga sa iya kaugalingon.

2Kag sang nakita ni Ezequias nga nag-abut si Senaquerib kag nga nagtuyo sia sa pagpakig-away batok sa Jerusalem,

3nagpakigsapul sia sa iya mga principe kag sa iya gamhanan nga mga tawo sa pagtampok sang mga tubig sang mga tuburan nga yara sa gowa sang banwa; kag ginbuligan nila sia.

4Gani may nagtipon sing tingub nga madamu nga mga tawo, kag gintampokan nila ang tanan nga tuburan kag ang mga sapa nga nag-ilig paagi sa tunga sang duta, nga nagasiling, “Ngaa bala nga mag-abut ang mga hari sang Asiria kag makakita sing madamu nga tubig?”

5Nagpakaisug sia kag nagpatindug sang bug-os nga kuta nga naguba, kag ginpataas ini tubtub sa mga torre, kag ang iban nga kuta sa gowa; kag ginpalig-on ang Milo sa banwa ni David. Naghimo man sia sing bugana nga mga hinganiban kag mga taming.

6Kag nagbutang sia sing mga pangolo sang inaway sa katawohan, kag gintipon sila sing tingub sa iya sa masangkad nga duug sa gawang sang banwa kag nagpamolong sing paglipay sa ila, nga nagasiling,

7“Magpakabakud kamo kag magpakaisug. Dili kamo magkahadluk ukon magkahangawa tungud sa hari sang Asiria kag sa bug-os nga kadam-an nga nagaupud sa iya; kay may labi pa kadaku nga nagaupud sa aton sang sa iya.

8Upud sa iya amo ang butkon nga unud; apang upud sa aton amo ang Ginoo nga aton Dios, sa pagtabang sa aton kag sa pag-away sang aton mga inaway. Kag ang katawohan nagsalig sa ila kaugalingon sa mga polong ni Ezequias nga hari sang Juda.

9Sa tapus sini si Senaquerib nga hari sang Asiria nagpadala sang iya mga alagad sa Jerusalem, yadto sia sa atubang sang Laquis upud ang bug-os niya nga gahum, kay Ezequias nga hari sang Juda kag sa bug-os nga Juda nga yara sa Jerusalem, nga nagasiling,

10“Amo ini ang ginasiling ni Senaquerib nga hari sang Asiria, ‘Sa ano bala nagasalig kamo, nga nagapabilin kamo sa pagkibon sa Jerusalem?

11Wala bala si Ezequias nagabuyok sa inyo, sa pagtugyan sa inyo nga mapatay sa tiggulutum kag sa kauhaw, nga nagasiling, “Ang Ginoo nga aton Dios magaluwas sa aton gikan sa kamut sang hari sang Asiria”?

12Wala bala ang amo nga Ezequias magkuha sang iya mataas nga mga duug kag sang iya mga halaran kag magsogo sa Juda kag sa Jerusalem, “Magasimba kamo sa atubangan sang isa ka halaran, kag sa ibabaw sini magasonog kamo sing incienso”?

13Wala bala kamo makahibalo sang ginhimo ko kag sang akon mga ginikanan sa tanan nga mga katawohan sang mga duta? Ang mga dios sang mga pungsud sang mga duta nakaluwas bala nga mas-a sang ila mga duta gikan sa akon kamut?

14Sino-o bala dira sa tanan nga dios sadto nga mga pungsud nga ginlaglag sing bug-os sang akon mga ginikanan nga makaluwas sang iya katawohan gikan sa akon kamut, nga ang inyo Dios makasarang magluwas sa inyo gikan sa akon kamut?

15Busa karon dili kamo magpalimbong kay Ezequias ukon magpabuyok sa inyo sa sini nga bagay, ukon magpati sa iya, kay wala sing dios sa bisan ano nga pungsud ukon ginharian nga nakasarang sa pagluwas sang iya katawohan gikan sa akon kamut kag gikan sa kamut sang akon mga ginikanan. Daw ano pa bala nga pagluwas sang inyo Dios sa inyo gikan sa akon kamut!’”

16Kag ang iya mga alagad nagpamolong pa gid batok sa Ginoong Dios kag batok sa iya alagad nga si Ezequias.

17Nagsulat man sia sing mga sulat sa pagpasipala sa Ginoo nga Dios sang Israel kag sa pagpamolong batok sa iya, nga nagasiling, “Subong nga ang mga dios sang mga pungsud sang mga duta nga wala makaluwas sang ila katawohan gikan sa akon kamut, sa amo ang Dios ni Ezequias indi makaluwas sang iya katawohan gikan sa akon kamut.”

18Kag nagsinggit sila sa mabaskug nga tingug sa hinudiyo nga hambal sa katawohan sang Jerusalem nga yara sa kuta, sa pagpahog sa ila kag sa pagpalisang sa ila, agud nga maagaw nila ang banwa.

19Kag nagpamolong sila nahanungud sang Dios sang Jerusalem, subong sang mga dios sang mga katawohan sang duta, nga binuhatan sang mga kamut sang mga tawo.

20Niyan si Ezequias nga hari kag ang manalagna nga si Isaias nga anak ni Amoz, nagpangamuyo nahanungud sini kag nagtuaw sa langit.

21Kag ang Ginoo nagpadala sing manugtunda, nga nagpapas sang tanan nga gamhanan nga tawo nga isganan kag sang mga manugdumala kag mga pangolo sa dologan sang hari sang Asiria. Gani nagpauli sia nga may kahuya sa nawung sa iya kaugalingon nga duta. Kag sang nagsulud sia sa balay sang iya dios, sila nga naggowa sa iya kaugalingon nga kasudlan nagpatay sa iya didto sa espada.

22Gani ginluwas sang Ginoo si Ezequias kag ang mga pumuluyo sang Jerusalem gikan sa kamut ni Senaquerib nga hari sang Asiria kag gikan sa kamut sang tanan niyang mga kaaway; kag gintuytuyan sila sa tagsa ka luyo.

23Kag madamu ang nagdala sing mga dolot sa Ginoo sa Jerusalem kag bilidhon nga mga butang kay Ezequias nga hari sang Juda, sa bagay nga nabayaw sia sa itololok sang tanan nga mga pungsud kutub sadto.

24Sa sadtong mga adlaw si Ezequias nagmasakit nga sa ikamatay, kag nagpangamuyo sia sa Ginoo; kag nagpamolong sia sa iya kag naghatag sa iya sing tanda.

25Apang si Ezequias wala magbalus sono sa kaayohan nga nahimo sa iya, kay ang iya tagiposoon nagmatinaastaason. Busa may kasingkal batok sa iya kag sa Juda kag sa Jerusalem.

26Apang si Ezequias nagpaubus sang iya kaugalingon tungud sang bugal sang iya tagiposoon, sia kag ang mga pumuluyo sang Jerusalem, sa bagay nga wala mag-abut sa ila ang kasingkal sang Ginoo sa mga adlaw ni Ezequias.

27Kag si Ezequias may lakas gid nga manggad kag kadungganan; kag naghimo sia nga sa iya sing mga bahandian nga sa pilak, sa bulawan, sa bilidhon nga mga bato, sa mga pahumut, sa mga taming, kag sa tanan nga matahum nga gamit;

28mga tambobo nga sa patubas sang uyas, bag-o nga alak, kag lana; kag mga palasudlan sang tanan nga bagay sang kahayupan, kag mga panong sa mga toril.

29Labut pa nagbutang sia nga sa iya sing mga banwa, kag bugana nga mga pagkabutang nga mga panong kag kabakahan; kay ang Dios nakahatag sa iya sing madamu gid nga pagkabutang.

30Ini man nga Ezequias nagtampok sang naibabaw nga tuburan sang mga tubig sang Gihon kag ginpailig sila sing tadlong pa idalum sa katundan nga kilid sang banwa ni David. Kag si Ezequias nag-uswag sa tanan niyang binuhatan.

31Apang sa hilikuton sang mga embajador sang mga principe sang Babilonia, nga ginpadala sa iya nga sa pagpakisayud sang katingalahan nga nahimo sa duta, ginpabayaan sia sang Dios, sa pagtilaw sa iya agud nga mahibaloan sang Dios ang tanan nga yara sa iya tagiposoon.

32Karon ang nabilin nga mga binuhatan ni Ezequias, kag ang iya maayo nga mga buhat, yari karon, nasulat sila sa palanan-awon ni Isaias nga manalagna nga anak ni Amoz, sa Tolon-an sang mga Hari sang Juda kag sang Israel.

33Kag si Ezequias nagtolog upud sa iya mga ginikanan, kag ginlubung nila sia sa taklaran sang mga lulubngan sang mga anak ni David; kag nagpadungug sa iya ang bug-os nga Juda kag ang mga pumuluyo sang Jerusalem sa iya kamatayon. Kag naghari nga tal-us niya si Manases nga iya lalaking anak.

← Chapter 31 Jump to: Chapter 33 →