Numbers 10

Mien Bible (Thai Script) © Thailand Bible Society, 2007

← Chapter 9 Jump to: Chapter 11 →

1เฒี้ยว ก๊อง บั๋ว โมเซ,

2“อ๋อย หฒุ หล่ง ญ่าน ต๊า อี นอม หฑัด. ปย๊ม วั้ว เต๋ย อี นอม หฑัด เห่ว หฒวัง เมี่ยน กั๊บ ฒุ้น, หย่า ปย๊ม เห่ว ซุ้ย ด๊บ-ลิ่ว เธี้ยง.

3ปย๊ม อี นอม หฑัด เญย เฒี่ยง โห่, หฒวัง เมี่ยน อ๋อย หฒุ ต้าย เหธา เม่ย กั๊บ ฒุ้น เยียม หวุ่ย ปวั้ง ด๊บ-ลิ่ว เญย แก้ง ด่าง.

4สี ก๊อง ขูง ปย๊ม เหยียด นอม หฑัด ฮนั้ง, ฝีงๆ อิสะลาเอน เมี่ยน เญย เปย๊ย เฒ้ย อ๋อย หฒุ ต้าย ฒุ้น เม่ย น้าย.

5ไฮ์ ปย๊ม หฑัด เญย เฉีย บุย, เป๊ะ เญย, ธอง ด๊บ-ลิ่ว เยียม ตง ปูง แหมง วั้ว เต๋ย อ๋อย หฒุ ธ้วด เจ๊า.

6ไฮ์ ปย๊ม ตะเหญ่ย หฑุ่น, ธอง ด๊บ-ลิ่ว เยียม น่าม ปูง แหมง วั้ว เต๋ย หย่า อ๋อย หฒุ ธ้วด เจ๊า. ปย๊ม หฑัด เญย เฉีย บุย, เป๊ะ เญย, ฯฒฯ โหฒว จั๋ง-โห่ ปุน ฮิ้ว ตุ๊ อ๋อย หฒุ ธ้วด เจ๊า.

7เหว่ย เห่ว หฒวัง เมี่ยน ต้าย ฒุ้น อ๋อย หฒุ ปย๊ม หฑัด, มป่า ไม้ ตู๋ง ปย๊ม บุย เญย, เป๊ะ เญย, วั้ว หญู่ง เฉีย.

8“เซ ต้ง อาโลน เญย ตอน บัว วั้ว เต๋ย ไซ เมี่ยน อ๋อย หฒุ ปย๊ม หฑัด. น้าย เซ เม่ย บัว ต่อย เจี๋ย ต่อย, เหยียด ลิ์ว อ๋อย หฒุ กัน เญย เล์ย.

9เม่ย บัว เยียม กั้น เญย เต่ย-ปูง หย่า ม่าย วิน-วั้ง ต้าย ห่อย ฯฒฯ ธ้วด มี่ง เหธา นิ่น บัว เบ๊าะ จ๋า, อ๋อย หฒุ หล่ง วั้ว เต๋ย หฑัด ปย๊ม เฉีย บุย เญย, เป๊ะ เญย. เฒี้ยว, เม่ย บัว เญย ทิน-ฮู่ง, ฯฒฯ จั๋ง เม่ย บัว, เหฌียว เม่ย บัว เล่ย ดุ๊ด เม่ย บัว เญย วิน-วั้ง.

10แอ๋ง เถา เฌียน-โย่ว เญย เฒี่ยง โห่, เจี๋ย เม่ย บัว เญย ฒิบ เหธา เซียง-หฮลา เญย ฒิบ, ต้อ กะน้าย มี่ง ปั๊ว เหฒี่ย, หย่า เหฒี่ย เหว่ย จิว ทง วั้ว หฒั่น, อ๋อย หฒุ ปย๊ม น้าย เต๋ย หฑัด. น้าย เซ เหว่ย ปุน เม่ย บัว เญย เฒี้ยว จั๋ง หฒุ เม่ย บัว. เยีย โหฒว เฒี้ยว, เม่ย บัว เญย ทิน-ฮู่ง.”

11เถา ตะเหญ่ย หฮญัง, เหญ่ย หฮลา, หญี่ เหฒียบ วั้ว ฮนอย, เยียม แล์ง แหง่ง หว่า เญย ด๊บ-ลิ่ว กู้ หงว่าย วั้ว ต๊อ บ๋วน ฝาว.

12อิสะลาเอน เมี่ยน ฯฒฯ ธ้วด ซีนาย เต่ย-ปูง-ฮวาง, คัง เจี๋ย คัง มี่ง เถา บ๋วน ตี้ง เหฌี่ย ปาลาน เต่ย-ปูง-ฮวาง.

13นิ่น บัว ธ้วด น้าย ตะเยี้ยด หฑุ่น เจ๊า หฒิว เฒี้ยว หล่ง โมเซ บั๋ว เญย หว่า.

14เยียม ยูดา เมี่ยน เญย ด๊บ-ลิ่ว เธี้ยง เญย กวั้นๆ ธ้วด เจ๊า มี่ง ด่าง. นิ่น บัว หย่า เยียม นิ่น บัว เญย เก้ กะเดี๊ย. ม่าย อัมมีนาดับ เญย ตอน, นาโซน, กุ๊น นิ่น บัว.

15ฒูอา เญย ตอน, เนทันเอน, กุ๊น อิดสาคา ฝีง วั้ว กวั้น.

16แอ๋ง ม่าย เฮโลน เญย ตอน, เอลีอับ, กุ๊น เสบูลุน ฝีง วั้ว กวั้น.

17แธะ ลิ์ว หฒั่ง ทิน-ฮู่ง เญย ด๊บ-ลิ่ว, เกโซน เมี่ยน เหธา เมลาลี เมี่ยน, ต้ง เปี้ยน ด๊บ-ลิ่ว วั้ว เต๋ย, ฯฒฯ ธ้วด เจ๊า.

18เจี๋ย ต้าย, เยียม ลูเบน เมี่ยน เญย ด๊บ-ลิ่ว เธี้ยง เญย กวั้นๆ ธ้วด เจ๊า, หย่า เยียม นิ่น บัว เญย เก้ กะเดี๊ย. ม่าย เซเดเอ เญย ตอน, เอลีซู, กุ๊น นิ่น บัว.

19สูลิซัดได เญย ตอน, เซลูมิเอน, กุ๊น สิเมโอน ฝีง วั้ว กวั้น.

20หย่า ม่าย เดอูเอน เญย ตอน, เอลียาสาบ, กุ๊น กาด ฝีง วั้ว กวั้น.

21เจี๋ย ต้าย, โคฮ้าด เมี่ยน ธ้วด เจ๊า หย่า แกง เจี๊ยน ธีง-เหฑ่ง เญย กะน้าย มี่ง. นิ่น บัว เถา ต๋อง, หฒั่ง ทิน-ฮู่ง เญย ด๊บ-ลิ่ว ฒู้ง ธอง เหฒียง อ๊ะ.

22เจี๋ย ต้าย, แอ๋ง ม่าย เยียม เอฟาอิม เมี่ยน เญย ด๊บ-ลิ่ว เธี้ยง เญย กวั้นๆ ธ้วด เจ๊า, หย่า เยียม นิ่น บัว เญย เก้ กะเดี๊ย. ม่าย อัมมีฮู้ด เญย ตอน, เอลีซามา, กุ๊น นิ่น บัว.

23ม่าย เปดาซู เญย ตอน, กามาลิเอน, กุ๊น มะนัดเส ฝีง วั้ว กวั้น.

24หย่า ม่าย กิเดโอนี เญย ตอน, อาบีดัน, กุ๊น เบนยามิน ฝีง วั้ว กวั้น.

25ฆะฮ้า ลาย, เหว่ย เถง กวั้นๆ บู้ง เจี๊ยน ฆะฮ้า แหมง, ม่าย เยียม ดาน เมี่ยน เญย ด๊บ-ลิ่ว เธี้ยง เญย กวั้นๆ ธ้วด เจ๊า, หย่า เยียม นิ่น บัว เญย เก้ กะเดี๊ย. ม่าย อัมมีชัดได เญย ตอน, อาหิเยเซ, กุ๊น.

26ม่าย โอคาน เญย ตอน, ปากีเอน, กุ๊น อาเซ ฝีง วั้ว กวั้น.

27หย่า ม่าย เอนัน เญย ตอน, อาหิลา, กุ๊น นับทาลี ฝีง วั้ว กวั้น.

28กวั้นๆ อิสะลาเอน เมี่ยน ธ้วด เจ๊า เญย เฒี่ยง โห่, อ๋อย หฒุ ฮนั้ง น้าย นอ หฒิว นิ่น บัว เญย เหยียด เหญ่ย มี่ง.

29โมเซ เหธา นิ่น เญย อง-ตา, มีเดียน เมี่ยน, เลอูเอน เญย ตอน, โฮบับ, ก๊อง, “เยีย บัว อ๋อย ธ้วด เจ๊า มี่ง เถา เฒี้ยว ก๊อง, ‘เยีย อ๋อย จิว ปุน เม่ย บัว’ วั้ว นอม ต๋อง. โท้ เหธา เยีย บัว มี่ง โอ่. เยีย บัว ฯฒฯ โหฒว หลง ปุน เม่ย เหว่ย หฒุ เฒี้ยว แล์ง เหธย หลง เญย กะน้าย ปุน อิสะลาเอน เมี่ยน.”

30โฮบับ เตา, “เยีย ไม้ มี่ง อ๊ะ. เยีย อ๋อย หฑวน เยีย กั้น เญย เต่ย-ปูง, เยีย กั้น เญย เมี่ยน วั้ว.”

31โมเซ แอ๋ง ก๊อง, “โท้ เม่ย ไม้ ตู๋ง กวั่ง เยีย บัว โอ่. เม่ย ฮิ้ว ตุ๊ เยียม น้าย เต่ย-ปูง-ฮวาง เยีย บัว อ๋อย หฒุ ธอง ด๊บ-ลิ่ว เธี้ยง เยียม หาย. เม่ย ไฮ่ เถง เยีย บัว โหฒว มฒีง.

32สี ก๊อง เม่ย เหธา เยีย บัว มี่ง นอ, เฒี้ยว เหธย หาย หญู่ง หลง เญย ปุน เยีย บัว, เยีย บัว หย่า ปุน เม่ย เหธา เจี๊ยน ม่าย ป่วน.”

33อิสะลาเอน เมี่ยน ฯฒฯ ธ้วด เฒี้ยว เญย บง มี่ง ปัว ฮนอย เญย เจ๊า. วั้ว เต๋ย ปัว ฮนอย กะญั์ว เฒี้ยว เญย แล์ง แหง่ง หว่า ฟาง มี่ง ด่าง เถง นิ่น บัว ล์อ ต๋อง ฮิด.

34หาย หฒั่น ธ้วด เจ๊า, ลู่ง ฮนอย หฒั่น เฒี้ยว เญย บ๋วน เยียม นิ่น บัว กู้ หงว่าย.

35แกง แล์ง แหง่ง หว่า ฟาง ธ้วด เจ๊า เญย เฒี่ยง โห่, โมเซ ก๊อง, “โอ เฒี้ยว อ้า! เจี์ย ต้าย ม่าะ! โท้ ปุน เม่ย เญย วิน-วั้ง ฟ้าด หฑาน เหฑ่ง. โท้ ปุน ฑอง เม่ย วั้ว เต๋ย เมี่ยน เยียม เม่ย เญย หฑะเฮมียน เปย๋า ฆอย.”

36แล์ง แหง่ง หว่า ฟาง หาย หฒั่น ตี้ง เหฌี่ย, โมเซ แอ๋ง ก๊อง, “โอ เฒี้ยว อ่า, โท้ เม่ย หฑวน ต้าย, เหธา ธินๆ หว่านๆ อิสะลาเอน เมี่ยน เยียม.”

← Chapter 9 Jump to: Chapter 11 →