Numbers 21

Mien Bible (Thai Script) © Thailand Bible Society, 2007

← Chapter 20 Jump to: Chapter 22 →

1คานาอัน เมี่ยน, อาล้าด ฒี่ง เญย ฮู่ง, ต้ง เยียม เนเกบ ไฮ์ ก๊อง อิสะลาเอน เมี่ยน กัน อาทาลิม วั้ว ติ้ว เจ๊า ต้าย, นิ่น ฯฒฯ ธ้วด มี่ง เหธา อิสะลาเอน เมี่ยน เบ๊าะ จ๋า, ธ้าง ตุ๊ เต๋ย นิ่น บัว เญย เมี่ยน.

2อิสะลาเอน เมี่ยน ฯฒฯ เหธา เฒี้ยว แล์ง เจี์ย แหง่ง หว่า. นิ่น บัว ก๊อง, “สี ก๊อง เฒี้ยว เฒาะ น้าย เต๋ย เมี่ยน จิว ปุน เยียม เยีย บัว เญย ปั์ว-เดี๊ย, เยีย บัว ฯฒฯ เหมียด เหฑ่ง นิ่น บัว เญย ฒี่ง อ๊ะ.”

3เฒี้ยว ไฮ์ อิสะลาเอน เมี่ยน โท้ เญย หว่า ฯฒฯ เฒาะ คานาอัน เมี่ยน จิว ปุน นิ่น บัว. นิ่น บัว ฯฒฯ เหมียด เหฑ่ง คานาอัน เมี่ยน เหธา วั้ว นอม เต่ย-ปูง เญย ฒี่ง เหยียด ฒู้ง. วั้ว นอม ห่อง นิ่น บัว หย่า ธ้วด บั๋ว เห่ว “โฮมา.”

4อิสะลาเอน เมี่ยน เยียม โฮอา บง ธ้วด เจ๊า ยั่ง มี่ง ค้อย-ซิ วั้ว ติ้ว เจ๊า เหว่ย หวี่ง เอโดม เต่ย-ปูง. เยียม เจ๊า หฒั่ง หฒวัง เมี่ยน ไฮ์ ไม้ หน่อย ฟ่าน.

5นิ่น บัว ฯฒฯ งบ ทิน-ฮู่ง เหธา โมเซ, “เม่ย บัว เหว่ย หาย ติ่ว ต้อ เยีย บัว ธ้วด อียิบ เต่ย-ปูง ปุน เยีย บัว เยียม น้าย เต่ย-ปูง-ฮวาง ไต่? เยียม น้าย ไม้ ม่าย หญั่น เญย กะน้าย. ไม้ ม่าย ววม ฮบ. เยีย บัว โหยว! ไห่ อี้ หฒั่น หญั่น เจี๊ยน น้าย เต๋ย ไม้ เป๋น หญั่น เญย กะน้าย.”

6เฒี้ยว ฯฒฯ ปุน นาง-โตะ เยียม หฒวัง แปะ ฝีง เญย บุด๋ง. นาง เญาะ เมี่ยน ฯฒฯ ม่าย อิสะลาเอน เมี่ยน ไต่ ธั้ม ไห่.

7แปะ ฝีง ต้าย ล์อ โมเซ หย่า ก๊อง, “เยีย บัว ป์าม ฒุ์ย เหว่ย หฒุ เยีย บัว งบ เฒี้ยว หย่า งบ เม่ย. อี้ หฒั่น โท้ เถง เต๋า เก๋า โท้ เฒี้ยว ต้อ น้าย เต๋ย นาง ธ้วด เยีย บัว บุด๋ง มี่ง.” โมเซ ฯฒฯ เหว่ย นิ่น บัว เต๋า เก๋า.

8เฒี้ยว ก๊อง บั๋ว โมเซ, “อ๋อย หฒุ โหฒว ติ้ว นาง-โตะ อัน วั้ว ต่ง กู้ หงว่าย. ตะฟ่าน หฒุ นาง เญาะ เญย เมี่ยน หมั่ง เยียม ต่ง วั้ว ติ้ว ต้ง ซิ นาง, วั้ว เต้า ฯฒฯ ตุ๊ เฒี่ยง เจี๊ยน.”

9โมเซ ฯฒฯ หล่ง ต้ง ซิ โหฒว ติ้ว นาง อัน เจี๊ยน ต่ง กู้ หงว่าย. หาย เต้า หฒุ นาง-โตะ เญาะ หย่า หมั่ง น้าย ติ้ว ต้ง ซิ นาง, วั้ว เต้า ฯฒฯ ตุ๊ แหม่ง ธ้วด.

10อิสะลาเอน เมี่ยน แอ๋ง ซุ้ย มี่ง ธอง ด๊บ-ลิ่ว เธี้ยง เยียม โอโบด.

11เยียม โอโบด นิ่น บัว ธ้วด เจ๊า มี่ง เหลียบ ด๊บ-ลิ่ว เธี้ยง เยียม อีเยอาบาลิม, เซ เยียม เต่ย-ปูง-ฮวาง, โมอับ ต๋อย-หง่าน, ฮวิน บะฮนอย ธ้วด วั้ว ปูง.

12เยียม หน่าย นิ่น บัว แอ๋ง ซุ้ย มี่ง เหลียบ เธี้ยง เยียม เฒเล้ด ฮ์อง.

13นิ่น บัว แอ๋ง ธ้วด เจ๊า เยียม อานโนน ด้าย เฮลน ป๊ะ ปูง แหมง. อานโนน ด้าย เยียม เต่ย-ปูง-ฮวาง แหธง เปียะ อาโมไล เมี่ยน เญย เต่ย, หย่า โหฒว โมอับ เต่ย-ปูง เหธา อาโมไล เมี่ยน เญย กั๊บ-จ๋าย.

14เหว่ย น้าย เยียม เฒี้ยว เญย เบ๊าะ จ๋า โซว ก๊อง, “...สุฟา เต่ย เญย วาเฮ้บ ฒี่ง, เหธา อานโนน ด้าย เญย เหยียด ฒู้ง ฮ์อง,

15เหธา แหธง ฝาว เถา อาน ฒี่ง วั้ว เต๋ย ฮ์อง เญย ไบ๊, หย่า ฑ์ม มี่ง โมอับ เต่ย-ปูง เญย กั๊บ-จ๋าย.”

16อิสะลาเอน เมี่ยน เยียม หน่าย แอ๋ง มี่ง โต่ว เถา เบเอ. เยียม เบเอ ม่าย นอม ววม-ค้วด, ต้ง ฒิ่น ด่าง เฒี้ยว บั๋ว โมเซ, “เห่ว หฒวัง แปะ ฝีง ต้าย ฒุ้น, เยีย ฯฒฯ ปุน ววม นิ่น บัว ฮบ,” วั้ว นอม ต๋อง.

17วั้ว หฒั่น อิสะลาเอน เมี่ยน ป๋าว น้าย ติ้ว ฑูง, “ววม-ค้วด อ่า, ปุน ววม แป๊ด ธ้วด ต้าย, เยีย บัว ล่ม ฑ่อย ป๋าว ฑูง โห่ว.

18เซ เปย๊ย เฒ้ย เว้ด เญย ววม-ค้วด, แปะ ฝีง เญย เจียน ลง ธ้วด ต้าย เญย, หล่ง ฮู่ง ปย๊า เหธา ปย๊า-บย่า ลง.” นิ่น บัว แอ๋ง ธ้วด เต่ย-ปูง-ฮวาง มี่ง เถา มัดทานา,

19เยียม มัดทานา มี่ง เถา นาหะลีเอน ห่อง. เยียม นาหะลีเอน แอ๋ง ซุ้ย มี่ง เถา บาโม้ด.

20ธ้วด บาโม้ด นิ่น บัว แอ๋ง มี่ง โมอับ เต่ย เญย ฮ์อง, เซ หมั่ง เหฌี่ย เต่ย-ปูง-ฮวาง เญย ปิดกา บง- นี้ง กะเฮลน.

21อิสะลาเอน เมี่ยน พ้าย เมี่ยน มี่ง บั๋ว อาโมไล เมี่ยน เญย ฮู่ง, สิโหน.

22“โท้ ปุน เยีย บัว เจี๋ย เม่ย เญย เต่ย-ปูง โอ่. เยีย บัว ไม้ ยั่ง เพียน เปียะ เด่ย ไฟ อะหงุ่น หฮวีง, หย่า ไม้ ฮบ หาย นอม ววม-ค้วด เญย ววม. เยีย บัว ขูง กัน ฮู่ง เตี๋ย เญย ต้ม เจ๊า เถา เจี๋ย จ่ม เม่ย เญย เต่ย-ปูง ฮนั้ง.”

23มป่า สิโหน ฮู่ง ไม้ คั้ง ปุน อิสะลาเอน เมี่ยน เจี๋ย นิ่น เญย เต่ย. นิ่น เห่ว นิ่น เญย หฒวัง แปง ต้าย ฒุ้น แอ๋ง ธ้วด มี่ง เต่ย-ปูง-ฮวาง เบ๊าะ อิสะลาเอน เมี่ยน. นิ่น เถา ยาฮ้าด ฯฒฯ เหธา อิสะลาเอน เมี่ยน เบ๊าะ จ๋า.

24มป่า อิสะลาเอน เมี่ยน หล่ง หฑุ ด๊าว ไต๋ นิ่น, แอ๋ง ธ้าง นิ่น เญย เต่ย-ปูง เยียม อานโนน ด้าย เถา ยับบอก ด้าย, มป่า ขูง ธ้าง เถา อัมโมน เมี่ยน เญย กั๊บ-จ๋าย เฮลน, เหว่ย หฒุ อัมโมน เมี่ยน เญย กั๊บ-จ๋าย เซ ว้วน ไห่.

25อิสะลาเอน เมี่ยน ธ้าง เหฑ่ง อาโมไล เมี่ยน เญย นอมๆ ฒี่ง, เลี่ยม เฮ้ดโบน ฒี่ง เหธา เว่ย ก๋อม เญย ฟิ้ว-ล์าง, ฯฒฯ เปียะ มี่ง เยียม เจี๊ยน.

26เฮ้ดโบน โหฒว อาโมไล เมี่ยน เญย สิโหน ฮู่ง เญย ต้ม ฒี่ง. สิโหน ฮู่ง เหธา ฒิ่น ด่าง วั้ว เต้า โมอับ เมี่ยน เญย ฮู่ง เบ๊าะ จ๋า ธ้าง เหฑ่ง เยียม โมอับ ฮู่ง เญย ปั์ว-เดี๊ย เญย เหยียด ฒู้ง เต่ย-ปูง เถา อานโนน ด้าย.

27เหว่ย น้าย โหฒ่ ฑูง เญย เมี่ยน ก๊อง, “ต้าย เถา เฮ้ดโบน ฒี่ง, ปุน น้าย นอม ฒี่ง แอ๋ง ตุ๊ เหลียบ เจี์ย, ปุน สิโหน ฮู่ง เญย ต้ม ฒี่ง แอ๋ง เหธย เจี์ย ต้าย.

28ม่าย โต์ว เยียม เฮ้ดโบน ฒี่ง ธ้วด, โต์ว-เบียด เยียม สิโหน เญย ฒี่ง หฌบ ต้าย ปั๊ว ชุย โมอับ เต่ย-ปูง เญย อาน ฒี่ง, เหธา ฮวีง อานโนน ด้าย เก้ ฒอง เญย แปะ ฝีง.

29โอ โมอับ เมี่ยน อ่า, เม่ย หฒุ โค้ว อ๊ะ. โอ หฒั่ง เคโม้ด เญย เมี่ยน อ่า, เม่ย บัว หฒุ เหมียด อ๊า โล่ะ! เคโม้ด เฒี่ยน ปุน นิ่น เญย ตอน หฒุ เป๋น เปย๋า สี่ เญย เมี่ยน, หย่า ปุน นิ่น เญย เซียะ หฒุ ธ้าง มี่ง จิว ปุน อาโมไล เมี่ยน เญย สิโหน ฮู่ง ธ้าง.

30มป่า เยีย บัว ปุน นิ่น บัว เญย เฒ้ย-ฟุน หฒุ เหมียด, เยียม เฮ้ดโบน ฒี่ง หฒุ เหมียด เถา ดีโบน. เยีย บัว ป่าย เหฑ่ง นิ่น บัว เถา โนฟา, เซ เถา เมเดบา วั้ว นอม ต๋อง.”

31อิสะลาเอน เมี่ยน ฯฒฯ เยียม เหฌี่ย อาโมไล เมี่ยน เญย เต่ย-ปูง.

32โมเซ พ้าย เมี่ยน มี่ง ฒ่า ลิ์ว ยาเซ ฒี่ง, ฆะฮ้า อิสะลาเอน เมี่ยน มี่ง เบ๊าะ, แอ๋ง เฒาะ ยาเซ ฒี่ง เหธา ฮวีง หฑวน เญย ฟิ้ว-ล์าง หย่า หฒุ่น อาโมไล เมี่ยน ธ้วด เหฑ่ง.

33เจี๋ย ต้าย, อิสะลาเอน เมี่ยน ฮวิน มี่ง หูง เจี๊ยน บาซาน เต่ย-ปูง มี่ง. บาซาน เญย โอก ฮู่ง เหธา นิ่น เญย หฒวัง แปง ฯฒฯ ธ้วด ต้าย เถา เอเดนอี ฒี่ง เหธา นิ่น บัว เบ๊าะ จ๋า.

34เฒี้ยว ก๊อง บั๋ว โมเซ, “ไม้ ตู๋ง กั้ม เหฑีย นิ่น, เหว่ย หฒุ เยีย เฒาะ นิ่น เหธา นิ่น เญย หฒวัง แปง, เหธา นิ่น เญย เต่ย-ปูง, จิว เยียม เม่ย เญย ปั์ว-เดี๊ย. อ๋อย หฒุ โหฒว ปุน นิ่น ฮนั้ง เม่ย บัว โหฒว ปุน เยียม เฮ้ดโบน ฒี่ง, วั้ว เต้า อาโมไล เมี่ยน เญย สิโหน ฮู่ง วั้ว นอ.”

35ฮนั้ง หน่าย, อิสะลาเอน เมี่ยน ไต๋ โอก ฮู่ง, เหธา นิ่น เญย ตอน บัว เหธา นิ่น เญย หฒวัง แปง. เหยียด เต้า หย่า ไม้ เลี่ยว. นิ่น บัว ฯฒฯ เฒาะ นิ่น เญย เต่ย-ปูง เป๋น นิ่น บัว เญย ป่วน.

← Chapter 20 Jump to: Chapter 22 →