Numbers 19

Mien Bible (Thai Script) © Thailand Bible Society, 2007

← Chapter 18 Jump to: Chapter 20 →

1เฒี้ยว ก๊อง บั๋ว โมเซ เหธา อาโลน,

2“หฒิว เฒี้ยว เหฌี่ย เญย หลี่ง อ๋อย หฒุ ฮนั้ง น้าย นอ โหฒว. อ๋อย หฒุ บั๋ว อิสะลาเอน เมี่ยน ต้อ เต้า ง่ง เญ์ย-ซิ ต้าย ปุน เม่ย, เซ ไม้ หว่าย ฝัง, ไม้ ม่าย ต๋อง เฆ่ม, หย่า ไม้ ก์า เจี๋ย เดี๋ยง-ก์า เญย ง่ง.

3อ๋อย หฒุ จิว ปุน เอเลอาซา ไซ เมี่ยน. หย่า อ๋อย หฒุ ต้อ ธ้วด หฒิ ด๊บ-ลิ่ว เธี้ยง ปุน เมี่ยน ตอง เจี๊ยน เอเลอาซา ไซ เมี่ยน เญย หฑะเฮมียน ไต๋.

4เอเลอาซา ฯฒฯ หล่ง ปั์ว-โด๊ะ โธะ ง่ง เญ์ย ฑย้าม แอ๋ง หูง มี่ง หวุ่ย ปวั้ง เญย ด๊บ-ลิ่ว หฑะเฮมียน แหมง ทิว เสี่ย หฑุ่น.

5อ๋อย หฒุ ม่าย เต้า เมี่ยน เยียม ไซ เมี่ยน เญย หฑะเฮมียน ปั๊ว น้าย เต้า ง่ง. เลี่ยม ด๊บ, อ๊อ, ฑย้าม เหธา จ้าง อ๋อย หฒุ ปั๊ว เหฑ่ง.

6ไซ เมี่ยน อ๋อย หฒุ แอ๋ง เฒาะ เต๋ย สีดา ฒ่ง เดี๋ยง เหธา หุโสบ เมี้ย, แอ๋ง เหธา ติ้ว ปะกี สุย-ซิ, ฒอย เปียะ ปั๊ว ง่ง เญย โต์ว กะญั์ว.

7ฆะฮ้า ไซ เมี่ยน อ๋อย หฒุ โหฑ ลุย-โหว, หล่ง ววม หฑาว ลิ์ว กั้น เญย ซิน หธีง ต้าย เปียะ ด๊บ-ลิ่ว เธี้ยง. มป่า นิ่น หธ่อ ม่าย หวุย เถา ลู่ง หฮมวัง.

8ปั๊ว ง่ง เญ์ย เญย เมี่ยน หย่า อ๋อย หฒุ โหฑ ลุย-โหว, หล่ง ววม หฑาว กั้น เญย ซิน หย่า ฟี่ ฮนั้ง เญย ม่าย หวุย เถา หฮมวัง.

9“อ๋อย หฒุ ม่าย เต้า ไม้ ม่าย หวุย เญย เมี่ยน เซียว น้าย เต้า ง่ง เญย ซ้าย, อัน เจี๊ยน กะเหญี่ย ด๊บ-ลิ่ว เธี้ยง, ธีง-เหฑ่ง, ไม้ ม่าย หวุย เญย ต๋อง. อ๋อย หฒุ เหว่ย อิสะลาเอน เญย หฒวัง เมี่ยน เลี่ยว เจี๊ยน โหฒว สา หวุย เญย ววม หฑาว ฒุ์ย.

10เซียว ง่ง เญ์ย เญย ซ้าย วั้ว ล่าน เมี่ยน หย่า อ๋อย หฒุ โหฑ นิ่น เญย ลุย-โหว. นิ่น ฟี่ ฮนั้ง เญย ม่าย หวุย เถา ลู่ง หฮมวัง. น้าย เซ เหว่ย อิสะลาเอน เมี่ยน เหธา เยียม นิ่น บัว บุด๋ง เญย กั้น ฝีง เมี่ยน เหยียด ลิ์ว อ๋อย หฒุ กัน เญย เล์ย.

11“หาย เต้า มัวะ หฒุ จั๋น-ไต่ เญย เซย ฯฒฯ ม่าย หวุย ปวั๊ง เสี่ย ฮนอย.

12วั้ว เต้า เมี่ยน เถา ตะฟาม ฮนอย เหธา ตะเธี้ยด ฮนอย, อ๋อย หฒุ หล่ง น้าย เต๋ย สา หวุย เญย ววม สา หวุย. นิ่น ฯฒฯ ธีง-เหฑ่ง หมี่ อ๊ะ. เถา ตะฟาม ฮนอย เหธา ตะเธี้ยด ฮนอย, นิ่น ไม้ สา หวุย นอ, นิ่น ไม้ ธีง-เหฑ่ง.

13หาย เต้า มัวะ หฒุ จั๋น-ไต่ เญย เซย หย่า ไม้ สา กั้น เญย หวุย นอ, วั้ว เต้า โหฒว ปุน หฒั่ง เฒี้ยว เญย ด๊บ-ลิ่ว ม่าย หวุย. น้าย เต้า เยียม อิสะลาเอน เมี่ยน บุด๋ง อ๋อย หฒุ ไพ กวั่ง. หลาย ไม้ ตุ๊ สา หวุย เญย ววม ฟุ นิ่น, นิ่น ม่าย หวุย อ๊ะ. นิ่น หธ่อ ม่าย หวุย หฒัน เยียม นิ่น เญย ซิน.

14“น้าย เซ เมี่ยน เยียม ด๊บ-ลิ่ว กะญั์ว ไต่ เญย เล์ย. เมี่ยน ไต่ เยียม ด๊บ-ลิ่ว กะญั์ว, หาย เต้า เปียะ ด๊บ-ลิ่ว เหธา เยียม ด๊บ-ลิ่ว เญย เมี่ยน ฯฒฯ ม่าย หวุย เสี่ย ฮนอย.

15ด๊บ-ลิ่ว เญย หาย หญู่ง จา-ต๋อง ไม้ ม่าย หฆาย ก๊ม ดิบ หย่า ม่าย หวุย.

16“หาย เต้า เยียม วั้ว น่า หาย เดา หย่า มัวะ หฒุ จั๋น-ไต่ เญย เซย, ต้ง หฒุ หฑุ ด๊าว ไต๋ เญย, ไฟ เมี่ยน กั้น ไต่, ไฟ จั๋น-ไต่ เญย บู๊ง, ไฟ จั๋น-ไต่ โฒ้ว, วั้ว เต้า ฯฒฯ ม่าย หวุย เสี่ย ฮนอย.

17“เหว่ย ม่าย หวุย เญย เมี่ยน, อ๋อย หฒุ เฒาะ เต๋ย ปั๊ว เหว่ย หฑาว ฒุ์ย วั้ว เต้า ง่ง เญ์ย เญย ซ้าย, ตั๊บ เจี๊ยน แป้ง, แอ๋ง ฒ่าง ววม-ต้าย ตั๊บ เจี๊ยน.

18อ๋อย หฒุ ม่าย เต้า ไม้ ม่าย หวุย เญย เมี่ยน หล่ง หุโสบ เมี้ย เหฒียม วั้ว นอม แป้ง เญย ววม ฟุ ด๊บ-ลิ่ว เหธา ด๊บ-ลิ่ว กะญั์ว เญย จา-ต๋อง เหธา เยียม วั้ว เญย เมี่ยน. นิ่น หย่า อ๋อย หฒุ ฟุ มัวะ หฒุ จั๋น-ไต่ เญย บู๊ง, ไฟ จั๋น-ไต่ โฒ้ว, ไฟ หฒุ หฑุ ด๊าว ไต๋ เญย, ไฟ เมี่ยน กั้น ไต่ เญย วั้ว เต๋ย เมี่ยน.

19เถา ตะฟาม ฮนอย เหธา ตะเธี้ยด ฮนอย, ไม้ ม่าย หวุย เญย เมี่ยน อ๋อย หฒุ หล่ง น้าย เต๋ย ววม ฟุ ม่าย หวุย เญย เมี่ยน. ตะเธี้ยด ฮนอย อ๋อย หฒุ เถง นิ่น สา หวุย. วั้ว ล่าน เมี่ยน หย่า อ๋อย หฒุ โหฑ ลุย-โหว, หล่ง ววม หฑาว ซิน. เถา หฮมวัง นิ่น ฯฒฯ ธีง-เหฑ่ง, ไม้ ม่าย หวุย อ๊ะ.

20“หาย เต้า ไม้ สา กั้น เญย หวุย, วั้ว เต้า เยียม หฒวัง เมี่ยน บุด๋ง อ๋อย หฒุ ไพ กวั่ง, เหว่ย หฒุ นิ่น ปุน เฒี้ยว เญย สีง ติ่น ม่าย หวุย. นิ่น ไม้ ตุ๊ สา หวุย เญย ววม ฟุ นิ่น, นิ่น ฯฒฯ ม่าย หวุย อ๊ะ.

21น้าย เซ นิ่น บัว อ๋อย หฒุ เหยียด ลิ์ว กัน เญย เล์ย. “เถง เมี่ยน ฟุ สา หวุย เญย ววม วั้ว ล่าน เมี่ยน หย่า อ๋อย หฒุ โหฑ กั้น เญย ลุย-โหว. หาย เต้า มัวะ หฒุ สา หวุย เญย ววม, วั้ว เต้า ฯฒฯ ม่าย หวุย เถา หฮมวัง.

22ม่าย หวุย เญย เมี่ยน มัวะ หฒุ หาย หญู่ง, วั้ว หญู่ง หย่า ม่าย หวุย อ๊ะ. หาย เต้า มัวะ หฒุ วั้ว หญู่ง ฯฒฯ ม่าย หวุย เถา ลู่ง หฮมวัง.”

← Chapter 18 Jump to: Chapter 20 →