Numbers 20

Mien Bible (Thai Script) © Thailand Bible Society, 2007

← Chapter 19 Jump to: Chapter 21 →

1เยียม ฒี่ หฮลา, อิสะลาเอน เญย หฒวัง เมี่ยน มี่ง เถา ซิน เต่ย-ปูง-ฮวาง, ตี้ง เจี๊ยน เยียม คาเดด. มิเลียม เยียม หน่าย เกวย เสย หย่า หฒัง เจี๊ยน วั้ว.

2เยียม วั้ว นอม ต๋อง ไม้ ม่าย ววม ปุน หฒวัง แปะ ฝีง ฮบ. นิ่น บัว ฯฒฯ กั๊บ ฒุ้น ต้าย ไกว๋ โมเซ เหธา อาโลน.

3นิ่น บัว เหธา โมเซ แฑง จ๋า ก๊อง, “เยีย บัว เญย ก๋อ-โย์ว เยียม เฒี้ยว เญย หฑะเฮมียน ไต่ วั้ว หฒั่น, เฝย ตุ๊ เยีย บัว ตุ๊ เหธา เจี๊ยน ไต่ เก้า หลง.

4เม่ย เหว่ย หาย ติ่ว ต้อ เฒี้ยว เญย หฒวัง เมี่ยน ต้าย น้าย เต่ย-ปูง-ฮวาง เหว่ย ปุน เยีย บัว เหธา เยีย บัว เญย แซง-คู้ ไต่ เหฑ่ง?

5เม่ย เหว่ย หาย ติ่ว ต้อ เยีย บัว ธ้วด อียิบ เต่ย-ปูง เถา น้าย นอม หว่าย ไห่ เญย เต่ย-ปูง? เยียม น้าย ไม้ ม่าย เบย้า, ไม้ ม่าย ง่ง หญอ เปี๊ยว, ไม้ ม่าย อะหงุ่น เฮมย, ไม้ ม่าย หฒิ เลี่ยว เปี๊ยว. เลี่ยม ววม หย่า ไม้ ม่าย ฮบ!”

6โมเซ เหธา อาโลน เล่ย ฆอย หฒวัง เมี่ยน มี่ง เถา หวุ่ย ปวั้ง ด๊บ-ลิ่ว เญย แก้ง ด่าง, บ๊าบ เหฌี่ย เดา. เฒี้ยว เญย ฌัง-หล่าง หิ่น ธ้วด ต้าย ปุน นิ่น บัว ปวัด.

7เฒี้ยว ก๊อง บั๋ว โมเซ,

8“เฒาะ ปย๊า-บย่า ต้าย. เม่ย เหธา เม่ย เญย ก๋อ, อาโลน, อ๋อย หฒุ เห่ว หฒวัง เมี่ยน กั๊บ ฒุ้น, ตอง เจี๊ยน นิ่น บัว บั๋ว วั้ว นอม หละเปย๊ย ธ้วด ววม ต้าย. ววม ฯฒฯ เยียม หละเปย๊ย เหลี่ยว ธ้วด ต้าย. ฮนั้ง น้าย เม่ย ฯฒฯ ปุน ววม เยียม หละเปย๊ย ธ้วด ต้าย ปุน หฒวัง เมี่ยน เหธา นิ่น บัว เญย แซง-คู้ ตุ๊ ฮบ.”

9โมเซ ฯฒฯ มี่ง เฒาะ เยียม เฒี้ยว เญย หฑะเฮมียน วั้ว ติ้ว ปย๊า-บย่า ต้าย ฮนั้ง เฒี้ยว บั๋ว นิ่น โหฒว นอ.

10โมเซ เหธา อาโลน เห่ว หฒวัง แปะ ฝีง ต้าย ฒุ้น เยียม วั้ว นอม หละเปย๊ย เญย หฑะเฮมียน. โมเซ ฯฒฯ ก๊อง บั๋ว นิ่น บัว, “เม่ย บัว เฮญี้ยว แหง่ง เญย เมี่ยน หมวัง ม่าะ! เยีย บัว อ๋อย หฒุ ปุน น้าย นอม หละเปย๊ย ธ้วด ววม เหว่ย เม่ย บัว ไฟ?”

11โมเซ ฯฒฯ ซูง ปั์ว, หล่ง นิ่น เญย ปย๊า-บย่า เบ๊าะ อี ปย๊า หละเปย๊ย. ววม แป๊ด ธ้วด ธั้ม ไห่. หฒวัง เมี่ยน เหธา นิ่น บัว เญย แซง-คู้ ฯฒฯ ตุ๊ ฮบ ววม อ๊ะ.

12มป่า เฒี้ยว ก๊อง บั๋ว โมเซ เหธา อาโลน, “เหว่ย หฒุ เม่ย บัว เสียน เยีย ไม้ เถา ต้าว หธีง ไม้ ตอง เจี๊ยน อิสะลาเอน เมี่ยน ท่าย เยีย เว่ย ธีง-เหฑ่ง, เม่ย บัว ฯฒฯ ไม้ ตุ๊ ต้อ น้าย เต๋ย หฒวัง เมี่ยน เปียะ เยีย แล์ง เหธย ปุน เญย เต่ย-ปูง.”

13น้าย เต๋ย ววม นิ่น บัว เห่ว เมลีบา เหว่ย หฒุ เยียม หน่าย อิสะลาเอน เมี่ยน เหธา เฒี้ยว แฑง จ๋า. เยียม วั้ว นอม ต๋อง, เฒี้ยว หย่า เยียม นิ่น บัว บุด๋ง ปิ๋ว เม่ง นิ่น ธีง-เหฑ่ง.

14โมเซ พ้าย เต๋ย เมี่ยน เยียม คาเดด ฒี่ง มี่ง ล์อ เอโดม เต่ย-ปูง เญย ฮู่ง เตี๋ย ก๊อง, “เม่ย เญย โย์ว, อิสะลาเอน เมี่ยน, ฮนั้ง น้าย ก๊อง. เม่ย ฮิ้ว ตุ๊ เยีย บัว ปวั้ง เจี๋ย เญย โค้ว หน่าน.

15เยีย บัว เญย อง-ถาย มี่ง อียิบ เต่ย-ปูง หย่า เยียม วั้ว เล่า เญย. อียิบ เมี่ยน โหฒว โตะ เยีย บัว เหธา เยีย บัว เญย อง-ถาย.

16มป่า เยีย บัว ชะ เห่ว เฒี้ยว, โท้ นิ่น เถง. นิ่น หย่า ไฮ์ หมี่ อ๊ะ, ฯฒฯ พ้าย เต้า ฟิน-เมี่ยน ต้อ เยีย บัว ธ้วด อียิบ ต้าย. “อี้ หฒั่น เยีย บัว เยียม น้าย เม่ย เญย กั๊บ-จ๋าย กะเฮลน, คาเดด ฒี่ง.

17โท้ ปุน เยีย บัว เจี๋ย เม่ย เญย เต่ย-ปูง. เยีย บัว ไม้ ยั่ง เด่ย, ไม้ ยั่ง อะหงุ่น หฮวีง เจี๋ย, หย่า ไม้ ฮบ หาย นอม ววม-ค้วด เญย ววม. เยีย บัว ขูง ยั่ง ฮู่ง เตี๋ย เญย ต้ม เจ๊า มี่ง ฮนั้ง, ไม้ มี่ง หฒาย หย่า ไม้ มี่ง บย่าว เถา เจี๋ย จ่ม เม่ย เญย กั๊บ-จ๋าย.”

18มป่า เอโดม ฮู่ง เตา, “เยีย บัว ไม้ ปุน เม่ย บัว ยั่ง เยีย บัว เญย เต่ย-ปูง เจี๋ย. สี ก๊อง เม่ย บัว แหง่ง เจี๊ยน เจี๋ย นอ, เยีย บัว ฯฒฯ ธ้วด มี่ง หล่ง หฑุ ด๊าว เหธา เม่ย บัว เบ๊าะ จ๋า.”

19อิสะลาเอน เมี่ยน เตา, “เยีย บัว ขูง กัน ต้ม เจ๊า มี่ง. สี ก๊อง เยีย บัว ไฟ เยีย บัว เญย แซง-คู้ ฮบ เม่ย บัว เญย ววม, เยีย บัว ฯฒฯ ธ้วด ญ่าน ม์าย ปุน. เยีย บัว ขูง โท้ ยั่ง เจ๊า เจี๋ย ฮนั้ง. กั้น หญู่ง ไม้ โท้ อ๊ะ.”

20ฮู่ง เตี๋ย แอ๋ง เตา, “เยีย บัว ฮนั้ง หาย หย่า ไม้ ปุน เม่ย บัว เจี๋ย.” เอโดม เมี่ยน เญย จุน-แปง ธั้ม! เญย ฯฒฯ ธ้วด ต้าย อ๋อย เบ๊าะ นิ่น บัว.

21หลาย เอโดม เมี่ยน ไม้ ปุน นิ่น บัว ยั่ง เต่ย-ปูง เจี๋ย, อิสะลาเอน เมี่ยน ฯฒฯ ต๋าว ซิน ยั่ง กั้น ติ้ว เจ๊า มี่ง อ๊ะ.

22หฒวัง อิสะลาเอน เมี่ยน เยียม คาเดด ฒี่ง ธ้วด เจ๊า มี่ง เถา โฮอา บง.

23เยียม นิด เอโดม เต่ย-ปูง, โฮอา บง วั้ว, เฒี้ยว บั๋ว โมเซ เหธา อาโลน,

24“อาโลน อ๋อย หฒุ เกวย เสย. นิ่น ไม้ ตุ๊ เปียะ เยีย จิว ปุน อิสะลาเอน เมี่ยน วั้ว นอม เต่ย-ปูง, เหว่ย หฒุ เยียม เมลีบา ววม เม่ย บัว อี เต้า แหง่ง เจี๊ยน เยีย บั๋ว เญย หว่า.

25อ๋อย หฒุ ต้อ อาโลน เหธา นิ่น เญย ตอน, เอเลอาซา, ฝาว โฮอา บง.

26แอ๋ง ไจ๊ อาโลน เญย โหฒว ไซ ลุย ต้าย เถง นิ่น เญย ตอน, เอเลอาซา, ฒุ เจี๊ยน. อาโลน ฯฒฯ เยียม วั้ว ไต่, เกวย เสย หมี่ อ๊ะ.”

27โมเซ เอย เจี๊ยน เฒี้ยว เญย หว่า โหฒว. นิ่น บัว ปัว เต้า ตอง เจี๊ยน หฒวัง เมี่ยน ฝาว โฮอา บง.

28โมเซ ไจ๊ อาโลน เญย โหฒว ไซ ลุย ปุน อาโลน เญย ตอน, เอเลอาซา, ฒุ เจี๊ยน. อาโลน ฯฒฯ เยียม วั้ว บง-นี้ง เกวย เสย หมี่ อ๊ะ. โมเซ เหธา เอเลอาซา ฯฒฯ เยียม บง เหฌี่ย ต้าย.

29หฒวัง เมี่ยน ฮิ้ว ตุ๊ อาโลน ไต่ หมี่ อ๊ะ, อิสะลาเอน เมี่ยน เญย หฒวัง แปะ ฝีง ฯฒฯ เหว่ย นิ่น เฑ่า เญี้ยม ฟ่า เหฒียบ ฮนอย.

← Chapter 19 Jump to: Chapter 21 →