Numbers 28

Mien Bible (Thai Script) © Thailand Bible Society, 2007

← Chapter 27 Jump to: Chapter 29 →

1เฒี้ยว ก๊อง บั๋ว โมเซ,

2“อ๋อย หฒุ ฮนั้ง น้าย นอ พ้าย อิสะลาเอน เมี่ยน. บั๋ว นิ่น บัว, ‘อ๋อย หฒุ หฒิว ตี่ง เญย เฒี่ยง โห่ ต้อ หญั่น ฮบ ต้าย เหฒี่ย, หล่ง โต์ว ปั๊ว เหฒี่ย ฝ่ง ห่อ, เว่ย ดาง เญย เฉีย หอบ เฒี้ยว เญย เฮญี้ยว.’

3หย่า บั๋ว นิ่น บัว, ‘น้าย เซ เม่ย บัว อ๋อย หฒุ หล่ง โต์ว ปั๊ว เหฒี่ย ฝ่ง ห่อ ปุน เฒี้ยว เญย กะน้าย. อ๋อย หฒุ ฮนอยๆ หล่ง อี เต้า ไม้ หว่าย ฝัง, ต๋อย หฮญัง เญย ปะกี ยู่ง โก๊ว ตอน.

4ลู่ง ดอม เหฒี่ย เต้า, เหฑียม-ย่าง เหฒี่ย เต้า.

5โม์ว เต้า อ๋อย หฒุ หล่ง อี เมาะ บ๊วน-หม่วน หฒอบ เจี๊ยน เหยียด ก่อง กะลั้น เปี๊ยว หฌาบ ต้าย เญย โย่ว เหธา เจี๊ยน ปั๊ว เหฒี่ย.

6เยียม ซีนาย บง วั้ว หฒั่น ฮนั้ง น้าย เหลียบ ต้าย, หฒั่นๆ หล่ง โต์ว ปั๊ว เหฒี่ย ฝ่ง ห่อ, เว่ย ดาง เญย เฉีย หอบ เฒี้ยว เญย เฮญี้ยว.

7เหฒี่ย เญย โม์ว เต้า ยู่ง ตอน อ๋อย หฒุ เหยียด เต้า ม่าย ก่อง อะหงุ่น ติ๊ว เหธา เจี๊ยน เหฒี่ย, เยียม สีง ติ่น เธี้ย เหฒี่ย ปุน เฒี้ยว.

8เหฑียม-ย่าง เญย เฒี่ยง โห่ หลิ่ว เล์ย ตะเหญ่ย เต้า ยู่ง ตอน เหธา เจี๊ยน ฮนั้ง ลู่ง ดอม ฝ่ง ห่อ เญย ล่าง หฒิ เหธา เธี้ย เหฒี่ย เญย กะน้าย. น้าย เซ หล่ง โต์ว ปั๊ว เหฒี่ย ฝ่ง ห่อ เญย กะน้าย, เว่ย ดาง เญย เฉีย หอบ เฒี้ยว เญย เฮญี้ยว.

9“‘ตี้ง กง ฮนอย อ๋อย หฒุ หล่ง อี เต้า ไม้ หว่าย ฝัง, ต๋อย หฮญัง เญย ปะกี ยู่ง ตอน เหธา เปยย เมาะ เปี๋ยน บ๊วน-หม่วน หฒอบ เจี๊ยน กะลั้น โย่ว เหธา เธี้ย เหฒี่ย เญย กะน้าย เหยียด เหฌี่ย เหฒี่ย.

10น้าย เซ นอมๆ ตี้ง กง ฮนอย ปั๊ว เหฒี่ย เญย กะน้าย. หธ่อ แอ๋ง ม่าย ฮนอยๆ ปั๊ว เหฒี่ย เหธา เจี๊ยน เหยียด เหฌี่ย เธี้ย เหฒี่ย เญย กะน้าย.

11“‘โม์ว หฮลา, แซง-เยี้ยด ฮนอย, อ๋อย หฒุ หล่ง อี เต้า ง่ง โก๊ว ธาน, เหยียด เต้า ปะกี ยู่ง โก๊ว, เหธา เสี่ย เต้า ต๋อย หฮญัง เญย ปะกี ยู่ง โก๊ว. เหยียด ฒู้ง ไม้ หว่าย ฝัง เญย.

12เหยียด เต้า ง่ง โก๊ว ธาน อ๋อย หฒุ ม่าย จุ๊ เมาะ เปี๋ยน บ๊วน-หม่วน หฒอบ เจี๊ยน กะลั้น โย่ว โหฒว เหฒี่ย เญย ล่าง หฒิ. เหว่ย วั้ว เต้า ปะกี ยู่ง โก๊ว หย่า อ๋อย หฒุ ม่าย อี เมาะ บ๊วน-หม่วน หฒอบ เจี๊ยน กะลั้น โย่ว โหฒว เหฒี่ย เญย ล่าง หฒิ.

13โม์ว เต้า ปะกี ยู่ง ตอน หย่า อ๋อย หฒุ หล่ง เหยียด เมาะ บ๊วน-หม่วน หฒอบ เจี๊ยน กะลั้น โย่ว โหฒว เหฒี่ย เญย ล่าง หฒิ. น้าย เซ หล่ง โต์ว ปั๊ว เหฒี่ย ฝ่ง ห่อ เญย กะน้าย, เว่ย ดาง เญย เฉีย หอบ เฒี้ยว เญย เฮญี้ยว.

14เต้าๆ ง่ง โก๊ว ธาน อ๋อย หฒุ ม่าย อี ก่อง อะหงุ่น ติ๊ว เหธา เจี๊ยน เธี้ย เหฒี่ย. เหยียด เต้า ปะกี ยู่ง โก๊ว อ๋อย หฒุ ม่าย เหยียด ก่อง เล่ง. โม์ว เต้า ปะกี ยู่ง ตอน อ๋อย หฒุ ม่าย เหยียด ก่อง. น้าย เซ หฮญังๆ หฮลาๆ แซง-เยี้ยด ฮนอย อ๋อย หฒุ ปั๊ว เหฒี่ย เญย กะน้าย.

15หย่า อ๋อย หฒุ เอย ฮนอยๆ เหฒี่ย เญย เหฒี่ย. เหล่ง เจ๊ย แอ๋ง หล่ง เต้า ยู่ง โก๊ว เหฒี่ย ปุน เฒี้ยว เหว่ย ฟิ ฒุ์ย.

16“‘ฒี่ หฮลา เหฒียบ เฝย วั้ว ฮนอย อ๋อย หฒุ เจี๋ย เสีย แหม่ง ฒิบ.

17เหฒียบ ฮม์ วั้ว ฮนอย, อ๋อย หฒุ เจี์ย กอน เจี๋ย เสี่ย ฮนอย เญย ฒิบ. น้าย เต๋ย เสี่ย ฮนอย กะญั์ว อ๋อย หฒุ หญั่น ไม้ อัน ปี๊ง เญย ฌั้ว.

18ต้าว ฮนอย อ๋อย หฒุ กั๊บ ฒุ้น โหฒว เล์ย-ป๋าย หย่า ไม้ ตู๋ง โหฒว หาย หญู่ง ฮนอยๆ โหฒว เญย กง.

19“‘หย่า อ๋อย หฒุ หล่ง อี เต้า ง่ง โก๊ว ธาน, เหยียด เต้า ปะกี ยู่ง โก๊ว เหธา เสี่ย เต้า ต๋อย หฮญัง เญย ปะกี ยู่ง ตอน, เหยียด ฒู้ง เซ ไม้ หว่าย ฝัง เญย, หล่ง โต์ว ปั๊ว เหฒี่ย ฝ่ง ห่อ ปุน เฒี้ยว.

20เหยียด เต้า ง่ง โก๊ว อ๋อย หฒุ ม่าย จุ๊ เมาะ เปี๋ยน บ๊วน-หม่วน หฒอบ เจี๊ยน กะลั้น โย่ว โหฒว เหฒี่ย เญย ล่าง หฒิ. เหว่ย วั้ว เต้า ปะกี ยู่ง โก๊ว หย่า อ๋อย หฒุ ม่าย อี เมาะ บ๊วน-หม่วน หฒอบ เจี๊ยน กะลั้น โย่ว โหฒว เหฒี่ย เญย ล่าง หฒิ.

21โม์ว เต้า ปะกี ยู่ง ตอน หย่า อ๋อย หฒุ ม่าย เหยียด เมาะ บ๊วน-หม่วน โหฒว เหฒี่ย เญย ล่าง หฒิ.

22หย่า อ๋อย หฒุ หล่ง เต้า ยู่ง โก๊ว เหฒี่ย เหว่ย ฟิ เม่ย บัว เญย ฒุ์ย.

23อ๋อย หฒุ หลิ่ว เล์ย น้าย เต๋ย ทิบ เจี๊ยน ดอมๆ ปั๊ว เหฒี่ย เญย กะน้าย.

24เสี่ย ฮนอย กะญั์ว อ๋อย หฒุ ฮนอยๆ หลิ่ว เล์ย น้าย เต๋ย หญั่น ฮบ หล่ง โต์ว ปั๊ว เหฒี่ย ฝ่ง ห่อ, เว่ย ดาง เญย เฉีย หอบ เฒี้ยว เญย เฮญี้ยว. หธ่อ อ๋อย หฒุ แอ๋ง ม่าย ฮนอยๆ ปั๊ว เหฒี่ย เญย เหธา เธี้ย เหฒี่ย เญย เหยียด เหฌี่ย เหฒี่ย.

25เถา ตะเธี้ยด ฮนอย, แอ๋ง กั๊บ ฒุ้น โหฒว เล์ย-ป๋าย หย่า ไม้ ตู๋ง โหฒว หาย หญู่ง ฮนอยๆ โหฒว เญย กง.

26“‘ฝ่ง ห่อ ต้าว ถอง ล่าง หฒิ วั้ว ฮนอย ต๋อย เจี๋ย เซียว เซียง-เบย้า เญย ฒิบ ต้าว ฮนอย, เม่ย บัว ต้อ เซียง-เบย้า ต้าย ฝ่ง ห่อ เฒี้ยว วั้ว หฒั่น, อ๋อย หฒุ กั๊บ ฒุ้น โหฒว เล์ย-ป๋าย. หย่า ไม้ ตู๋ง โหฒว หาย หญู่ง ฮนอยๆ โหฒว เญย กง.

27อ๋อย หฒุ ต้อ อี เต้า ง่ง โก๊ว ธาน, เหยียด เต้า ปะกี ยู่ง โก๊ว, เหธา เสี่ย เต้า ต๋อย หฮญัง เญย ปะกี ยู่ง โก๊ว ตอน เหฒี่ย, เว่ย ดาง เญย เฉีย หอบ เฒี้ยว เญย เฮญี้ยว.

28เหยียด เต้า ง่ง โก๊ว ธาน อ๋อย หฒุ ม่าย จุ๊ เมาะ เปี๋ยน บ๊วน-หม่วน หฒอบ เจี๊ยน กะลั้น โย่ว โหฒว เหฒี่ย เญย ล่าง หฒิ. เหว่ย เหยียด เต้า ปะกี ยู่ง โก๊ว อ๋อย หฒุ ม่าย อี เมาะ.

29โม์ว เต้า ปะกี ยู่ง โก๊ว ตอน, เหยียด เต้า เหยียด เมาะ.

30หย่า อ๋อย หฒุ หล่ง เหยียด เต้า ยู่ง โก๊ว เหฒี่ย เหว่ย ฟิ ฒุ์ย.

31ธ้วด ลิ์ว น้าย เต๋ย ปั๊ว เญย เหธา เจี๊ยน เหยียด เหฌี่ย เธี้ย เหฒี่ย เญย, หธ่อ แอ๋ง ม่าย ฮนอยๆ ปั๊ว เหฒี่ย เหธา เจี๊ยน เหยียด เหฌี่ย เหฒี่ย เญย ล่าง หฒิ. น้าย เต๋ย เหฒี่ย เญย แซง-คู้ เหยียด ฒู้ง อ๋อย หฒุ ไม้ หว่าย ฝัง เญย.

← Chapter 27 Jump to: Chapter 29 →