Numbers 16

Mien Bible (Thai Script) © Thailand Bible Society, 2007

1โคลา, ดาทาน, อาบีลัม เหธา อน เจี์ย กอน ต๋อย-เตก แหง่ง เจี๊ยน โมเซ. โคลา เซ อิดฮา เญย ตอน, อิดฮา เซ โคฮ้าด เญย ตอน, โคฮ้าด เซ เลวี เญย ตอน. ดาทาน เหธา อาบีลัม โหฒว เอลีอับ เญย ตอน, อน โหฒว เปเหลด เญย ตอน. น้าย เต๋ย ปัว เต้า เซ ลูเบน ฝีง.

2แอ๋ง ม่าย หญี่ แป๊ะ ฮม์ เหฒียบ เต้า, ต้ง หฒวัง แปะ ฝีง กิ๊น ต้าย, ม่าย เม่ง เต้า เญย เปย๊ย เฒ้ย.

3นิ่น บัว กั๊บ ฒุ้น ต้าย เยียม โมเซ เหธา อาโลน เญย หฑะเฮมียน แฑง ก๊อง, “เม่ย บัว โหฒว เจี๋ย จ๋า หมี่ อ๊ะ. หฒวัง แปะ ฝีง เต้าๆ ฒู้ง ธีง-เหฑ่ง เญย. เฒี้ยว หย่า เหธา นิ่น บัว เยียม. ฮนั้ง หน่าย, เม่ย บัว เหว่ย หาย ติ่ว ท่าย กั้น โหฒว เก้า โฮล เจี๋ย หฒวัง แปะ ฝีง?”

4โมเซ ไฮ์ น้าย เต๋ย หว่า นิ่น บ๊าบ เหฌี่ย เดา

5หย่า ก๊อง บั๋ว โคลา เหธา กัน โคลา ต้าย วั้ว เต๋ย, “ฌัง ดอม เฒี้ยว อ๋อย ปิ๋ว เม่ง หาย เต้า เป๋น นิ่น เญย เมี่ยน, หาย เต้า ธีง-เหฑ่ง, หย่า อ๋อย ปุน วั้ว เต้า ต้าย นิด ฟัด นิ่น. นิ่น อ๋อย กิ๊น หาย เต้า ฯฒฯ ปุน วั้ว เต้า ต้าย นิด ฟัด นิ่น.

6โคลา อ้า! อ๋อย หฒุ ฮนั้ง น้าย นอ โหฒว. เม่ย เหธา กัน เม่ย เญย เมี่ยน อ๋อย หฒุ ต้อ ฮูง-โล่ว ต้าย.

7ฌัง ฮนอย อ๋อย หฒุ เยียม เฒี้ยว เญย หฑะเฮมียน เฒาะ โต์ว เหธา ฮูง อัน เจี๊ยน ฮูง-โล่ว. เฒี้ยว กิ๊น หาย เต้า, ต้ง วั้ว เต้า ธีง-เหฑ่ง. เลวี เมี่ยน อ้า! เม่ย บัว โหฒว เจี๋ย จ๋า หมี่ อ๊ะ.”

8โมเซ แอ๋ง ก๊อง บั๋ว โคลา, “เม่ย บัว เลวี เมี่ยน หมวัง ม่าะ!

9อิสะลาเอน เญย ทิน-ฮู่ง กิ๊น เม่ย บัว เยียม อิสะลาเอน เมี่ยน เญย หฒวัง แปะ ฝีง บุด๋ง ธ้วด ต้าย, ต้อ เม่ย บัว ต้าย นิด ฟัด นิ่น, ปุน เม่ย บัว เยียม หฒั่ง เฒี้ยว เญย ด๊บ-ลิ่ว โหฒว กง ฟู-สู, หย่า เยียม หฒวัง แปะ ฝีง เญย หฑะเฮมียน ฟู-สู นิ่น บัว. น้าย เม่ย บัว ไฮ์ เซ ไฝ-ฟิ้ว สี่ ไฟ?

10นิ่น ต้อ เม่ย เหธา เม่ย เญย หฒวัง ก๋อ-โย์ว, เลวี เมี่ยน, ต้าย นิด ฟัด นิ่น. มป่า เม่ย บัว หธ่อ อ๋อย แฑง โหฒว ไซ เมี่ยน?

11ฮนั้ง น้าย, เม่ย เหธา กัน เม่ย เญย หฒวัง เมี่ยน กั๊บ ฒุ้น ต้าย เหธา เฒี้ยว ต๋อย-เตก. อาโลน ฮนั้ง หาย นอ เม่ย บัว หธีง งบ นิ่น?”

12โมเซ พ้าย เมี่ยน มี่ง เห่ว เอลีอับ เญย ตอน, ดาทาน เหธา อาบีลัม ต้าย. มป่า นิ่น บัว ก๊อง, “เยีย บัว ไม้ มี่ง อ๊ะ.

13เม่ย ต้อ เยีย บัว เยียม เดา-โท้ว หลง เญย เต่ย-ปูง ธ้วด ต้าย เยียม เต่ย-ปูง-ฮวาง ไต๋ เยีย บัว. น้าย หธ่อ ไม้ แก้ง เก๋า? เม่ย ฒู้ง อ๋อย โหฒว โฮล กุ๊น เยีย บัว?

14ไม้ ตาน บัวะ น้าย! เม่ย ฒู้ง ไม้ ต้อ เยีย บัว เปียะ นอม เดา-โท้ว หลง เญย เต่ย-ปูง, หย่า ไม้ ปุน เยีย บัว ตุ๊ หฑิบ ลี่ง เต่ย เหธา อะหงุ่น เปี๊ยว เญย หฮวีง. เม่ย หธ่อ อ๋อย เกว๋ย น้าย เต๋ย เมี่ยน เญย มฒีง ธ้วด ไฟ? เยีย บัว หฒะเก้ง ไม้ มี่ง อ๊ะ.”

15โมเซ เฉีย เจี์ย! ไห่ ฯฒฯ ก๊อง บั๋ว เฒี้ยว, “โท้ ไม้ ตู๋ง ฒิบ นิ่น บัว ฝ่ง ห่อ เญย กะน้าย. เยีย ฒู้ง ไม้ เฒาะ เจี๋ย นิ่น บัว เญย เหยียด เต้า ล่อ. หย่า ไม้ ห่อย เจี๋ย นิ่น บัว เญย หาย เต้า เมี่ยน.”

16โมเซ บั๋ว โคลา, “ฌัง ฮนอย เม่ย เหธา กัน เม่ย วั้ว เต๋ย เมี่ยน อ๋อย หฒุ ต้าย เยียม เฒี้ยว เญย หฑะเฮมียน. เม่ย กั้น เหธา วั้ว เต๋ย เมี่ยน แอ๋ง เหธา อาโลน อ๋อย หฒุ ต้าย.

17เก๊าะ-เมี่ยน อ๋อย หฒุ ต้อ เก๊าะ-เมี่ยน เญย ฮูง-โล่ว, แอ๋ง เฒาะ ฮูง เฮยี้ยด เจี๊ยน กะญั์ว ฝูง ปุน เฒี้ยว. เหยียด ฒู้ง ม่าย หญี่ แป๊ะ ฮม์ เหฒียบ นอม ฮูง-โล่ว. เม่ย เหธา อาโลน หย่า อ๋อย หฒุ ต้อ กั้น เญย ฮูง-โล่ว ต้าย.”

18เก๊าะ-เมี่ยน ฯฒฯ ต้อ เก๊าะ-เมี่ยน เญย ฮูง-โล่ว, เฒาะ โต์ว เหธา ฮูง เฮยี้ยด เจี๊ยน กะญั์ว, มี่ง เหธา โมเซ เหธา อาโลน โซ้ว เจี๊ยน หวุ่ย ปวั้ง ด๊บ-ลิ่ว เญย แก้ง ด่าง.

19โคลา เหธา กัน นิ่น เญย เมี่ยน ฯฒฯ กั๊บ ฒุ้น เหธา โมเซ เหธา อาโลน โซ้ว เจี๊ยน เฮมียน ต๋อย เฮมียน เยียม ด๊บ-ลิ่ว เญย แก้ง ด่าง. เฒี้ยว เญย ฌัง-หล่าง ฯฒฯ หิ่น ธ้วด ปุน หฒวัง แปะ ฝีง ปวัด.

20เฒี้ยว ก๊อง บั๋ว โมเซ เหธา อาโลน,

21“เม่ย บัว อ๋อย หฒุ ซิ้ม ฆอย น้าย เต๋ย หฒวัง เมี่ยน. ด่ง เฑี้ยบ ตั้ง มฒีง เยีย ฯฒฯ เหมียด เหฑ่ง นิ่น บัว.”

22โมเซ เหธา อาโลน ฯฒฯ บ๊าบ เหฌี่ย เดา ก๊อง, “โอ ทิน-ฮู่ง อ่า, หม่าน เมี่ยน เญย ลี่ง ว่วน เญย ทิน-ฮู่ง! ดุ เต้า เมี่ยน ป์าม ฒุ์ย, เม่ย อ๋อย โน์ว หฒวัง แปะ ฝีง ไฟ?”

23เฒี้ยว ก๊อง บั๋ว โมเซ,

24“บั๋ว หฒวัง แปะ ฝีง ซิ้ม ฆอย โคลา, ดาทาน เหธา อาบีลัม เญย ด๊บ-ลิ่ว ม่าะ!”

25โมเซ ฯฒฯ มี่ง เถา ดาทาน เหธา อาบีลัม วั้ว. อิสะลาเอน เมี่ยน เญย เมี่ยน โก๋ หย่า กัน เจี๊ยน นิ่น มี่ง.

26นิ่น ขวิน หฒวัง เมี่ยน, “ซิ้ม ฆอย น้าย เต๋ย เมี่ยน หว่าย เมี่ยน เญย ด๊บ-ลิ่ว. ไม้ ตู๋ง มัวะ นิ่น บัว เญย หาย หญู่ง กะน้าย. เหฑีย เม่ย บัว หลาย นิ่น บัว เญย ฒุ์ย หฒุ กว๊าด มี่ง.”

27เมี่ยน ฯฒฯ ซิ้ม ฆอย โคลา, ดาทาน เหธา อาบีลัม เญย ด๊บ-ลิ่ว. ดาทาน เหธา อาบีลัม ธ้วด ต้าย เหธา เอ๊า-เจว๊ย เหธา ฝุเจว๊ย-ไฝ โซ้ว เจี๊ยน กั้น เญย ด๊บ-ลิ่ว แก้ง ด่าง.

28โมเซ ก๊อง, “เม่ย บัว อ๋อย ฮนั้ง น้าย นอ ฮิ้ว ตุ๊ เฒี้ยว พ้าย เยีย ต้าย โหฒว น้าย เต๋ย เหยียด ฒู้ง สี่, ไม้ เฒ์ย เยีย เอย กั้น เญย เฮญี้ยว ฮนั้ม ธ้วด ต้าย โหฒว.

29สี ก๊อง น้าย เต๋ย เมี่ยน ไต่ ฮนั้ง โพว-ทง เญย เมี่ยน ไต่, ไฟ หฒุ สี่ ฮนั้ง โพว-ทง เมี่ยน ไฮ่ หฒุ เญย สี่ นอ, เซ ปุน ธีง ไม้ เฒ์ย เฒี้ยว พ้าย เยีย ต้าย.

30มป่า สี ก๊อง เฒี้ยว โหฒว เซียง-สี่, เดา ฆอย, นะ เหฑ่ง น้าย เต๋ย เมี่ยน เหธา นิ่น บัว ม่าย เญย เหยียด ฒู้ง กะน้าย, ปุน นิ่น บัว เลี่ยม นั่ง ด๊อด เหฌี่ย เถา เยี่ยม เกน, เม่ย บัว ฯฒฯ ฮิ้ว ตุ๊ น้าย เต๋ย เมี่ยน หมั่ง เผีย เฒี้ยว. ”

31โมเซ ก๊อง เซ้ด น้าย เต๋ย หว่า, เยียม อาบีลัม บัว เญย เหฒา-เดี๊ย เญย เดา บ๋าย.

32เดา ฆอย ฮนั้ง หมอง ฆอย ฑุ่ย, นะ นิ่น บัว เหธา นิ่น บัว เญย จา-ตี้ง, เหธา โคลา เญย เหยียด ฒู้ง เมี่ยน, แอ๋ง เหธา นิ่น บัว เญย เหยียด ฒู้ง กะน้าย.

33นิ่น บัว เลี่ยม นั่ง เหธา เจี๊ยน นิ่น บัว เญย เหยียด ฒู้ง กะน้าย ฯฒฯ ด๊อด เหฌี่ย เยี่ยม เกน. เดา ฯฒฯ กั๊บ เจี๊ยน ดิบ, งัด เจี๊ยน นิ่น บัว. นิ่น บัว หฒุ เหมียด, ไม้ ตุ๊ เหธา หฒวัง เมี่ยน เยียม อ๊ะ.

34เยียม เว่ย ก๋อม เญย อิสะลาเอน เมี่ยน เหยียด ฒู้ง ไฮ์ นิ่น บัว เห่ว ฯฒฯ ก๊าน เปย๋า, เห่ว เจี๊ยน ก๊อง, “เหฑีย เดา อ๋อย เลี่ยม เยีย บัว นะ อ๊า โล่ะ!”

35แอ๋ง ม่าย โต์ว เยียม เฒี้ยว ธ้วด ต้าย ปั๊ว ชุย เหฑ่ง ต้อ ฮูง มี่ง ฝ่ง ห่อ วั้ว เต๋ย หญี่ แป๊ะ ฮม์ เหฒียบ เต้า เมี่ยน.

36เฒี้ยว ก๊อง บั๋ว โมเซ,

37“อ๋อย หฒุ บั๋ว อาโลน ไซ เมี่ยน เญย ตอน, เอเลอาซา, มี่ง เฒาะ เยียม วั้ว โต์ว กะญั์ว วั้ว เต๋ย ฮูง-โล่ว. แอ๋ง ต้อ เยียม ฮูง-โล่ว เญย โต์ว-ถาน มี่ง กวั่ง โก เต๋ย เญย ต๋อง เหว่ย หฒุ น้าย เต๋ย ฮูง-โล่ว ธีง-เหฑ่ง เญย.

38เซ ต้ง ป์าม ฒุ์ย ฯฒฯ หฒุ กวั่ง แหม่ง วั้ว เต๋ย เมี่ยน เญย ฮูง-โล่ว. อ๋อย หฒุ เฒาะ น้าย เต๋ย ฮูง-โล่ว ต๊า ต้าย เป๋น เหยียด คว้าย เหยียด คว้าย ปวัง เจี๊ยน เหฒี่ย-ต้อง, เหว่ย หฒุ น้าย เต๋ย ฮูง-โล่ว ฝ่ง ห่อ เจี๋ย ปุน เฒี้ยว ฯฒฯ ธีง-เหฑ่ง เญย. ฮนั้ง น้าย เซ โหฒว จั๋ง-โห่ ปุน อิสะลาเอน เมี่ยน.”

39เอเลอาซา ไซ เมี่ยน ฯฒฯ เฒาะ เหฑ่ง หฒุ โต์ว ปั๊ว วั้ว เต๋ย เมี่ยน ต้อ ต้าย ฝ่ง ห่อ เญย ต้ง ซิ ฮูง-โล่ว, หย่า ปุน เมี่ยน ต๊า ต้าย ปวัง เจี๊ยน เหฒี่ย-ต้อง,

40ฮนั้ง เฒี้ยว หล่ง โมเซ บั๋ว เอเลอาซา โหฒว นอ. น้าย เซ เหว่ย เถง อิสะลาเอน เมี่ยน จั๋ง หฒุ, ธ้วด ลิ์ว อาโลน เญย เฒ้ย-ฟุน, ไม้ ม่าย หาย เต้า ตุ๊ เยียม เฒี้ยว เญย หฑะเฮมียน ปั๊ว ฮูง. เหฑีย ไฮ่ หฒุ ฮนั้ง โคลา เหธา กัน โคลา วั้ว เต๋ย เมี่ยน.

41ตะเหญ่ย ฮนอย หฒวัง แปะ ฝีง งบ โมเซ เหธา อาโลน. นิ่น บัว ก๊อง, “เม่ย บัว ไต๋ เฒี้ยว เญย เมี่ยน หมี่ อ๊ะ.”

42หฒวัง เมี่ยน กั๊บ ฒุ้น ต๋อย โมเซ เหธา อาโลน วั้ว หฒั่น, นิ่น บัว ฮวิน มี่ง หวุ่ย ปวั้ง เญย ด๊บ-ลิ่ว วั้ว. เลี่ยม เฒ่ย ม่าย โหม่ว ต้าย อม เจี๊ยน ด๊บ-ลิ่ว. เฒี้ยว เญย ฌัง-หล่าง หย่า หิ่น ธ้วด ต้าย.

43โมเซ เหธา อาโลน ฯฒฯ มี่ง เถา หวุ่ย ปวั้ง ด๊บ-ลิ่ว เญย หฑะเฮมียน.

44เฒี้ยว ก๊อง บั๋ว โมเซ,

45“ซิ้ม ฆอย น้าย เต๋ย หฒวัง เมี่ยน อ๊ะ. ด่ง เฑี้ยบ ตั้ง มฒีง เยีย อ๋อย เหมียด เหฑ่ง นิ่น บัว.” นิ่น บัว อี เต้า ฯฒฯ บ๊าบ เหฌี่ย เดา.

46โมเซ ก๊อง บั๋ว อาโลน, “เฒาะ เม่ย เญย ฮูง-โล่ว ต้าย, เฒาะ เหฒี่ย-ต้อง เญย โต์ว เหธา เจี๊ยน ฮูง ตั๊บ เจี๊ยน, ก๊าน มี่ง หฒวัง เมี่ยน วั้ว เถง นิ่น บัว ฟิ ฒุ์ย. เฒี้ยว โน์ว ไห่ เมี่ยน ฯฒฯ ปุน ต้ม ววน-แป่ง เจี์ย กอน ปุ๊ด ธ้วด อ๊ะ.”

47อาโลน ฯฒฯ เอย โมเซ เญย หว่า โหฒว, ถิว เปียะ หฒวัง เมี่ยน บุด๋ง. เมี่ยน เจี์ย กอน หฒุ ต้ม ววน-แป่ง, มป่า อาโลน เฒาะ ฮูง เถง แปะ ฝีง ฟิ ฒุ์ย.

48นิ่น โซ้ว เจี๊ยน เฒี่ยง เญย เหธา ไต่ มี่ง เญย เมี่ยน บุด๋ง, ต้ม ววน-แป่ง ฯฒฯ ตี้ง หมี่ อ๊ะ.

49หฒุ ววน-แป่ง ไต่ เญย เมี่ยน ม่าย เหยียด หว่าน เปยย ธิน เธี้ยด แป๊ะ เต้า, ไม้ ฝุน หลาย โคลา เญย เจ๊า หฒุ ไต่ วั้ว เต๋ย.

50ววน-แป่ง ตี้ง เหฑ่ง, อาโลน ฯฒฯ หฑวน หวุ่ย ปวั้ง ด๊บ-ลิ่ว เญย แก้ง ด่าง, โมเซ วั้ว.

← Chapter 15 Jump to: Chapter 17 →