Numbers 23

Mien Bible (Thai Script) © Thailand Bible Society, 2007

← Chapter 22 Jump to: Chapter 24 →

1บาลาอัม ก๊อง บั๋ว บาล้าก, “อ๋อย หฒุ เหธย เสี่ย นอม เหฒี่ย-ต้อง เหว่ย เยีย, แอ๋ง หลิ่ว เล์ย เสี่ย เต้า ง่ง โก๊ว, เสี่ย เต้า ปะกี ยู่ง โก๊ว ปุน เยีย.”

2บาล้าก ฯฒฯ เอย เจี๊ยน บาลาอัม เญย หว่า โหฒว. นิ่น บัว อี เต้า เยียม โม์ว นอม เหฒี่ย-ต้อง, เหยียด นอม เหฒี่ย-ต้อง เหฒี่ย เหยียด เต้า ง่ง โก๊ว เหธา เหยียด เต้า ปะกี ยู่ง โก๊ว.

3บาลาอัม ก๊อง บั๋ว บาล้าก, “เม่ย โซ้ว เจี๊ยน น้าย เม่ย ปั๊ว เหฒี่ย เญย กะน้าย กะเฮลน, เยีย กั้น มี่ง เพียน เต๋ย. เหฑีย เฒี้ยว ต้าย ปวั้ง เยีย. นิ่น บั๋ว หาย หญู่ง เยีย, เยีย ฒู้ง บั๋ว เม่ย.” บาลาอัม ฯฒฯ ฝาว นอม ต๋อง ฮลัง เญย, ฌัง เญย.

4ทิน-ฮู่ง ปวั้ง บาลาอัม, บาลาอัม ฯฒฯ ก๊อง, “เยีย หลิ่ว เล์ย เหฒียง เสี่ย นอม เหฒี่ย-ต้อง. โม์ว นอม เหฒี่ย-ต้อง เยีย เหฒี่ย เต้า ง่ง โก๊ว เหธา เต้า ปะกี ยู่ง โก๊ว.”

5เฒี้ยว บั๋ว บาลาอัม ฮนั้ง หาย นอ ก๊อง, หย่า เห่ว นิ่น, “หฑวน บาล้าก วั้ว เฒาะ น้าย เต๋ย หว่า บั๋ว นิ่น.”

6บาลาอัม ฯฒฯ หฑวน, ปวัด บาล้าก เหธา โมอับ วั้ว เต๋ย เหยียด ฒู้ง เจียน หธ่อ โซ้ว เจี๊ยน นิ่น เหฒี่ย เญย กะน้าย เญย กะเฮลน.

7บาลาอัม ฯฒฯ ก๊อง ธ้วด นิ่น โต่ว เญย หว่า. นิ่น ก๊อง, “โมอับ ฮู่ง, บาล้าก, ต้อ เยีย ธ้วด อาลัม, เซ ต้อ เยีย เยียม ตง ปูง แหมง เญย บง ต้าย. นิ่น ก๊อง, ‘ต้าย ม่าะ! เถง เยีย เหฒียว ยาโค้บ เญย เฒ้ย-ฟุน. ต้าย ม่าะ! เถง เยีย เหฒง อิสะลาเอน เมี่ยน.’

8ทิน-ฮู่ง ไม้ เหฒียว วั้ว เต๋ย, เยีย ฮนั้ง หาย นอ ไฮ่ เหฒียว? เฒี้ยว ไม้ เหฒง เญย, เยีย ฮนั้ง หาย นอ ไฮ่ เหฒง?

9เยีย เยียม แบ๋ง-นี้ง ปวัด นิ่น บัว. เยีย เยียม ฮลัง เญย ต๋อง หมั่ง เจี๊ยน นิ่น บัว, เซ เหยียด ฝีง ไม้ หฒอบ กั้น ฝีง เญย เมี่ยน, เป๊ย หฒวัง กั๊วะ เญย แปะ ฝีง, นิ่น บัว ฝุน กั้น เหล่ง เจ๊ย เญย เมี่ยน.

10ยาโค้บ เญย เฒ้ย-ฟุน ด่ง เนีย-บูง ธั้ม, หาย เต้า ไฮ่ ซ้าว ตุ๊ เฒี์ยน? หาย เต้า ไฮ่ ฝุน อิสะลาเอน เมี่ยน เปยย โก๊ว เญย เหยียด โก๊ว? โท้ ปุน เยีย เกวย เสย ฮนั้ง คู้ เมี่ยน, หย่า ปุน เยีย เญย เซ้ด เมว์ย ฮนอย ฮนั้ง นิ่น เญย นอ.”

11บาล้าก ก๊อง บั๋ว บาลาอัม, “เม่ย โหฒว หาย หญู่ง ปุน เยีย? เยีย ต้อ เม่ย ต้าย น้าย เหว่ย เหฒียว เยีย เญย วิน-วั้ง, มป่า เม่ย ขูง ปวัง หว่า ปุน นิ่น บัว ฮนั้ง.”

12บาลาอัม เตา, “เยีย อ๋อย หฒุ ก๊อง เฒี้ยว ปุน เยีย ก๊อง วั้ว เต๋ย หว่า ไม้ เฒ์ย?”

13บาล้าก แอ๋ง ก๊อง บั๋ว นิ่น, “เหธา เยีย มี่ง กั้น นอม ต๋อง โอ่. เยียม วั้ว เม่ย ไฮ่ หมั่ง ตุ๊ ปวัด เต๋ย อิสะลาเอน เมี่ยน มป่า ปวัด ไม้ เหฑ่ง. เม่ย เยียม วั้ว นอม ต๋อง เถง เยีย เหฒียว นิ่น บัว.”

14บาล้าก ฯฒฯ ต้อ บาลาอัม เถา โสฟิม เญย เด่ย, เยียม ปิดกา บง- นี้ง. เยียม วั้ว นิ่น แอ๋ง เหธย เสี่ย นอม เหฒี่ย-ต้อง, โม์ว นอม เหฒี่ย-ต้อง เหฒี่ย เต้า ง่ง โก๊ว เหธา เต้า ปะกี ยู่ง โก๊ว.

15บาลาอัม ก๊อง บั๋ว บาล้าก, “เม่ย โซ้ว เจี๊ยน น้าย เม่ย เหฒี่ย เญย กะน้าย กะเฮลน, ฒั้ว เยีย มี่ง วั้ว แหมง ปวั้ง เฒี้ยว. ”

16เฒี้ยว ต้าย ปวั้ง บาลาอัม, บั๋ว นิ่น หอบ หฒุ ฮนั้ง หาย นอ ก๊อง, หย่า เห่ว นิ่น, “หฑวน บาล้าก วั้ว โต่ว น้าย เต๋ย หว่า บั๋ว นิ่น.”

17บาลาอัม หฑวน มี่ง, ปวัด บาล้าก เหธา โมอับ เมี่ยน เญย เจียน โซ้ว เจี๊ยน นิ่น เหฒี่ย เญย กะน้าย เญย กะเฮลน. บาล้าก หน่าย นิ่น, “ เฒี้ยว ฮนั้ง หาย นอ ก๊อง?”

18บาลาอัม แอ๋ง ก๊อง ธ้วด นิ่น โต่ว เญย หว่า, “สิบโป เญย ตอน, บาล้าก, ต้าย หมวัง ม่าะ! หมวัง เยีย อ๋อย ก๊อง เญย หว่า.

19ทิน-ฮู่ง ไม้ เฒ์ย เมี่ยน, นิ่น ไม้ ก๊อง-แปะ. นิ่น หย่า ไม้ เฒ์ย ป้าม เมี่ยน, ฯฒฯ ไม้ หฒุ ก๊อย หฒะเอ๋ย. ก๊อง ลิ์ว เญย หว่า, นิ่น ไม้ เฒ์ย อ๋อย เอย เจี๊ยน โหฒว ไฟ? นิ่น แล์ง เญย หว่า, นิ่น ไม้ เฒ์ย อ๋อย โหฒว เหฒียง?

20เยีย ฒิบ หลี่ง ปวัง หว่า, ทิน-ฮู่ง เหธย ฟุ ปุน นิ่น บัว, เยีย หย่า ไม้ ไฮ่ ก๊อย หฑวน.

21“ไม้ ปวัด ยาโค้บ เญย เฒ้ย-ฟุน อ๋อย ม่าย หาย หญู่ง เฑ่า โค้ว. ไม้ ปวัด อิสะลาเอน เมี่ยน ม่าย หาย หญู่ง ขวน น่าน. เฒี้ยว, นิ่น บัว เญย ทิน-ฮู่ง, เหธา นิ่น บัว เยียม, โห่ว ฮู่ง เญย เฉีย เยียม นิ่น บัว บุด๋ง.

22ทิน-ฮู่ง ต้อ นิ่น บัว ธ้วด อียิบ เต่ย-ปูง, นิ่น บัว ม่าย ชะ ฮนั้ง เฮยี่ย ง่ง นอ.

23ไม้ ไฮ่ ปู๋ง หาย หญู่ง ฟ้าด ห่อย ยาโค้บ เญย เฒ้ย-ฟุน. ไม้ ไฮ่ ปู๋ง ตีง ปู๋ง เจี๋ยม ห่อย อิสะลาเอน เมี่ยน. อี้ หฒั่น เมี่ยน อ๋อย ก๊อง เถา ยาโค้บ เญย เฒ้ย-ฟุน, อิสะลาเอน เมี่ยน, ‘หมั่ง ก๋า ทิน-ฮู่ง ฮนั้ง หาย นอ โหฒว!’

24น้าย ฝีง เมี่ยน เจี์ย ซิน ฮนั้ง เต้า เซี่ยน เญ์ย นอ, โซ้ว เจี๊ยน ฮนั้ง เต้า เซี่ยน โก๊ว. นิ่น ไม้ เปว๋ย เถา หญั่น เหฑ่ง นิ่น เฒาะ เญย อ๊อ, แอ๋ง ฮบ เหฑ่ง นิ่น ไต๋ ต้าย เญย ฑย้าม.”

25บาล้าก ก๊อง บั๋ว บาลาอัม, “เม่ย ไม้ เหฒียว เหยียด เต๋ย นิ่น บัว, หย่า ไม้ ตู๋ง ปวัง หว่า นิ่น บัว ม่าะ!”

26บาลาอัม เตา, “เยีย บั๋ว เจี๋ย เม่ย, เฒี้ยว ก๊อง หาย หญู่ง, เยีย อ๋อย หฒุ เอย เจี๊ยน โหฒว ไม้ เฒ์ย?”

27บาล้าก ก๊อง บั๋ว บาลาอัม, “ต้าย ม่าะ! เยีย ต้อ เม่ย มี่ง กั้น นอม ต๋อง. เหฑีย ทิน-ฮู่ง หอบ เฮญี้ยว ปุน เม่ย เยียม วั้ว นอม ต๋อง เถง เยีย เหฒียว นิ่น บัว.”

28บาล้าก ฯฒฯ ต้อ บาลาอัม เถา เปโอ บง- นี้ง. เยียม หน่าย ไฮ่ หมั่ง เหฌี่ย ปวัด เต่ย-ปูง-ฮวาง.

29บาลาอัม ก๊อง บั๋ว บาล้าก, “เยียม น้าย อ๋อย หฒุ เหธย เสี่ย นอม เหฒี่ย-ต้อง เหว่ย เยีย, แอ๋ง หลิ่ว เล์ย เสี่ย เต้า ง่ง โก๊ว, เสี่ย เต้า ปะกี ยู่ง โก๊ว.”

30บาล้าก ฯฒฯ เอย เจี๊ยน บาลาอัม เญย หว่า โหฒว. เยียม โม์ว นอม เหฒี่ย-ต้อง เหฒี่ย เต้า ง่ง โก๊ว เหธา เต้า ปะกี ยู่ง โก๊ว.

← Chapter 22 Jump to: Chapter 24 →