Numbers 25

Mien Bible (Thai Script) © Thailand Bible Society, 2007

← Chapter 24 Jump to: Chapter 26 →

1อิสะลาเอน เมี่ยน เยียม ซิดทิม เต่ย วั้ว หฒั่น, ม่าย เต๋ย แปะ ฝีง เจี์ย กอน เหฮยียน โมอับ เมี่ยน เญย เซียะ.

2เหฒี่ย นิ่น บัว เญย เฒี่ยน เญย เฒี่ยง โห่, น้าย เต๋ย มเซียะ ตอน หยัวะ อิสะลาเอน เมี่ยน เหธา เจี๊ยน มี่ง. อิสะลาเอน เมี่ยน ฯฒฯ หญั่น เหฒี่ย เจี๋ย เญย กะน้าย, หย่า เกว่ย เหฌี่ย ป๋าย วั้ว เต๋ย เฒี่ยน.

3ฮนั้ง หน่าย, อิสะลาเอน เมี่ยน หย่า เหธา เจี๊ยน นิ่น บัว หฒั่ง เยียม เปโอ เญย บาอัน เฒี่ยน. เฒี้ยว ฯฒฯ เฉีย เจี์ย! ไห่ อิสะลาเอน เมี่ยน.

4เฒี้ยว บั๋ว โมเซ, “เฒาะ น้าย เต๋ย เมี่ยน เญย หฒวัง เปย๊ย เฒ้ย ลู่ง ฮนอย หฒั่น, ฌัง เญย เฒี่ยง โห่, เยียม แหฆ่ง เญย ต๋อง ตอง เจี๊ยน เฒี้ยว เญย หฑะเฮมียน ไต๋, เหว่ย ปุน เฒี้ยว ไม้ เฉีย เจี์ย, โน์ว ไห่ อิสะลาเอน เมี่ยน.”

5โมเซ ฯฒฯ บั๋ว อิสะลาเอน เมี่ยน เญย เซี้ยม ฒุ์ย เจียน, “ตะฟ่าน เม่ย บัว เญย หาย เต้า เมี่ยน หฒั่ง เยียม เปโอ เญย บาอัน เฒี่ยน, เม่ย บัว โม์ว เต้า อ๋อย หฒุ เฒาะ นิ่น บัว ไต๋ เหฑ่ง.”

6อิสะลาเอน เญย หฒวัง เมี่ยน กั๊บ ฒุ้น เยียม หวุ่ย ปวั้ง ด๊บ-ลิ่ว เญย แก้ง ด่าง เญี้ยม วั้ว หฒั่น, ม่าย เต้า อิสะลาเอน เมี่ยน ตอง เจี๊ยน โมเซ เหธา หฒวัง เมี่ยน ต้อ เต้า มีเดียน เซียะ ต้าย เปียะ นิ่น เญย ด๊บ-ลิ่ว.

7อาโลน ไซ เมี่ยน เญย ฟุน, เอเลอาซา เญย ตอน, ฟีเนหัด, ปวัด, นิ่น ฯฒฯ เยียม หฒวัง เมี่ยน บุด๋ง ธ้วด ต้าย, นั้น ติ้ว ธัง

8กัน เจี๊ยน วั้ว เต้า อิสะลาเอน เมี่ยน เปียะ ด๊บ-ลิ่ว กะญั์ว วั้ว ฉง. นิ่น หล่ง ธัง ฑบ นิ่น บัว อี เต้า, ฑบ ทง วั้ว เต้า อิสะลาเอน มจั่ง ตอน เปียะ วั้ว เต้า มีเดียน เซียะ เญย ซิน. ฮนั้ง หน่าย, เยียม อิสะลาเอน เมี่ยน บุด๋ง เญย ต้ม ววน-แป่ง ฯฒฯ ตี้ง หมี่ อ๊ะ.

9มป่า หลาย ปุ๊ด น้าย หญู่ง ววน-แป่ง ไต่ เญย เมี่ยน, ฒู้ง ม่าย อี หว่าน เปยย ธิน เต้า.

10เฒี้ยว ก๊อง บั๋ว โมเซ,

11“อาโลน ไซ เมี่ยน เญย ฟุน, เอเลอาซา เญย ตอน, ฟีเนหัด, ปุน เยีย ไม้ เฉีย เจี์ย อิสะลาเอน เมี่ยน เหว่ย หฒุ นิ่น เถง เยีย แฑง นิ่น บัว, ฮนั้ง เยีย เยียม นิ่น บัว บุด๋ง แฑง นิ่น บัว วั้ว นอ. เยีย ฯฒฯ ไม้ เหมียด นิ่น บัว.

12อ๋อย หฒุ บั๋ว นิ่น, เยีย เหธา นิ่น เหลียบ เจี์ย แป้ง ออน เญย แหง่ง หว่า,

13เซ แล์ง ปุน นิ่น เหธา นิ่น เญย เฒ้ย-ฟุน เหยียด ลิ์ว ตุ๊ โหฒว ไซ เมี่ยน เหว่ย หฒุ นิ่น เถง นิ่น เญย ทิน-ฮู่ง แฑง อิสะลาเอน เมี่ยน หย่า เถง อิสะลาเอน เมี่ยน ฟิ ฒุ์ย.”

14เหธา มีเดียน เซียะ หฒุ ไต๋ วั้ว เต้า อิสะลาเอน เมี่ยน เญย บั๋ว เห่ว สิมลี, เซ สาลู เญย ตอน. สาลู เซ สิเมโอน ฝีง เญย เหยียด ปู้ง เมี่ยน เญย เปย๊ย เฒ้ย.

15หฒุ ไต๋ วั้ว เต้า มีเดียน เซียะ เห่ว โค้ดบี. นิ่น เญย เตีย เห่ว สูอา, เซ เหยียด ปู้ง มีเดียน เมี่ยน เญย เปย๊ย เฒ้ย.

16เฒี้ยว ก๊อง บั๋ว โมเซ,

17“อ๋อย หฒุ โหฒว ปุน มีเดียน เมี่ยน เป๋น วิน-วั้ง อ๊ะ, หย่า ไต๋ นิ่น บัว,

18เหว่ย หฒุ นิ่น บัว เยียม เปโอ ดั๊ว เม่ย บัว, โหฒว ปุน เม่ย บัว เป๋น วิน-วั้ง. หลาย เยียม เปโอ ธ้วด เญย สี่ อิสะลาเอน เมี่ยน ปุ๊ด ต้ม ววน-แป่ง. หย่า ต๋อย วั้ว หฒั่น มีเดียน เมี่ยน เญย เหยียด เต้า เปย๊ย เฒ้ย เญย เซียะ, โค้ดบี, หฒุ ไต๋ ไต่.”

← Chapter 24 Jump to: Chapter 26 →