Numbers 17

Mien Bible (Thai Script) © Thailand Bible Society, 2007

← Chapter 16 Jump to: Chapter 18 →

1เฒี้ยว ก๊อง บั๋ว โมเซ,

2“อ๋อย หฒุ บั๋ว อิสะลาเอน เมี่ยน หฒิว อง-ถาย บัว เหลียบ ต้าย เญย ฝีง, เหยียด ฝีง เญย เปย๊ย เฒ้ย อ๋อย หฒุ ต้อ เหยียด ติ้ว ปย๊า-บย่า ต้าย, เหยียด ฒู้ง ม่าย เหฒียบ เหญ่ย ติ้ว. เก๊าะ-เมี่ยน อ๋อย หฒุ เฟี้ย เก๊าะ-เมี่ยน เญย บั๋ว เยียม เก๊าะ-เมี่ยน เญย ปย๊า-บย่า.

3เยียม เลวี ฝีง เญย ปย๊า-บย่า อ๋อย หฒุ เฟี้ย อาโลน เญย บั๋ว. ฝีงๆ อ๋อย หฒุ เหว่ย อง-ถาย เหลียบ วั้ว ฝีง เญย เปย๊ย เฒ้ย ม่าย เหยียด ติ้ว ปย๊า-บย่า.

4ต้อ น้าย เต๋ย ปย๊า-บย่า เปียะ หวุ่ย ปวั้ง เญย ด๊บ-ลิ่ว กะญั์ว, อัน เจี๊ยน แล์ง แหง่ง หว่า ฟาง หฑะเฮมียน แหมง, ต้ง เยีย เหธา เม่ย บัว กั๊บ ฒุ้น เญย ต๋อง.

5เยีย กิ๊น ต้าย วั้ว ล่าน เมี่ยน เญย ปย๊า-บย่า ฯฒฯ ธ้วด หธุน. ฮนั้ง หน่าย เยีย ฯฒฯ ปุน อิสะลาเอน เมี่ยน งบ เม่ย บัว เญย หว่า เซ้ก หมี่ อ๊ะ, ไม้ เถา เยีย เญย มน่อม.”

6โมเซ ฯฒฯ บั๋ว อิสะลาเอน เมี่ยน. นิ่น บัว เญย เปย๊ย เฒ้ย ฯฒฯ เฒาะ ปย๊า-บย่า, หฒิว อง-ถาย บัว เหลียบ เญย ฝีง, โม์ว ฝีง, เหยียด ฝีง เหยียด ติ้ว. เหยียด ฒู้ง ม่าย เหฒียบ เหญ่ย ติ้ว. อาโลน เญย ปย๊า-บย่า หย่า ต้ง วั้ว เต๋ย เญย เหยียด ติ้ว.

7โมเซ ต้อ เหยียด ฒู้ง ปย๊า-บย่า เฮยี้ยด เจี๊ยน เฒี้ยว เญย หฑะเฮมียน, แล์ง แหง่ง หว่า เญย ด๊บ-ลิ่ว กะญั์ว.

8ตะเหญ่ย ฮนอย โมเซ เปียะ แล์ง แหง่ง หว่า เญย ด๊บ-ลิ่ว กะญั์ว, ปวัด อาโลน เญย ปย๊า-บย่า, ต้ง ปิ๋ว เม่ง เลวี ฝีง วั้ว ติ้ว ปย๊า-บย่า, ธ้วด หธุน, ฒู้ง ธ้วด เปี้ยง เญว์ย, ฆอย เปี้ยง หย่า เฒี่ยง อันมัน เปี๊ยว หฒัวะ เญย.

9โมเซ ต้อ เหยียด ฒู้ง ปย๊า-บย่า เยียม เฒี้ยว เญย หฑะเฮมียน ธ้วด ปุน อิสะลาเอน เญย หฒวัง เมี่ยน หมั่ง. นิ่น บัว หมั่ง ลิ์ว, เก๊าะ-เมี่ยน ฯฒฯ ต้อ เก๊าะ-เมี่ยน เญย มี่ง หมี่ อ๊ะ.

10เฒี้ยว ก๊อง บั๋ว โมเซ, “ต้อ อาโลน เญย ปย๊า-บย่า หฑวน, อัน เจี๊ยน แล์ง แหง่ง หว่า ฟาง เญย หฑะเฮมียน โหฒว จั๋ง-โห่ ปุน วั้ว เต๋ย แหง่ง เยีย เญย เมี่ยน. ฮนั้ง น้าย ฯฒฯ ปุน นิ่น บัว ตี้ง เหฌี่ย, ไม้ งบ เยีย, นิ่น บัว หธีง ต้าย ไม้ หฒุ ไต่.”

11โมเซ ฯฒฯ หฒิว เฒี้ยว เญย หว่า โหฒว เหฑ่ง.

12อิสะลาเอน เมี่ยน ก๊อง บั๋ว โมเซ, “เยีย บัว ฒู้ง อ๋อย หฒุ ไต่ อ๊ะ. เยีย บัว หฒุ เหมียด เหฑ่ง, อ๋อย หฒุ เหมียด เหฑ่ง อ๊า โล่ะ!

13หาย เต้า เลี่ยม มี่ง นิด ฟัด เฒี้ยว เญย ด๊บ-ลิ่ว ฒู้ง อ๋อย หฒุ ไต่ อ๊ะ. เยีย บัว เหยียด ฒู้ง อ๋อย หฒุ ไต่ เหฑ่ง ไฟ?”

← Chapter 16 Jump to: Chapter 18 →