Numbers 4

Mien Bible (Thai Script) © Thailand Bible Society, 2007

2“อ๋อย หฒุ ซ้าว เหฑ่ง เลวี เมี่ยน ปุน เหฌี่ย เญย โคฮ้าด เมี่ยน หฒิว นิ่น บัว เญย ปู้ง ป่วน เหธา นิ่น บัว เญย เมี่ยน ป่วน,

3เยียม ฟ่า เหฒียบ หฮญัง เถา ฮม์ เหฒียบ หฮญัง เญย มจั่ง ตอน, ต้ง ไฮ่ เยียม หวุ่ย ปวั้ง เญย ด๊บ-ลิ่ว ฟู-สู โหฒว กง วั้ว เต๋ย.

4“น้าย เซ โคฮ้าด เมี่ยน อ๋อย หฒุ เยียม หวุ่ย ปวั้ง ด๊บ-ลิ่ว โหฒว เญย กง. นิ่น บัว อ๋อย หฒุ โก๋ว เก้า ธีง-เหฑ่ง เจี๋ย เญย กะน้าย.

5อ๋อย ซุ้ย ต๋อง เญย เฒี่ยง โห่, อาโลน เหธา นิ่น เญย ตอน อ๋อย หฒุ เปียะ มี่ง แธะ แบะ แก้ง เดีย เหฌี่ย, หล่ง ก๊ม แล์ง แหง่ง หว่า ฟาง.

6หย่า อ๋อย หฒุ เฒาะ ฟัวะ ต้าย หลง เญย แซง-คู้ ด๊บ ก๊ม กู้ หงว่าย, แอ๋ง หล่ง คว้าย เดีย, เซ้ด เฒ้ย บั๊ว เหฑ่ง, ก๊ม กู้ หงว่าย เจี๋ย. แอ๋ง เฒาะ แกง ฟาง เญย เดี๋ยง หธุน เจี๊ยน.

7“อ๋อย หฒุ เฒาะ คว้าย เดีย-บั๊ว ติ่ม เก๋ง ทิน-ฮู่ง เญย ฌั้ว วั้ว นอม เตี้ย. แอ๋ง เฒาะ เปี้ยน, ปะเกน, หฑ่อม เหธา เธี้ย เหฒี่ย อะหงุ่น ติ๊ว เญย งว่า แป้ง อัน เจี๊ยน. เตี้ย กู้ หงว่าย หย่า อ๋อย หฒุ ม่าย หฒั่นๆ เก๋ง เญย ฌั้ว.

8อ๋อย หฒุ หล่ง คว้าย เดีย-ซิ ก๊ม เหฑ่ง น้าย เต๋ย เหยียด ฒู้ง. แอ๋ง หล่ง คว้าย ฟัวะ ต้าย หลง เญย แซง-คู้ ด๊บ ก๊ม กู้ หงว่าย เจี๋ย หย่า เฒาะ แกง เตี้ย เญย เดี๋ยง หธุน เจี๊ยน.

9“นิ่น บัว อ๋อย หฒุ เฒาะ คว้าย เดีย-บั๊ว ก๊ม เจี๊ยน หฒิว ฌัง เญย ตัง-จ๋า, ตัง เญย ฒ้าน, จั๊บ ตัง-โธ้ เญย ฌิ้ว, อัน ฌิ้ว เญย เปี้ยน, แอ๋ง เหธา เหยียด ฒู้ง ตั๊บ โย่ว เหว่ย ติ้น ตัง เญย แป้ง.

10เฒาะ ตัง-จ๋า เหธา ตัง เญย เหยียด ฒู้ง จา-สี่, หล่ง ฟัวะ ต้าย หลง เญย แซง-คู้ ด๊บ เปว เจี๊ยน, อัน แกง กะน้าย เญย จ๋า กู้ หงว่าย.

11“นิ่น บัว อ๋อย หฒุ หล่ง คว้าย เดีย-บั๊ว ก๊ม เจี๊ยน ปั๊ว ฮูง เญย เจียม-เตี้ย, แอ๋ง หล่ง ฟัวะ ต้าย หลง เญย แซง-คู้ ด๊บ ก๊ม เจี๊ยน, เฒาะ แกง เตี้ย เญย เดี๋ยง หธุน เจี๊ยน.

12“นิ่น บัว อ๋อย หฒุ เฒาะ เยียม สีง ติ่น หล่ง เญย เหยียด ฒู้ง จา-สี่ หล่ง เดีย-บั๊ว เปว เจี๊ยน. แอ๋ง หล่ง ฟัวะ ต้าย หลง เญย แซง-คู้ ด๊บ ก๊ม เจี๊ยน อัน แกง กะน้าย เญย จ๋า.

13“นิ่น บัว อ๋อย หฒุ กว้าย ธ้วด ต้ง ซิ เหฒี่ย-ต้อง เญย ซ้าย, แอ๋ง หล่ง คว้าย เดีย-หลัวะ ก๊ม เจี๊ยน เหฒี่ย-ต้อง.

14เฒาะ เหว่ย เหฒี่ย-ต้อง หล่ง เญย จา-สี่, เลี่ยม เซียว โต์ว เญย เจย, ญ้าบ, กะน้าย-เธ้น, เหธา ปุ้น, อัน เหฒี่ย-ต้อง กู้ หงว่าย. แอ๋ง หล่ง ฟัวะ ต้าย หลง เญย แซง-คู้ ด๊บ ก๊ม เจี๊ยน, เฒาะ แกง เหฒี่ย-ต้อง เญย เดี๋ยง หธุน เจี๊ยน.

15“อาโลน เหธา นิ่น เญย ตอน บัว เฒาะ สีง ติ่น เหธา สีง ติ่น เญย เหยียด ฒู้ง จา-สี่ ก๊ม ลิ์ว, เถา ซุ้ย ด๊บ-ลิ่ว เธี้ยง เญย เฒี่ยง โห่, โคฮ้าด เมี่ยน อ๋อย หฒุ ต้าย แกง. มป่า นิ่น บัว ธิน-หม่าน ไม้ ตู๋ง มัวะ น้าย เต๋ย ธีง-เหฑ่ง เญย กะน้าย. มัวะ นอ, อ๋อย หฒุ ไต่ อ๊ะ. เซ ต้ง โคฮ้าด เมี่ยน อ๋อย หฒุ แกง น้าย เต๋ย หวุ่ย ปวั้ง ด๊บ-ลิ่ว เญย กะน้าย.

16“อาโลน ไซ เมี่ยน เญย ตอน, เอเลอาซา, อ๋อย หฒุ โก๋ว ปั๊ว ตัง เญย โย่ว เหธา ฮูง, เหฒี่ย เญย ล่าง หฒิ, เหธา ออน เมี่ยน เญย ธีง-เหฑ่ง โย่ว. นิ่น อ๋อย หฒุ โก๋ว หวุ่ย ปวั้ง เญย ด๊บ-ลิ่ว เหธา เยียม ด๊บ-ลิ่ว กะญั์ว เญย เหยียด ฒู้ง กะน้าย, เซ โก๋ว เหฑ่ง สีง ติ่น เหธา สีง ติ่น เญย เหยียด ฒู้ง จา-สี่.”

17เฒี้ยว ก๊อง บั๋ว โมเซ เหธา อาโลน,

18“ไม้ ตู๋ง ปุน โคฮ้าด เญย ปู้ง ป่วน เมี่ยน เยียม เลวี เมี่ยน กะญั์ว หฒุ ไพ กวั่ง.

19เหว่ย ปุน น้าย เต๋ย เมี่ยน ไฮ่ มี่ง นิด ฟัด น้าย เต๋ย ธีง-เหฑ่ง เจี๋ย เญย กะน้าย หย่า ไม้ หฒุ ไต่, ม่าย แหม่ง เฒี่ยง เจี๊ยน เญย, อ๋อย หฒุ ฮนั้ง น้าย นอ เถง นิ่น บัว. อาโลน เหธา นิ่น เญย ตอน บัว อ๋อย หฒุ เปียะ สีง ติ่น พ้าย เหฒียง หาย เต้า อ๋อย หฒุ โหฒว หาย หญู่ง กง, หาย เต้า อ๋อย หฒุ แกง หาย หญู่ง.

20มป่า โคฮ้าด เมี่ยน ธิน-หม่าน ไม้ ตู๋ง เปียะ มี่ง หมั่ง น้าย เต๋ย ธีง-เหฑ่ง เญย กะน้าย, เหยียด ตั้ง หย่า ไม้ ตู๋ง หมั่ง. ไม้ เฒย แอ๊ะ, อ๋อย หฒุ ไต่ อ๊ะ.”

21เฒี้ยว ก๊อง บั๋ว โมเซ,

22“อ๋อย หฒุ ซ้าว เหฑ่ง เกโซน เมี่ยน หฒิว นิ่น บัว เญย ปู้ง ป่วน เหธา นิ่น บัว เญย เมี่ยน ป่วน.

23ซ้าว เหฑ่ง ฟ่า เหฒียบ หฮญัง เถา ฮม์ เหฒียบ หฮญัง เญย มจั่ง ตอน, ต้ง ไฮ่ เยียม หวุ่ย ปวั้ง เญย ด๊บ-ลิ่ว ฟู-สู โหฒว กง เญย เหยียด ฒู้ง.

24“น้าย เซ เกโซน เมี่ยน เญย ปู้ง ป่วน อ๋อย หฒุ โหฒว กง ฟู-สู หย่า อ๋อย หฒุ เปี้ยน กะน้าย.

25นิ่น บัว อ๋อย เปี้ยน ธอง หฒั่ง ทิน-ฮู่ง เญย ด๊บ-ลิ่ว เญย เดีย, เซ ธอง หวุ่ย ปวั้ง ด๊บ-ลิ่ว เญย เดีย, ต้ง ก๊ม เญย กะน้าย เหธา ก๊ม กู้ หงว่าย ฟัวะ ต้าย หลง เญย แซง-คู้ ด๊บ, เหธา เปียะ หวุ่ย ปวั้ง ด๊บ-ลิ่ว เญย แบะ แก้ง เดีย,

26เว่ย ด๊บ-ลิ่ว เหธา เหฒี่ย-ต้อง แบะ หลาด เหธา แบะ หลาด แก้ง เญย เดีย, ฮลาง, เหธา เหยียด ฒู้ง เฉียม หล่ง เญย จา-สี่. ด๊อด หฒุ เกโซน เมี่ยน อ๋อย หฒุ หลิ่ว เล์ย น้าย ปั๊วะ กะน้าย.

27นิ่น บัว ฟู-สู โหฒว เญย เหยียด ฒู้ง กง, ไม้ กุ๊น แกง ด๊บ-ลิ่ว เญย กะน้าย ไฟ โหฒว หาย หญู่ง กง, เซ เยียม อาโลน เหธา นิ่น เญย ตอน บัว เญย ปั์ว-เดี๊ย. เม่ย กั้น อ๋อย หฒุ พ้าย เหฒียง นิ่น บัว อ๋อย หฒุ เปี้ยน เญย หญู่งๆ.

28น้าย เซ เกโซน เมี่ยน เญย ปู้ง ป่วน เยียม หวุ่ย ปวั้ง ด๊บ-ลิ่ว โหฒว เญย กง. นิ่น บัว โหฒว เญย หญู่งๆ เซ เยียม อาโลน ไซ เมี่ยน เญย ตอน, อิทามา, เญย ปั์ว-เดี๊ย.

29“อ๋อย หฒุ ซ้าว เมลาลี เมี่ยน หฒิว นิ่น บัว เญย ปู้ง ป่วน เหธา นิ่น บัว เญย เมี่ยน ป่วน.

30ซ้าว เหฑ่ง เยียม ฟ่า เหฒียบ หฮญัง เถา ฮม์ เหฒียบ หฮญัง เญย มจั่ง ตอน, ต้ง ไฮ่ เปียะ ต้าย ฟู-สู, เยียม หวุ่ย ปวั้ง ด๊บ-ลิ่ว โหฒว กง เญย เต้าๆ.

31นิ่น บัว เยียม หวุ่ย ปวั้ง เญย ด๊บ-ลิ่ว อ๋อย หฒุ ฟู-สู เญย ม่าย ฮนั้ง น้าย. อ๋อย หฒุ เปี้ยน หฒั่ง ทิน-ฮู่ง เญย ด๊บ-ลิ่ว เญย ชอง, กู้ง กั่ง เดี๋ยง, ต่ง, เหธา ทบ ต่ง เญย ท้าบ,

32แอ๋ง เหธา เว่ย ก๋อม ด๊บ-ลิ่ว เญย หลาด ต่ง เหธา ทบ ต่ง เญย ท้าบ, บอง เดา ธอง หลาด เดีย เญย ต่ง, ฮลาง, เหยียด ฒู้ง โหฒว ชอง เญย กะน้าย แอ๋ง เหธา น้าย ปั๊วะ เฉียม หล่ง เญย เหยียด ฒู้ง กะน้าย เหธา หญู่งๆ จา-สี่. อ๋อย หฒุ หฒิว บั๋ว พ้าย เหฒียง หาย เต้า อ๋อย หฒุ เปี้ยน เญย หาย หญู่ง.

33น้าย เซ เมลาลี เมี่ยน เญย ปู้ง ป่วน อ๋อย หฒุ เยียม หวุ่ย ปวั้ง ด๊บ-ลิ่ว โหฒว เญย กง, หย่า เยียม อาโลน ไซ เมี่ยน เญย ตอน, อิทามา, เญย ปั์ว-เดี๊ย.”

34โมเซ, อาโลน เหธา หฒวัง เมี่ยน เญย เปย๊ย เฒ้ย ซ้าว เหฑ่ง โคฮ้าด เมี่ยน หฒิว นิ่น บัว เญย ปู้ง ป่วน เหธา นิ่น บัว เญย เมี่ยน ป่วน.

35เยียม ฟ่า เหฒียบ หฮญัง เถา ฮม์ เหฒียบ หฮญัง, ไฮ่ เยียม หวุ่ย ปวั้ง เญย ด๊บ-ลิ่ว ฟู-สู, โหฒว กง เญย เหยียด ฒู้ง มจั่ง ตอน

36หฒิว นิ่น บัว เญย ปู้ง ป่วน ม่าย อี ธิน เธี้ยด แป๊ะ ฮม์ เหฒียบ เต้า.

37น้าย เซ โคฮ้าด เมี่ยน เญย ปู้ง ป่วน, เซ เหยียด ฒู้ง เยียม หวุ่ย ปวั้ง ด๊บ-ลิ่ว ฟู-สู เญย เมี่ยน. โมเซ เหธา อาโลน ซ้าว เหฑ่ง นิ่น บัว หฒิว เฒี้ยว หล่ง โมเซ พ้าย เญย หว่า.

38นิ่น บัว หย่า ซ้าว เหฑ่ง เกโซน เมี่ยน หฒิว นิ่น บัว เญย ปู้ง ป่วน เหธา เมี่ยน ป่วน.

39เยียม ฟ่า เหฒียบ หฮญัง เถา ฮม์ เหฒียบ หฮญัง, ไฮ่ เยียม หวุ่ย ปวั้ง ด๊บ-ลิ่ว ฟู-สู, โหฒว กง เญย เหยียด ฒู้ง มจั่ง ตอน,

40หฒิว ปู้ง ป่วน เหธา เมี่ยน ป่วน ม่าย อี ธิน หลัวะ แป๊ะ ฟ่า เหฒียบ เต้า.

41น้าย เซ เกโซน เมี่ยน เญย ปู้ง ป่วน, เซ เหยียด ฒู้ง เยียม หวุ่ย ปวั้ง ด๊บ-ลิ่ว ฟู-สู เญย เมี่ยน. โมเซ เหธา อาโลน ซ้าว เหฑ่ง นิ่น บัว หฒิว เฒี้ยว พ้าย เญย หว่า.

42นิ่น บัว หย่า ซ้าว เหฑ่ง เมลาลี เมี่ยน หฒิว นิ่น บัว เญย ปู้ง ป่วน เหธา เมี่ยน ป่วน.

43เยียม ฟ่า เหฒียบ หฮญัง เถา ฮม์ เหฒียบ หฮญัง, ไฮ่ เยียม หวุ่ย ปวั้ง เญย ด๊บ-ลิ่ว ฟู-สู, โหฒว กง เญย เหยียด ฒู้ง มจั่ง ตอน,

44หฒิว นิ่น บัว เญย เมี่ยน ป่วน ม่าย ปัว ธิน หญี่ แป๊ะ เต้า.

45น้าย เซ เมลาลี เมี่ยน เญย ปู้ง ป่วน. โมเซ เหธา อาโลน ซ้าว เหฑ่ง นิ่น บัว หฒิว เฒี้ยว หล่ง โมเซ พ้าย เญย หว่า.

46โมเซ, อาโลน เหธา อิสะลาเอน เมี่ยน เญย เปย๊ย เฒ้ย ฯฒฯ หฒิว ปู้ง ป่วน, หฒิว เมี่ยน ป่วน, ซ้าว เหฑ่ง เลวี เมี่ยน.

47เยียม ฟ่า เหฒียบ หฮญัง เถา ฮม์ เหฒียบ หฮญัง, ไฮ่ เยียม หวุ่ย ปวั้ง เญย ด๊บ-ลิ่ว โหฒว กง ฟู-สู หย่า เถง เปี้ยน ด๊บ-ลิ่ว วั้ว เต๋ย เหยียด ฒู้ง มจั่ง ตอน,

48ม่าย เหฮยียด ธิน ฮม์ แป๊ะ เป๊ด เหฒียบ เต้า.

49หฒิว เฒี้ยว บั๋ว โมเซ, นิ่น บัว พ้าย เหฒียง เก๊าะ-เมี่ยน เญย กง, เก๊าะ-เมี่ยน อ๋อย หฒุ เปี้ยน หาย หญู่ง. ฮนั้ง น้าย นอ, หฒิว เฒี้ยว พ้าย เญย หว่า, โมเซ ซ้าว เหฑ่ง นิ่น บัว.

← Chapter 3 Jump to: Chapter 5 →