Numbers 14

Mien Bible (Thai Script) © Thailand Bible Society, 2007

1วั้ว ม์วน หฒวัง เมี่ยน ชะ เญี้ยม บุย เญย.

2อิสะลาเอน เญย หฒวัง เมี่ยน งบ โมเซ เหธา อาโลน. นิ่น บัว ก๊อง, “เฝย ตุ๊ เยีย บัว เยียม อียิบ เต่ย-ปูง ไต่, ไฟ เยียม น้าย เต่ย-ปูง-ฮวาง ไต่ ไม้ เฒย!

3เฒี้ยว เหว่ย หาย ติ่ว ต้อ เยีย บัว เถา น้าย นอม เต่ย-ปูง หฒุ หฑุ ด๊าว ไต๋? เลี่ยม เยีย บัว เญย เอ๊า-เจว๊ย หย่า อ๋อย หฒุ ธ้าง มี่ง. เยีย บัว หฑวน อียิบ เต่ย-ปูง ฒู้ง เก้า หลง ไม้ เฒ์ย?”

4ล่าน หย่า บั๋ว ล่าน, “บัว กิ๊น เต้า โหฒว เปย๊ย เฒ้ย ต้อ บัว หฑวน อียิบ เต่ย-ปูง เอาะ?”

5โมเซ เหธา อาโลน ฯฒฯ บ๊าบ เหฌี่ย อิสะลาเอน หฒวัง เมี่ยน กั๊บ ฒุ้น เญย ต๋อง หฑะเฮมียน.

6นุน เญย ตอน, โยซูวา, เหธา เยฟุนเน เญย ตอน, คาเล้บ, ต้ง มี่ง ฒ่า เต่ย-ปูง เญย อี เต้า, เฑ่า ไห่ ฯฒฯ เป๊ด กั้น เญย ลุย,

7หย่า ก๊อง บั๋ว หฒวัง เมี่ยน, “เยีย บัว มี่ง โย่ว ฒ่า ก๋อม วั้ว นอม เต่ย-ปูง, ปวัด เต่ย-ปูง หฒะเก้ง! หลง ไห่.

8สี ก๊อง เฒี้ยว หอบ เฮญี้ยว บัว นอ, นิ่น ไฮ่ ต้อ บัว เปียะ วั้ว นอม เต่ย-ปูง, หย่า เฒาะ วั้ว นอม เต่ย-ปูง ปุน บัว. เซ เดา-โท้ว หลง เญย เต่ย-ปูง.

9มป่า ไม้ ตู๋ง แหง่ง เฒี้ยว, หย่า ไม้ ตู๋ง กั้ม เหฑีย เยียม วั้ว นอม เต่ย-ปูง เญย เมี่ยน. บัว ฮู่ง เห่ เบ๊าะ ฮี่ง นิ่น บัว. เฑีย นิ่น บัว วั้ว หญู่ง ชะ หฒิด หมี่ อ๊ะ. เฒี้ยว หย่า เหธา บัว เยียม. ไม้ ตู๋ง กั้ม เหฑีย นิ่น บัว ม่าะ!”

10หฒวัง เมี่ยน ฯฒฯ ก๊อง อ๋อย เฒาะ หละเปย๊ย ฒง ไต่ นิ่น บัว. วั้ว หฒั่น, เฒี้ยว เญย ฌัง-หล่าง หิ่น ธ้วด ต้าย เยียม หวุ่ย ปวั้ง เญย ด๊บ-ลิ่ว, ปุน อิสะลาเอน เญย หฒวัง เมี่ยน ปวัด.

11เฒี้ยว บั๋ว โมเซ, “น้าย เต๋ย เมี่ยน อ๋อย หมั่ง เผีย เยีย เถา หาย หฒั่น? ไม้ กุ๊น เยีย เยียม นิ่น บัว บุด๋ง โหฒว บัวะ ฮ่อง เญย จั๋ง-โห่ ด่ง หน่าย ธั้ม, นิ่น บัว หธ่อ อ๋อย แหง่ง เจี๊ยน ไม้ เสียน เยีย เถา หาย หฒั่น?

12เยีย อ๋อย ปุน นิ่น บัว ปุ๊ด ต้ม ววน-แป่ง เหมียด นิ่น บัว, ปุน นิ่น บัว ไม้ ตุ๊ หฑิบ วั้ว นอม เต่ย-ปูง. มป่า เยีย อ๋อย ปุน เม่ย โหฒว เหยียด ฝีง เญย อง-ถาย. วั้ว ฝีง อ๋อย โหฒว เก้า โฮล, เก้า เฮ้น นิ่น บัว เญย ฝีง.”

13โมเซ ก๊อง บั๋ว เฒี้ยว, “เม่ย หล่ง เม่ย เญย ต้ม ชะ ต้อ น้าย เต๋ย เมี่ยน เยียม อียิบ เมี่ยน บุด๋ง ธ้วด ต้าย. อียิบ เมี่ยน ไฮ์ เม่ย ไต๋ เม่ย เญย เมี่ยน,

14นิ่น บัว ฯฒฯ บั๋ว เยียม เจี๊ยน น้าย นอม เต่ย-ปูง เญย เมี่ยน. โอ เฒี้ยว อ่า, น้าย นอม เต่ย-ปูง เญย เมี่ยน ฒู้ง ไฮ์ ก๊อง เม่ย เหธา น้าย เต๋ย เมี่ยน เยียม. เม่ย เฮมียน ต๋อย เฮมียน ปุน เมี่ยน ปวัด เจี๋ย. เม่ย เญย บ๋วน เยียม เจี๊ยน นิ่น บัว กู้ หงว่าย. ลู่ง ฮนอย หฒั่น เฒี้ยว เยียม บ๋วน-เดี้ยว ต้อ นิ่น บัว. ลู่ง ม์วน หฒั่น เยียม โต์ว-เดี้ยว.

15สี ก๊อง เฒี้ยว โหฒว เหยียด หฑุ่น ไต๋ เหฑ่ง น้าย เต๋ย อิสะลาเอน เมี่ยน, เป๊ย ไต๋ เหยียด เต้า เมี่ยน, ฝีงๆ ไฮ์ เม่ย ฮนั้ง น้าย นอ โหฒว นิ่น บัว ฯฒฯ ก๊อง,

16‘ เฒี้ยว ไม้ ม่าย ปั้น เหฒ่ย ต้อ น้าย เต๋ย เมี่ยน เปียะ นิ่น โฮ้ว ปุน นิ่น บัว วั้ว นอม เต่ย-ปูง, ฯฒฯ เยียม วั้ว เต่ย-ปูง-ฮวาง ไต๋ เหฑ่ง นิ่น บัว.’

17“ เฒี้ยว อ่า, อี้ หฒั่น โท้ ปุน เม่ย เญย ต้ม ชะ ปิ๋ว เม่ง ธ้วด ต้าย หฒิว เม่ย ก๊อง เจี๋ย เญย หว่า.

18เม่ย ก๊อง, ‘ เฒี้ยว ไม้ เฉีย เจี์ย เซี้ยบ, เหฒียบ ฒัวะ เญย ฮนั้ม เมี่ยน, กวั่ง เมี่ยน เญย ฒุ์ย เหธา เมี่ยน แหง่ง เฒี้ยว เญย สี่. มป่า ไม้ เฒ์ย ไม้ ปุน หฒุ ตี่ง ฒุ์ย, ฒู้ง ตี่ง เตี๋ย หม่า เญย ฒุ์ย เหฌี่ย เถา ปัว เปยย ต่อย ฟุน-ฟะ.’

19เฒี้ยว อ่า, หฒิว เม่ย เหฒียบ ฒัวะ เญย ฮนั้ม ไห่ เมี่ยน, โท้ กวั่ง ฆอย น้าย เต๋ย เมี่ยน เญย ฒุ์ย, ฮนั้ง นิ่น บัว เยียม อียิบ เต่ย-ปูง ธ้วด ต้าย เถา อี้ หฒั่น เม่ย กวั่ง นิ่น บัว เญย ฒุ์ย วั้ว นอ.”

20เฒี้ยว เตา, “หฒิว เม่ย โท้ เญย หว่า เยีย กวั่ง นิ่น บัว เญย ฒุ์ย.

21มป่า เยีย หฒะเก้ง เฒี่ยง เจี๊ยน, เยีย เญย ฌัง-หล่าง หย่า อ๋อย ปวั๊ง เหฑ่ง ลู่ง เดี๊ย. น้าย อี หญู่ง เซ เฒียน ไห่. ด่ง น้าย เต๋ย เฒียน

22เซ เยีย โฮ้ว เจี๊ยน น้าย เต๋ย เมี่ยน, ไม้ ม่าย เหยียด เต้า ตุ๊ เฒี่ยง เจี๊ยน เถา เปียะ วั้ว นอม เต่ย-ปูง. นิ่น บัว ปวัด เจี๋ย เยีย เญย ฌัง-หล่าง, หย่า ปวัด เจี๋ย เยีย เยียม อียิบ เต่ย-ปูง เหธา เต่ย-ปูง-ฮวาง โหฒว บัวะ ฮ่อง เญย จั๋ง-โห่, มป่า นิ่น บัว เสย เยีย เหฒียบ หฑุ่น, หย่า ไม้ หมวัง เยีย เญย หว่า.

23นิ่น บัว ฯฒฯ เหยียด ลิ์ว ไม้ ตุ๊ เปียะ เยีย แล์ง ปุน นิ่น บัว เญย อง-ถาย เญย เต่ย-ปูง. หมั่ง เผีย เยีย วั้ว เต๋ย ไม้ ม่าย เหยียด เต้า ตุ๊ ปวัด.

24มป่า เยีย เญย โปว, คาเล้บ, เญย เฮญี้ยว เหธา วั้ว เต๋ย ไม้ ฟี่ ฮนั้ง. นิ่น หย่า กัน เหฑ่ง เยีย. เยีย ฯฒฯ อ๋อย ต้อ นิ่น เปียะ นิ่น ฒ่า ลิ์ว วั้ว นอม เต่ย-ปูง. นิ่น เญย เฒ้ย-ฟุน หย่า อ๋อย ตุ๊ หฑิบ.

25เหว่ย หฒุ อามาเล้ก เมี่ยน เหธา คานาอัน เมี่ยน เยียม วั้ว เต๋ย ห่อง หฒั่ง เญย ต๋อง, ฌัง ฮนอย เม่ย บัว อ๋อย หฒุ ต๋าว ซิน ธ้วด เจ๊า หูง เจี๊ยน เต่ย-ปูง-ฮวาง, กัน ค้อย-ซิ วั้ว ติ้ว เจ๊า มี่ง.”

26เฒี้ยว ก๊อง บั๋ว โมเซ เหธา อาโลน,

27“น้าย เต๋ย เอ๊าะ ไห่ เญย หฒวัง เมี่ยน อ๋อย งบ เยีย เถา หาย หฒั่น? เยีย ไฮ์ น้าย เต๋ย อิสะลาเอน เมี่ยน งบ เยีย, ไกว๋ เยีย.

28เหว่ย น้าย อ๋อย หฒุ บั๋ว นิ่น บัว, ‘ เฒี้ยว ก๊อง, “เยีย เฒี่ยง เจี๊ยน เยีย กั้น เญย แหม่ง ก๊อง, หฒิว ไฮ์ เม่ย บัว ก๊อง เญย หว่า เยีย ฒู้ง อ๋อย โหฒว ปุน เม่ย บัว อ๊ะ.

29เอย ซ้าว เมี่ยน วั้ว หฒั่น, เยียม หญี่ เหฒียบ หฮญัง ฝาว แหมง เญย เมี่ยน, ต้ง งบ เยีย วั้ว เต๋ย, ฒู้ง อ๋อย หฒุ เยียม น้าย เต่ย-ปูง-ฮวาง ด๊อด เหฑ่ง.

30ธ้วด ลิ์ว เยฟุนเน เญย ตอน, คาเล้บ, เหธา นุน เญย ตอน, โยซูวา, ไม้ ม่าย เหยียด เต้า ไฮ่ ตุ๊ เปียะ เยีย โฮ้ว ปุน นิ่น บัว เยียม วั้ว นอม เต่ย-ปูง.

31มป่า เม่ย บัว เญย ฝุเจว๊ย, ต้ง เม่ย บัว ก๊อง อ๋อย หฒุ ธ้าง มี่ง, เยีย อ๋อย ต้อ เปียะ เม่ย บัว เฆ่ม วั้ว นอม เต่ย-ปูง. วั้ว นอม เต่ย-ปูง ฯฒฯ เป๋น นิ่น บัว เญย หมี่ อ๊ะ.

32มป่า เม่ย บัว แอ๊ะ, อ๋อย หฒุ เยียม น้าย เต่ย-ปูง-ฮวาง ด๊อด เหฑ่ง.

33เม่ย บัว เญย ฝุเจว๊ย อ๋อย หฒุ เยียม น้าย โหฒว หมั่ง ยู่ง เญย เมี่ยน. เซ หลาย เม่ย บัว ไม้ เหฒียบ ฒัวะ, นิ่น บัว หธีง หฒุ เสี่ยว โค้ว ปวั๊ง เฝย เหฒียบ หฮญัง, ฒั้ว เถา เม่ย บัว เต้าๆ ไต่ เหฑ่ง.

34เม่ย บัว อ๋อย หฒุ เสี่ยว เม่ย บัว กั้น เญย ฒุ์ย ปวั๊ง เฝย เหฒียบ หฮญัง. หฒิว มี่ง ฒ่า เต่ย-ปูง วั้ว เต๋ย เฝย เหฒียบ ฮนอย, อ๋อย หฒุ เหยียด หฮญัง ตี๊ เหยียด ฮนอย. เม่ย บัว ฯฒฯ ฮิ้ว ตุ๊ เยีย ไม้ หอบ เฮญี้ยว เม่ย บัว เซ ฮนั้ง หาย นอ.”’

35เยีย, เฒี้ยว, ก๊อง ลิ์ว อ๊ะ. เยีย ด่ง หาย ฒู้ง อ๋อย ฮนั้ง น้าย นอ โหฒว ปุน น้าย เต๋ย หว่าย ไห่ เญย หฒวัง เมี่ยน, ต้ง กั๊บ เฮญี้ยว เหธา เยีย ต๋อย-เตก เญย เมี่ยน. นิ่น บัว อ๋อย หฒุ เยียม น้าย เต่ย-ปูง-ฮวาง ปวั้ง หฒุ นิ่น บัว เญย เซ้ด เมว์ย ฮนอย. อ๋อย หฒุ เยียม น้าย ไต่ เหฑ่ง อ๊ะ.”

36โมเซ พ้าย มี่ง ฒ่า เต่ย-ปูง เญย เมี่ยน หฑวน ต้าย ก๊อง โตะ เต่ย-ปูง เญย เจ๊า-โหล่ว ดั๊ว หฒวัง เมี่ยน ไกว๋ นิ่น,

37เซ หฑวน ต้าย ฒุ่น หว่าย เญย เฝียน ก๊อง โตะ วั้ว นอม เต่ย-ปูง วั้ว เต๋ย, หฒุ เฒี้ยว ปุน นิ่น บัว ปุ๊ด ต้ม ววน-แป่ง ไต่ เหฑ่ง หมี่ อ๊ะ.

38มี่ง ฒ่า เต่ย-ปูง เญย เมี่ยน ขูง ม่าย นุน เญย ตอน, โยซูวา, เหธา เยฟุนเน เญย ตอน, คาเล้บ, ม่าย แหม่ง เฒี่ยง ฮนั้ง.

39โมเซ ก๊อง น้าย เต๋ย เจ๊า-โหล่ว ปุน อิสะลาเอน เญย หฒวัง เมี่ยน หมวัง. แปะ ฝีง ฯฒฯ เฑ่า ไห่, ชะ เญี้ยม.

40ตะเหญ่ย ดอม เฑี้ยว เญย, นิ่น บัว ฝาว บง ฮลัง เต๋ย เญย ต๋อง มี่ง ก๊อง, “เยีย บัว อี้ หฒั่น อ๋อย มี่ง เปียะ เฒี้ยว แล์ง ปุน เญย ต๋อง. เยีย บัว ป์าม ฒุ์ย หมี่ อ๊ะ.”

41มป่า โมเซ ก๊อง, “เม่ย บัว เหว่ย หาย ติ่ว แหง่ง เฒี้ยว เญย หลี่ง? เม่ย บัว ไม้ ไฮ่ โหฒว ไม้ เฒี่ยง สี่.

42ไม้ ตู๋ง มี่ง เหว่ย หฒุ เฒี้ยว ไม้ เหธา เม่ย บัว เยียม. เม่ย บัว ฯฒฯ หฒุ วิน-วั้ง ไต๋ เม่ย บัว,

43เหว่ย หฒุ อามาเล้ก เมี่ยน เหธา คานาอัน เมี่ยน เยียม เม่ย บัว เญย วั้ว ด่าง แหมง. เม่ย บัว อ๋อย หฒุ นิ่น บัว เญย หฑุ ด๊าว ไต๋. เฒี้ยว ไม้ เหธา เม่ย บัว เยียม เหว่ย หฒุ เม่ย บัว ฮวิน ฆาง, ไม้ กัน เจี๊ยน เฒี้ยว. ”

44มป่า หฒวัง เมี่ยน ก๊าม ฝาว บง ฮลัง เต๋ย เญย ต๋อง มี่ง ไม้ กุ๊น โมเซ เหธา เฒี้ยว เญย แล์ง แหง่ง หว่า ฟาง ไม้ ธ้วด ด๊บ-ลิ่ว เธี้ยง.

45เยียม วั้ว บง เญย อามาเล้ก เมี่ยน เหธา คานาอัน เมี่ยน ฯฒฯ เหฌี่ย ต้าย เบ๊าะ ฮี่ง, หฒุ่น นิ่น บัว เถา โฮมา เต่ย.

← Chapter 13 Jump to: Chapter 15 →