Numbers 22

Mien Bible (Thai Script) © Thailand Bible Society, 2007

1ฆะฮ้า อิสะลาเอน เมี่ยน ธ้วด เจ๊า มี่ง เถา โมอับ เญย เดา-แป้ง, จอแดน ด้าย ตง ปูง, เยลีโค ฒี่ง ต๋อย-หง่าน.

2โมอับ เต่ย-ปูง เญย ฮู่ง, สิบโป เญย ตอน, บาล้าก, ปวัด อิสะลาเอน เมี่ยน โหฒว ปุน อาโมไล เมี่ยน เญย เหยียด ฒู้ง สี่.

3โมอับ เมี่ยน เก้ง! กั้ม เหฑีย ไห่ เหว่ย หฒุ อิสะลาเอน เมี่ยน ธั้ม! ไห่. โมอับ เมี่ยน กั้ม เหฑีย เกา อิสะลาเอน เมี่ยน, นิ่น บัว ฒู้ง เฮญี้ยว หว่าย เหฑ่ง.

4โมอับ เมี่ยน ฯฒฯ บั๋ว มีเดียน เมี่ยน เญย เมี่ยน โก๋, “น้าย กวั้น ด่ง หน่าย ธั้ม เญย เมี่ยน อ๋อย นะ เบี่ย เหฑ่ง ฮวีง หฑวน เญย เหยียด ฒู้ง กะน้าย, ฮนั้ง ง่ง โก๊ว ไหฮล ฌัง เหฑ่ง เธี้ยง เญย เมี้ย นอ.” วั้ว หฒั่น สิบโป เญย ตอน, บาล้าก, โหฒว โมอับ เมี่ยน เญย ฮู่ง.

5นิ่น ฯฒฯ พ้าย เมี่ยน มี่ง บั๋ว เบโอ เญย ตอน, บาลาอัม, ต้าย. บาลาอัม เยียม นิ่น เญย ป๊วน-กั๊วะ, นิด ฟัด ยูเฟติด ด้าย, เปโท วั้ว. บาล้าก ก๊อง, “ม่าย เหยียด ฝีง เมี่ยน เยียม อียิบ เต่ย-ปูง ธ้วด ต้าย เยียม ปวั๊ง ลู่ง เดี๊ย เญย เดา-เป้ย. อี้ หฒั่น นิ่น บัว ฒู้ง ต้าย เยียม เจี๊ยน เยีย เญย ต๋อย-หง่าน.

6โท้ เม่ย อี้ หฒั่น ต้าย เถง เยีย เหฒียว นิ่น บัว, เหว่ย หฒุ นิ่น บัว เก้ง! เก้า เฮ้น เยีย. ฮนั้ง หน่าย, เหฑีย เยีย ไฮ่ เบ๊าะ ฮี่ง นิ่น บัว, หฒุ่น นิ่น บัว ธ้วด เต่ย-ปูง มเปย. เหว่ย หฒุ เยีย ฮิ้ว ตุ๊ เม่ย ปวัง หว่า หาย เต้า, วั้ว เต้า ฯฒฯ ตุ๊ ฟุ. เม่ย เหฒียว หาย เต้า, วั้ว เต้า หฒุ เหฒียว อ๊ะ.”

7โมอับ เหธา มีเดียน เมี่ยน เญย เมี่ยน โก๋ ฯฒฯ ธ้วด เจ๊า แอ๋ง ต้อ เจี๊ยน ธี้ง เหฒียว เญย ญ่าน มี่ง. เถา บาลาอัม วั้ว, นิ่น บัว เฒียง บาล้าก เญย หว่า บั๋ว นิ่น.

8บาลาอัม บั๋ว นิ่น บัว, “เม่ย บัว เปว๋ย ม์วน น้าย โอ่. หฒิว เฒี้ยว บั๋ว เยีย, เยีย ฯฒฯ บั๋ว เม่ย บัว.” วั้ว เต๋ย โมอับ เมี่ยน เญย เจียน ฯฒฯ ฮิด บาลาอัม วั้ว.

9ทิน-ฮู่ง ต้าย เถา บาลาอัม วั้ว หน่าย ก๋า นิ่น, “เหธา เม่ย เยียม น้าย เต๋ย เมี่ยน เซ หาย เต้า?”

10บาลาอัม เตา ทิน-ฮู่ง, “โมอับ เต่ย-ปูง เญย ฮู่ง, สิบโป เญย ตอน, บาล้าก, พ้าย เมี่ยน ต้าย บั๋ว เยีย,

11‘ม่าย ฝีง เมี่ยน เยียม อียิบ เต่ย-ปูง ธ้วด ต้าย เยียม ปวั๊ง ลู่ง เดี๊ย เญย เดา-เป้ย. อี้ หฒั่น โท้ เม่ย ต้าย เหฒียว นิ่น บัว. ฮนั้ง หน่าย เหฑีย เยีย ไฮ่ เหธา นิ่น บัว เบ๊าะ จ๋า แอ๋ง หฒุ่น นิ่น บัว เปย๋า น่อ.’”

12ทิน-ฮู่ง ก๊อง บั๋ว บาลาอัม, “ไม้ ตู๋ง เหธา น้าย เต๋ย เมี่ยน มี่ง, หย่า ไม้ ตู๋ง เหฒียว อิสะลาเอน เมี่ยน, เหว่ย หฒุ เยีย เหธย ฟุ ปุน นิ่น บัว หมี่ อ๊ะ.”

13ตะเหญ่ย ดอม, บาลาอัม เจี์ย ซิน ต้าย บั๋ว เยียม บาล้าก ต้าย วั้ว เต๋ย โหฒว โฮล เญย เมี่ยน, “เม่ย บัว หฑวน เม่ย บัว กั้น เญย เต่ย-ปูง อ๊ะ, เหว่ย หฒุ เฒี้ยว ไม้ ปุน เยีย เหธา เม่ย บัว มี่ง.”

14วั้ว เต๋ย โมอับ เมี่ยน เญย เจียน ฯฒฯ หฑวน บาล้าก วั้ว ก๊อง, “บาลาอัม ไม้ คั้ง เหธา เยีย บัว ต้าย.”

15บาล้าก แอ๋ง พ้าย เต๋ย โหฒว โฮล เญย เมี่ยน มี่ง, เก้า ธั้ม หย่า ม่าย เม่ง เต้า เก้า โฮล ฒิ่น ด่าง วั้ว เต๋ย.

16นิ่น บัว มี่ง เถา บาลาอัม วั้ว ก๊อง, “สิบโป เญย ตอน, บาล้าก, ฮนั้ง น้าย นอ ก๊อง. ‘โท้ ไม้ ตู๋ง ปุน หาย หญู่ง ล่าน เจี๊ยน ปุน เม่ย ไม้ ตุ๊ เถา เยีย น้าย.

17เยีย อ๋อย ปุน เม่ย ตุ๊ ต้ม ฒี่ง เหญ่ย. เม่ย อ๋อย เยีย โหฒว หาย หญู่ง เยีย หย่า เอย เจี๊ยน โหฒว. โท้! ต้าย เถง เยีย เหฒียว น้าย เต๋ย เมี่ยน.’”

18มป่า บาลาอัม เตา บาล้าก พ้าย ต้าย เญย เมี่ยน, “ไม้ กุ๊น บาล้าก เฒาะ เหฑ่ง ปวั๊ง ฮู่ง ติ่น เญย เจียม ญ่าน ปุน เยีย, เยีย หย่า ไม้ ไฮ่ โหฒว เจี๋ย ด่าง เฒี้ยว, เยีย เญย ทิน-ฮู่ง, บั๋ว เญย. ต้ม สี่ ไฟ ฟิ้ว-สี่ ไม้ ไฮ่ โหฒว.

19อี้ หฒั่น โท้ เม่ย บัว เยียม ม์วน น้าย ฮนั้ง ฒิ่น ด่าง วั้ว เต๋ย นอ, เหว่ย ปุน เยีย ฮิ้ว ตุ๊ เฒี้ยว แอ๋ง อ๋อย จา บั๋ว หาย หญู่ง เยีย.”

20วั้ว ม์วน ทิน-ฮู่ง ต้าย ก๊อง บั๋ว บาลาอัม, “เหว่ย หฒุ น้าย เต๋ย เมี่ยน ต้าย ล์อ เม่ย, เม่ย กุ๊น เหธา นิ่น บัว มี่ง อ๊ะ. มป่า ขูง หฒิว เยีย บั๋ว เญย หว่า โหฒว ฮนั้ง.”

21ตะเหญ่ย ดอม, บาลาอัม เจี์ย ซิน ต้าย, เฒาะ เก้ ออน ปุ่ย เจี๊ยน นิ่น เญย ล่อ, กัน เจี๊ยน วั้ว เต๋ย โมอับ เมี่ยน เญย เจียน มี่ง.

22มป่า ทิน-ฮู่ง เฉีย เจี์ย ไห่ เหว่ย หฒุ บาลาอัม มี่ง. เฒี้ยว เญย ฟิน-เมี่ยน ฯฒฯ ต้าย โซ้ว เจี๊ยน เจ๊า ตั๊ง เจี๊ยน นิ่น. วั้ว หฒั่น บาลาอัม เก้ เจี๊ยน ล่อ, แอ๋ง ม่าย อี เต้า โปว กัน นิ่น มี่ง.

23ล่อ ปวัด เฒี้ยว เญย ฟิน-เมี่ยน โซ้ว เจี๊ยน วั้ว เจ๊า นั้น เจี๊ยน หฑุ ด๊าว. ล่อ ฯฒฯ ซิ้ม ธ้วด เจ๊า-เฮลน เปียะ เด่ย มี่ง. บาลาอัม ฯฒฯ เบ๊าะ ล่อ, อ๊าบ ล่อ แอ๋ง ฝาว วั้ว เจ๊า.

24เฒี้ยว เญย ฟิน-เมี่ยน แอ๋ง มี่ง โซ้ว เจี๊ยน อี นอม อะหงุ่น หฮวีง บุด๋ง, เจ๊า เหบ เญย ต๋อง. อี ปูง เจ๊า-เฮลน หย่า ม่าย หละเปย๊ย-หลาด.

25ล่อ ปวัด เฒี้ยว เญย ฟิน-เมี่ยน ฯฒฯ เบ๋ง เจี๊ยน หลาด เจี๋ย, หฌาบ หฒุ บาลาอัม เญย เหฒา. บาลาอัม ฯฒฯ แอ๋ง เบ๊าะ นิ่น เญย ล่อ.

26เฒี้ยว เญย ฟิน-เมี่ยน แอ๋ง เจี๋ย มี่ง โซ้ว เจี๊ยน เก้า เหบ เจี๋ย เญย เหยียด นอม ต๋อง. หฒาย แหมง, บย่าว แหมง, ไม้ ม่าย ต๋อง มี่ง อ๊ะ.

27ล่อ ปวัด เฒี้ยว เญย ฟิน-เมี่ยน นิ่น ฯฒฯ บ๊าบ เหฌี่ย. บาลาอัม หธ่อ เก้ เจี๊ยน เญย. บาลาอัม เฉีย เจี์ย! ไห่, หล่ง ปย๊า-บย่า เบ๊าะ.

28เฒี้ยว ปุน ล่อ ไฮ่ ก๊อง หว่า บั๋ว บาลาอัม, “เยีย โหฒว หาย หญู่ง ปุน เม่ย, เม่ย หธีง ต้าย เบ๊าะ เยีย น้าย เต๋ย ปัว หฑุ่น?”

29บาลาอัม เตา ล่อ, “เม่ย โหฒว ปุน เยีย ป่าย เฮมียน. สี ก๊อง เยีย เญย ปั์ว นั้น เจี๊ยน หฑุ ด๊าว นอ, เยีย อี้ หฒั่น ฒู้ง ไต๋ เม่ย อ๊ะ.”

30ล่อ แอ๋ง ก๊อง บั๋ว บาลาอัม, “เยีย ไม้ เฒ์ย เม่ย กั้น เญย ล่อ, ต้ง เม่ย เหยียด เสย เก้ เถา อี้ หฒั่น ไฟ? เยีย ฮนั้ง น้าย นอ โหฒว เจี๋ย ปุน เม่ย เญย ไฟ?” บาลาอัม ก๊อง, “ไม้ โหฒว เจี๋ย.”

31วั้ว หฒั่น เฒี้ยว ปุน บาลาอัม เญย มฒีง ไฮ่ หมั่ง ตุ๊ ปวัด เฒี้ยว เญย ฟิน-เมี่ยน นั้น เจี๊ยน หฑุ ด๊าว โซ้ว เจี๊ยน วั้ว เจ๊า. บาลาอัม ฯฒฯ บ๊าบ เหฌี่ย เดา.

32เฒี้ยว เญย ฟิน-เมี่ยน หน่าย นิ่น, “เม่ย เหว่ย หาย ติ่ว เบ๊าะ เม่ย เญย ล่อ เถา ปัว หฑุ่น? เยีย ต้าย น้าย ตั๊ง เม่ย เญย เจ๊า เหว่ย หฒุ เม่ย โหฒว เญย เซ แหง่ง เจี๊ยน เยีย โหฒว.

33ล่อ ปวัด เยีย หย่า ซิ้ม เพียน น้าย เต๋ย ปัว หฑุ่น. สี ก๊อง นิ่น ไม้ ซิ้ม นอ, เยีย ฒู้ง ไต๋ เม่ย อ๊ะ. มป่า เลี่ยว เม่ย เญย ล่อ.”

34บาลาอัม ก๊อง บั๋ว เฒี้ยว เญย ฟิน-เมี่ยน, “เยีย ป์าม ฒุ์ย อ๊ะ. เยีย ไม้ ฮิ้ว ตุ๊ เม่ย เยียม วั้ว เจ๊า ตั๊ง เจี๊ยน เยีย. สี ก๊อง เม่ย ไม้ อะเฮน้ย เยีย มี่ง นอ, เยีย ฯฒฯ หฑวน อ๊ะ.”

35เฒี้ยว เญย ฟิน-เมี่ยน ก๊อง บั๋ว บาลาอัม, “กุ๊น เหธา น้าย เต๋ย เมี่ยน มี่ง อ๊ะ, มป่า ขูง เอย เยีย บั๋ว เญย หว่า ก๊อง ฮนั้ง.” บาลาอัม ฯฒฯ กัน เจี๊ยน บาล้าก พ้าย ต้าย วั้ว เต๋ย เจียน มี่ง หมี่ อ๊ะ.

36บาล้าก ไฮ์ ก๊อง บาลาอัม ต้าย, นิ่น ฯฒฯ มี่ง เถา โมอับ เต่ย-ปูง เญย กั๊บ-จ๋าย เก้า โก เจี๋ย เญย เหยียด นอม ฒี่ง, อานโนน ด้าย เฮลน วั้ว ฒิบ.

37บาล้าก ก๊อง บั๋ว บาลาอัม, “เยีย พ้าย เมี่ยน มี่ง เห่ว เม่ย ก๊าน ต้าย, เม่ย โหฒว หาย หญู่ง ไม้ ต้าย? เม่ย หล่าย เยีย ไม้ ปุน ฒี่ง เหญ่ย เก๋า ไฟ?”

38บาลาอัม เตา, “อี้ หฒั่น เยีย เซ เถา เม่ย น้าย อ๊ะ. มป่า เยีย ฝู่ง ไฮ่ หละไกว้ ก๊อง หาย หญู่ง? ทิน-ฮู่ง ฮนั้ง หาย นอ บั๋ว เยีย, เยีย ขูง ไฮ่ ฮนั้ง วั้ว นอ ก๊อง ฮนั้ง.”

39บาลาอัม ฯฒฯ เหธา เจี๊ยน บาล้าก มี่ง คีลิย้าดหุโซ้ด ฒี่ง.

40บาล้าก ไต๋ ง่ง เหธา ปะกี ยู่ง เหฒี่ย หย่า เฒาะ เต๋ย อ๊อ ปุน บาลาอัม เหธา กัน เจี๊ยน มี่ง วั้ว เต๋ย เจียน.

41ตะเหญ่ย ดอม, บาล้าก ต้อ บาลาอัม ฝาว เถา บาโม้ด บาอัน. เยียม หน่าย นิ่น หมั่ง ตุ๊ ปวัด เต๋ย อิสะลาเอน เมี่ยน.

← Chapter 21 Jump to: Chapter 23 →