Acts 11

Kamba (Mbivilia) 1956

← Chapter 10 Jump to: Chapter 12 →

1Na atũmwa na ana‐a‐ĩthe ala maĩ Yutia meew’a kana Andũ‐ma‐mbaĩ‐ĩngĩ nao nĩmosete ndeto ya Ngai.

2Na Vetelo ambata Yelusaleme, ala maĩ ma nzaĩko makananĩa nake,

3makĩmwĩa, We, nĩwalikile kwa andũ mataĩkawa, na waya nao.

4Ĩndĩ Vetelo ambĩlĩlya kũmon’ya nesa ũndũ ũsu, aatĩanĩsye, aiasya,

5Naĩ ndũanĩ ya Yova ngĩvoya: na nĩ toonĩ ũilyĩ ta kĩkw’ũ noona woni, kĩndũ kĩitheea, ta ngũa nene ĩkĩtheew’a kuma ĩtunĩ, ĩkwetwe mĩthya ĩna; nakyo kyooka vala nĩĩ:

6na ngĩketeea mũno, na kũsũanĩa, noona nthĩnĩ wakyo nyamũ sya nthĩ ila syĩ maũũ ana, na nyamũ ila mbai, na tũsamũ tũla tũtambũkaa, na syĩndũ ila iũlũkaa.

7Na neew’a naw’o wasya ũkĩmbĩa, Ũkĩla, Vetelo; wũae, ũye.

8Ĩndĩ nyie nasya, Aiee, Mwĩaĩi; nĩkwĩthĩwa kĩndũ kĩvuku kana kĩte kĩtheu kĩtyaamba kũlika kanyw’anĩ wakwa nongi.

9Ĩndĩ wasya wanzũngĩa ya kelĩ kuma ĩtunĩ, Ila itheetw’e nĩ Ngai ndũkaitw’e mbuku.

10Na ũndũ ũsu weekwa katatũ: na kyonthe kyakusw’a kyambatw’a ĩtunĩ.

11Na sisya, oyu kwaũngama andũ atatũ mbee wa nyũmba ĩla twaĩ, matũmĩtwe kũla nĩĩ kuma Kaĩsalea.

12Na Veva ambĩa nĩthi nao, nde na kĩvathũkan’yo. Na ana‐a‐asa aa thanthatũ maendan’ya nakwa; na twavota nyũmbanĩ ya ũla mũndũ:

13nake atũtavya ũndũ ũnoonie mũlaĩka aũngeme nthĩnĩ wa nyũmba yake, aiasya, Tũma andũ mathi Yova, mamũlatye Simoni, ũla wĩ na syitwa yĩngĩ ya kelĩ, Vetelo;

14ũla wĩkũtavya ndeto ila syĩkũtangĩĩa, we na nyũmba yaku yonthe.

15Na kweethĩwa ngyambĩlĩlya ũneena nao, Veva Mũtheu amatheeea, o ũndũ watũtheeie ithyĩ mwambĩlĩlyonĩ.

16Na indĩ nalilikana ndeto ya Mwĩaĩi, ũndũ waisye, Nĩ w’o, Yoana nĩwavatisie na kĩw’ũ; ĩndĩ inyw’ĩ mũkavatiswa nĩ Veva Mũtheu.

17Ethĩwa ĩndĩ Ngai nũmanengete mũthĩnzĩo o ũla watũnengie ithyĩ, twamwĩtĩkĩla Mwĩaĩi Yesũ Klĩsto, nyie nai ũũ, kana nĩtonye kũmũsiĩĩa Ngai?

18Namo meew’a maũndũ asu, mavindya ki, na mamũtaĩa Ngai, maiasya, O na Andũ‐ma‐mbaĩ‐ingĩ Ngai nũmanengete ũalyũlo wa ngoo ũetae thayũ.

19Na ĩndĩ ala manyaĩĩkĩtw’e nũndũ wa ũnyamao ũla wookĩlile kwondũ wa Sitivini, mathi mavika Voenike, na Kuvolo, na Andiokia, mateũneena ĩla ndeto kwa mũndũ ate o kwa Ayuti oka.

20Ĩndĩ kwaĩ amwe moo, aũme ma Kuvolo na Kulene, ala, yĩla mavikie Andiokia, mamatavisye Akiliki nao, maitavan’ya Mwĩaĩi Yesũ.

21Na kw’oko kwa Mwĩaĩi kwaĩ vamwe nao: na andũ aingĩ meetĩkĩla na mamwĩthyũũĩa Mwĩaĩi.

22Na ũvoo woo wavika matũnĩ ma ĩkanisa yĩla yaĩ Yelusaleme: nao mamũtũma Valanava avike Andiokia:

23nake yĩla wavikie, na kwona mũmo wa Ngai, atana; na amataa onthe, nĩ kana malũman’ye na Mwĩaĩi na kwenda kwa ngoo:

24nĩkwĩthĩwa we aĩ mũndũ mũseo, na kusũwa nĩ Veva Mũtheu na mũĩkĩĩo. Na andũ aingĩ mongeleka ngalĩ ya Mwĩaĩi.

25Na ĩndĩ athi Taliso kũmũmantha Saulo;

26na amwona, amũete Andiokia. Na meethiwa makyũmbana na ĩkanisa ĩvinda ya mwaka mũima, na mamanyĩsya andũ aingĩ; na ala amanyĩw’a mambĩlĩlya kwĩtwa Aklĩsto ndũanĩ ĩsu ya Andiokia.

27Na mĩthenya isu kwatheeie athani kuma Yelusaleme maithi Andiokia.

28Na ũmwe woo wetawa Akavo aũngama, na oonan’ya kwa Veva kana kũkooka yũa ĩnene ĩũlũ wa nthĩ yonthe: nayo yooka mĩthenya ya Kilautiosi Kaisali.

29Na ala amanyĩw’a, kĩla mũndũ kwĩanana na ũtonyi wake, masũanĩa, matw’a kũmatwaĩa ũtethyo ana‐a‐ĩthe moo ala matwie Yutia:

30nao meeka ũu, mamatwaĩa atumĩa na moko ma Valanava na Saulo.

← Chapter 10 Jump to: Chapter 12 →