Acts 7 — Kamba (Mbivilia) 1956

1Na mũthembi mũnene amũkũlya Sitivini, Nĩw’o mailyĩ maũndũ asu?

2Na asũngĩa, Ana‐a‐asa na aasa, ĩthukĩĩsyei: Ngai ũla ũtaĩawa amumĩlĩle asa waitũ Avalaamu, yĩla watwĩe nthĩ ya Mesovotamĩa, atanamba ũtũa nthĩ ya Aalani,

3na amwĩa, Uma nthĩ ĩno yaku, ũtie andũ maku, ũthi nthĩ ĩla ngakwon’ya.

4Na ĩndĩ auma nthĩ ya Akalitei, na atũa nthĩ ya Aalani: na yĩla ĩthe wake wakwie, Ngai amũthamya amũete nthĩ ĩno, ĩla mũtwĩe yu:

5na ndaamũnenga ũtiĩwa wayo, aiee, o na veana kwia ũnyaĩĩ wake: na amwatha kana akamũnenga nthĩ ĩno yĩthĩwe ng’ũndũ yake, na ya ũsyao wake ĩtina wake, yĩla ũtaĩ mwana.

6Na Ngai aneena ũu, kana ũsyao, wake ũkekala ũeni nthĩ ngeni, na kana makatuwa ngombo syoo, na kwĩkwa naĩ, ĩvinda ya myaka maana ana.

7Na mbaĩ ĩla makethĩwa ngombo syayo ngamĩsilĩla, aisye ũu Ngai: na ĩtina wa ũu makauma nthĩ ĩsu, na kũnthũkũmĩa vaa.

8Na amũnenga ũtianĩo wa nzaĩko: na ĩndĩ Avalaamu amũsyaa Isaka, na amwaĩka mũthenya wa nyanya; na Isaka amũsyaa Yakovo, na Yakovo amasyaa ala atumĩa maitũ ĩkũmi na elĩ.

9Na atumĩa asu mamwĩw’ĩe Yosevu kĩwĩu, na mamũthoosya athi Misili: na Ngai aĩ nake,

10na amumya mathĩnanĩ make onthe, na amũnenga waĩlu na ũĩ mbee wa Valao, mũsumbĩ wa Misili; na amũtw’a ngavana ĩũlũ wa Misili na ĩũlũ wa nyũmba yake yonthe.

11Na kwooka yũa ĩũlũ wa nthĩ yonthe ya Misili na ya Kanaani, na ũnyamao mũnene: na aasa maitũ maiaaona syĩndũ sya ũmavũn’ya.

12Ĩndĩ Yakovo eew’a kana lĩu wĩ Misili, amatũma aasa maitũ, ya mbee.

13Na ya kelĩ Yosevu eeyumbũla kwa ana‐a‐ĩthe make; na mbaĩ ya Yosevu yamanyĩka kwa Valao.

14Na Yosevu atũmana Yakovo ĩthe wake, amwĩta oke kwake na andũ make onthe, andũ mĩongo muonza na atano.

15Na Yakovo atheea alika Misili; na akw’a, we na aasa maitũ;

16nao makuwa matwawa Sekemu, na maiwa mbũanĩ ĩla Avalaamu wathooie na thooa wa vetha kwa ana ma Amolu nthĩ ya Sekemu.

17Ĩndĩ ĩvinda ya watho ũla Ngai wamũnengie Avalaamu yathengeea, andũ asu meana na maingĩva nthĩ ya Misili,

18mũvaka kwookĩla mũsumbĩ ũngĩ ĩũlũ wa Misili, ũtaamwĩsĩ Yosevu.

19Ũsu amĩkĩe mbaitũ ũseleke, na kũmeka naĩ aasa maitũ, kana mekye tũũkenge twoo ĩtheka tũikethĩwe thayũ.

20Na ivĩnda yĩu Mose asyawa, nako kaĩ kanake mũno; na kaeewa nyũmbanĩ ya ĩthe myei ĩtatũ:

21na kekw’a ĩtheka, mwĩĩtu wa Valao akosa, akaea akatw’a mwana wake.

22Na Mose amanyĩiw’e ũĩ w’onthe wa Amisili; nake aĩ mwai ndetonĩ syake na mekonĩ make.

23Ĩndĩ avikya myaka yake mĩongo ĩna, kwamũlika ngoonĩ yake kũenda kũmasisya ana‐a‐ĩthe make, ana ma Isilaeli.

24Na akyona ũmwe wamo akĩnyamaw’a, amũtetheesya, na amũĩvanĩĩsya ũsu wanyamaaw’a, na amũaa ũla Mũmisili:

25nake atalĩlya kana ana‐a‐ĩthe nimamanyite kana Ngai nũmanengete wovosyo na kw’oko kwake; ĩndĩ matyaamanya.

26Na ũnĩ ũsu amaumĩlĩla maiũkita, nake enda ũmew’anĩthya ĩngĩ, aimea, Mavwana, mwĩ ma ĩthe ũmwe; nikĩ mũkwĩkana nai?

27Ĩndĩ ũla ũmwĩkĩte ũngĩ naĩ amũluuta, aisya, Ũtw’ĩtwe mũnene na mũsili ĩũlũ waitũ nũũ?

28Wĩenda ũmbũaa, ũndũ ũnamũaie Mũmisili ĩoo?

29Na Mose akĩa nũndũ wa ndeto isu, na atw’ĩka mwĩkali wa ũeninĩ nthĩ ya Mitiani, na asyaĩa ana elĩ kw’o.

30Na avikya myaka mĩongo ĩna e kw’o, aumĩlĩlwa nĩ mũlaĩka ũmũĩnĩ wa mwaki wĩ kakuthunĩ, weũnĩ wa kĩĩma kya Sinai.

31Na Mose awona, aseng’w’a nĩ woni ũsu: na akĩthengeea asisye, kwooka wasya wa Mwĩaĩi, ũiasya,

32Nyie nĩ Ngai wa aaĩthe maku, Ngai wa Avalaamu, na wa Isaka, na wa Yakovo. Na Mose atetema, na akĩa kũsisya.

33Na Mwĩaĩi amwĩa, Umya iatũ maũũnĩ maku: nũndũ vandũ vau ũũngeme nĩ nthĩ ntheu.

34Nyie nĩnonete nesa monyamao ma andũ makwa me Misili, na nĩnĩw’ĩte kũluma kwo, nakwa natheea kũmatangĩĩa: na yu ũka, nĩngũũtũma Misili.

35Mose ũsu ũla maleile, maiasya, Ũtw’ĩtwe mũnene na mũsili nũũ? Nĩwe watũmiwe nĩ Ngai ethĩwe mũnene, na ĩngĩ ethĩwe mwovosya kwondũ wa kw’oko kwa mũlaĩka ũla wamumĩlĩle kakuthunĩ.

36Mũndũ ũsu amatongoesye, akĩka momakyo na syama nthĩ ya Misili, na Ukanganĩ Mũtune, na weũni, ĩvinda ya myaka mĩongo ĩna.

37Mose ũsu nĩwe ũla wamatavisye ana ma Isilaeli, Ngai akamũkĩlĩlya mwathani kuma kwa ana‐a‐ĩthe menyu, ũilyĩ takwa.

38Ũsu nĩwe ũla waĩ ũmbanonĩ weũnĩ, vamwe na mũlaĩka ũla waneenie nake kĩĩmanĩ kya Sinai, na vamwe na aasa maitũ: ũla wosie ndeto syĩ thayũ atũnenge ithyĩ:

39na aasa maitũ maiaaĩtĩkĩla kũmwĩw’a, ĩndĩ mamũluuta kũasa, na ngoonĩ syoo maalũka Misili,

40Aluni, Tũseũvĩsye ngai ila syĩtũtongoeasya: nũndũ Mose ũsu, ũla watumisye nthĩ ya Misili, tũtyĩsĩ ũndũ ũmũkwatĩte.

41Na mĩthenya ĩsu maseũvya mũvw’anano wa kasaũ ka ng’ombe, na mootwaĩa mũvw’anano ũsu nthembo, na kũtanĩa mawĩa ma moko moo.

42Ĩndĩ Ngai eethyũũa, na aekana nao mathũkũme nguthu ya ĩtunĩ; o ũndũ kũandĩkĩtwe ĩvukunĩ ya athani, atĩĩ, Mwaandetee nyie indo mbũae na nthembo sya kũtonywa Ĩvinda ya myaka mĩongo ĩna weũnĩ, inyw’ĩ nyũmba ya Isilaeli?

43Na inyw’ĩ mwakuĩte kakalũ ka Moleki, Na ndata ya ĩla ngai yetawa Levani, Mĩvw’anano ĩla mwaseũvisye mũmĩthaithe: Nakwa ngatuma mũenda mwĩ atave kũasa kũvĩta Mbaviloni.

44Aasa maitũ maĩ na ũla wĩkalo wa ũkũsĩ weũnĩ, o ũndũ Mose weaĩwe nĩ ũla waneenie nake, kana ayĩseũvye kwĩanana na ngelekan’yo ĩla wonie.

45Naw’o aasa maitũ nĩmookuanasya, na kũete me na Yosua, yĩla malikile kũmĩmeesya nthĩ sya i mbai ila Ngai walũngilye mbee wa mothyũ ma aasa maitũ kũvika mĩthenya ya Ndaviti;

46ũla wonie waĩlo vala ve Ngai, nake nĩwendie kũmwonea Ngaĩ wa Yakovo wĩkalo.

47Ĩndĩ Solomoni amwakĩa nyũmba.

48Ĩndĩ Ũla Wĩ lũlũ wa Onthe ndekalaa nthĩnĩ wa nyũmba syakĩtwe na moko; o ũndũ mwathani waitye,

49Ĩtu nĩ kĩvĩla kyakwa kya ũsumbĩ, Na nthĩ nĩ kavila kakwa ka nyaĩĩ syakwa; Mwĩaĩĩ easya, Mũkambakĩa nyũmba ĩilyĩ ata? Kana nĩ vandũ vailyĩ ata vala ngathũmũa?

50Ti kw’oko kwakwa kwoombie syĩndũ ii syonthe?

51Inyw’ĩ mwĩ na ngingo nyũmũ, na ngoo syenyu na matũ menyu mate maike, mĩthenya yonthe nĩmũmũsiĩĩaa Veva Mũtheu: o ũndũ aaĩthe menyu meekie, nĩw’o inyw’ĩ mwĩkaa.

52Nĩ mwathani wĩva ũla aaĩthe menyu mataamũthĩn’ya? Na ĩngĩ nĩmamoaie ala mambie ũmwon’ya kũka kwa Ũla Mũlũngalu; na ũsu inyw’ĩ yu nĩmũtw’ĩkĩte amũvũnyanĩi na amũai;

53inyw’ĩ ala mwoosie ĩla mĩao ũndũ kwatwiwe nĩ alaĩka, na mũtyaamĩkwata.

54Na meew’a maũndũ asu, matemwa ngoonĩ syoo, na mamũvevetanĩsye maeo moo.

55Ĩndĩ ausũĩtwe nĩ Veva Mũtheu, ang’elela aketee ĩtuni, na oona ũtheu mũtisu wa Ngai, na Yesũ aũngeme ngalĩ ya kw’oko kwa aũme kwa Ngai,

56na asya, Sisya, nĩngwona ĩtu yĩvingũkĩte, na ũla Mwana wa mũndũ aũngeme ngalĩ ya kw’oko kwa aũme kwa Ngai.

57Ĩndĩ makaya na wasya mũnene, na malinda matũ moo, mamũthaanyũkĩa na ngoo ĩmwe;

58mamũkusũlan’ya mamũtwaa ũtee wa ndũa, na mamũkimanga na mavia: na ila ngũsĩ syaia ngũa syoo maũũnĩ ma mwanake wĩtawa Saulo.

59Na mamũkimanga Sitivini, aimwĩkaĩla Mwĩaĩi, ayasya, Mwĩaĩi Yesũ, osa veva wakwa.

60Nake atulya ndu, na aneena na wasya mũnene, Mwĩaĩi, ndũkamatalĩle naĩ ĩno. Na amina ũneena ũu, akoma.