Acts 25

Kamba (Mbivilia) 1956

← Chapter 24 Jump to: Chapter 26 →

1Na ĩndĩno Vesito alika nthĩ yake, na mĩthenya ĩtatũ yathela ambata Yelusaleme kuma Kaisalea.

2Na athemb anene na andũ ala anene ma Ayuti mamũtavya ũvoo wa Vaulo; na mamwĩsũva,

3ameke nesa ũndũ wa Vaulo, kana amũtũmane aetwe Yelusaleme; nĩ kana matonye kũmwoveesya nzĩanĩ mamũae okĩte.

4Ĩndĩ Vesito amasũngĩa, kana Vaulo esũvĩĩwa Kaisalea, na ĩngĩ kana we mwene nũkilĩlye kũthi kw’o mĩtũkĩ.

5Na ĩngĩ asya, Kwondũ wa ũu, ala me na ũtonyi katĩ wenyu, nĩmatheee vamwe nakwa, na ethĩwa ve ũndũ ũtaĩle mũndũnĩ ũsu, nĩmamũvinganĩsye.

6Na ekala kw’o mĩthenya ĩtathonokete nyanya kana ĩkũmi, atheea Kaisalea; na ũnĩ ũsu ekala kĩvĩlanĩ kya sila, na eeaa Vaulo aetwe.

7Nake ooka, Ayuti ala manatheeie kuma Yelusaleme maũngama mamũthyũlũlũkĩte, makĩete movingan’yo maingĩ na maito ĩũlũ wake, nao matyaatonya kwonan’ya kana nĩ ma w’o;

8ĩndĩ Vaulo aumya ũsũngĩo wake, aiasya, Ndyaavĩtya nongo ĩũlũ wa ĩla mĩao ya Ayuti, o na ĩũlũ wa ĩkalũ, o na ĩũlũ wa Kaisali.

9Ĩndĩ Vesito, akyenda kwendeesya Ayuti, amũsũngĩa Vaulo aimwĩa, Nũkwenda kwambata Yelusaleme, ũkasilĩĩlwe kw’o mbee wakwa ũndũ wa maũndũ asu?

10Ĩndĩ Vaulo asya, Nĩũngeme mbee wa kĩvĩla kya sila kya Kaisali, vala naĩlwe nĩ kũsilĩĩlwa: Ayuti ndimekĩte ũndũ ũthũku, o ũndũ we wĩsĩ mũno.

11Ethĩwa ĩndĩ nĩ mwĩki wa naĩ, na ethĩwa nĩnĩkĩte ũndũ waĩle kĩkw’ũ, ndiũlea kũkw’a; ĩndĩ ethĩwa maũndũ asu ti ma w’o ala aa meũmbinganĩĩsya, vai mũndũ ũtonya kũnumya na kũnengane kwa mo. Nĩmwĩkaĩla Kaisali.

12Na ĩndĩ Vesito amina kũneena na nzama, amũsũngĩa, Nĩwamwĩkaĩla Kaisali: ũkathi kwa Kaisali.

13Na mĩthenya ĩmwe yavĩta, mũsumbĩ Akiliva na Velinike mavika Kaisalea, mamũkethya Vesito.

14Na makĩkala kw’o mĩthenya mingĩ, Vesito amũtavya ũla mũsũmbĩ ũvoo wa Vaulo, aiasya, Kwĩ mũndũ ũmwe vaa watiiwe e mwove nĩ Velike;

15nakwa, yĩla naĩ Yelusaleme, athembi anene na atumĩa ma Ayuti nĩmandavisye ũvoo wake, makĩngũlya nĩmũtw’ĩĩe.

16Nakwa namasũngĩa, kana ti kĩthĩo kya Alomi kũnengane mũndũ o na wĩva, mũvinganĩw’a atanamba kwonana na ala mamũvinganĩsye, ũthyũ kwa ũthyũ, one ũthei wa kwĩneenea ũndũ ũla ũvinganĩĩw’e.

17Na ĩndĩ moombana vaa, ndyaaĩkala, ĩndĩ ũnĩ ũsu nekalile kĩvĩlanĩ kya sila, na neeaa kana mũndũ ũsu aetwe.

18Na ala mamũvinganĩsye maũngama, matyaaete ũndũ ũthũku nongo iũlũ wake tondũ natalĩlasya meũete;

19ĩndĩ maĩ na mokũlyo amwe ĩũlũ wake ũndũ wa ũthaithi woo ene, na ũndũ wa mũndũ ũmwe Yesũ, ũla waĩ anakw’a, ũla Vaulo walũlũmĩlaa mũno kwasya e thayũ.

20Nakwa, nasũanĩwa ũndũ ngũkũlya maũndũ asu, namũkũlya kana nũnũkwenda kũthi Yelusaleme, akasilĩlwe kw’o ũndũ wa maũndũ asu.

21Ĩndĩ Vaulo enda asũvĩwe akasilĩlwe nĩ Kaisali, neeaa asũvĩwe mũvaka yĩla nĩmũtwaa kwa Kaisali.

22Akiliva amwĩa Vesito, Nyie o nakwa nĩnendaa kwĩthukĩĩsya ũ mũndũ. Amwĩa, Ũkamwĩthukĩĩsya ũnĩ.

23Na ĩndĩ ũnĩ ũsu, Akiliva ooka, na Velinike, na ũsũng’wa mũnene, na mavota vandũ va kwĩthukĩĩsya vamwe na anene ma asikali ngili, na andũ anene ma ndũa, Vesito eeaa Vaulo naetwe.

24Na Vesito asya, Mũsumbĩ Akiliva, na andũ aa onthe ala mwĩ vaa vamwe naitũ, nĩmũkwona mũndũ ũũ, ũla ĩkomano yonthe ya Ayuti, Yelusaleme o na kũũ, nĩmamboyete kwondũ wake, maineena mũno, maiasya, kana ndaĩle kwĩthĩwa thayũ.

25Ĩndĩ nyie noonie kana ndaaĩka ũndũ o na wĩva ũtuma oawa: na kwa kwĩthĩwa we mwene nĩwamwĩkaĩlile Kaisali natw’a kũmũtwaa kw’o.

26Nakwa ndi na ũndũ wa w’o wa ũmũandĩkĩa mwĩaĩi wakwa kwondũ wake. Kwondũ wa ũu namũete vaa mbee wenyu, na mũno mbee waku, mũsumbĩ Akiliva, nĩ kana akũlangw’a, ĩtina none nongo ũndũ wa kũandĩka.

27Nũndũ nĩngwona nĩ ũndũ ũtaĩle kũtwaa mwovwa, na kũlea kwonan’ya movingan’yo ala ũvinganĩw’e namo.

← Chapter 24 Jump to: Chapter 26 →