Acts 4

Kamba (Mbivilia) 1956

← Chapter 3 Jump to: Chapter 5 →

1Na makĩneena na andũ, athembi anene na mũnene wa ĩkalũ na Asatukai mamaumĩlĩla,

2makĩw’a woo mũno nũndũ wamo kũmamanyĩsya andũ, na kũtavan’ya ũthayũũkyo wa akw’ũ nthĩnĩ wa Yesũ.

3Na mamakwata na mamekĩa kolokolonĩ kũvika ũnĩ: nĩkwĩthĩwa kwaĩ kũnavika wĩoo.

4Ĩndĩ aingĩ ma ala meewie ndeto meetĩkĩlile; na ũtalo wa aũme weethĩwa ta ngili itano.

5Na ũnĩ ũsu, anene moo na atumĩa na aandĩki meethĩwa mombanĩte vamwe Yelusaleme;

6na Anasi mũthembi mũnene aĩ vo, na Kaiava na Yoana, na Alesanda, na angĩ o ala maĩ ma mbaĩ ya mũthembi mũnene.

7Na mamaia katĩ woo, mamakũlya, Undũ ũsu mũneekie kwa vinya wiva, kana kwa syĩtwa yĩva?

8Nĩvo ĩndĩ Vetelo, ausũĩtwe nĩ Veva Mũtheu, wamasũngĩie, aiasya, Inyw’ĩ asumbĩki ma andũ, na atumĩa,

9ethĩwa nĩtũũkũlw’a ũmũnthĩ ũndũ wa wĩko mũseo ũla ũneekiwe mũndũ kyonze, ũndũ ũnavoiw’e;

10nĩkũmanyĩke kwa inyw’onthe, na kwa andũ onthe ma Isilaeli, kana nĩ kwondũ wa syĩtwa ya Yesũ Klĩsto wa Nasaleti, ũla inyw’ĩ mwamwambie, na Ngai nĩwamũthayũũkisye kũmumya kwa akw’ũ, no kwondũ wa ũsu mũndũ ũũ nũũngeme mbee wenyu e mũima.

11Ũsu nĩwe yĩla ĩvia yavũthiwe nĩ inyw’ĩ aki, nayo yatw’ĩka yĩla ĩnene ya kĩkotonĩ.

12O na kũti ũtangĩĩo kwa ũngĩ o na wĩva w’onthe: nũndũ kũti syĩtwa yĩngĩ ĩtheo wa ĩtu, yĩnengetwe andũ, yĩtwaĩle ithyĩ kũtangĩĩwa nayo.

13Na moona ũnyiau wa Vetelo na Yoana, na mamanya kana nĩ andũ matamanyĩĩtw’e, na mate na ũmanyi, maseng’a; na mamamanya kana maneethĩawa vamwe na Yesũ.

14Na makyona ũla mũndũ ũnavoiw’e aũngeme vamwe nao, maiaatonya kũsũngĩa ũndũ ũsu.

15Ĩndĩ mamatavya maumaale nza kuma nzamanĩ, makũlan’ya ene kwa ene,

16maiasya, Twĩmeka ata andũ aa? Nĩkwĩthĩwa nĩwenekee kwa onthe ala matwĩe Yelusaleme kana kyama kĩnene nĩkĩneekiwe kwondũ wamo; na ithyĩ tũtitonya kũkaĩa.

17Ĩndĩ nĩ kana ũndũ ũũ ndũkanyaĩĩke mbee wa vau andũnĩ, tũmatĩsye, kana maikaneene ĩngĩ na mũndũ syĩtwanĩ yĩu.

18Na mameta, na mameaĩa maikaaneene ĩngĩ nongĩ kana kũmanyĩsya syĩtwanĩ ya Yesũ.

19Ĩndĩ Vetelo na Yoana mamasũngĩa, mamea, Ethĩwa nĩ wa w’o mbee wa Ngai kũmwĩthukĩĩsya inyw’ĩ kwĩ kũmwĩthukĩĩsya Ngai, silai inyw’ĩ:

20nũndũ ithyĩ tũitonya ate o kũneena maũndũ ala twoonie na kwĩw’a.

21Namo, mamatĩsya ĩngĩ, mamalekya, matene ũndũ matonya kũmasilĩla, nũndũ wa andũ; nĩkwĩthĩwa andũ onthe mamũtaĩaa Ngai kwondũ wa ũndũ ũsu ũneekiwe,

22Nũndũ mũndũ ũsu ũla ũneekiwe kyama kyu kya ũvow’a, avikĩtye myaka mbee wa mĩongo ĩna.

23Na mathaw’a, mathi vala ve ala angĩ moo, na mamatavya maũndũ onthe ala mataviw’e nĩ athembi anene na atumĩa.

24Namo, meew’a ũu, mamũkĩlĩlya Ngai mawasya moo na ngoo ĩmwe, maiasya, Ame Mwĩaĩi, nue woombie ĩtu na nthĩ na ũkanga, na syĩndũ syonthe ila syĩ nthĩnĩ wasyo:

25we, ũla waneenie kwondũ wa Veva Mũtheu, na kanyw’a wa asa waitũ Ndaviti, mũthũkũmi waku, ũkyasya, Andũ‐ma‐mbaĩ‐ingĩ malonzanĩlye kĩ, Na andũ kũsũanĩa maũndũ ma mana?

26Asumbĩ ma nthĩ nĩmetaũĩtye, Na asumbĩki nĩmoombanie vamwe, Ĩũlũ wa Mwĩaĩi, na ĩũlũ wa Mwĩtĩkĩw’a mauta wake:

27nũndũ nĩ w’o ndũanĩ ĩno, Elote na Vondio Vilato vamwe na Andũ‐ma‐mbaĩ‐ingĩ na andũ ma Isilaeli nĩmoombanie vamwe, ĩũlũ wa Mũthũkũmi waku mũtheu Yesũ, ũla wamwĩtĩkĩsye mauta,

28meke o ala kw’oko kwaku na ũtw’ĩo waku watwie mbee kana methĩwe.

29Na yu, Mwĩaĩi, sisya motĩsyo moo: noinenga ngombo syaku ineene ndeto yaku na ũnyiau w’onthe,

30naku wĩthĩwe ũitambũũkya kw’oko kwaku kũvosya; nĩ kana syama na momakyo mekwe kwondũ wa syĩtwa ya Mũthũkũmi waku mũtheu Yesũ.

31Na mavoya, vala moombanĩte vathingithangw’a; nao mausũwa onthe nĩ Veva Mũtheu, na maneena ndeto ya Ngai na ũnyiau.

32Na nguthu ya ala meetĩkĩlĩte maĩ na ngoo ĩmwe na veva ũmwe: na vai ũmwe waasya kĩndũ o na kĩmwe kya ila waĩ nasyo nĩ kyake mwene; ĩndĩ maĩ na mũamba wa syĩndũ syonthe.

33Na atũmwa maumya ũkũsĩ woo wa kũthayũũka kwa Mwĩaĩi Yesũ na vinya mũnene: na mumo mũnene waĩ ĩũlũ wa onthe.

34Nũndũ vaiaaĩthĩwa ũmwe wamo waanyivĩwa nĩ kĩndũ: nĩkwĩthĩwa ala maĩ na nthĩ kana nyũmba syoo nĩmathooisye, na maete thooa wa syĩndũ ila ithooetw’e,

35mawia maũũnĩ ma atũmwa: na maana kĩla mũndũ, o ũndũ vata wake weanaa.

36Na Yosevu, ũla wanengiwe syĩtwa ya kelĩ nĩ ala atũmwa, ya Valanava (nayo ũalyũlo wayo nĩ, Mwana wa ũtao), aĩ Mũlivai, ĩndĩ kũsyaĩwa kwake nĩ Kuvolo,

37aĩ na mũũnda, na oothoosya, na aete thooa waw’o aia maũũnĩ ma atũmwa.

← Chapter 3 Jump to: Chapter 5 →