Acts 22

Kamba (Mbivilia) 1956

← Chapter 21 Jump to: Chapter 23 →

1Ana‐a‐asa makwa na aasa, ĩthukĩĩsyei ũsũngĩo wakwa ũla ngũsũngĩa mbee wenyu oyu.

2Na meew’a kana eneena nao na Kĩevelania, mavindĩĩsya mũno: nake asya,

3Nyie nĩ Mũyuti, nasyaĩwe Taliso, ndũa ya Silisia, ĩndĩ neanĩe ndũanĩ ĩno, na ũmanyĩĩw’a maũũnĩ ma Kamalieli, kwĩanana na wĩanĩu wa ĩla mĩao ya aasa maitũ, na neethĩwa na ũthangaau kwa Ngai, o ũndũ inyw’ĩ mũilyĩ ũmũnthĩ:

4nakwa nathĩnasya ala ma Nzĩa ĩno o na ũmoaa, na ngĩmova na kũmekya kolokolonĩ aũme na aka.

5O ũndũ mũthembi mũnene e na ũkũsĩ wakwa, na atumĩa onthe: ala noosie mavalũa kwoo nĩmaetee ala ana‐a‐asa, na nathi kyalo Ndamasiku, ngamaete ala maĩ kw’o me ove Yelusaleme, masilĩlwe.

6Na kweethĩwa yĩla naendete kyalo, ngĩthengeea Ndamasiku, ta mũthenya katĩ, oyu, o ĩmwe, kyeni kĩnene kyaumie ĩtunĩ kyatisa ngalĩ syakwa syonthe.

7Nakwa navalũka nthĩ, na neew’a wasya ũineena nakwa, ũiasya, Saulo, Saulo, nĩkĩ ũũnthĩn’ya?

8Nakwa nasũngĩa, Nue ũũ, Mwĩaĩi? Nake ambĩa, Ninyie Yesũ wa Nasaleti, ũla ũũthĩn’ya.

9Na ala maĩ nakwa nĩmoonie kyeni kyu, ĩndĩ maiaaĩw’a wasya wa ũla ũnũũneena nakwa.

10Nakwa nasya, Nĩĩka ata, Mwĩaĩi? Na Mwĩaĩi ambĩa, Ũkĩla, ũthi Ndamasiku nthĩnĩ; na kw’o ũkatavĩw’a ũvoo wa maũndũ onthe ala meaĩtwe wĩke.

11Na ĩndĩ neethĩwa ndekwona nthĩ nũndũ wa ũtheu mũtisu wa kĩla kyeni, natongoew’a nĩ ala maĩ nakwa mangwete kw’oko, nalika Ndamasiku.

12Na mũndũ ũmwe wĩtawa Anania, mũthaithi mũnene wa Ngai kwĩanana na ĩla mĩao, ũla ũwetawa nesa nĩ Ayuti onthe ala matwĩe kw’o,

13ooka vala nĩĩ, na aũngama ũtee wakwa ambĩa, Mwana‐a‐asa Saulo, nengwa kwona. Nakwa mamũũngalalĩlya metho makwa saa o ũsu.

14Nake asya, Ngai wa aasa maitũ nũkũnyuvĩte we ũmanye kwenda kwake, na kũmwona Ũla Mũlũngalu, na kwĩw’a wasya ũla wumaa kanyw’anĩ wake.

15Nũndũ ũkeethĩwa ngũsĩ kwondũ wake kwa andũ onthe ya maũndũ ala ũnoonie na kwĩw’a.

16Na yu weteele kyaũ? Ũkĩla, ũvatiswe, ũthambw’e naĩ syaku, ũkĩkaĩla syĩtwa yake.

17Na kweethĩwa, naalũka Yelusaleme, ngĩvoya ĩkalũnĩ, nakwatwa nĩ too ũilyĩ ta kĩkw’ũ,

18na namwona aimbĩa, Ĩkalaate nokyuma Yelusaleme mĩtũkĩ; nĩkwĩthĩwa maikosa ũkũsĩ waku kwondũ wakwa.

19Nakwa nasũngĩa, Mwĩaĩi, o ene nĩmesĩ kana nyie nĩnamovie kolokolonĩ na ngĩmakũnĩa masinakokenĩ ala makwĩtĩkĩlĩte:

20na yĩla nthakame ya ngũsĩ yaku Sitivini yetĩkaw’a, nyie naũngeme ũtee woo, na neetĩkĩla oawe, nĩsũvĩĩte ngũa sya ala mamũaie.

21Nake ambĩa, Thi: nũndũ ngaũtũma ũthi kũasa kwa Andũ‐ma‐mbaĩ‐ingĩ.

22Na mamwĩthukĩĩsya kũvika ndeto ĩsu: na mookĩlya mawasya moo, na masya, Mũvetei mũndũ ta ũsu kũũ nthĩ: nũndũ ndaĩle kwĩkala thayũ.

23Na makĩlonzan’ya, na kwĩkya ngũa syoo, na kwĩkya mũthanga na ĩũlũ,

24ũla mũnene wa asikalĩ eeaa nalikw’e nthĩnĩ wa ĩla ngome, aiasya kana akũlw’e kwa ũkũnwa, nĩ kana atonye ũmanya ũndũ ũũtuma malonzan’ya ũu ĩũlũ wake.

25Na mamwovete na mĩkwa, Vaulo amũkũlya mũnene wa asikalĩ ĩana ũla ũũngeme ũtee wake, Nĩkwosana na mĩao kwenyu kũmũkũna mũndũ Mũlomi, o na ti mũsilĩle?

26Na ũla mũnene eew’a ũu, aenda kwa ũla mũnene wa asikalĩ ngili, amũkũlya, aiasya, Ũkilĩlye kwĩka ata? Nũndũ mũndũ ũsu nĩ Mũlomi.

27Na ũla mũnene wa asikalĩ ngili ooka, amwĩa, Ndavya, we wĩ Mũlomi? Na amwĩa Ĩĩ.

28Na ĩndĩ mũnene ũsu asya Nyie nĩnengetwe kwĩtwa Mũlomi ngĩthooa na mbesa nyingĩ. Na Vaulo amwĩa, Ĩndĩ nyie nĩ Mũlomi kwa kũsyawa.

29Ĩndĩ ala makilĩlye kũmũkũlya mamũtia, mathi: na mũnene ũsu akĩa amanya kana nĩ Mũlomi, na nũndũ nũmwovie.

30Ĩndĩ ũnĩ ũsu, aienda kũmanya vyũ ũndũ ũnavinganĩw’e nĩ Ayuti, amũthasya, na ameaĩa athembi anene na nzama yonthe mombane vamwe, na amũtheesya Vaulo amwia mbee woo.

← Chapter 21 Jump to: Chapter 23 →