Acts 26

Kamba (Mbivilia) 1956

← Chapter 25 Jump to: Chapter 27 →

1Na Akiliva amwĩa Vaulo, Wĩ na ũthei wa kwĩneenea mwene. Na ĩndĩ Vaulo atambũũkya kw’oko kwake, na eeneenea mwene:

2Nĩngwĩtala mwene kwĩthĩwa na ũtanu, mũsumbĩ Akiliva, nĩkwĩthĩwa nĩnanengwa kwĩneenea mbee waku ũmũnthĩ ũndũ wa maũndũ onthe ala nĩvinganĩĩw’e nĩ Ayuti:

3na mbee nũndũ we wĩ mũmanyi mũĩ wa syĩthĩo syonthe na mokũlyo onthe ma Ayuti: kwondu wa ũu nĩngũkwĩsũva ũmbĩthukĩĩsye na wũmĩĩsyo.

4Ayuti onthe nĩmesĩ, mwĩkalĩle wa thayũ wakwa kuma nĩ kavĩsĩ, kuma mwambĩlĩlyonĩ katĩ wa mbaĩ yakwa, na ku Yelusaleme;

5nĩmambĩsĩ mũno kuma tene ethĩwa nĩmekwenda kũneena ũkũsĩ, kana nyie naĩ Mũvalisi kũatĩĩa na kwĩanĩsya kĩthemba kya ũthaithi witũ ũla mũmũ mbee.

6Na yu nĩngũũngama vaa nĩsilĩlwe kwondũ wa wĩkwatyo wa watho ũla Ngai wamathie aasa maitũ;

7na kwaw’o mbaĩ sitũ ĩkũmi na ilĩ nĩsyĩkwatasya kwĩthĩwa ikavikĩa, ikĩmũthũkũma Ngai na ũthangaau ũtukũ na mũthenya. Na ũndũ wa wĩkwatyo ũũ, mũsumbĩ, nĩngũvinganĩw’a nĩ Ayuti!

8Nĩkĩ mũkwona nĩ ũndũ ũtetĩkĩlĩka, kana Ngai athayũũkasya akw’ũ?

9Nĩ w’o nyie mwene nĩnoonie kana nĩnaĩlwe nĩ kwĩka maũndũ maingĩ mavĩtanĩte na syĩtwa ya Yesũ wa Nasaleti.

10Nakwa nĩneekie ũu Yelusaleme: na namavingie aingĩ ma ala atheu makolokolonĩ, nosete ũkũmũ kwa athembi anene, na maiũawa wasya wakwa waĩ vo ĩũlũ woo.

11Na ngĩmathĩn’ya kaingĩ masinakokenĩ onthe, natatie kũmaumĩthya Ngai; na kwa kwĩthĩwa namathatĩe mũno, namathĩn’ya o na kũvika ndũa sya ũeninĩ.

12Na ngĩka maũndũ asu, yĩla naendete Ndamasiku nĩ na ũkũmũ na ũtũme wa athembi anene,

13mũthenya katĩ, mũsumbĩ, nonie nzĩanĩ kyeni kuma ĩtunĩ, kĩthonokete ũtisu wa syũa kĩikena ngalĩ syonthe syakwa na sya ala maendete vamwe nakwa.

14Na twavalũka nthĩ ithyonthe, newie wasya ũineena nakwa kĩthyomonĩ kya Kĩevelania, ũiasya, Saulo, Saulo, nĩkĩ ũũnthĩn’ya? Nĩ vinya kwaku kũtheela mũsenge.

15Nakwa nasya, Nue ũũ, Mwĩaĩi? Na Mwĩaĩi anzũngia, Ninyie Yesũ ũla ũũthĩn’ya.

16Ĩndĩ ũkĩla, ũũngame na maũũ maku: nũndũ nakumĩlĩla kwondũ wa ũndũ ũũ, kũkwia we wĩthĩwe mũthũkũmi na ngũsĩ ya maũndũ asu ala wambona nyie nĩ nthĩnĩ wamo, na ya maũndũ ala nthĩnĩ wamo ngakumĩlĩla:

17ngiũtangĩĩa kwa andũ ma mbaĩ yaku, na kwa Andũ‐ma‐mbaĩ‐ingĩ, ala ngũũtũma kwamo,

18kũmasalukya metho moo, nĩ kana methyũũe na kũkĩtia kĩvindu makyelekele kyeni, na kũeka ũkũmũ wa Satani na ũmwelekela Ngai, nĩ kana mose ũekeo wa naĩ, na ũtiĩwa vamwe na onthe ala mavathanĩtw’e kwondũ wa mũĩkĩĩo ũla wĩ kwakwa.

19Nĩvo ĩndĩ, mũsumbĩ Akiliva, ndyaatw’ika mũlei wa ũla woni waumie ĩtunĩ:

20ĩndĩ mbee natavanisye kwa ala ma Ndamasiku, na Yelusaleme, na ku kw’onthe nthĩ ya Yutia, na kwa Andũ‐ma‐mbaĩ‐ingĩ nao, kana mealyũle na ũmwelekela Ngai, mekae meko mosanĩte na kũalyũla ngoo kwoo.

21Kwondũ wa ũu Ayuti mangwatĩa ĩkalũnĩ na menda ũmbũaa.

22Ĩndĩ nĩkwĩthĩwa nosete ũtethyo ũla wumaa kwa Ngai, nĩũngeme kũvika ũmũnthĩ ngĩnenga ũkũsĩ anene na anini nao, o na ndiũneena ũndũ, ate o ũla athani na Mose maisye ũkoka:

23wa atĩ ũndũ Klĩsto nde ndĩi ya ũlea kũthĩnw’a, na ũndũ we ũkamba kũthayũũkw’a kwa akw’ũ na kũtavan’ya kyeni kwa andũ ma mbaĩ yaitũ na kwa Andũ‐ma‐mbaĩ‐ingĩ.

24Na akĩneena ũu, Vesito amwĩa na wasya mũnene, Vaulo, wĩ na ndũũka; kũsoma waku kwingĩ nĩkũũkũalyũkĩla ndũũka.

25Ĩndĩ Vaulo asũngĩa, Nyie ndi na ndũũka, we Vesito mũtaĩwa, ĩndĩ nĩneena ndeto sya w’o na sya kĩlĩko.

26Nũndũ mũsumbĩ nĩwĩsĩ ũvoo wa maũndũ asu, nakwa nĩneena nake vyũ: nũndũ nĩnĩsĩ mũno kana kũi ũmwe wa maũndũ asu ũvithĩtwe kwake; nũndũ ũndũ ũũ ndwĩkĩtwe ũtee kĩmbithĩnĩ.

27Mũsumbĩ Akiliva, nĩwĩtĩkĩlaa athani? Nĩnĩsĩ kana nũmetĩkĩlaa.

28Na Akiliva amũtavya Vaulo, Vatiele vanini ũngalyũle ndw’ĩke Mũklĩsto.

29Na Vaulo asya, Nĩngũvoya Ngai, ethĩwa nĩ vanini kana ethĩwa nĩ vanene, tuue weka, ĩndĩ o na onthe ala meũmbĩw’a ũmũnthĩ, methĩwe mailyĩ takwa, ate o mĩnyololo ĩno.

30Na mũsumbĩ ookĩla, na ngavana, na Velinike, na ala mekalĩte vamwe nao;

31na maumaala ũtee, maneenan’ya, maiasya, Mũndũ ũsu nde na ũndũ waĩle kĩkw’ũ kana kwovwa.

32Na Akiliva amwĩa Vesito, Kethĩwa ndaamwĩkaĩla Kaisali, ethĩwa athaw’a.

← Chapter 25 Jump to: Chapter 27 →