Acts 6

Kamba (Mbivilia) 1956

← Chapter 5 Jump to: Chapter 7 →

1Na mĩthenya ĩsu, yĩla ũtalo wa amanyĩw’a waĩ ũkingĩva, kwookĩla mũnyungunyĩsyo wa Ayuti ma Ũkiliki ĩũlũ wa Aevelania, nũndũ wa aka moo ndiwa kũlea kũnengwa nesa ũtethyo ũla wanenganawe kĩla mũthenya.

2Na ala ĩkũmi na elĩ mameta nguthu ya amanyĩw’a moke kwamo, na mamea, Kũtiaĩle ithyĩ kũtia ndeto ya Ngai, na kũthũkũma maũndũnĩ ma mesa.

3Kwondũ wa ũu, ana‐a‐asa, nyuvai katĩ wenyu aũme mũonza me na nguma nzeo, mausũĩtwe nĩ Veva na ũĩ, ala tũtonya kũmaia kwondũ wa wĩa ũũ.

4Ĩndĩ ithyĩ tũkekalaa tũlũlũmĩle mboyanĩ na ũthũkũminĩ wa ĩla ndeto.

5Na ndeto ĩsu yendeesya ĩla nguthu yonthe: na mamũnyuva Sitivini, mũndũ wusũĩte mũĩkĩĩo na Veva Mũtheu, na Vilivu, na Volokolo, na Nikanoli, na Timona, na Valimena, na Nikola mũvikĩli wa Kĩyuti wa Andiokia:

6na asu mamaia mbee wa atũmwa: na mavoya, mamailĩĩla moko.

7Na ndeto ya Ngai yeana; na ũtalo wa amanyĩw’a waingĩvw’a mũno Yelusaleme; na nguthu nene ya athembi yalika ũla mũĩkĩĩonĩ.

8Na Sitivini, ausũĩte mumo na vinya, eeka momakyo manene na mawonan’yo andũnĩ.

9Ĩndĩ kwookĩla amwe ala maĩ ma ĩsinakoke yĩla yĩtawa ya Alivelitino, na ya Akulene, na ya Aalesandalia, na ya ala ma Silisia na Asia, maikananĩa na Sitivini.

10Na matyaatonya kũsiĩĩa ũĩ wake na Veva ũla waneenie naw’o.

11Na ĩndĩ mew’ana na maisye, Nĩtwĩw’ĩte ũsu aineenea Mose na Ngai ndeto sya ũumano.

12Na mamaingĩanĩsya andũ, na atumĩa, na aandĩki, na mamũkĩlĩla, mamũkwata, na mamũete nzamanĩ,

13na mamũũngamĩsya ngũsĩ sya ũvũngũ, ila syaisye, Mũndũ ũũ ndaekaa ũneenea vandũ vaa vatheu na ĩla mĩao ndeto:

14nũndũ nĩtwĩw’ĩte aiasya kana Yesũ ũsu wa Nasaleti akaananga vandũ vaa, na kũalyũla syĩthĩo ila twanengiwe nĩ Mose.

15Na onthe ala mekalĩte nzamanĩ, maimũketeea na metho moo, moona ũthyũ wake ũilyĩ ta ũthyũ wa mũlaĩka.

← Chapter 5 Jump to: Chapter 7 →