Acts 13

Kamba (Mbivilia) 1956

← Chapter 12 Jump to: Chapter 14 →

1Na ĩkanisanĩ yĩla yaĩ Andiokia, kwaĩ athani na amanyĩsya, Valanava, na Simeoni ũla wetawa Nikeli, na Lukio wa Kulene, na Manaene ũla waeanĩwe na Elote ũla wai mũsumbĩ ĩndĩ maiaasyaanĩw’a, na Saulo.

2Na makĩmũthũkũma Mwiaĩi, na kwĩkala mateũya, Veva Mũtheu asya, Mbathĩai Valanava na Saũlo kwondũ wa ũla wĩa nametĩe.

3Na ĩndĩ mamina kũtĩĩa ũya na kũvoya na kũmailĩĩla moko moo, mamatũma mathi.

4Nao ĩndĩ, matũmwa nĩ Veva Mũtheu, matheea mathi Seleusi; na kuma vau mathi na ngalawa Kuvolo.

5Na yĩla maĩ Salamisi, matavan’ya ĩla ndeto ya Ngai masinakokenĩ ma Ayuti: na maĩ na Yoana nake aĩ mũtethya woo.

6Na matvĩtĩla kĩthamanĩ kyonthe mavika Vavo, moona mũndũ mũe ũmwe, mwathani wa ũvũngĩ, Mũyuti, syĩtwa yake nĩyo Vali‐Yesũ;

7nake aĩ vamwe na mũnene wetawa Selikio Vaulo, mũndũ mũmanyi. Ũsu ameta Valanava na Saulo moke kwake, akyenda kwĩw’a ndeto ya Ngai.

8Ĩndi Elumo ũla mũndũ mũe (nũndũ nĩw’o ũilyĩ ũalyũlo wa syĩtwa yake) amakananĩsya, aimantha kũmwathũkya ũla mũnene kũmumya mũĩkĩĩonĩ.

9Ĩndi Saulo, nake nĩwĩtawa Vaulo, ausũĩtwe nĩ Veva Mũtheu, amũketeea na metho make,

10na asya, We, usũĩte ũkengani na wai w’onthe, we, mwana wa ndevili, na mũmaitha wa ũlũngalu w’onthe, ndũkaeka kwathũkya nzĩa ndũngalu sya Mwĩaĩi?

11Na yu, sisya, kw’oko kwa Ngai kwĩ ĩũlũ waku, naku ũkeethĩwa kĩlilinda, ũtona syũa kwa ĩvinda. Na oyu kwamũtheea wiki na kĩvindu; na aenda aivavata aimantha mũndũ amũkwate kw’oko amũtongoesye.

12Na ĩndĩ ũla mũnene, oona ũndũ kweekwa, eetĩkĩla, aiseng’w’a nĩ ũmanyĩsyo wa Mwĩaĩi.

13Na ĩndĩ Vaulo na ala maĩ nake mauma Vavo mathi na ngalawa, na mavika Velika nthĩ ya Vambilia: na Yoana ataanĩĩsya namo vo asyoka Yelusaleme.

14Ĩndĩ mo, mavĩta mauma Velika, mavika Andiokia nthĩ ya Visitia; nao mathi ĩsinakokenĩ mũthenya wa savato na mekala nthĩ.

15Na ĩtina wa kũsoma mĩao na mavuku ma athani, anene ma ĩsinakoke matũma mũndũ kwamo, amea, Ana‐a‐asa, ethĩwa mwĩ na ndeto ya ũtao ya ũmatavya andũ aa, neenai.

16Na Vaulo aũngama, na amokĩlĩlya kw’oko, asya, Aũme ma Isilaeli, na inyw’ĩ ala mũkĩaa Ngai, ithukĩĩsyei:

17Ngai wa andũ asu ma Isilaeli nĩwamanyuvie aaĩthe maitũ, na amanenevya andũ asu yĩla matwĩe ũeni nthĩ ya Misili, na amatongoesya na kũmaumya nthĩ ĩsu na kw’oko kwĩ vinya.

18Na ĩvinda ya myaka mĩongo ina amakua na kũmĩĩsya meko moo weũnĩ.

19Na aananga mbaĩ mũonza nthĩ ya Kanaani, amanenga nthĩ syasyo syĩthĩwe ũtiĩwa woo, ĩvinda ya myaka maana ana na mĩongo ĩtano:

20na ĩtina wa maũndũ asu amanenga asili kũvika mwathani Samueli.

21Na ĩtina mamũvoya manengwe mũsumbĩ: na Ngai amanenga Saulo, mwana wa Kisi, mũndũ wa mbaĩ ya Mbenyamini, ĩvinda ya myaka mĩongo ĩna.

22Na amũveta ũsu, amũkĩlya Ndaviti ethĩwe mũsumbĩ woo; nake nĩwamũkũsĩĩe, aiasya, Nĩnamwona Ndaviti, mwana wa Yese, mũndũ wendeeasya ngoo yakwa, ũla ũkeka kwenda kwakwa kw’onthe.

23Na ũsyaonĩ wa mũndũ ũsu kwĩanana na watho wake, Ngai amaetee Isilaeli Mũtangĩĩi Yesũ;

24Yoana aĩ anamba ũtavan’ya ũvatiso wa ũalyũlo wa ngoo kwa andũ onthe ma Isilaeli, mbee wa kũka kwake.

25Na Yoana akĩminũkĩlya mũendo wake, nĩwaisye, Mwĩndalĩlya ninyie ũũ? Tii nyie we. Ĩndĩ sisyai, nĩkũkĩte ũmwe ĩtina wakwa ũla ndyĩaniwe nĩ ũthasya iatũ sya maũũ make.

26Ana‐a‐asa, ana ma ũsyao wa Avalaamu, na ala me katĩ wenyu ala mũkĩaa Ngai, ndeto ya ũtangĩĩo ũũ nĩtũmĩtwe kwitũ.

27Nĩkwĩthĩwa ala matwĩe Yelusaleme, vamwe na anene moo, nũndũ maiaamũmanya, o na mawasya ma athani ala masomawa kĩla mũthenya wa savato, mameanĩsye kwa ũmũsilĩla.

28O na kau maiaaona ũndũ ũtuma mamũaa, ĩndĩ mamũvoya Vilato kana oawe.

29Na mamina kwĩanĩsya maũndũ onthe ala maandĩkiwe kwondũ wake, mamwambũa mũtĩnĩ, na mamwia mbũanĩ.

30Ĩndĩ Ngai amũthayũũkya amumya kwa akw’ũ:

31nake nĩwonekie matukũ maingĩ nĩ ala mambatie nake Yelusaleme kuma Kalilii, namo nĩo ngũsĩ syake yu mbee wa andũ.

32Na nĩtũmũetee ũvoo mũseo wa ũla watho wanengiwe aasa,

33ũndũ Ngai wawĩanĩsye kwa syana sitũ, kwondũ wa kũmũthayũũkya Yesũ; o ũndũ kũandĩkĩtwe Savuli kĩlungu kya keli, Nue mwana wakwa, ũmũnthĩ nĩnaũsyaa.

34Na kwa kwĩthĩwa nĩwamũthayũũkisye kũmumya kwa akw’ũ, atekũsyoka wanangĩkonĩ ĩngĩ, aneenete atĩĩ, Ngamũnenga inyw’ĩ moathimo ma Ndaviti ala matheu na ala maĩkĩĩĩka.

35Nũndũ nĩwaisye naw’o, Savuli vandũ vangĩ, Ndũkanengane Mũtheu waku one wanangĩko.

36Nĩkwĩthĩwa Ndaviti, athũkũmĩte ũtw’ĩo wa Ngai ũsyaonĩ wa ĩvinda yake, nĩwakomie, na aiwa na aaĩthe make, na oona wanangĩko:

37ĩndĩ ũla wokĩlilw’e nĩ Ngai ndaaona wanangĩko.

38Ĩndĩ ũndũ ũũ nũmanyĩke kwenyu, ana‐a‐asa maitũ, kana kwondũ wa mũndũ ũũ nĩkũũtavanw’a kwa inyw’ĩ ũekeo wa naĩ:

39na kwondũ wake kĩla mũndũ ũla ũmwĩtĩkĩlaa nũtalĩlawa ũlũngalu maũndũnĩ onthe, ala kwondũ wa mĩao ya Mose mũtaatonya kũtalĩlwa ũlũngalu.

40Ĩsũvĩei ĩndĩ, ũla waneeniwe mavukunĩ ma athani ndũkese ũmũvikĩa:

41Sisyai, inyw’ĩ avũthya, seng’ai, na anangĩkai; Nũndũ nĩtethya wĩa mĩthenya yenyu, Wĩa ũla mũtaketĩkĩla nongi, o na ethĩwa mũndũ akamũtavya.

42Na makyumaala, mamwĩsũva matavw’e ndeto isu savato ũla wũkĩte.

43Na andũ ala maĩ ĩsinakokenĩ mataanĩsya, aingĩ ma Ayuti na avikĩlĩ ma Kĩyuti makĩaa Ngai mamaatĩĩa Vaulo na Valanava; nao maineena nao mamathing’ĩĩsya mekalae mumonĩ wa Ngai.

44Na savato ũsu ũngĩ, meethĩwa mombanĩte ta ndũa nima methukĩĩsye ndeto ya Ngai.

45Ĩndĩ Ayuti moona makomano, mausũwa nĩ kĩwĩu, na makananĩsya ndeto ila syaneeniwe nĩ Vaulo makĩumana.

46Na Vaulo na Valanava maneena na ũkũmbaũ maiasya, No mũvaka ndeto ya Ngai ĩneenwe mbee kwenyu. Ĩndĩ kwa kwĩthĩwa nĩmwamĩluutile yume kwenyu, na kwĩtw’ĩĩa ene kana mũiaĩlwe nĩ thayũ wa tene na tene, sisyai, nĩtũũalyũka twelekele Andũ‐ma‐mbaĩ‐ingi.

47Nũndũ niw’o tweeaĩwe nĩ Mwĩaĩi, aiasya, Nĩkwiĩte we wĩthĩwe kyeni kya Andũ‐ma‐mbaĩ‐ingĩ, Ni kana wĩthĩwe ũtangĩĩo kũvika itulunĩ syonthe sya nthĩ.

48Na Andũ‐ma‐mbaĩ‐ingĩ meew’a ũu, matana, na mataia ndeto ya Ngai: na ũndũ meanaa ala manyuvĩtwe kwĩthĩwa na thayũ ũtathela nĩmeetĩkĩlile.

49Na ndeto ya Mwĩaĩi yanyaiĩkw’a nthĩ isu yonthe.

50Ĩndĩ Ayuti nĩmamaingĩanĩsye aka me nguma, athaithi anene, na atumĩa anene ma ndũa, na mamokĩlĩlya Vaulo na Valanava thĩna mũnene, na mamalũngya maume mĩvakanĩ yoo.

51Ĩndĩ mamatuangĩa kĩtoo kya nyaĩĩ syoo, na mathi Ikonio.

52Na amanyĩw’a mausũĩtwe nĩ ũtanu na Veva Mũtheu.

← Chapter 12 Jump to: Chapter 14 →