Ezekiel 11

Lugbara (E’yo Siza Alatararu Munguniri BIBLIA)

← Chapter 10 Jump to: Chapter 12 →

1Azini orindi nga vini ma ’du uru, eji ma jo Yehovani ma kalitile etuni efurialeruria. Te mi ndre, kali nde ma tilea ’ba kali iri drini towi; yi ma eselia ma ndre Yaazania Azuri mvi pi Pelatia Benaya mvi be, opi ’ba drilia ’diyi.

2Te eri ’yo ma tia, Mvi ’bani, ’ba ’diyi yi ’ba e’yo onzi egapi, e’yo onzi amapi aku ’dori ma alia ’diyi’i;

3yi ’yo ra, Etu jo sizuri nga ogogo yo; aku ’dori eri otekuani, ama’i ama za aleniari’i.

4E’yo ’disi mi ondri e’yo yi ma ruaa, mi ondri e’yo, mvi ’bani la!

5Orindi Yehovani nga di e’de ma dria, eri ’yo ma tia kini, Mi ’yo kini, Yehova ’yo ’dini: Emi ’yo ndra ’dini, emi suru Israelini la; mani e’yo emini egale asisile emini ma aliari nile rarisi.

6Emi ere ’ba emini ofule ’diyi ma kalafe aku ’dori ma alia ’bo, emi fe geri ariti erini ga tre ’ba emini ofule ’diyi ma avusi ’bo.

7E’yo ’disi Opi Yehova ’yo ’dini: ’Ba emini ofule emini o’bale eri ma alia ’diyi yi zani, aku ’dori eri otekuani; te yi nga emi ofu amve aku nde ma aliasi ra.

8Emi ru ndra sei ra, te ma nga sei eji emi ruaa’i, Opi Yehova ’yo ra.

9Azini ma nga emi ofu aleniasi ra, ma nga emi fe juru ma dria, ma nga e’yo liza ’ye emi ’eselia.

10Emi nga o’de sei ma sia; ma nga e’yo eminiri li angu Israeliniri ma kalatia; emi nga ni ma Yehova’i.

11Aku amboru ’dori ngani ovu otekua eminiru ku, emi ngani vini ovu za aleniariru ku; te ma nga e’yo emini li angu Israelini ma kalatia;

12azini emi nga ni ma Yehova’i; a’disiku emini acile e’yo mani azile ’diyi ma alia kurisi, emini vini e’yo liza mani ’diyi ’yele kurisi, te emi ’ve suru jururu emi ageia ’diyini azilerile.

13Te eri nga di eca ’dini, de mani e’yo ondriria, Pelatia Benaya mvi dra ra, Ma nga e’de ani o’bukuru va, ma oyu uru o’duko urusi, ma ’yo ra, Eyawaye, Opi Yehova la! mi nga Israeli ma joloko de teketeke ra ya?

14Te e’yo Yehovani nga eca ma vu kini:

15Mvi ’bani, mi adripi, adaru mi adripi ori’ba mini ma eselia ’diyi pi ’ba dria suru Israelini ’diyi be dria, yi ’ba ’ba ovupi Yerusalemua ’diyini ’yozu yi ma tia kini, Emi da emi Yehova vurisi ziri; yi fe angu ’dori ama dri afa amaniru, ’dini diyi.

16E’yo ’disi mi ma ’yo yi tia, Opi Yehova ’yo ’dini, Opi Yehova ’yo ’dini: Ma ka tro ndra emi enze emi vile anguasi emi drozu juru eselia ziri, ma ka tro ndra emi ere angu ndu ndu ma eselia ti, ma nga ovu yi dri pari alatararuriru ewu were angu nde yini cale alenia ’bo ’diyi ma alia.

17E’yo ’disi mi ma ’yo ’dini, Opi Yehova ’yo ’dini: Ma nga emi oku suru ’diyi ma eseliasi ra, ma nga emi ti oku tualu engazu angu ndu ndu yini emi erele yi ma alia ’diyiasi, te ma nga angu Israelini fe emi dri.

18Yi nga eca angu nde ma alia ra, te yi riga afa onzikanyaru dria ’diyi pi onze angu nde ma aliasi ra, afa ngule onzi ’diyi be dria.

19Te ma nga yi dri asi fe alu, ma nga orindi o’diru ’ba emi alia; ma nga asi oniru nze yi ma ruaasi ra, ma nga asi ruaniri fe yi dri,

20yi ma aci e’yo mani azile ’diyi ma alia ani beni, yi ma inzi azita mani ’diyi, yi ’yezu indi; yi nga ovu ’ba mani, ma’i ma nga ovu Mungu yini.

21Te ’ba lepi yi ma asia acipi afa onzikanyaru yini ’diyi pi ma vutia e’yo ngule onzi yini diyi be ’diyi, ma nga geri yiniri omvi be yi ngulupi ma dria, Opi Yehova ’yo ra.

22Etu ’dasi kerubi yi nga yi ma opile enga uru, pa omberu yi ma: ageia indi; Mungu Israeliniri ma diza ovu yi ma drilia uru.

23Diza Yehovaniri tu uru aku amboru ma eseliasi, mu pa so oni aku ma kala etuni efurialeruriari ma dria.

24Orindi nga ma ’du uru, nga ma cii afa ndreza alia Orindi Mungunisi Kalideyaa, ’ba yini obile ati’baru ’diyi vu. ’Dini afa ndreza mani ndreleri fu ma vurisi ra.

25Ma nga di e’yo dria Yehovani ecele ma dri ’diyi olu ’ba yini obile ati’baru ’diyi ma tia.

← Chapter 10 Jump to: Chapter 12 →