Ezekiel 32

Lugbara (E’yo Siza Alatararu Munguniri BIBLIA)

← Chapter 31 Jump to: Chapter 33 →

1Te eri nga eca ’dini, eli mudri drini iriri ma mba mudri drini iriri ma o’du alurisi, e’yo Yehovani nga eca ma vu, kini:

2Mvi ’bani, mi ngo awuongo Farau opi Misiriarisi, mi ’yo eri ma tia: Mi ndra kami aluduru suru ndu ndu ’diyinirile, te mi eyiu miriarile; mi efu okposi yi mini ma aliasi, mi otu yi mi pasi, mi eza yi ara yini.

3Opi Yehova ’yo ’dini: Ma nga emba mani se mi dria ’ba ongulumuru suru kakauni be; yi nga mi esi emba mani ma alia.

4Ma nga mi ku angu a’wiru ma dria, ma nga mi ’be amve nyamuko walaruri ma dria, ma nga fe aria ’bua ’diyi dria ma ri mi dria, ma nga fe anyapa angu wudrikuru dria ma alia ’diyi ma tra mi zasi.

5Ma nga za mini o’ba oni dria, ma nga e’bu ga tre avu minisi.

6Ma nga ari mini da yile angu mini yi wezuri ma dria kpere cazu oni vu; pari yini razu ’diyi nga ti mi arisi.

7Ma ka nga mi inyu ra ma nga ’bu ma mile a’bu indi, ma nga fe ’bi’bio erini ’diyini bizu iniciciru; ma nga etu a’bu iritisi, te mba ngani mve ku.

8Ma nga diza dipi okposi ’bua ’diyi oja mi dria bizaru, ma nga angu biza ’ba angu mini ma dria, Opi Yehova ’yo ra.

9Ma nga suru kakau ma asi ecandi indi, ma ka nga dri jaza mini li eji suru ma eselia, kpere angu mini nile ku ’diyi vu.

10Ada ma nga fe suru kakau ma osu misi osu osu, opi yini nga ovu urisi misi tu tu, ma ka nga sei mani oya yi milia; yi ruani nga ya ya etu dria, yi dria alu aluni ovuzu urisi idri ini ma e’yosi, o’du mini e’dezurisi.

11A’disiku Opi Yehova ’yo ’dini: Opi Babuloniari ma seini nga emu mi dria ra.

12Ma nga fe ’ba mini ongulumuru ’diyini o’dezu ’ba okporu ’diyi ma seisi, yi ’ba suru eselia uri fepi ’ba asia’diyi. Yi nga afu Misiriniri eza ra, ’ba ongulumuru erini yi nga dri ja dria ra.

13Ma nga anyapa erini ma dri ja dria engazu yi kakau ma kalaasi; ’ba ma pa ngani vini yi ecandi dika ku, anyapa ma onyofi ngani vini yi ecandi ku indi.

14Vutinia ma nga yi yini ’ba alaru, ma nga fe yi raza yini ma ra odule, Opi Yehova ’yo ra.

15Ma ka nga angu Misirini ’ba ovuzu dri jazaru azini andreru, angu pirini ovupi afa ndra gapi alenia treri kokoru, ma ka nga ’ba dria ovupi ’dale ’diyi ofu rarisi, o’du ndesi yi nga ni ma Yehova’i.

16Awuongo yini ngale ngoleri eri ’di’i; ezoanzi suru ndu nduni ’diyi nga wu awuongo ndesi; yi nga awuongo nde ngo Misiri pisi ’ba erini ongulumuru ’diyi be dria, Opi Yehova ’yo ra.

17Eri nga vini eca ’dini indi eli mudri drini iriri ma alia, mba nde ma o’du mudri drini towisi, e’yo Yehovani nga eca ma vu ’yozu kini:

18Mvi ’bani, mi owu ’ba ongulumuru Misiria ’diyisi, mi o’be yi va, ada eri’i ezoanzi suru ru kuza be ’diyini be, kpere nyaku ma esele valeru tu ’diyi ma alia, ’ba sipi va ’bilea ’diyi be tualu:

19’Ba mini agale rua ndrizasiri a’di’i ya? Mi si va, mi la va ’ba agele lile ku ’diyi be.

20Yi nga o’de ’ba ofule seisi ’diyi ma eselia ra; fe eri sei dri ’bo; emi se eri ’dale ’ba erini ongulumuru ’diyi be dria.

21’Ba okporu ’ba okpo be ’diyi ma eseliari nga e’yo ’yo eri ma tia engazu ’ba drapi ’bo ’diyi ma paria, ’ba eri aza kopi ’diyi be: Yi si va ’bo, yi la va, yi ’ba agele me ku ofule seisi ’diyi.

22Asuriani ’dale indi, ’ba ongulumuru erini be; pari ’ba erini ma avu sazu ’diyi ovu eri ma ageia, yi dria ’ba ofule ra odrapi seisi ’diyi;

23pari yini avu sazu ’diyi ovu ’bile ma kala valeru turia, ’ba erini ongulumuru ’diyi ovu pari eri ma avu sazuri ma ageia; yi dria ’ba ofule ra odrapi seisi ndra uri fepi ’ba idriru ma angua ’diyi.

24Elamuni ’dale indi, ’ba erini ongulumuru be dria pari eri ma avu sazuri ma ageia; yi dria ’ba ofule ra odrapi seisi, osipi va agele me ku nyaku ma esele valeru tu, ndra yi ma uri fepi ’ba idriru ma angua ’diyi, te nya drinza ’ba esipi va ’bilea ’diyi be tualu.

25Yi ’ba eri dri pari lazuri ’ba ofule ra ’diyi ma eselia ’ba ongulumuru erini be, pari erini ’ba ma avu sazu ’diyi ovu eri ma ageia kuru, yi dria ’ba agele lile ku ofule seisi ’diyi; fe ndra yini uri ’ba idriru ma angua, te nya drinza ’ba osipi ’bilea ’diyi be tuahu ’bo; ’ba eri ’ba ofule ’bo ’diyi ma eselia ra.

26Meseki pi ’dale indi, Tubali pie, ’ba ongulumuru yini be dria, pari erini avu sazu ’diyi ovu eri ma ageia, yi dria ’ba agele me ku ofule seisi ’diyi; te yi ’ba ndra yi ma uri ’ba idriru ma angua.

27Yi ngani 1a ’ba okpo be ’ba agele lile ku o’depi ’bo ’diyi ma eselia ku ya? osipi va Pari ’ba drazaniria afa yini ombani be, yi ma sei o’bapi va yi ma dri etia, yi ma e’yo onzini ovuzu yi ma fala dria ’diyi; a’disiku yi fe ndra uri ’ba okporu ’diyi dri ’ba idriru ma angua.

28Te yi nga mi nyo ra ’ba agele lile ku ’diyi ma eselia, mi di nga la ’ba ofule seisi ’diyi be tualu.

29Edomuni ’dale indi, opi erini piyi ’ba wara erini be dria, ka tro yi ’ba okporu ti, yi la ’ba ofule seisi ’diyi be; yi nga la ’ba agele lile ku ’diyi pi be, ’ba sipi va ’bilea ’diyi pie.

30’Ba opiru angu andralerua ’diyi yi ’dale indi dria, ’ba Zidonia ’diyi be dria, yi si va ’ba ofule ’bo ’diyi be; ka tro okpo yini ndra uriuriru ti, yi ovu drinzasi; yi la agele lile kuru ’ba ofule seisi ’diyi be tualu, yi drinza nya ’ba sipi va ’bilea ’diyi be tualu’i

31Farauni nga yi ndre ra, nga i ma asi omi ceni ’ba erini ongulumuru ’diyi ma e’yosi dria, ada Farau pi asikari erini ongulumuru ’diyi be dria, yi ’ba ofule seisi ’diyi, Opi Yehova ’yo ra.

32A’disiku ma ’ba uri erini ’ba idriru ma angua; te yi nga eri la ’ba agele lile ku ’diyi ma eselia ’ba ofule seisi ’diyi be tualu, ada Farau pi ’ba erini ongulemuru ’diyi be dria, Opi Yehova ’yo ra.

← Chapter 31 Jump to: Chapter 33 →