Ezekiel 6

Lugbara (E’yo Siza Alatararu Munguniri BIBLIA)

← Chapter 5 Jump to: Chapter 7 →

1E’yo Yehovani nga eca ma vu kini:

2Mvi ’bani, mi ’ba mi mile oni Israelini ’diyi vu, mi ondri e’yo yi ma ruaa,

3mi ’yo, Emi oni Israelini ’diyi la, emi eri e’yo Opi Yehovani ’yoleri fo! Opi Yehova ’yo ’dini oni amboru ’diyi pi ma tia oni were ’diyi pie, pari yini razu ’diyi pie, e’bu pie: Emi ndre, ma’I, adani ma’i, nga sei eji emi ruaa, ma nga pari emini uruleru ’diyi ma dri ja ra.

4Pari emini edeta edezu ’diyi nga eca andruru, wura emini eturu emini, edele ’diyi nga ovu onyozaru; ma nga ’ba emini fuzaru ’diyi o’be va wura yini inzile ’diyi ma milia.;

5Ma nga anzi Israelini ’diyi ma avu ola va wura yini inzile ’diyi ma milia; ma nga fala emini ere pari emini edeta edezu ’diyi ma ageia.

6Pari emini adrizuria dria aku nga ovu ezazaru, pari uruleru ’diyi nga eca andruru, yi ma eza pari emini edeta edezu ’diyi ani, yi ’bazu andruru, yi ma onyo wura emini inzile ’diyi yi ma ovu di dika ku, yi ma oga wura emini edele eturu ’diyi va ani, azi erini ma ovu imzaru ani beni,

7’Ba yini ofule ’diyi nga o’de va emi eselia, emi nga ni ani kini ma Yehova’i,

8Te ti, ma nga ’ba azini ’diyi ma joloko ku ci, ’ba emini ma azi yini apazu sei sia juru ma eselia, emi ka nga emi ere angu ndu ndu ma eselia ’boria.

9Te ’ba yi opapi ’bo emi eselia ’diyi nga e’yo mani ega suru ndu ndu yini ngazu yi jizu ati’baru yi ma eselia ’diyi ma alia, yi nga ega kini asi yini ali o’bapi ma kupi rari fe ma asi nyo i candisini, mile yini ali ’bapi wura yini inzile inzi ’diyi ma vuti bipi ’diyi be; yi nga eca onzikanyaru tu yi ngulupi ma milia ani, e’yo onzi yini ’yele e’yo ngule onzi ’diyi dria berisi.

10Yi nga ni indi ma Yehova’i; ma ’yoni ndra toko ku kini ma nga e’yo onzi ’diri ’ye yi ruaa.

11Opi Yehova ’yo ’dini: Mi sa mi dri, mi tu angu va mi pasi, ’yozu kini, Eyawaye e’yo ngule onzi suru Israelini ’yele ’diyi dria yi kakau ’doni ya Te yi nga ani o’de seisi, kani likisi, kani azo muanisi indi.

12’Ba ovupi ziriri nga dra azo muarurisini; ’ba ovupi ogogori nga dra seisini; ’ba joloko acepiri yini acele ombasi kururi nga dra likisini. Ma nga adra mani ’ye yi ruaa ’dini,

13Emi di nga ni ani ma Yehova’i, ’ba yini ’bani ofule ’diyi ma avu ka nga ovu wura yini inzile ’diyi ma eselia pari yini edeta edezu ’diyi ma ageia, oni izuru piyi ma dria dria, oni drimbiliru ’diyi pie, pati ibiru ma etia dria, kumara bi be tre ’diyi ma etia dria indi, pari yini afa aji be arikariru fezu wura yini inzile ’diyi dri dria ’diyi.

14Te ma nga ma dri eju yi ma ruaa, ma nga angu fe ovuzu andruru azini ezazaru, engazo angu rokoru Dibila vualeruriasi cazu pari yini ovuzuri ma eselia dria, Te yi nga ni kini ma Yehova’i,

← Chapter 5 Jump to: Chapter 7 →