Ezekiel 20 — Lugbara (E’yo Siza Alatararu Munguniri BIBLIA)

1Te eri nga eca ’dini eli aziriri ma alia, mba towi ma o’du mudrisi, ’ba Israelini ’wara ’diyi ma azi eca Yehovani zizu, emu ri ma drilialeru.

2Te e’yo Yehovani nga eca ma vu kini:

3Mvi ’bani, mil ’yo ’ba ’wara Israelini ’diyi ma tia, mi ’yo yi tia kini, Opi Yehova ’yo ’dini: Emi emu e’yo zizu ma tia ra ya? Mani ovule idri berile, Opi Yehova ’yo ra, ma a’ini emini e’yo zizu ma tia aluni ku.

4Mi nga yi ma e’yo li, mvi ’bani la, mi nga yi ma e’yo li ra ya? Mi fe yi ma ni yi ma atapi ma e’yo onzikanyaru ngule onzi ’diyi,

5mi ma ’yo yi tia, Opi Yehova ’yo ’dini: O’du ndra mani Israelini pezu, azini mani ma dri engazu oyo sozu ori Yakoboni vu, ma ’bazu nizaru yi dri angu Misirinia, mani ma dri engaria yi vu kini, Ma Yehova Mungu eminiri’irisi,

6o’du nde ’dasi ma enga ma dri yi vu oyo sozu, yi ofuzu amve angu Misiriniarisi, yi ofizu angu mani amale yi dri ’bo, lesu pini razu alenia anyuoso be, ovupi angu dria ma dizaniria.

7Te ma ’yo yi ma tia, Emi alu alu ma o’be afa ngule onzi emi ma mileni lele ’diyi amve, emi ma eza emi wura toko Misirini ’diyisi ku; ma Yehova Mungu eminiri’i.

8Te yi mbu ma ruaarisi amve ra, yi ga ma ti eriko si; yi o’beni alu alu afa ngule onzi yi ma mileni lele ’diyi amve ku, kuni vini wura toko Misirini ’diyi inzikokoru ku. Ka’dini ma nga di ’yo kini ma nga adra mani osu yi ma dria, ngazu fezu aoko manini i dezu yi ma ruaa angu Misirini ma alia ’daa.

9Te ma ’ye ru mani ma e’yosi, yi kazu ma ru o’dazu suru ndu ndu yini ovuzu yi ma eselia ’diyi ma milia ku, te ma e’da ndra ma ovuzu nizaru yi dri ’ba nde ma milia, yi ofuzu angu Misiriniasi,

10’Dini ma ofu di yi angu Misiriniarisi amve ra, ma ji yi angu roko driari ma alia.

11Ma fe e’yo mani azile ’diyi yi dri ra, ma ece vini e’yo liza mani yi dri indi, te ’ba ka nga e’yo liza nde ’diyi ’ye ra, eri nga ovu idriru yisi.

12Ma fe vini sabato mani yi dri ovuzu ecetaru ama eselia yi be, yi ma ni ani kini ma Yehova yi ’bapi alaruri’i.

13Te Isuru Israelini mbu ma ruaarisi amve angu roko driari ma alia; yi acini e’yo azile yi dri ’diyi ma alia ku, yi nga e’yo liza mani ’diyi si, e’yo liza nde ’diyi ’ba ka nga yi ’ye ra yi nga ovu ani idriru yisi; yi eza sabato mani onzi tu. Ma nga di ’yo kini ma nga adra, mani osu yi ma dria angu roko driaria ’daa, yi dri jazu.

14Te ma ’ye ru mani ma e’yosi, yi kazu ma ru o’dazu suru mani yi ofuzu yi ma milia ’diyi ma milia ku.

15Azini vini ma enga ma dri oyo sozu yi vu angu roko driaria kini ma ngani di yi ji angu mani fele yi dri ’bo, lesu pini razu alenia anyuoso be, ovupi angu dria ma dizaniria ku,

16yini e’yo liza mani gale ’borisi, yini acile e’yo mani azile ’diyi ma alia kurisi, yini vini sabato mani ezalerisi; te yi ma asi fu mu wura toko yini ma vuti bizu.

17Te ti, ma mile ovu yi vusi yikisi, ma kazu yi dri jazu ku, ma deni vini yi teketeke angu roko driari ma alia ku.

18Te ma ’yo anzipi yini ma tia angu roko driaria, Emi ma aci e’yo emi atapini azile ’diyi ma alia ku, emi ma mba e’yo liza yini ma ta ku, emi ma eza emi wura toko yinisi ku indi

19Ma Yehova Mungu emini; emi aci e’yo mani azile ’diyi ma alia, emi inzi e’yo liza mani, emi ma ’ye yi indi,

20emi ma ’ba sabato mani alatararu, te yi nga ovu ecetaru ama eselia emi be, emi ma ni ani ma Yehova Mungu emini.

21Te anzipi mbu ma ruaarisi amve ra, yi acini e’yo mani azile ’diyi ma alia ku, inzini vini e’yo liza mani ’diyi yi ’yezu ku indi, te ’ba ka nga yi ’ye ra, yi nga ovu idriru yisi ra; yi eza sabato mani ra. Ma nga di ’yo kini ma nga adra mani osu yi ma dria, mani ngazu fezu aoko manini i dezu yi ma ruaa angu roko driaria ’daa.

22Te ti, ma enze ma dri, ma ’ye ru mani ma e’yosi, yi kazu ma ru o’dazu suru mani yi ofuzu yi ma milia ’diyi ma milia ku.

23Ma enga vini ma dri oyo sozu yi vu angu roko driaria kini ma nga yi ere suru ma eselia ra, ma nga yi ere ndu ndu angu ndu ndu ma eselia,

24a’disiku yi ’yeni e’yo liza mani ku, yi ga e’yo mani azile ’diyi ’bo, yi eza vini sabato mani ’bo’i yi ’ba yi ma mile yi ma atapi ma wura toko ’diyi vu yi inzizu.

25Ma feli vini yi dri azita ovupi onyiru ku ’diyi pi e’yo liza yini ngazu ovuzu alenia idriru ku ’diyi be;

26ma eza yi yi ma ngulupi ma afa fezasi, yini ani afa dria efupi opojo alia oko ’diyi fezu agazu aci alesi, ma ma ja yi dri beni; yi ma ni ani ma Yehova’i.

27E’yo ’disi, mvi ’bani la, mi olu e’yo suru Israelini ma tia, mi ’yo yi tia, Opi Yehova ’yo ’dini: E’yo ’diri ma alia emi a’bipi o’da ma ru indi, yini ezata ezale ma vurisi.

28A’disiku ma ka ndra yi ofi angu nde ndra mani ma dri engazu oyo sozu fezu yi dri ndoria ’bo, o’du ’dasi yi ne oni izuru dria alu alu, azini pati ’bi be tru tru ’diyi dria alu alu, yi nga edeta ede ani ’daa, pari ’da ma alia yi ofe edeta yini ma asi engapi adraru ’diyi; yi ede afa yini aji be arikariru ’diyi ’daa, yi osu afa mvuza yini osule edetaru ’diyi ’daa indi.

29(Ma nga di ’yo yi ma tia, Pari uruleru emini muzu aleniari ma efi ngoni ya? E’yo ’disi ’da runi Bama, ecazu kpere o’du andru ’dorisi.)

30E’yo ’disi mi ma ’yo suru Israelini ma tia kini, Opi Yehova ’yo ’dini: Emi eza emi ekile emi atapini yi ezalerile ya? Emi mu ali o’bazu afa yini ’yele Munguni ngule onzi ’diyi ma vuti bizu ya?

31Te emini afa feza emini feria, azini emini feria anzi emini ma aga aci ma alesi, emi eza emi wura toko emini ’diyisi dria ecazu kpere o’du andru ’dorisi ya? Te emi nga vini e’yo zi ma tia ra ya, emi suru Israelini ’diyi la? Mani ovule idrirurile, Opi Yehova ’yo ra, ma a’ini di emini e’yo zizu ma tia aluni ku.

32Azini indi e’yo emini egale emi asiari ngani i ’ye ’ dini ku: emini ’yoria kini, Ama nga ovu ekile suru azi ’diyile, ekile suru angu ndu ndua ’diyile, azi ngazu pati pi inzizu oni be.

33Mani ovule idri berile, Opi Yehova ’yo ra, ma nga adri opiru emi drilia ra ’bo, te ada dri okporu pisi wu ejuleri pie, adra osule ’ba driari pie.

34Ma nga emi ofu suru ma eseliasi, ma nga emi oku engazu angu ndu ndu emini emi erezu yi ma alia ’diyiasi ra, dri okporu pisi wu ejuleri pie, adra osule ’ba driari pie;

35te ma nga emi ofi angu roko dria ’ba jururu vileria, ma nga e’yo nze emi ma ruaa ’daa milia milia.

36Ekile ndra mani e’yo nzele emi a’bipi ma ruaa angu roko dria Misiriaria ma nga e’yo nze emi ruaa trotro ’dinile, Opi Yehova ’yo ra.

37Ma nga fe emi ma aga kali etiasi, ma nga emi eji ombeza e’yo azizaniri ma alia ra.

38-Ma nga ’ba mbupi amve ’diyi onze dria emi eseliarisi ra, ’ba e’yo ezapi ma vu ’diyi pie dria; ma nga yi ofu amve angu yini ovuzu alenia ani’baruriasi, te yi ngani fi angu Israelinia ku. Emi nga ni ani ma Yehova’i.

39Te suru Israelini la, Opi Yehova ’yo e’yo emisi ’dini: Emi mu di, emi alu alu ma nga azi wura toko emini inzizu yi, kpere ewu vileria indi, emi ka le e’yo mani eri kuria; te emi ngani ru mani alatararuri eza ’dani afa feza emini piyisi wura toko emini be ku.

40A’disiku Opi Yehova ’yo ra. Suru Israelini dria, adani yi dria alu alu, nga azi nga ma dri angu nderi ma alia oni mani alatararuri ma dria, adani oni angu uruleru Israelinirini ma dria; ma nga yi a’i ’dale, ma nga le emi ma eji afa feza emini piyi ’dale, anyadri kapi oko edetaruri pie, afa emini alatararu ’diyi pie dria.

41Ma nga emi a’i afa aji be arikarirurile, ma ka nga emi ofu suru ndu ndu ma eseliarisi, ma ka nga emi oku engazu angu ndu ndu emini emi erezu yi ma alia ’diyiasiria; azini ma nga ovu alatararu emi ma alia suru ndu ndu ma milia ra.

42Emi nga ni ani ma Yehova’i, ma ka nga emi eji angu Israeliniria, kpere angu ndra mani ma dri engale oyo sozu eri fezu emi a’bipi driria.

43Emi nga geri emini ma e’yo ega ’dale, azini ’yeta emini, emini ani emi ezazu ’diyi be dria; emi ma ngulupi nga ofu ani kile afa ngule onzirile emi ma milia, e’yo onzi emini ’yele ’diyi ma e’yosi dria.

44Te emi nga ni ma Yehova’i, ma ka nga ’ye emi be ru mani ma e’yosi ’boria, geri emini onziri vusi ku, azini ’yeta emini onzikanyaru ’diyi vusi ku indi, emi suru Israelini ’diyi la, Opi Yehova ’yo ra.

45E’yo Yehovani eca ma vu kini:

46Mvi ’bani, mi ’ba mi mile angu uruleruri vu, mi fe e’yo mini ’yoleri ma ti angu uruleruri vu ti ti, mi ondri e’yo pati oceru asea ’dale Angu Uruleruari ma dria;

47mi ’yo pati oceru Angu Uruleruari ma tia kini, Emi eri e’yo Yehovani: Opi Yehova ’yo ’dini, Mi ndre, ma nga aci edu mi alia, eri nga pati ibiru diyi ove mi alia dria dria, eri nga pati a’wiru ’diyi ove dria dria indi; ad adra ’diri ngani i inyu ku, eri nga ’ba dria ma mile ove engazu angu uruleruarisi kpere angu andraleruri vu.

48’Ba rua ari be ’diyi dria nga ndre kini ma Yehova, ma edu aci nde ma’i; eri ngani i inyu ku.

49Ma nga di ’yo, Wa wo, Opi Yehova la! te yi ’yo masi ’dini kini, Eri ’ba e’yo o’beza o’bepiri’i ku ya?