Ezekiel 36

Lugbara (E’yo Siza Alatararu Munguniri BIBLIA)

← Chapter 35 Jump to: Chapter 37 →

1Te mi mvi ’bani la, mi ondri e’yo oni Israelini ma dria, mi ’yo ’dini, Emi oni Israelini ’diyi la, emi eri e’yo Yehovani fo!

2Opi Yehova ’yo ’dini; Ari’bani ’yole mi dria, Awa’difo! azini, Fe pari uruleru oku drio ’diyi ama dri nyazu ra, dinirisi,

3e’yo ’disi mi ondri e’yo,mi ’yo, Opi Yehova ’yo ’dini: Ada yini mi ’bale andrururisi, yini mi okile kala vusi driarisi, mi ma ovu ani suru ma joloko acepi ’diyi ma awuafaru, azini ’ba e’yo ’yopi ’diyi yi emi ru ’yo ajidimararu, azini ’ba fe e’yo emini kuzu onzi;

4e’yo ’disi emi oni. Israelini la, emi eri e’yo Opi Yehovani ’yoleri fo! Opi Yehova ’yo’dini oni amboru ’diyi pi ma tia oni were ’diyi be, yi raza ’diyi pi ma tia e’bu ’diyi be, aku andruru ezazaru ’diyi pi ma tia aku kule ra ovupi suru ma joloko acepi ovupi yi ma ageia kuru ’diyi dri afa opazale azini ogutaru ’diyi be;

5e’yo ’disi Opi Yehova ’yo ’dini: Ada a’ya mani vepi okposirisi, ma ’yo suru ma joloko acepi ’diyi pi ma dria Edomu dria be, suru angu mani pepi yi ma ngulupi dri awuafaru ayiko yi ma asiarisi, eri ’yezu asi onzisi, eri ’bezu amve afa pazale ’diyi.

6E’yo ’disi mi ondri e’yo angu Israelini ma e’yosi, mi ’yo oni amboru ’diyi pi ma tia, oni were ’diyi pie, yi raza pie, e’bu pie, Opi Yehova ’yo ’dini: Mi ndre, ma ’yo e’yo a’ya manisi azini aoko manisi ’bo, juruni drinza fele emi dririsi;

7e’yo ’disi Opi Yehova ’yo ’dini: Ma enga ma dri oyo sozu kini, Ada ada ’ba jururu emi ageia ’diyi nga ovu drinza be yi’i.

8Te emi’i, emi oni Israelini la, emi nga arakala emini idi ra, emi nga efi emini ka suru mani Israelini dri; yini ’yele emu emurisi.

9Te emi ndre, ma fi emini, ma nga ma oja emi vu, yi nga emi ’ya ra, nga ori fa emi ma alia; loma

10ma nga vini fe ’bani ezuzu emi ma alia tre, yi suru Israelini dria, ada suru nde woro; laku yi nga ovu ’ba be, yi nga pari andruru ’diyi si dika:

11ma nga fe ’ba piyini ezuzu tre emi ma alia anyapa be; yi nga ezu ra, nga ti tu; ma nga fe ’ba ma ovu emi ma alia ekile ndra okorile ra, ma nga emi ’ye onyiru aga ndra mani ’yele e’doza emini ma aliari ra. Emi nga ni ma Yehova’i.

12Ada ma nga fe ’ba ma aci emi dria, yi ’ba mani Israelini ’diyi; yi nga mi nya angu yiniru, mi nga ovu yi ma awurusoru, mi ngani yi fe ovuzu anzi kokoru dika ku.

13Opi Yehova ’yo ’dini: Yini adrile ’yole ’dinirisi, kini, Mi angu la, mi angu ’ba nyapiri, azini mi ndra suru mini ’bapi ovuzu anzi kokoruri’i;

14e’yo ’disi mi ngani ’ba nya dika ku, mi ngani vini suru mini ’ba ovuzu anzi kokoru dika ku indi, Opi Yehova ’yo ra;

15ma ngani vini mi ku drinza juruni erizu ku, mi ngani ovu o’data suru ’diyini be dika ku, mi ngani vini suru mini fe abazu dika ku indi, Opi Yehova ’yo ra.

16E’yo Yehovani nga vini eca ma vu kini:

17Mvi ’bani, suru Israelini ka ovu mira yi vile angua, yi eza ndra eri geri yinisi azini ’yeta yinisi; geri yini ovu ndra ma milia ondi okuni erini i esele coriarile.

18E’yo ’disi ma ada aoko mani yi ma dria, ari yini adale angu ma dria ’bori ma e’yosi, yini eri ezale wura yini inzile inzi ’diyisirisi.

19Ma ere di yi suru ma eselia, yi ovu ani erezaru angu ndu ndu ma eselia; ma li e’yo yini geri yini vusi azini ’yeta yini vusi.

20Te yi ka eca suru yini; muzu yi vu ’diyi ma eselia ’bo, yi eza ru mani alatararu, a’disiku ’ba ’yo ra, ’Diyi ’ba Yehovani, te yi fu eri ma anguasi ’bo.

21Te ma ovu ndra yikisi yi vu ru mani alatararu suru Israelinirini ezale suru yini muzu yi vu ’diyi ma eselia ’bori ma e’yosi.

22E’yo ’disi mi ’yo suru Israelini ma tia, Opi Yehova ’yo ’dini: Ma ’yeni e’yo ’diri e’yo eminisi ku, emi suru Israelini la, te ru mani alatararu; emini ezale suru emini muzu yi vu ’diyi ma eselia ’bori ma e’yosi.

23Ma nga ru mani amboruri ’ba: alatararu, ovupi ndra ezazaru suru eselia, emini ezale emi’i yi ma eseliari; te suru yi nga ni ma Yehova’i, Opi Yehova ’yo ra, ma ka nga ovu alatararu mi ma alia va yi ma milia raria.

24A’disiku ma nga emi ’du: engazu suru eseliasi, ma nga emi oku angu ma aliasi dria, ma nga emi eji emi ngulupi ma angua.

25Ma nga yi alaru oya emi dria, emi di nga ovu alaru ani, ma nga emi oji alaru azavu eminisi dria, azini wura emini inzile inzi ’diyisi dria indi.

26Ma: nga asi o’diru fe emi dri, ma nga orindi o’diru ’ba emi ma alia; ma nga asi oniru nze emi rua aliasi ra, ma nga asi rua kalanyaniri fe emi dri.

27Ma nga orindi mani ’ba emi alia, ma nga fe emi ma ad azita mani ma alia, emi nga ani e’yo liza mani ma ra mba yi ’yezu indi.

28Emi nga ovu angu mani fele emi a’bipi driri ma alia, emi nga ovu ’ba maniru, ma nga ovu Mungu eminiru.

29Ma nga vini erru opa ondi eminisi dria; ma nga anya omve, ma nga fe eri ma ezu ra, ma ngani abiri ’ba emi dria ku.

30Ma nga patiefi fe kazu kakau, efi kaza amvuniri be, juru kazu emi o’dazu emini ovule abiri berisi dika ku beni.

31O’du ’dasi emi nga geri emini onzikanyaru ’diyi ega ra, ’yeta emini ndra onyiru kuri be; emi nga ani emi ma ngulupi ngu emi ma milia ceni ceni e’yo onzi eminisi, e’yo ngule onzi emini ’diyisi indi.

32Emi ma ni ra, ma ’yeni e’yo ’diri emi ma e’yosi ku, Opi Yehova ’yo ra; emi ma ovu drinzasi, emi ma aba aba geri emini ma e’yosi, emi suru Israelini la!

33Opi Yehova ’yo ’dini: o’du mani ngazu emi ’bazu alaru e’yo onzi emini wuzu driarisi, ma nga fe aku ambo ambo ’diyi ma ovu ’ba be, ma nga fe vini yini pari andruru ’diyi sizu indi.

34Te angu ndra andruru ’diri nga ovu ’yazaru, erini ndra ovule andruru ’ba dria agapi geria ’diyi ma miliari ti.

35Te yi nga ’yo ra, Angu ndra andruru ’diri eca nga Edeniarile ’bo; aku ndra ezale andruru anzule ra ’diyi ovu di abi kaliru be ’bo, ’ba yi ma alia indi.

36Te suru acepi mi ageia kuru ’diyi nga ni kini ma Yehova, ma si pari ezale ’bo ’diyi ra, ma sa afa pari a’uceru ma alia ’bo;ma’i Yehova ama ’yo e’yo ’diri ’bo, ma nga eri ’ye ra,

37Opi Yehova ’yo ’dini: Suru Israeli eco e’yo ’diri zizaru ma tia indi, eri ’yezu yi dri: ma nga yi ezu ’ba be tre kabilo o’birule.

38Ekile kabilo o’biru ’bani ejile edetaru ’diyile ekile kabilo o’biru Yerusalemua omu erini o’duni azile ’bo ’diyisirile, aku andruru ’diyi nga ovu ’ba o’biru be trotro ’dini. Te yi nga ni ra ma Yehova’i.

← Chapter 35 Jump to: Chapter 37 →