Ezekiel 4

Lugbara (E’yo Siza Alatararu Munguniri BIBLIA)

← Chapter 3 Jump to: Chapter 5 →

1Mi indi, mvi ’bani, mi ’du biriki alu, mi ’ba eri mi drilia, mi si wura akuni drinia, ada wura Yerusalemuniri’i;

2mi ace eri kuru ombasi, mi si jo okporu ’bani ani omba ’bazu ’diyi eri ma ageia, mi oku nyaku nguluru eri ma ageia; mi ’ba pari ari’bani hema asozu eri ma ruaa ’diyi, mi ’ba pati ombani yini abi sizu va ’diyi eri ma ageia indi.

3Azini mi ma ’du mini ajiko ayaru, mi ’ba eri ovuzu abi ayaru mi ngulupi pi ma eselia aku amboru nde beriru; mi ’ba mi mile eri vuleru, ’ba yi nga eri ace ombasi kuru, mi nga eri ace ombasi kuru. E’yo ’diri nga ovu ecetaru suru Israelini dri.

4Azini indi, mi ma la mi eje dri ejialeruri ma dria, ma ’ba suru Israeliniri ma e’yo onzi eri ma dria; mi nga e’yo onzi yini ’du mi ruaa ekile kalafe o’duni mini lazu eje mini ma driari vusi.

5A’disiku ma azi kalafe eli yini e’yo onzi be ’diyiniri Ima ovu mi dri o’du ma kalafele, adani o’du turu na drini kali oromi; mi nga e’yo onzi suru Israeliniri ’du mi ruaa ’dini,

6Azini dika, mi ka o’du de ’dipi ’bo, mi nga vini la eje dri ndiari ma dria, mi nga suru Yudani ma e’yo onzi ’du mi ruaa; ma azi mi dri o’du kali su, o’du alu alu eli alu alu vusi.

7Te mi nga mi mile ’ba aceza Yerusalemuni acezu ombasiri vuleru, mi nga mi bongo tru mi wuaarisi ra; mi nga e’yo ondri eri ma ruaa.

8Azini, mi ndre, ma anziriku ’i mi ruaa, mi ma oja mi eje aziniri ma dria ku, de nga mi deni o’du mini aku acezu ombasi ’diyi ku.

9Mi ’du mini nganu pi, ’du pie, kaiko pie, osu nyiri pie, anya pie, burusu pie, mi ’ba yi imvu alu ma alia, mi ova ani enya afa ’diyi be. Mi ma nya afa ’diri o’du mini ngazu lazu eje mini ma dria ’diyi ma kalafe vusi, cazu kpere o’du turu na drini kali oromi.

10Nyaka mini ngale nyaleri mi ma nya o’bizasi, sekeli kali iri o’du alu alu vusi; mi nga eri nya o’du alu pale alu.

11Mi ma mvu yi o’bizasi indi, otekua alu ma esele azia ’diyi ma azi aluri; mi nga mvu o’du alu pale alu.

12Nyaka nde nga ovu ekile mikate nyiri nyiri edele anyafurasi ’diyile, mi ma ozo eri yi ma milia, ejaniri ze efupi ’ba ma aliari’i.

13Te Yehova ’yo ra, Anzi Israelini nga mikate yini nya alata kokoru ’dini suru mani ngale yi odrole yi vu ’diyi ma eselia.

14Ma nga di ’yo ra, Wa wo, Opi Yehova la! mi ndre, orindi mani ecani nga alata kokoru ku; gbu mvasi ecazu kpere curu’do ma nyani nga afa drapi ceniri, kani nguruni cileri pi ma za ku, za alata kokoruri fini nga ma tilia aluni ku.

15Eri ’yo ra, Mi ndre, ma fe mi dri tiwara ze ’bani ma paria, mi nga enya mini ova erisi.

16’Yo vini ma tia indi kini, Mvi ’bani, mi ndre, ma nga kali enyaruri nye Yerusalemua ra; yi nga enya o’bile o’bizasi nya asi otizasi; yi nga yi mvu o’bizasi, de yi ma asini osu osu;

17enya pi ma ava yi mvuza beri ma fu yi beni, yi ma osu yi ma eselia osu osu, yi ma odi ani e’yo onzi yini ma alia.

← Chapter 3 Jump to: Chapter 5 →