Ezekiel 44

Lugbara (E’yo Siza Alatararu Munguniri BIBLIA)

← Chapter 43 Jump to: Chapter 45 →

1Vutinia eri nga di ma omvi vile geri pari alatararuri ma kalitile amveleru ti fepi kala etuni efuzurialeruriari vurisi; te eri ovu opizaru.

2Yehova nga di ’yo ma tia kini, Kalitile ’diri nga ovu opizaru ra; yi ngani eri zi ku, ’ba ngapi fipi eri ma tilesini aluni ’yo; a’disiku Yehova Mungu Israelinirini efile geri eri ma aliarisi ’borisi; e’yo ’disi eri nga ovu opizaru ani.

3Te opi ma e’yo ’dini, eri nga ri eri ma alia opiru enya nyazu Yehova ma drilia; eri nga fi geri ikalitile nde ma jobileko vurisi, eri inga fu geri nde alu ’darisi.

4Vutinia eri nga ma eji geri; kalitile andraleru jo ma driliari vurisi; ma lu ra, te mi ndre, diza Yehovani ga jo Yehovani ma alia tre; ma nga di ma eco o’bukuru va.

5Yehova ’yo ma tia, Mvi ’bani la, mi ’ba mi asi e’yo ’diri nizu, mi ndre mi milesi, mi co mi bile e’yo dria mani ’yole mi tia e’yo dria azile jo Yehovani ma e’yosiri erizu, azita erini be dria; mi ’ba mi asi pari ’bani fizu joari pi ma e’yo amazu pari dria ’bani fuzu pari alatararuriasiri be.

6Mi nga ’yo ’ba mbupi amve ’diyi ma tia, ada suru Israelini ma tia kini, Opi Yehova ’yo ’dini: Emi suru Israelini la, e’yo ’diri ma fu dri emi dri ci e’yo ngule onzi emini ’diyi ma alia,

7emini ’ba jururu agele liza kokoru asia azini agele liza kokoru yi ma ruaa ’diyi ofizu, yini ani ovuzu pari mani alatararuri ma alia eri ezazu, ada jo maniri’i, emini mikate mani pi feria edetaru, oso pie ari be. Te yi eza aziza mani ’bo, afa ngule onzi emini ’diyi dria ma azini o’bazu drinia drinia.

8Emi mbani vini azi afa mani alatararu ’diyiniri ma ta ku; te emi ’ba ’ba pari mani alatararu ma alia azi mani ma ta mbazu, emi ma ngulupi ma drisi.

9Opi Yehova ’yo ’dini, ’Ba jururu anzi Israelini ma eselia ’diyi ma azi, ovupi agele liza kokoru asia azini agele liza kokoru eri ma ruaari ma fi pari mani alatararuri ma alia aluni ku.

10Te ’ba Levini mupi ma vusi ziri, geri mani kupi wura yini inzile inzi ’diyi ma vuti bipi, Israelini ndra geri mani kuria raria ’diyi, yi nga e’yo onzi yini ma panga a’i yi’i.

11Te yi nga ovu ’ba azi ngapi pari mani alatararuri ma alia, azi ndrepi jotilia, azi ngapi joa ’diyiru; yi nga edeta vezaruri pi li ra, edeta be ’ba dri, yi nga pa so yi drilia azi ngazu yi dri.

12Yini ndra azi ngale yi dri wura yini inzile inzi ’diyi ma driliarisi, yini yi ojale ovuzu kumu e’yo onziniriru suru Israelini dririsi, e’yo ’disi ma enga ma dri oyo sozu yisi ’bo, Opi Yehova ’yo ra, yi nga e’yo onzi yini ma panga a’i yi ruaa yi’ini.

13Yi ngani eca ma vu ogogo azi alatararuri ngazu ma dri ku, yi ngani vini esi ogogo afa mani alatararu ’diyi ma azini vu aluni ku, ada yi ngani eca afa alatararu tu ’diyi vuku; te yi nga ovu drinza yini be afa ngule onzi yini ’yele ’diyisi.

14Te ti, ma nga yi ’ba ’ba jo ma azi ta mbapi ’diyiru, azi erini ma e’yosi dria, afa ’bani ’yele eri ma alia ’diyisi dria indi.

15Te ’ba edeta edepi ’ba Levini, Zadoki ma oriru ndra pari mani alatararuri ma azita ta mbapi o’du anzi Israelinini geri mani kuzurisi ’diyi nga esi ma vu ogogo azi ngazu ma drini; yi nga pa so ma drilia oso pi fezu ma dri ari beni, Opi Yehova ’yo ra;

16yi nga fi pari mani alatararuri ma aliani, yi nga esi mesa mani vu ogogo, azi ngazu ma dri, yi nga azi mani ma ta mbani.

17Te eri nga ovu ’dini, yi ka fi riidri alialeruri ma kalitilea, yi nga bongo mile be nyiriri su’i; kabilo ’biko ma ca yi ma ruaa ku, yini azi ngaria riidri alialeruri ma kalitilea, azini jo nde ma alia.

18Bongo ombeza mile be nyiriri ma ovu yi ma dria, yi ma su bongo pani mile be nyiriri yi rita opilea; yi ma adi yi afa azini fepi ondini efuzu yi ma ruaarisi ku.

19Te yi ka fu amve muzu riidri amveleruria, ada riidri amveleruri ma alia kpere fuzu ’ba nde vu, yi ma otru bongo yini azi ngazu ’diyi ra, ma o’ba yi jo aliza alatararu ’diyi ma alia; yi ma su bongo andini, yi kazu ’ba ’bazu alaru bongo yinisi ku.

20Yi ma fa dri’bi yi ma driari ku, ma ku dri’bi yini ma du izuru ku indi; te yi ma oli yi ma dri’bi oli oli.

21’Ba edeta edepiri aluni ma mvu patiefi ma su yini firia riidri alialeru ria ku.

22Ma je vini awuzi okuru ku, kani oku drole ’bori ku indi, te ma je ezoanzi aliriaru suru Israelini ma oriru ’diyi, kani awuzi, ’ba edeta edepiri ma awuzi’i.

23Yi ma imba ’ba mani esele coza afa alatararuri pi ma eselia afa ’ba drianiri beri nizu, yi ma fe yi ma va esele coza afa ondiru pi ma eselia afa alaru beri ra.

24Yi nga pa so e’yo lizu agata gaza ma alia, yi ma li e’yo nde e’yo liza mani ’diyi vusi. Yi nga azita mani piyi ma ta mba e’yo mani azile ’diyi be, omu dria mani pele ’diyi ma alia; Yi nga sabato mani ’diyi ’ba alatararu.

25Yi ma ca ’ba ma avu vu ogogo, yi ma ngulupi ’bazu alatara kokoru ku; mite yi eco yi ’ba alatara kokoru yi ati Pisi andri pie, mvi pie, zi pie, adripi pie, kani amvipi agupi kokoruri pie.

26Eri ka i ’ba alaru dika ’bo, eri ma la i dri o’du aziri.

27O’du erini fizu pari alatararuria, ada erini fizu riidri alialereria, azi ngazu pari alatararuri ma aliarisi, eri ma fe edeta ini e’yo onziniri, Opi Yehova ’yo ra.

28Yi nga ovu awuruso yini be: ma awuruso yiniriru ma’i; emi ma fe yi dri afa azini ovuzu yi ma afaru Israeli ma alia ku; ma afa yiniru ma’i.

29Yi nga edeta anyafurasiri pi nya, edeta e’yo onziniri pie, edeta e’yoni ’ba ndezuri be; afa dria Israeli ma eselia ’bani oyoni sole eri fezu Mungu driri nga ovu yini.

30Afa kaza esele be dria ma efi kapi oko ’diyi pi, afa feza esele be dria afa feza eminirini ’diyi be, nga ovu ’ba edeta edepi ’diyi dri; emi ma fe ’ba edeta edepiri dri anya emini ovale nga kuri ma esele okori, asi ndriza ma ovu jo mini ma dria beni,

31’Ba edeta edepi ’diyi ngani afa azini drapi ceniri ma za nya ku, kani nguruni ocileniri’i ku, ka tro ariani kani anyapani ti.

← Chapter 43 Jump to: Chapter 45 →