Ezekiel 26

Lugbara (E’yo Siza Alatararu Munguniri BIBLIA)

← Chapter 25 Jump to: Chapter 27 →

1Te eri nga eca ’dini eli mudri drini aluri ma mbao’du okorisi, e’yo Yehovani nga eca ma vu, kini:

2Mvi ’bani, Turoni ’yole Yerusalemu ma dria ’dinirisi, kini, Awa’di, fo! suru ndra suru ma kalitileruri nyo i ’bo, oja i ma vu ’bo; erini ovule curu’do ezazarurisi ma nga ga tre lonyisi dika;

3e’yo ’disi Opi Yehova ’yo ’dini, Mi ndre, ma mi dri aru ra, Turo la! ma nga fe suru kakau ma enga mi ruaa a’di ’dizu, ekile mirini yi erini ombupi ombu ’diyi fele engazurile.

4Te yi nga Turo ’ma abi kaliru ’diyi eza ra, yi nga jo izuru erini ’diyi ogu va; ma nga irifura ofa eri ma ruaarisi, ma nga eri ofu kata piriniriru.

5Eri nga ovu pari ’bani emba ajazu miri ma eseliari’i; mani e’yo nde ’yolerisi, Opi Yehova ’yo ra; eri nga ovu afa opale ombariru suru ’diyi dri;

6ezoanzi lerini ovupi amvua ’diyi nga ovu ofuzaru seisi. Te yi nga ni kini ma Yehova’i.

7A’disiku Opi Yehova ’yo ’dini: Mi ndre, ma nga Nebukadreza opi Babuloniari cii Turo ma dria engazu langu andraleruria, eri opi opini, ma nga eri cii akanya pi be, gari ombani pie, ’ba nzupi akanyasi ’diyi pie, ’ba longulumuru pie, ’ba o’biru ’diyi pie dria.

8Eri nga ezoanzi mini ofu seisi amvua; eri nga jo ombani si mi ageia, eri nga nyaku oku mi ageia, eri nga gombere ’du a’di ’dizu mi be indi.

9Eri nga afa erini abi osizu ’diyi ’ba abi mini ma ageia, eri nga jo izuru mini ’diyi oga ogarasi va.

10Akanya erini yini ovule o’biru turisi, yi ma irifurani nga nga mi i ruaa; abi mini kaliru ’diyi nga oya oya ’ba nzupi akanyasi ’diyi pi ma ididisi, gari akanyani sele ’diyi pie, gari ombani ’diyi pie, eri ka fi kalitile minia ekile ’bani file aku abini olule huri ma aliarile.

11Akanya erini ma onyofini nga geri mini otu dria; eri nga ’ba mini ofu seisi; agofe mini okporu ’diyi nga o’de va nyakua

12Yi nga lonyi mini opa ra, yi nga afa oziza mini ’ba afa opale ombaa-ji rile; yi nga abi mini ’diyi ogu va, nga jo mini ayikoru ’diyi eza ra; yi nga oni mini piyi o’be yia, pari osiza mini pie, irifura mini be dria.

13Te ma nga fe ongo mini ma awu ma asi ra, yi ngani o’di mini ma o’duko eri dika ku.

14Ma nga mi ’ba ovuzu kata piriniriru; mi nga ofu pari ’bani emba ajazuriru; yi ngani mi si dika ku; te ma Yehova, ma ’yo e’yo nde ma’i, Opi Yehova ’yoni.

15Te Opi Yehova ’yo Turo tia ’dini: Angu yi lipi miri ma alia ’diyi ngani oya oya e’deza mini ma ididisi, ’ba ebi be ’diyini otazu rua suzasi, ’bani ’ba ofuri a mi eselia raria ku ya?

16O’du ’dasi ’ba dria opiru miri ma drilia ’diyi nga si yi ma oguna driarisi va, nga yi ma bongo otru ra, yi nga bongo wura osole drinia ’diyi otru ra; yi nga rua yaza su’i; yi nga ri nyakua, yi ruani nga oya oya zu zu, yi nga osu misi tu.

17Te yi nga awuongo ngo misi, ’yozu mi tia, Mi ja dri ’doni ya! mi pari ’ba miria ’diyini ovuzuri ye Aku ru kuza be, ovupi okporu miri ma aliari, eri’i ’ba alenia ’diyi pie dria, yi ma urini ndra ovuzu ’ba dria lapi alenia ’diyi ma dria ’diyi!

18Te curu’do angu yi lipi miri ma alia ’diyi nga oya o’du mini e’dezu varisi: ada angu nde yi lipi miri ma alia ’diyi ma asini nga oti fuza minisi.

19A’disiku Opi Yehova ’yo ’dini: Ma ka mi ’ba ovuzu aku andruru, ekile aku ’ba kokoru ’diyi ma azile, ma ka yi aliru eji mi dria, yi ambo runi mi a’buzu ci,

20o’du ’dasi ma nga mi osi va ’ba sipi va ’bilea ’diyi be tualu, muzu ’ba oku drio ’diyi vu, ma nga fe mini ovuzu nyaku ma pari ele tu, pari andra andruru drio ’diyi ma alia, ’ba sipi va ’bilea ’diyi be, ’ba ma adri ovu;mi ma alia dika ku beni; te ma ngani diza mini ’ba ’ba idriru ’diyi ma langua ku.

21Te ma nga mi oja ovuzu afa uri fepiriru, mi ngani ovu i dika ku; yi ka tro mi nda ti, yi ngani mi isu dika ku Opi Yehova ’yoni.

← Chapter 25 Jump to: Chapter 27 →