Ezekiel 28

Lugbara (E’yo Siza Alatararu Munguniri BIBLIA)

← Chapter 27 Jump to: Chapter 29 →

1E’yo Yehovani eca ma vu dika kini:

2Mvi ’bani la, mi ’yo opi Turoari ma tia kini, Opi Yehova ’yo ’dini: Mi asini i engale uru, mini ’yole kini, Ma munguni, ma ri Mungu ma oguna dria miri ma eselia, ’dinirisi; te mi ’bani, mi Mungu’i yo, ka tro mi ’ba ndra mi asi Mungu ma asile ti-

3mi ndre, mi onduaru aga Danielini ra; afa vale kuri yini ecole zile mi ma milia rani yo;

4ondua mini pisi e’yo vaza mini be mi isu mini lonyi ra, mi eji mele pi dahabu be o’ba afa mini tani mbale ’diyi ma eselia ’bo;

5ondua mini amborurisi, afa oziza mini be mi ere lonyi mini ra, te mi asi enga i uru lonyi mini ma e’yosi-

6e’yo ’disi Opi Yehova ’yo ’dini: Mini mi asi ’bale Mungu ma asile ’borisi,

7e’yo ’disi, mi ne, ma nga ’ba jururu ’diyi eji mi dria, yi ’ba uri fepi suru eselia ’diyi; yi nga yi ma sei onze ondua mini ma onyi ezazu, yi nga diza mini eza ra.

8Yi nga mi osi va kpere ’bile ma alia, mi nga dra ’ba ofule ra ’diyile miri ma alia adikadi,

9Te mi nga kiri ’yo, Ma Mungu’i, ’ba nu fupiri ma drilia ya, de mi ’bani, mi Munguni yo, ’ba mi sopi ma dria?

10Mi nga dra ’ba agele lile ku ’diyile juru ma dria ra; a’disiku ma ’yo e’yo nde ma’i, Opi Yehova ’yo ra.

11E’yo Yehovani eca vini ma vu, kini:

12Mvi ’bani la, mi ngo awuongo opi Turoarisi, mi ’yo tinia kini, Opi Yehova ’yo ’dini: Mi eceta ’ba afa o’biza dria ma dria, gapi tre onduasiri azini ezata kokoru rua ndriza ma alia.

13Mi ovu ndra Edeni, nga ndrizaru Munguniri ma alia; oni aje nyapi amboru ’diyi dria ovu mi dri mi rua a’buzuriru, ada sadiusi pi, topaze pie, diamonde pie, berule pie, oniki pie, yasipa pie, safira pie, emerode pie, karaboko pie, mele pie: azi ari were piyi edezu ejeleko pieri ovu mi alia ci; ede ndra yi o’du yini mi ’bazurisi.

14Mi ndra kerubi odu osule drinia afa a’bupiri’i, ma ’ba mi mi paria; mi ovu ndra oni alatararu Munguniri ma dria ani; mi ri ndra aci ’dole ’dale oniefi aciru ’diyi ma eselia.

15Mi ovu ndra ezata kokoru geri mini ma alia engazu o’du ndra mi ’bazurisi cazu o’du yini e’yo onzi isuzu mi aliaria.

16Afa oziza mini kakausi yi fe mi aleni gazu tre eganasi, mi eza ezata ’bo; e’yo ’disi ma ’be mi oni Munguniriasi amve afa alata kokorurile; te ma ja mi dri ’bo, mi kerubi afa a’bupiri la, mi ofuzu oni aciru ’diyi ma eseliasi.

17Mi asi enga ndra i afuru rua ndriza minisi; mi eza ondua mini diza mini ma e’yosi. Ma ’be mi nyakua ’bo; ma ’ba mi opi ma milia yi ma ndre mi beni,

18Ezata mini kakau ’diyisi, afa oziza mini ma e’yo onzisi mi eza pari mini alatararu ’diyi alatara kokoru; e’yo ’disi ma ofu aci mi aliasi; eri ve mi ’bo, ma fe mi ofu ofutaru nyaku ma ’biria mi ndrepi ’diyi ma milia ’bo.

19’Ba dria mi nipi suru eselia ’diyi nga ovu osuta be misi; mi oja mi afa uri fepiriru, mi ngani ovu dika ku.

20Te e’yo Yehovani eca ma vu’i kini:

21Mvi ’bani la, mi ’ba mi mile Zidoni vu, mi ondri e’yo eri ma ruaa,

22mi ’yo ’dini, kini, Opi Yehova ’yo ’dini: Mi ndre, ma mi dri aru, Zidoni la, ma nga ovu diza be mi alia. Te yi nga ni ma Yehova’i ma ka nga e’yo liza ’ye eri ma alia ’bo, azini ma ka nga ovu alatararu eri ma alia raria;

23a’disiku ma nga azo muaruri pi ma ti pe eri eselia ari be gboko erinia; te ’ba ebi be ’diyi nga o’de va eri ma alia ra, seini nga ovu eri ma dria kalasi dria. Te yi nga ni ma Yehova’i.

24Oci ’ba sopi ngani ovu dika suru Israelini vu ku, oci candi fepi yi driri ’ba yi ma kalaasi ’diyi dria ma eselia nga ovu aluni yo indi. Te yi nga ni ma Opi Yehova’i,

25Opi Yehova ’yo ’dini: Ma ka nga suru Israelini oku suru yini ovuzu erezaru yi ma eselia ’diyi ma eseliarisi ’bo, ma ka nga ovu alatararu yi ma alia suru ndu ndu ma milia ’bo, o’du ’dasi yi nga di ovu yi vile angu mani ndra fele ati’bo mani Yakobo driri ma alia.

26Te yi nga adri: alenia e’yo ’yaasi, ada yi nga jo si ra, nga amvu zabibuni isi ra. Yi nga adri e’yo ’yaasi, ma ka nga e’yo liza ’ye ’ba dria yi ma ageia yi ’yepi onzi ’diyi ma dria ’boria. Te yi nga ni ma Yehova Mungu yiniri’i.

← Chapter 27 Jump to: Chapter 29 →