Ezekiel 17

Lugbara (E’yo Siza Alatararu Munguniri BIBLIA)

← Chapter 16 Jump to: Chapter 18 →

1Te e’yo Yehovani nga eca ma vu, kini:

2Mvi bani, nu o’bi e’yo etiru, mi o’be e’yo o’beza suru Israelini ma tia;

3mi ma ’yo kini, Opi Yehova ’yo ’dini: Aji amboru opile be amboru azini izuru tu, ’biko be tre wura be ndu nduri nga eca ndra Lebanonia, eri nga mario pati ma arakala sinia ururi ’du ra;

4eri nga arakala nyiri aroru drinia uru agapi ra ’diyi onyo ra, nga ji ani angu afa jezuria, nga ’ba ’ba afa ozipi ’diyi ma akua.

5Eri nga vini ori angu ndeari ’du ra, eri nga eri sa nyaku afa kapi turi ma alia; eri ’ba eri yi amboru ma tia. Eri nga eri ’ba pati yiarile,

6te eri zo ra, nga eca pati zabibuni rapi walaru te zopi tu tu kurile, nga arakala erini oja eri vuleru, olani vini eri ma etia indi. Ka’dini eri nga eca zabibu patiru, eri nga arakala erini ega ra, eri nga arakala nyiri ’diyi egbi ra.

7Isu de aji azini vini indi amboru, ovupi opile be ambo ambo, ’biko be ruaa kakauri; te mi ne, zabibu pati ’diri nga i ola oja eri vu, eri nga vini i ma arakala ega ra eri vu, engazu pari yini eri sazuria, eri ma da yi drinia ani.

8Sa ndra eri nyaku onyiru ma alia yi amboru ma tia, eri ma ega arakala ani, eri ma ’ya efi, ma ovu zabibu pati onyiruni.

9Mi ma ’yo ’dini, Opi Yehova ’yo ’dini: Eri nga drileba isu ra ya? Eri ngani olani nze ku ya? Eri ngani efini li va, erini onyuzu ku ya? ’Biko erini idipi o’diru ’diyi nga onyu dria ani, erini eri nzeria pi ola be, te okpo amborusi ku, kani ’ba kakausi ku indi.

10Ada, mi ndre, ka eri si dikarisi, eri nga drileba isu ra ya? Eri ngani ’wi teketeke oli engapi etuni efurialeruri ka li ruania raria ku ya? Eri nga ’wi pari yini eri sazu ’daria ra.

11E’yo Yehovani nga vini eca ma vu, kini:

12Mi ’yo curu’do suru lepi mbupi amveri ma tia, Emi nini e’yo ’diyi ma efi ngoni yari ku ya? Mi olu e’yo yi ma tia ’dini, Emi ndre, opi Babuloniari emu Yerusalemua ra, obi ndra opi yini opianzi pie, nga yi ji i vu Babulonia ra.

13Eri ’du ndra ori opiniri, azi aziza eri be, fe eri so oyo ci. (Eri o’du ’ba okporu angu ndea ’diyi indi,

14suru ma ovu ani okpo kokoru beni, ma enga uru dika i ma ngulupisi ku, te eri ma so pa kiri yini aziza nde ma ta mbalerisi a’dule.)

15Te eri mbu eri ma ruaarisi amve, erini ojiou ma ti pele Misiria, akanya piyi a’izu ’ba kakau berisi. Eri nga drileba isu ra ya? ’Ba ’yepi ’diniri aga i pa ra ya; erini aziza nyole aka ’ dirisi eri nga i pa ra ya?

16Mani ovule idri berile, Opi Yehova ’yo ra, pari opi eri ’bapi opiru, erini oyoni ’bale aparakaru, erini vini azizani nyole indirini ovuzuria, eri nga di dra eri vu Babuloni ma alia ’daa.

17Farau pi, asikari erini okporu ’diyi pie, ’ba kakau ongulumuru erini ’diyi pie, ngani vini eri aza ko omba ma alia ku, yini nyaku omvuria amuru uru azini yini jo okporu siria omba ’bazu, ’ba ma dri jazu kakau ti.

18A’disiku eri ’ba oyo aparakaru erini aziza nde nyolerisi ’bo, te mi ndre, ti i dri ’bo, te di eri ’ye afa ’diyi dria ra, ’dini eri ngani i pa ku.

19E’yo ’disi Opi Yehova ’yo ’dini: Mani ovule idri berile, ada ada oyo mani erini ’bale aparakaruri pi aziza mani erini nyoleri be, ma nga omvi be eri ma ngulupi ma dria.

20Ma nga emba ’be eri dria, eri nga ’de awi mani alia ra, ma di nga eri ji Babulonia, ma nga matu ’ba eri vu ’dale, ezata erini ma ezazuri ma e’yosi.

21Te ’ba erini apapi ongulumu vusi ongulumu vusi ’diyi nga o’de sei ma sia dria dria, azini ’ba acepi ’diyi nga yi ere oli dria vu; te emi nga ni kini ma Yehova, ma ’yo e’yo nde ma’i.

22Opi Yehova ’yo ’dini: Ma nga mario pati ma drile ururi e’du esi nyakua; ma nga arakala erini nyiri sinia uru ’diyi ma azi aroruri ’du alu, ma nga eri esi oni izuru e’dapi ceri ma dria;

23ma nga eri isi angu uruleru Israeliniri ma oni dria, eri nga arakala ambo ambo ’diyi ega ra, eri nga efi ’ya ra, eri nga ofu ovuzu mario pati onyiruni; aria opile be ndu ndu ’diyi dria yi nga emu adri eri ma etia; yi nga adri arakala erini ma endria ra.

24Azini pati asea ’diyi dria nga ni kini ma Yehova’i, ma osi pati izururi va, azini ma enga pati valeruri uru ma’i, ma fe pati ibiruri ’wi ra, ma fe vini pati ’wipi ’bori ma ovu ibiru ma’i. Ma Yehova, ma ’yo e’yo ’diri ra, ma ’ye eri indi.

← Chapter 16 Jump to: Chapter 18 →