Ezekiel 33

Lugbara (E’yo Siza Alatararu Munguniri BIBLIA)

← Chapter 32 Jump to: Chapter 34 →

1E’yo Yehovani nga eca ma vu, kini:

2Mvi ’bani la, mi ’yo suru mini ma anzipi ma tia, mi ’yo yi tia kini, Ma ka sei eji angu azini ma dria, ’ba angu ndea ’diyi ka nga ’ba alu pe yi ma eselia, ka nga eri ’ba yi dri angu ndrezu;

3agu nde ka seini ndre erini emuria angu ma dria, ka guka vu fezu ’ba ndeni e’yoni egazu;

4ka’dini ’ba ka guka ma awu eri ra, te ti, ka e’yoni ega ku, sei ka nga emu eri fuzu, ari erini nga ovu eri ma ngulupi ma dria.

5Eri guka ma awu ra, te egani e’yoni ku; eri ma arini nga ovu eri ngulupi ma dria. Te ’dini ku ka ndra e’yoni ega ra, eco ndra i ma idri pazaru ra.

6Te ’ba angu ndrepiri ka seini ndre erini emuria, te awini guka vu ku, feni ’bani e’yoni egazu ku, te sei ka nga emu ’ba azini fu yi ma eselia ra; fu eri ezata erini ma alia ra ’bo, te ariniri ma nga a’i ’ba angu ndrepiri ma dria.

7’Dini mi’i, mvi ’bani la, ma ’ba mi ovuzu ’ba angu ndrepiriru suru Israelini dri; e’yo ’disi mi ma eri e’yo efupi ma tiari, mi fe yi ma ega e’yoni masi.

8Ma ka ’yo ’ba azi onzi ’yepiri ma tia, Mi ’ba azi onzi ’yepiri la, mi nga dra ada ada; te mi ka nga e’yo olu ’ba azi onzi ’yepiri ma tia ku, fezu eri ma ega e’yoni geri erini onziri kuzu ja, ’ba azi onzi ’yepi ’dari nga dra azi onzi erini ma alia ra, te ma nga ariniri a’i mi dria.

9Te ti, mi ka nga fe ’ba azi onzi ’yepiri ma ega geri ini ma e’yo, ma oja i, ma ku geri nde ja beni, te eri ojani i geri iniri kuzu ku; eri nga dra e’yo onzi i lerini ma alia ra, te mi pa idri mini ’bo.

10Te mi, mvi ’bani la, mi ’yo suri Israelini ma tia ’dini, Emi ’yo ’dini, kini: Ezata amani azini azi onzi amani ovu ama dria, te ama oyi e’yo nde ’diyisi; ama di nga ovu idriru ngoni ngoni ya?

11Mi ’yo yi ma tia, Mani ovule idri berile, Opi Yehova ’yo ra, ma ovuni ayikosi ’ba azi onzi ’yepiri ma drasi ku, te lu erini i ojazu geri ini kuzu ovuzu idriruri’i; emi oja emi fo, emi oja emi, emi ku geri emini onzikanyaru ’diyi ja; emi le dra a’disi ya, emi suri Israelini la?

12Te mi mvi ’bani, mi ’yo suri mini ma anzipi ma tia ’dini, E’yo kililiru ’ba e’yo kililiru ’yepirini ngani eri pa o’du erini ezazurisi ku; azini vini indi e’yo onzi ’ba e’yo onzi ’yepirini ngani fe erini e’dezu o’du erini i ojazu e’yo onzi kuzurisi ku; azini vini indi ’ba e’yo kililiru ’yepiri ngani eco ovuzu idriru e’yo ndesi o’du erini ezazurisi ku.

13Ma ka ’yo ’ba kililiruri ma tia kini eri riga ovu idriru ada ada, eri ka a’ita ’ba e’yo kililiru eriniri ma alia, ka e’yo onzi ’ye ra, yi ngani ’yeta erini kililiru ’diyi ma e’yo ega aluni ku; te e’yo onzi erini ’yeleri ma alia eri nga dra e’yo ndesini.

14Te dika, ma ka ’yo ’ba azi onzi ’yepiri ma ria kini, Mi nga dra ada ada; eri ka i oja e’yo onzi erini kuzu, ka e’yo azitani leleri ’ye kilili,

15’ba azi onzi ’yepiri ka afa toboru omvi ra, ka afa erini ogule oguri ofe dika, ka aci azita idriniri ma alia ezata ezazu ku; eri nga ovu idriru ada ada, eri ngani dra aluni ku.

16Yi ngani azi onzi erini ma aluni ega e’yoni ’bazu eri ma dria dika ku, eri nga ovu idriru ada.

17Te ti, suri mini ma anzipi ’yo kini, Geri Opini ovuni kililiru trotro ku; te yiruni, kani geri yini ovuni kililiru trotro kunini.

18’Ba kililiruri ka i oja e’yo kililiru eriniri ku ja, ka e’yo onzi ’ye ra, eri nga dra e’yo ndesini.

19Azini ’ba azi onzi ’yepiri ka i oja, e’yo onzi erini kuzu ja, ka e’yo ’ye azitani lelerile azini kililiru, eri nga ovu idriru e’yo ndesini.

20Te kiri emi ’yo, Geri Opini ovuni kililiru trotro ku. Emi suru Israelini la! ma nga emi alu alu ma e’yo li geri emini vusi.

21Te eri nga eca ’dini, amani ovuzu ati’baru eli mudri drini iri ’borisi, mba mudriri ma o’du towirisi, ’ba alu apapi Yerusalemuasi ’bori emu ma vu ’yozu kini, Eza aku ’bo.

22Isu de Yehova ma dri ovu ma dria ini ’dasi de nga agu ne emuni nga ma vu ku; eri zi ma tile ’bo de nga eri emuni ma vu o’bitisi, ku; zi ma tile ra, ma ovuni ’ba e’yo ’yopi kurile dika ku.

23E’yo Yehovani nga eca ma vu, kini:

24Mvi ’bani la, ’ba ovupi pari andruru angu Israeliniria ’dayi ma alia ’diyi ’yo kini, Iburahimuni ndra ’ba aluni, te eri nya angu driani; te ama’i ama kakau; fe angu ama dri awurusoru.

25E’yo ’disi mi ma ’yo yi ma tia ’dini, Opi Yehova ’yo ’dini: Emi za nya pi ari be, emi mile enga wura emini inzile inzi ’diyi vu, emi ’ba ma ari ada; emi di nga angu nde nya ra ya?

26Emi pa so sei eminisi, emi e’yo ngule onziri ’ye, emi dria alu alu eza ’ba emi jo ejelea ’diyi ma okusi; te emi di nga angu nde nya ra ya?

27Mi ma ’yo yi ma tia ’dini, Opi Yehova ’yo ’dini: Mani ovule idri berile, ada ’ba ovupi pari andruria ’diyi nga odra seisi; te ’ba ovupi asea amveri ma nga fe anyapa piyi dri nyazaru; te ’ba ovupi pari okporua azini oni gulea ’diyi nga odra azo muanisi,

28Te ma nga fe anguni cazu andreru azini osuta fepiriru; te afu okpo erinirini nga i de ra; oni Israelini diyi nga ovu andruru, ’ba alu ingani aga yi ma eseliasi ku.

290’du ’dasi yi di nga ni ma Yehova’i, ma ka nga angu fe ovuzu andruru azini osuta fepiriru ’bo, ezata dria mani ngule onzi yini ’yele ’diyisi.

30Te mi’ironi, mvi ’bani la, suru mini ma anzipi yi mi ru ’yo yi ma jobileko etia azini jotilea, yi e’yo mini ’yo yi ma eselia yi alu alu yi adripi ma tia ’dini, kini, Mi emu, ma zi mi tia, mi eri e’yo efupi Yehova vuri fo!

31Yi emu mi vu ekile ’ba adam emulerile, yi ri mi drilia ’ba manile, yi eri e’yo mini ra, te ’yeni yi ku; a’disiku yi ma tisi yi ece leta amboru, te asi yini bi orodri yini ma vuti.

32Azini mi ndre, mi ovu yi dri ekile ongo ndrizaru tu, ’ba o’duko onyiru be, nipi o’di copi onyiru turinirile; yi e’yo mini eri ra, te ’yeni ku.

33Te e’yo ’diri ka nga i ’ye i paria ra (mi ndre, eri emu emu), o’du ndesi yi nga ni nabi ovu ndra yi ma eselia ra,

← Chapter 32 Jump to: Chapter 34 →