Ezekiel 38

Lugbara (E’yo Siza Alatararu Munguniri BIBLIA)

← Chapter 37 Jump to: Chapter 39 →

1E’yo Yehovani nga eca ma vu kini:

2Mvi ’bani, mi ’ba mi mile okporu Gogi angu Magogia, opi Rosi pi ma drilia Meseki pie Tubali beri vuleru, mi ondri e’yo eri ma dria,

3mi ’yo, Opi Yehova ’yo ’dini: Mi ndre, ma mi dri aru, Gogi, opi Rosi pi ma drilia Meseki pie Tubali beri la;

4ma nga mi oja vile, ma nga ewia ’ba mi tilia, ma nga mi ofu amve asikari mini ongulumuru ’diyi pie dria, akanya pie, ’ba nzupi akanyasi ’diyi be, yi dria su afa ombani esele ndu ndu dria yi ma ruaa, yi ’ba ongulumuru kakau gombere nyiri ’diyi pi osuzu amboru ’diyi be, yi dria alu alu ovu sei be dria;

5Perisia pi Kusi pie Puti pie: ovu yi be, yi dria osu gombere pi biri be;

6Gomeri pi ’ba erini ongulumuru ’diyi be dria; suru Togarimani ovupi kala andraleru kalati asizuriari pi ’ba erini ongulumuru ’diyi be dria; ada suru kakau ovu mi be.

7Mi ma ede di mi ngonde, ada mi ede mi ngonde, mi’i ’ba ongulumuru yi okupi mi be ’diyi be, mi ma ovu yi dri ’ba dri cepiriru.

8Yi nga mi andri o’du kakau ma vutia; eli vile ’diyi ma alia mi nga fi angu omvile sei ma driasi, okule suru kakau ma eseliasiria, emuzu kpere oni Israelini ovupi andruru ’dani ’dani ’diyi ma dria; te yi ofu eri suru ma eseliasi ’bo, yi nga ovu ’dale e’yo ’yaasi, yi dria alu alu.

9Te mi nga tu ra, mi nga emu oli akulukururile, mi nga ovu iritile angu a’buzu, mi’i ’ba mini ongulumuru ’diyi pie, azini suru kakau mi be tualu.

10Opi Yehova ’yo ’dini: Eri nga eca o’du nde ’dasi, e’yoni nga fi mi asisile ma alia, mi nga e’yo onzi otu mi asia ra,

11mi nga di ’yo kini, Ma nga tu fi angu aku abi kaliru kokoru ’diyi beria; ma nga mu ’ba ovupi e’yere adripi e’yo ’yaasi ’diyi vu, yi dria ovupi abi kaliru piyi kokoru, katala pie, kalitile pie ’diyi;

12afa opaza opazu, afa opale okposiri wuzu; mi dri ojazu a’di ’dizu pari ndra andruru re curu’do ’ba be ’diyi ma ruaa, azini ’ba okule suru ndu ndu ma eselia, anyapa piyi isupi afa be ’bo, ovupi angu wudrikuru ma agadua ’diyi ma ruaa indi.

13Seba pi Dedani pie ’ba afa ozipi Tarisisia ’diyi pie, kamianzi yini be dria, nga ’yo mi tia, Mi emu afa opaza opazu ya? Mi oku ’ba mini ongulumuru afa opale okposiri wuzu miniru ya? Dahabu pi o’duzu mele be anyapa piyi olizu afa be, afa opaza opazu kakau ya?

14E’yo ’disi, mi mvi ’bani la, mi londri e’yo, mi ’yo Gogi ma ria, Opi Yehova ’yo ’dini: O’du ’ba mani Israelini ovuzu e’yo ’yaasi ’dasi, mi ngani e’yo nde ni ku ya?

15Mi mga emu engazu pari mini kala andralero reriariasi, mi’i suru kakau mi be tualo, yi dria nga nzu akanya dria, ’ba ongulumuru kakau asikari be o’biru okporu tu;

16te mi nga emu a’di ’dizu ’ba mani Israelini ma ruaa ekile iritini angu a’burile. Te eri nga di eca ’dini o’du yi! ’darisi ma nga mi eji a’di ’dizu angu mani be, suru ’diyi ma ni ma beni, ma ka nga ma e’da alaru yi milia mi alia raria, Gogi la!

17Opi Yehova ’yo ’dini: Mi agu ndra mani e’yoni olule ewu driorisi ati’ba mani ’ba Israelini nabiru ndra e’yo ondripi ewu ’dasi eli kakau kini ima nga mi eji yi ruaa ’diyi ma tisiri’i ’ya?

18Te eri nga eca ’dini o’du ’dasi, Gogi ka nga emu angu Israelini vu a’di ’dizu, Opi Yehova ’yo ra, aoko mani nga enga fi ma omvulea.

19A’disiku a’ya manisi azini adra mani acirurisi ma ’yo e’yo ’bo, Ada ada o’du ’dasi oyaza amboruni nga ovu angu Israelini ma alia;

20’dini e’bi miria ’diyi ma rua nga ya ya mani ovule indirisi, aria ’bua ’diyi pie, anyapa asea ’diyi pie, afa dria acipi aci nyaku ma dria ’diyi pie, ’ba ma ada angu wudrikuru ma dria ’diyi pie dria; oyaza ndesi oni ambo ambo ’diyi nga yi ogu va, pari gulukuru ’diyi nga o’de ra, abi dria yi nga o’de va nyakua indi.

21Ma nga vini seini omve eri ma ruaa, kpere oni mani’diyi vu dria, Opi Yehova ’yo ra; ’ba alu aluni nga i sei ’ba adripi ma ruaa.

22Ma nga e’yo to eri ruaa e’yo liza ma alia azo muani pisi ari be; ma nga fe ozooni ’dizu eri ma dria ’ba erini ongulumuru ’diyi pi suru kakau ovupi eri be ’diyi pie, ozoo tipi treri pisi si ambo ambo ’diyi pie, ad pie oni aciru ’diyi pie.

23Ma nga ma ngulupi ’ba amboro, ma nga ma e’da ovuzu alaru, ma nga fe ma ovu nizaru suru kakau ma milia. Yi nga ni ma Yehova i.

← Chapter 37 Jump to: Chapter 39 →