Ezekiel 25

Lugbara (E’yo Siza Alatararu Munguniri BIBLIA)

← Chapter 24 Jump to: Chapter 26 →

1Te e’yo Yehovani, nga eca ma vu, kini:

2Mvi bani, mi ba mi mile Amoni anziyi vu, mi ondri e’yo yi ma ruaa.

3Mi ’yo Amoni lanziyi tia ’dini, Emi eri e’yo Opi Yehovani: Opi Yehova ’yo ’dini kini, Emini ’yole, Awa’difo! ’dini, pari mani alatararuri ma e’yosi o’du yini eri ezazurisi, azini angu Israelini ma dria yini eri ’baria andrururisi, azini suru Yudani ma ruaa o’du ’bani yi Obizu ati’barurisi indi;

4e’yo’disi emi ndre, ma nga emi fe anzi angu etuni efuzurialeruria ’diyi dri ovuzu yi ma afaru, yi nga hema yini aso mi eselia, yi nga adri mi eselia; yi nga patiefi mini nya ra, nga lesu mini mvu ra.

5Ma nga Rabani ’ba ofuzu pari ngamiani lazuriru, azini Amoni anziyini ovuzu pari kabilo o’biru ’diyini lazuriru. Te emi nga ni ani ma Yehova’i.

6Te Opi Yehova ’yo’dini: Mini mi dri sale azini angu otule pasi, mini vini ovule nyonasi nguta dria ovupi mi asiarisi angu Israeliniri vurisi,

7e’yo ’disi, mi ndre, ma eju ma dri mi ruaa ’bo, ma nga mi fe suru ’diyi dri afa opazale; ma nga mi dri ja suru ma eseliasi ra, ma nga fe mini dri jazu angu nde ’diyi ma eseliasi; ma nga mi dri ja ra. Te mi nga ni ma Yehova’i.

8Opi Yehova ’yo ’dini: Moabu pini e’yo ’yole Seiri be ’dinirisi, kini, Emi ndre, suru Yudani si i suru dria ’diyile;

9e’yo ’disi, emi ndre, ma nga Moabu ma elele zi mgboru engazu aku ambo ambo ’diyi vu, ada engazu aku ambo ambo ovupi eri ma kalatia, angu nde ma dizaru ’diyi vu: yi Beti-yesimoti pi, Baali-meoni pie, Kiriataimu be.

10Ma nga yi zi mgboru anzi kala etuni efuzuria ’diyi dri, yi engazu fezu muzu a’di ’dizu Amoni anzipi vu; ma nga yi fe ovuzu yi ma afaru, ’ba ma ega ani Amoni anzipi ma e’yo dika suru eselia ku beni;

11te ma nga e’yo liza li Moabu ma dria. Yi nga ni ma Yehova’i.

12Opi Yehova ’yo ’dini: Edomuni ’yele suru Yudani vu ’dinirisi, yini arioti ofele, yini e’yo ezale tu arioti ndale yi ma ruaa yi ma ngulupisirisi,

13e’yo ’disi Opi Yehova ’yo ’dini, Ma nga ma dri eju Edomu ma dria, ma nga ’ba piyi ofu aleniasi anyapa be ra; ma nga eri ’ba ovuzu andruru engazu Temania; kpere Dedania yi nga odra seisi,

14Te ma nga mani arioti ofe Edomu ruaa ’ba mani Israelini ma drisi; yi nga ’ye Edomu ma alia ekile adra manile azini aoko mani vusi indi; te yi nga arioti ofeza mani ni ra, Opi Yehova ’yo ra,

15Opi Yehova ’yo ’dini: ’Ba Filisitia ’diyini ’yele arioti ofezasi, lazini yini arioti ofele asi onzisi, eri dri jazu nguta ’dani ’danirisirisi;

16e’yo ’disi Opi Yehova ’yo ’dini, Emi ndre, ma nga ma dri eju ’ba Filisitiaa ’diyi ma dria, ma nga ’ba Keretini ofu ra, ma nga ’ba joloko acepi miri tia ’diyi ma dri ja ra.

17Ma nga ariotini ofe yi ma dria ambo, mani egazu yi dria asi okasi. Yi nga ni kini ma Yehova’i, ma ka nga arioti ofeza mani ’ba yi ma ruaa.

← Chapter 24 Jump to: Chapter 26 →