Ezekiel 13

Lugbara (E’yo Siza Alatararu Munguniri BIBLIA)

← Chapter 12 Jump to: Chapter 14 →

1E’yo Yehovani eca ma vu kini:

2Mvi ’bani, mi ma ondri e’yo nabi Israelini e’yo ondripi ’diyi ma ruaa, mi ’yo ’ba e’yo efupi yi ma ngulupi ma asiari ondripi ’diyi ma tia, kini: Emi eri e’yo Yehovani!

3Opi Yehova ’yo ’dini, Candi nabi ondua kokoru, yi ma ngulupi ma orindi ma vuti bipi de yi ndreni afa aluni ku ’diyi dri!

4Israeli la, nabi mini ’diyi ovu abalako angu roko i driaria ’diyile.

5Emi tuni uru fizu pari i asupi vari ma alia ku, emi edeni abi kaliru suru Israelini dri ku, erini pa sozu ani omba ma alia o’du Yehovanisi beni.

6’Ba ’yopi kini, Yehova ’yoni, de isu Yehova peni yi ma ti ku ’diyi, yi ndre afa tokoni, azini e’yo ondriza inzoru; azini indi yi fe vini ’ba ma ovu asi teza be kini e’yo nderi nga ovu ’yezaru.

7Emi ndreni afa tokoru ku ya, emi ondrini e’yo ondriza inzoru ku ya, emini ’yoria, Yehova ’yoni; de isu ma ’yoni ku.

8E’yo ’disi Opi Yehova ’yo ’dini: Emini e’yo toko toko ’diyi ’yolerisi, emini e’yo inzoru ndrelerisi, e’yo ’disi emi ndre, ma emi dri aru ma’i, Opi Yehova ’yo ra.

9Ma nga ma dri enga ’ba afa ndreza tokoru ndrepi e’yo inzoru ondripi ’diyi ma dri aruzu; yi ngani fi ’ba ’wara suru mani ma drilia e’yo amapi ’diyi ma eselia ku, ’ba ngani vini yi ma ru si buku suru Israeliniri ma kalafe sizuri ma alia ku, yi ngani vini ’ifi angu Israeliniria ku indi; te emi nga ni ma Opi Yehova’i.

10E’yo ’dirisi, adani e’yo ’dirisi, yini suru mani ma ale icilerisi, yini ’yo ria kini, Asi anzuru indi, de isu asi anzuru yo; azini vini ’ba azini ka jo abi si ra, yi nga eri e’bura odri agagarisi,

11Mi ma ’yo ’ba abi e’burapi odri agagarisi ’diyi ma tia kini eri nga i asu ra! Ozooni nga ’di amboru; emi’i, emi si ombaza ambo ambo ’diyi la, emi nga ’de ra; akulukuni nga eri asi ra.

12Emi ndre, abi ka nga i asu ’bo, yi ngani ’yo mi tia, E’buraza emini eri e’burazuri ngoa ya, ’dinini ku ya?

13E’yo ’disi Opi Yehova ’yo ’dini: Ma nga eri asi ma’i oli akulukururisi, aoko manisi; adra manisi ozooni nga ’ di amboru yini tizu ani tre, azini sini nga ’de amboru eri dri jazu aoko manisi.

14’Dini ma nga di jo abi emini e’burale odri agagarisiri asu va, ma nga eri gu va nyakua, ’dini yi nga jo eti ndre ani ra; eri nga i asu va ra, te emi nga dri ja alenia; emi nga ni ani ma Yehova’i.

15Ma nga di fe aoko mani ma ’ye i abi ma ruaa, ’ba eri e’burapi odri agagarisi ’diyi be ’dini; ma nga ’yo emi tia, Abi curu’do di yo, ’ba eri e’burapi ’diyi yo indi,

16’ba ’diyi yi nabi Israelini e’yo Yerusalemuni ondripi, afa ndreza asi anzuruniri ndrepi de isu asi anzuru yo ’diyi, Opi Yehova ’yo ra.

17Te mi’i, mvi ’bani la, mi ’ba mi mile okporu suru mani ma ezopi e’yo efupi yi ma ngulupi ma asiari ondripi ’diyi vu; mi ondri e’yo yi ma ruaa,

18mi ’yo, Opi Yehova ’yo ’dini: Candi oku bongo siribaru sopi bongo wua ’diyi ma tia dria, azini bongo ti lizuri edepi ’bapi ’ba ndu ndu ma dria, yi ma orindi mbazu ’diyi dri! Emi nga ’ba mani ma orindi mba ra ya? Emi nga orindi azini ma ta mba idriru emini ra ya?

19Emi ’ba ma ovuzu inzita kokoru ’ba mani ma eselia, ondu gapi dri ogoro ma aliarisi azini mikate aleni apile ’diyisi, ’ba yi sipi drazaru ku ’diyi ma orindi ofuzu, azini ’ba yi sipi ovuzu idriru ku ’diyi ma orindi ta mbazu idriru, emini inzo lile ’ba mani inzo emini eripi ’diyi ma tiarisi.

20E’yo ’disi Opi Yehova ’yo ’dini: Emi ndre, ma nga omba ’ba emi be bongo emini siribaru, emini ani ’ba ma orindi mbazu ekile ’bani aria mbalerile ’diyi ma e’yosi, ma nga vi: onze emi wuarisi ra; ma nga orindi nde, adani orindi emini mbale ’bani aria mbalerile ’diyi tru ra.

21Ma nga vini bongo emini ti lizu ’diyi asi ra, ma nga ’ba mani opa mi driarisi, yi ngani yi ku emi dria emini yi mbazu ’dani dika ku; te emi nga ni ma Yehova’i.

22A’disiku inzo eminisi emi fe ’ba onyi be ’diyi ma asini ovuzu ani candisi, te ma feni yi dri candi ma’i ku, azini emi fe ’ba onzi ma drini ovuzu okporu, eri ma emvi geri erini onziri kuzu i pazu beni ku;

23e’yo ’disi emi ngani e’yo toko toko ’diyi ndre dika ku, emi ngani e’yo ondri dika ku; te ma nga ’ba mani opa emi ma driarisi ra. Emi di nza ni ma Yehova’i.

← Chapter 12 Jump to: Chapter 14 →