2 Kings 12

Lao Bible 2012 (ພຣະຄຳພີສັກສິ)

← Chapter 11 Jump to: Chapter 13 →

1ໃນຣາຊການປີທີເຈັດຂອງເຈົ້າເຢຮູ ກະສັດແຫ່ງອິດສະຣາເອນ ເຈົ້າໂຢອາດໄດ້ຂຶ້ນເປັນກະສັດແຫ່ງຢູດາຍ ແລະໄດ້ປົກຄອງຢູ່ທີ່ນະຄອນເຢຣູຊາເລັມເປັນເວລາສີ່ສິບປີ. ແມ່ຂອງເພິ່ນຊື່ວ່າ ຊີບີຢາ ຊາວເມືອງເບເອນເຊບາ.

2ເພິ່ນໄດ້ເຮັດໃນສິ່ງທີ່ພຣະເຈົ້າຢາເວພໍໃຈຕະຫລອດຊົ່ວຊີວິດຂອງເພິ່ນ ເພາະມີປະໂຣຫິດເຢໂຮຍອາດາເປັນຜູ້ແນະນຳເພິ່ນ.

3ແຕ່ເຖິງຢ່າງໃດກໍຕາມ ສະຖານທີ່ຂາບໄຫວ້ຂອງຄົນຕ່າງຊາດຍັງບໍ່ໄດ້ຖືກທຳລາຍເທື່ອ ແລະປະຊາຊົນກໍຍັງສືບຕໍ່ຖວາຍເຄື່ອງບູຊາ ແລະເຜົາເຄື່ອງຫອມຢູ່ທີ່ນັ້ນ.

4ແລ້ວກະສັດໂຢອາດກໍໄດ້ເອີ້ນພວກປະໂຣຫິດມາພົບ ແລະໄດ້ສັ່ງພວກເຂົາໃຫ້ທ້ອນໂຮມເອົາເງິນ ທີ່ຄົນໄດ້ຈ່າຍຄ່າເຄື່ອງຖວາຍບູຊາໃນວິຫານຂອງພຣະເຈົ້າຢາເວຕາມທຳນຽມ ພ້ອມທັງຈ່າຍຄ່າເຄື່ອງຖວາຍບູຊາເປັນປະຈຳ ແລະເງິນທີ່ປະຊາຊົນໄດ້ນຳມາຖວາຍຕາມໃຈສະໝັກໃນວິຫານຂອງພຣະເຈົ້າຢາເວ.

5ປະໂຣຫິດແຕ່ລະຄົນຕ້ອງໄດ້ຮັບຜິດຊອບເງິນ ຊຶ່ງໄດ້ຮັບຈາກຜູ້ທີ່ພວກຕົນທຳພິທີໃຫ້ ແລະໃຫ້ນຳເງິນເຫຼົ່ານີ້ໄປສ້ອມແປງພຣະວິຫານຕາມຄວາມຈຳເປັນ.

6ແຕ່ພວກປະໂຣຫິດບໍ່ໄດ້ສ້ອມແປງພຣະວິຫານບ່ອນໃດໝົດ ຕະຫລອດເວລາຊາວສາມປີ ໃນຣາຊການຂອງກະສັດໂຢອາດ.

7ດັ່ງນັ້ນ ກະສັດໂຢອາດຈຶ່ງເອີ້ນປະໂຣຫິດເຢໂຮຍອາດາແລະປະໂຣຫິດຄົນອື່ນໆມາ ຖາມວ່າ, “ເປັນຫຍັງພວກທ່ານຈຶ່ງບໍ່ສ້ອມແປງພຣະວິຫານ? ຕັ້ງແຕ່ເວລານີ້ຕໍ່ໄປ ພວກທ່ານຢ່າເກັບເງິນທີ່ພວກທ່ານໄດ້ຮັບມານັ້ນໄວ້, ແຕ່ຈົ່ງມອບເງິນນັ້ນໃຫ້ຕໍ່ໄປ ເພື່ອຈະໄດ້ນຳໄປໃຊ້ໃນການສ້ອມແປງພຣະວິຫານ.”

8ພວກປະໂຣຫິດຕົກລົງເຫັນພ້ອມ ແລະຍັງຕົກລົງທີ່ຈະສ້ອມແປງພຣະວິຫານດ້ວຍ.

9ແລ້ວປະໂຣຫິດເຢໂຮຍອາດາກໍເອົາຫີບໜ່ວຍໜຶ່ງມາເຈາະຮູໃສ່ຝາຫີບ ແລະນຳເອົາໄປວາງໄວ້ໃກ້ກັບແທ່ນບູຊາຢູ່ເບື້ອງຂວາທາງເຂົ້າວິຫານຂອງພຣະເຈົ້າຢາເວ. ພວກປະໂຣຫິດຜູ້ມີໜ້າທີ່ຢູ່ທາງເຂົ້ານັ້ນ ໄດ້ເອົາເງິນທັງໝົດຂອງພວກທີ່ນຳມາວິຫານຂອງພຣະເຈົ້າຢາເວໃສ່ໄວ້ໃນຫີບ.

10ເມື່ອເງິນເຕັມຫີບແລ້ວ ເລຂາທິການແລະມະຫາປະໂຣຫິດ ກໍເອົາເງິນນັ້ນໄປຫລອມແລະຊັ່ງເບິ່ງ.

11ຫລັງຈາກຈົດຈຳນວນເງິນຕາມອັດຕາແລ້ວ ພວກເຂົາກໍໄດ້ມອບເງິນຈຳນວນນັ້ນໃຫ້ພວກທີ່ກຳກັບວຽກການໃນວິຫານຂອງພຣະເຈົ້າຢາເວ. ເງິນສ່ວນນີ້ເປັນຄ່າຈ່າຍໃຫ້ພວກຊ່າງໄມ້, ພວກກໍ່ສ້າງ, ຜູ້ທີ່ເຮັດວຽກໃນວິຫານຂອງພຣະເຈົ້າຢາເວ,

12ພວກຊ່າງກໍ່ດິນເຜົາ ແລະພວກຊ່າງຕັດຫີນ ເພື່ອໃຫ້ຊື້ໄມ້ ແລະຫີນສຳລັບໃຊ້ໃນການສ້ອມແປງວິຫານຂອງພຣະເຈົ້າຢາເວ ແລະຈ່າຍໃນສິ່ງທີ່ຈຳເປັນສຳລັບພຣະວິຫານ.

13ສ່ວນເງິນທີ່ນຳມາຖວາຍໃນວິຫານຂອງພຣະເຈົ້າຢາເວ ພວກເຂົາບໍ່ໄດ້ໃຊ້ໃນການຈ່າຍສຳລັບຄ່າເຮັດຈອກ, ຖ້ວຍ, ແກ, ມີດຕັດສຳລັບຕັດໄສ້ຕະກຽງ ຫລືເຄື່ອງໃຊ້ອື່ນໆທີ່ເປັນເງິນຫລືຄຳ.

14ແຕ່ພວກເຂົາໄດ້ນຳໄປໃຊ້ສະເພາະໃນການໃຊ້ຈ່າຍສຳລັບຄ່າແຮງງານ ແລະຊື້ວັດຖຸສຳລັບໃຊ້ໃນການສ້ອມແປງວິຫານຂອງພຣະເຈົ້າຢາເວ.

15ພວກທີ່ກຳກັບວຽກງານນີ້ເປັນພວກທີ່ສັດຊື່ທີ່ສຸດ; ສະນັ້ນ ເພິ່ນຈຶ່ງບໍ່ຈຳເປັນໃຫ້ພວກເຂົາເຮັດບັນຊີການເງິນ.

16ເງິນທີ່ໄດ້ມາຈາກເຄື່ອງຖວາຍໃນການຊຳລະຄືນ ແລະໄດ້ຈາກເຄື່ອງຖວາຍໃນການລຶບລ້າງບາບນັ້ນ ບໍ່ແມ່ນເງິນທີ່ນຳມາຖວາຍໃນວິຫານຂອງພຣະເຈົ້າຢາເວ; ເງິນສ່ວນນີ້ເປັນຂອງພວກປະໂຣຫິດ.

17ໃນເວລານັ້ນ ກະສັດຮາຊາເອນແຫ່ງຊີເຣຍໄດ້ບຸກໂຈມຕີເມືອງກາດ ແລະໄດ້ຮັບໄຊຊະນະ ແລ້ວເພິ່ນກໍຕັດສິນໃຈໂຈມຕີນະຄອນເຢຣູຊາເລັມ.

18ກະສັດໂຢອາດແຫ່ງຢູດາຍໄດ້ເກັບເອົາເຄື່ອງຖວາຍທັງໝົດ ທີ່ບັນດາກະສັດຄົນກ່ອນໄດ້ອຸທິດຖວາຍແກ່ວິຫານຂອງພຣະເຈົ້າຢາເວ. ເຄື່ອງເຫຼົ່ານັ້ນມີດັ່ງນີ້: ເຄື່ອງຖວາຍຈາກກະສັດເຢໂຮຊາຟັດ, ຈາກກະສັດເຢໂຮຣາມ ແລະຈາກກະສັດອາຮາຊີຢາພ້ອມທັງເຄື່ອງຖວາຍຂອງເພິ່ນເອງ ແລະຄຳທັງໝົດທີ່ມີໃນຄັງຂອງພຣະວິຫານແລະມີໃນຣາຊວັງ. ແລ້ວເພິ່ນກໍສົ່ງເຄື່ອງທັງໝົດນັ້ນໄປເປັນຂອງຂວັນໃຫ້ແກ່ກະສັດຮາຊາເອນ ເພື່ອໃຫ້ຍົກທັບຂອງເພິ່ນຖອຍໜີໄປຈາກນະຄອນເຢຣູຊາເລັມ.

19ສິ່ງອື່ນໆທີ່ກະສັດໂຢອາດໄດ້ກະທຳ ແມ່ນໄດ້ຖືກບັນທຶກໄວ້ໃນ ປື້ມປະຫວັດສາດຂອງບັນດາກະສັດແຫ່ງຢູດາຍ.

20ບັນດາຂ້າຣາຊການຂອງກະສັດໄດ້ວາງແຜນກະບົດຕໍ່ເພິ່ນ ແລ້ວມີສອງຄົນໃນພວກເຂົາ ຄືໂຢຊາການລູກຊາຍຂອງຊີເມອາດ ແລະເຢໂຮຊາບັດລູກຊາຍຂອງໂຊເມ ໄດ້ຂ້າກະສັດໂຢອາດຢູ່ໃນວັງ ທີ່ຖືກສ້າງຂຶ້ນໃນດິນແດນທາງທິດຕາເວັນອອກຂອງນະຄອນເຢຣູຊາເລັມ ຕາມເສັ້ນທາງໄປເມືອງສິນລາ. ຊາກສົບຂອງກະສັດໂຢອາດໄດ້ຖືກຝັງໄວ້ທີ່ອຸບມຸງແຫ່ງກະສັດ ໃນເມືອງຂອງດາວິດ. ແລ້ວເຈົ້າອາມາຊີຢາ ລູກຊາຍຂອງເພິ່ນກໍຂຶ້ນເປັນກະສັດປົກຄອງແທນ.

← Chapter 11 Jump to: Chapter 13 →

Recommended Reading

Commentary 2 Kings Commentaries → Devotional 2 Kings Devotional Guide → Get This Bible Lao Bible (ພຣະຄຳພີສັກສິ) Study Bible →