2 Kings 13

Lao Bible 2012 (ພຣະຄຳພີສັກສິ)

← Chapter 12 Jump to: Chapter 14 →

1ໃນຣາຊການປີທີຊາວສາມຂອງເຈົ້າໂຢອາດ ລູກຊາຍຂອງເຈົ້າອາຮາຊີຢາກະສັດແຫ່ງຢູດາຍ; ເຢໂຮອາຮາດ ລູກຊາຍຂອງເຢຮູໄດ້ຂຶ້ນເປັນກະສັດແຫ່ງອິດສະຣາເອນ ແລະໄດ້ປົກຄອງຢູ່ທີ່ນະຄອນຊາມາເຣຍເປັນເວລາສິບເຈັດປີ.

2ເພິ່ນໄດ້ເຮັດບາບຕໍ່ສູ້ພຣະເຈົ້າຢາເວ ແລະນຳພາຊາວອິດສະຣາເອນຕົກໃນບາບດັ່ງເຈົ້າເຢໂຣໂບອາມລູກຊາຍຂອງເນບັດກະສັດຜູ້ປົກຄອງມາກ່ອນ; ເພິ່ນບໍ່ຢຸດຢັ້ງກະທຳໃນສິ່ງທີ່ຊົ່ວຊ້າ.

3ສະນັ້ນ ພຣະເຈົ້າຢາເວຈຶ່ງໂກດຮ້າຍຊາວອິດສະຣາເອນ ແລະປ່ອຍໃຫ້ກະສັດຮາຊາເອນແຫ່ງຊີເຣຍ ແລະກະສັດເບັນຮາດາດລູກຊາຍຂອງເພິ່ນ ຊະນະອານາຈັກອິດສະຣາເອນຕະຫລອດມາ.

4ແລ້ວກະສັດເຢໂຮອາຮາດກໍພາວັນນາອະທິຖານຕໍ່ພຣະເຈົ້າຢາເວ; ແລະພຣະເຈົ້າຢາເວໄດ້ຫລິງເຫັນເຖິງກະສັດຊີເຣຍກົດຂີ່ຊາວອິດສະຣາເອນຢ່າງໜັກ ຈຶ່ງຕອບຄຳພາວັນນາອະທິຖານຂອງເພິ່ນ.

5ພຣະເຈົ້າຢາເວໄດ້ສົ່ງຜູ້ນຳຄົນໜຶ່ງມາໃຫ້ອານາຈັກອິດສະຣາເອນ ເພື່ອປົດປ່ອຍພວກເຂົາອອກຈາກກຳມືຂອງຊາວຊີເຣຍ. ດັ່ງນັ້ນ ຊາວອິດສະຣາເອນຈຶ່ງຢູ່ຢ່າງສະຫງົບສຸກເໝືອນດັ່ງແຕ່ກ່ອນ.

6ແຕ່ພວກເຂົາຍັງບໍ່ເຊົາເຮັດການບາບ ຊຶ່ງກະສັດເຢໂຣໂບອາມໄດ້ນຳພາຊາວອິດສະຣາເອນເຮັດ ພວກເຂົາໄດ້ສືບຕໍ່ ເຮັດບາບຢູ່ເລື້ອຍ ແລະຮູບເຈົ້າແມ່ອາເຊຣາກໍຍັງຢູ່ໃນນະຄອນຊາມາເຣຍ.

7ກະສັດເຢໂຮອາຮາດບໍ່ມີກຳລັງທະຫານເຫຼືອຢູ່ເລີຍ ນອກຈາກທະຫານມ້າຫ້າສິບຄົນ, ລົດຮົບສິບຄັນ ແລະທະຫານລາບສິບພັນຄົນ ເພາະກະສັດແຫ່ງຊີເຣຍໄດ້ຢຽບຢໍ່າທຳລາຍພວກເຂົາຖິ້ມດັ່ງຢຽບຂີ້ຝຸ່ນດິນ.

8ສິ່ງອື່ນທີ່ກະສັດເຢໂຮອາຮາດໄດ້ກະທຳ ພ້ອມທັງເລື່ອງຄວາມອົງອາດກ້າຫານຂອງເພິ່ນແມ່ນໄດ້ຖືກບັນທຶກໄວ້ໃນ ປື້ມປະຫວັດສາດຂອງບັນດາກະສັດແຫ່ງອິດສະຣາເອນ.

9ເພິ່ນໄດ້ຕາຍໄປແລະໄດ້ຖືກຝັງໄວ້ທີ່ນະຄອນຊາມາເຣຍ. ແລ້ວເຈົ້າເຢໂຮອາດ ລູກຊາຍຂອງເພິ່ນກໍຂຶ້ນເປັນກະສັດປົກຄອງແທນ.

10ໃນຣາຊການປີທີສາມສິບເຈັດ ຂອງເຈົ້າໂຢອາດກະສັດແຫ່ງຢູດາຍ; ເຈົ້າເຢໂຮອາດ ລູກຊາຍຂອງເຈົ້າເຢໂຮອາຮາດໄດ້ຂຶ້ນເປັນກະສັດແຫ່ງອິດສະຣາເອນ. ເພິ່ນໄດ້ປົກຄອງຢູ່ທີ່ນະຄອນຊາມາເຣຍເປັນເວລາສິບຫົກປີ.

11ເພິ່ນເຮັດບາບຕໍ່ສູ້ພຣະເຈົ້າຢາເວເຊັ່ນກັນ ແລະໄດ້ຕິດຕາມແບບຢ່າງອັນຊົ່ວຮ້າຍຂອງກະສັດເຢໂຣໂບອາມລູກຊາຍຂອງເນບັດ ຜູ້ທີ່ໄດ້ນຳອານາຈັກອິດສະຣາເອນເຮັດບາບ.

12ສິ່ງອື່ນທີ່ກະສັດເຢໂຮອາດໄດ້ກະທຳ ຕະຫລອດທັງວິລະກຳໃນການຕໍ່ສູ້ກັບກະສັດອາມາຊີຢາແຫ່ງຢູດາຍ ແມ່ນໄດ້ຖືກບັນທຶກໄວ້ໃນ ປື້ມປະຫວັດສາດຂອງບັນດາກະສັດແຫ່ງອິດສະຣາເອນ.

13ກະສັດເຢໂຮອາດໄດ້ຕາຍໄປ ແລະໄດ້ຖືກຝັງໄວ້ໃນອຸບມຸງຂອງກະສັດທີ່ນະຄອນຊາມາເຣຍ. ແລ້ວເຈົ້າເຢໂຣໂບອາມທີສອງ ລູກຊາຍຂອງເພິ່ນກໍຂຶ້ນເປັນກະສັດປົກຄອງແທນ.

14ຜູ້ທຳນວາຍເອລີຊາໄດ້ປ່ວຍດ້ວຍພະຍາດອັນຮ້າຍແຮງ. ໃນຂະນະທີ່ເພິ່ນນອນຄອຍຂາດໃຈຕາຍຢູ່ນັ້ນ ເຈົ້າເຢໂຮອາດກະສັດແຫ່ງອິດສະຣາເອນກໍມາຢ້ຽມເພິ່ນ. ກະສັດຮ້ອງໄຫ້ ແລະທັງເວົ້າວ່າ, “ພໍ່ເອີຍ ພໍ່ເອີຍ ພໍ່ຜູ້ເປັນກຳລັງປ້ອງກັນອັນເຂັ້ມແຂງຂອງອິດສະຣາເອນເອີຍ.”

15ເອລີຊາໄດ້ສັ່ງກະສັດເຢໂຮອາດວ່າ, “ເອົາໜ້າທະນູ ແລະລູກສອນມານີ້.” ກະສັດກໍປະຕິບັດຕາມ.

16ແລ້ວເອລີຊາກໍບອກໃຫ້ເພິ່ນຕຽມຍິງ. ກະສັດໄດ້ເຮັດຕາມ ເອລີຊາເອົາມືຂອງເພິ່ນວາງທີ່ເທິງມືຂອງກະສັດ.

17ກະສັດເປີດປ່ອງຢ້ຽມທາງດ້ານຊີເຣຍອອກຕາມຄຳແນະນຳຂອງຜູ້ທຳນວາຍ. ເອລີຊາສັ່ງວ່າ, “ຈົ່ງຍິງທະນູອອກໄປ.” ພໍກະສັດຍິງທະນູອອກໄປ ຜູ້ທຳນວາຍກໍຮ້ອງຂຶ້ນວ່າ, “ທ່ານເປັນລູກທະນູຂອງພຣະເຈົ້າຢາເວ ຜູ້ທີ່ຈະຕີຊະນະຊີເຣຍ. ທ່ານຈະຕໍ່ສູ້ຊາວຊີເຣຍທີ່ອາເຟັກຈົນຊະນະພວກເຂົາ.”

18ແລ້ວເອລີຊາກໍໄດ້ສັ່ງກະສັດໃຫ້ເອົາລູກທະນູອອກມາຕີພື້ນດິນ. ກະສັດເອົາລູກທະນູຕີພື້ນດິນສາມເທື່ອແລ້ວກໍຢຸດ.

19ເອລີຊາໃຈຮ້າຍໃຫ້ກະສັດ ແລະເວົ້າວ່າ, “ທ່ານຄວນຕີເຖິງຫ້າ ຫລືຫົກເທື່ອ ທ່ານຈຶ່ງຈະຕີຊະນະຊາວຊີເຣຍຢ່າງສິ້ນເຊີງ; ແຕ່ບັດນີ້ທ່ານຈະຊະນະພວກເຂົາໄດ້ພຽງແຕ່ສາມຄັ້ງເທົ່ານັ້ນ.”

20ເອລີຊາໄດ້ຕາຍໄປແລະໄດ້ຖືກຝັງໄວ້. ແຕ່ລະປີ ຊາວໂມອາບໄດ້ບຸກລຸກດິນແດນຂອງຊາດອິດສະຣາເອນ.

21ແຕ່ມີຄັ້ງໜຶ່ງ ໃນພິທີຝັງຊາກສົບ ຄົນທີ່ໄປຝັງສົບໄດ້ເຫັນກອງໂຈນໂມອາບໝວດໜຶ່ງ ພວກເຂົາຈຶ່ງໂຍນຊາກສົບລົງໄປໃນອຸບມຸງຂອງເອລີຊາ ແລະແລ່ນປົບໜີໄປ. ພໍສົບນັ້ນໄປຖືກກະດູກຂອງເອລີຊາ ຊາຍຜູ້ຕາຍກໍເປັນຄືນມາສູ່ຊີວິດ ແລະລຸກຢືນຂຶ້ນ.

22ກະສັດຮາຊາເອນແຫ່ງຊີເຣຍໄດ້ກົດຂີ່ຊາວອິດສະຣາເອນ ຕະຫລອດຣາຊການຂອງກະສັດເຢໂຮອາຮາດ.

23ແຕ່ພຣະເຈົ້າຢາເວຍັງເມດຕາປານີພວກເຂົາ. ພຣະອົງບໍ່ຍອມໃຫ້ພວກເຂົາຖືກທຳລາຍແຕ່ໄດ້ຊ່ວຍເຫລືອພວກເຂົາໄວ້ ເພາະພຣະອົງໄດ້ເຮັດພັນທະສັນຍາໄວ້ກັບອັບຣາຮາມ, ອີຊາກ ແລະຢາໂຄບ. ພຣະອົງບໍ່ໄດ້ລືມໄລປະຊາຊົນຂອງພຣະອົງເລີຍ.

24ເມື່ອເຈົ້າຮາຊາເອນ ກະສັດແຫ່ງຊີເຣຍໄດ້ຕາຍໄປແລ້ວ; ເບັນຮາດາດ ລູກຊາຍຂອງເພິ່ນກໍຂຶ້ນເປັນກະສັດປົກຄອງແທນ.

25ແລ້ວເຈົ້າເຢໂຮອາດລູກຊາຍຂອງເຈົ້າເຢໂຮອາຮາດ ກໍໄດ້ຊະນະເຈົ້າເບັນຮາດາດລູກຊາຍຂອງເຈົ້າຮາຊາເອນສາມຄັ້ງທັງຢຶດເອົາເມືອງຕ່າງໆຂອງອິດສະຣາເອນຄືນໄດ້ ຊຶ່ງກະສັດເບັນຮາດາດໄດ້ຢຶດໄປ ໃນຣາຊການຂອງກະສັດເຢໂຮອາຮາດພໍ່ຂອງເພິ່ນ.

← Chapter 12 Jump to: Chapter 14 →

Recommended Reading

Commentary 2 Kings Commentaries → Devotional 2 Kings Devotional Guide → Get This Bible Lao Bible (ພຣະຄຳພີສັກສິ) Study Bible →