2 Kings 15

Lao Bible 2012 (ພຣະຄຳພີສັກສິ)

← Chapter 14 Jump to: Chapter 16 →

1ໃນຣາຊການປີທີຊາວເຈັດ ຂອງເຈົ້າເຢໂຣໂບອາມທີສອງ ກະສັດແຫ່ງອິດສະຣາເອນ; ເຈົ້າອຸດຊີຢາ ລູກຊາຍຂອງເຈົ້າອາມາຊີຢາໄດ້ຂຶ້ນເປັນກະສັດແຫ່ງຢູດາຍ

2ເມື່ອເພິ່ນອາຍຸໄດ້ສິບຫົກປີ ແລະໄດ້ປົກຄອງຢູ່ທີ່ນະຄອນເຢຣູຊາເລັມ ເປັນເວລາຫ້າສິບສອງປີ. ແມ່ຂອງເພິ່ນຊື່ວ່າເຢໂກລີຢາ ຊາວນະຄອນເຢຣູຊາເລັມ.

3ກະສັດອຸດຊີຢາໄດ້ເຮັດໃນສິ່ງທີ່ພຣະເຈົ້າຢາເວພໍໃຈ ຕາມແບບຢ່າງພໍ່ຂອງເພິ່ນ.

4ແຕ່ບ່ອນຂາບໄຫວ້ພະຂອງຄົນຕ່າງຊາດຍັງບໍ່ໄດ້ຖືກທຳລາຍ ແລະປະຊາຊົນກໍຍັງສືບຕໍ່ຖວາຍເຄື່ອງບູຊາ ແລະເຜົາເຄື່ອງຫອມຢູ່ທີ່ນັ້ນ.

5ພຣະເຈົ້າຢາເວໄດ້ລົງໂທດກະສັດອຸດຊີຢາ ໂດຍໃຫ້ເປັນໂຣກຂີ້ທູດ ຕະຫລອດຊົ່ວຊີວິດ. ເພິ່ນຢູ່ໃນວັງຕ່າງຫາກ ແລະອອກຈາກວຽກການທຸກຢ່າງໃນຂະນະທີ່ໂຢທາມ ລູກຊາຍຂອງເພິ່ນປົກຄອງອານາຈັກແທນ.

6ສິ່ງອື່ນທີ່ກະສັດອຸດຊີຢາໄດ້ກະທຳແມ່ນໄດ້ຖືກບັນທຶກໄວ້ໃນ ປື້ມປະຫວັດສາດຂອງບັນດາກະສັດແຫ່ງຢູດາຍ.

7ເພິ່ນໄດ້ຕາຍໄປແລະຖືກຝັງໄວ້ໃນອຸບມຸງແຫ່ງກະສັດທີ່ເມືອງຂອງດາວິດ; ແລ້ວເຈົ້າໂຢທາມລູກຊາຍຂອງເພິ່ນກໍຂຶ້ນເປັນກະສັດປົກຄອງແທນ.

8ໃນຣາຊການປີທີສາມສິບແປດຂອງເຈົ້າອຸດຊີຢາ ກະສັດແຫ່ງຢູດາຍ; ເຈົ້າເຊກາຣີຢາລູກຊາຍຂອງເຈົ້າເຢໂຣໂບອາມທີສອງ ໄດ້ຂຶ້ນເປັນກະສັດແຫ່ງອິດສະຣາເອນ ແລະປົກຄອງຢູ່ທີ່ນະຄອນຊາມາເຣຍເປັນເວລາຫົກເດືອນ.

9ເຈົ້າເຊກາຣີຢາໄດ້ເປັນດັ່ງກະສັດຜູ້ກ່ອນ ໂດຍເຮັດບາບຕໍ່ສູ້ພຣະເຈົ້າຢາເວ. ເພິ່ນປະພຶດຕາມແບບຢ່າງອັນຊົ່ວຮ້າຍຂອງກະສັດເຢໂຣໂບອາມລູກຊາຍຂອງເນບັດຜູ້ທີ່ນຳພາຊາດອິດສະຣາເອນຕົກໃນບາບ.

10ຕໍ່ມາ ຊານລູມລູກຊາຍຂອງຢາເບັດໄດ້ກະບົດຕໍ່ກະສັດເຊກາຣີຢາ ແລະຂ້າເພິ່ນເສຍ ທີ່ອິບເລອາມ ແລ້ວຕັ້ງຕົນເອງຂຶ້ນເປັນກະສັດປົກຄອງແທນ.

11ສິ່ງອື່ນທີ່ກະສັດເຊກາຣີຢາໄດ້ກະທຳແມ່ນໄດ້ຖືກບັນທຶກໄວ້ໃນ ປື້ມປະຫວັດສາດຂອງບັນດາກະສັດແຫ່ງອິດສະຣາເອນ.

12ສະນັ້ນ ເຫດການຈຶ່ງເປັນໄປຕາມຄຳສັນຍາ ທີ່ພຣະເຈົ້າຢາເວໄດ້ມີໄວ້ກັບກະສັດເຢຮູວ່າ, “ລູກຫລານຂອງເຈົ້າຈະເປັນກະສັດແຫ່ງອິດສະຣາເອນ ເຖິງສີ່ຊົ່ວເຊັ່ນຄົນ.”

13ໃນຣາຊການປີທີສາມສິບເກົ້າ ຂອງເຈົ້າອຸດຊີຢາກະສັດແຫ່ງຢູດາຍ; ຊານລູມ ລູກຊາຍຂອງຢາເບັດໄດ້ຂຶ້ນເປັນກະສັດແຫ່ງອິດສະຣາເອນ ເພິ່ນໄດ້ປົກຄອງຢູ່ທີ່ນະຄອນຊາມາເຣຍເປັນເວລາໜຶ່ງເດືອນ.

14ແລ້ວເມນາເຮມລູກຊາຍຂອງກາດີກໍໄດ້ອອກຈາກເມືອງຕີຣະຊາ ໄປທີ່ນະຄອນຊາມາເຣຍ. ລາວໄດ້ຂ້າຊານລູມ ແລະຕັ້ງຕົນເອງຂຶ້ນເປັນກະສັດປົກຄອງແທນ.

15ສິ່ງອື່ນທີ່ກະສັດຊານລູມໄດ້ກະທຳພ້ອມທັງເລື່ອງທີ່ເພິ່ນເປັນກະບົດ ແມ່ນໄດ້ຖືກບັນທຶກໄວ້ໃນ ປື້ມປະຫວັດສາດຂອງບັນດາກະສັດແຫ່ງອິດສະຣາເອນ.

16ເມື່ອເມນາເຮມໄດ້ອອກຈາກເມືອງຕີຣະຊາໄປນັ້ນ ເພິ່ນໄດ້ທຳລາຍເມືອງຕັບປູອາ ຖິ້ມຈົນໝົດສິ້ນ, ປະຫານປະຊາຊົນຢູ່ໃນເມືອງ ແລະຕາມເຂດແດນທີ່ຢູ່ອ້ອມແອ້ມເມືອງນັ້ນ ເພາະຊາວເມືອງນີ້ບໍ່ຍອມຈຳນົນຕໍ່ເພິ່ນ. ເພິ່ນໄດ້ຜ່າທ້ອງຂອງພວກຜູ້ຍິງຖືພາ.

17ໃນຣາຊການປີທີສາມສິບເກົ້າ ຂອງເຈົ້າອຸດຊີຢາກະສັດແຫ່ງຢູດາຍ; ເມນາເຮມລູກຊາຍຂອງກາດີໄດ້ຂຶ້ນເປັນກະສັດປົກຄອງອານາຈັກອິດສະຣາເອນ. ເພິ່ນໄດ້ປົກຄອງຢູ່ທີ່ນະຄອນຊາມາເຣຍເປັນເວລາສິບປີ.

18ເພິ່ນໄດ້ເຮັດບາບຕໍ່ສູ້ພຣະເຈົ້າຢາເວ ໂດຍປະພຶດຕາມແບບຢ່າງອັນຊົ່ວຮ້າຍຂອງກະສັດເຢໂຣໂບອາມລູກຊາຍຂອງເນບັດຜູ້ທີ່ນຳພາອານາຈັກອິດສະຣາເອນຕົກໃນບາບ ຕະຫລອດຊົ່ວຊີວິດຂອງເພິ່ນ.

19ກະສັດຕີກະລາດປີເລເສແຫ່ງອັດຊີເຣຍໄດ້ບຸກລຸກອານາຈັກອິດສະຣາເອນ. ແລ້ວກະສັດເມນາເຮມກໍໄດ້ມອບເງິນໃຫ້ເພິ່ນສາມສິບແປດໂຕນ ເພື່ອສະໜັບສະໜູນຕົນໃຫ້ມີອຳນາດໄດ້ປົກຄອງຕໍ່ໄປ.

20ກະສັດເມນາເຮມໄດ້ເງິນເຫຼົ່ານີ້ມາຈາກຄົນຮັ່ງມີໃນອານາຈັກອິດສະຣາເອນ ໂດຍບັງຄັບແຕ່ລະຄົນໃຫ້ມອບເງິນຜູ້ລະຫ້າສິບແທ່ງໃຫ້ແກ່ຕົນ; ແລ້ວຕີກະລາດປີເລເສກໍກັບຄືນປະເທດຂອງຕົນ.

21ສິ່ງອື່ນທີ່ກະສັດເມນາເຮມໄດ້ກະທຳແມ່ນໄດ້ຖືກບັນທຶກໄວ້ໃນ ປື້ມປະຫວັດສາດຂອງບັນດາກະສັດແຫ່ງອິດສະຣາເອນ.

22ເພິ່ນໄດ້ຕາຍໄປ ແລະຖືກຝັງໄວ້. ແລ້ວເປກາຮີຢາລູກຊາຍຂອງເພິ່ນກໍຂຶ້ນເປັນກະສັດປົກຄອງແທນ.

23ໃນຣາຊການປີທີຫ້າສິບ ຂອງເຈົ້າອຸດຊີຢາ ກະສັດແຫ່ງຢູດາຍ; ເປກາຮີຢາລູກຊາຍຂອງເຈົ້າເມນາເຮມໄດ້ຂຶ້ນເປັນກະສັດແຫ່ງອິດສະຣາເອນ. ເພິ່ນປົກຄອງຢູ່ທີ່ນະຄອນຊາມາເຣຍເປັນເວລາສອງປີ.

24ເພິ່ນໄດ້ເຮັດບາບຕໍ່ສູ້ພຣະເຈົ້າຢາເວ ໂດຍປະພຶດຕາມແບບຢ່າງອັນຊົ່ວຮ້າຍຂອງກະສັດເຢໂຣໂບອາມລູກຊາຍຂອງເນບັດຜູ້ທີ່ນຳພາອານາຈັກອິດສະຣາເອນເຮັດບາບ.

25ຕໍ່ມາ ໄດ້ມີນາຍທະຫານໃນກອງທັບຂອງກະສັດເປກາຮີຢາຜູ້ໜຶ່ງຊື່ ວ່າເປກາ ລູກຊາຍຂອງເຣມາລີຢາໄດ້ວາງແຜນກັບຊາວກີເລອາດຫ້າສິບຄົນ, ສັງຫານກະສັດເປກາຮີຢາທີ່ປ້ອມຍາມຂ້າງໃນຂອງຣາຊວັງ ໃນນະຄອນຊາມາເຣຍ ແລະຕັ້ງຕົນເອງຂຶ້ນເປັນກະສັດປົກຄອງແທນ.

26ສິ່ງອື່ນທີ່ກະສັດເປກາຮີຢາໄດ້ກະທຳແມ່ນໄດ້ຖືກບັນທຶກໄວ້ໃນ ປື້ມປະຫວັດສາດຂອງບັນດາກະສັດແຫ່ງອິດສະຣາເອນ.

27ໃນຣາຊການປີທີຫ້າສິບສອງ ຂອງເຈົ້າອຸດຊີຢາກະສັດແຫ່ງຢູດາຍ; ເປກາລູກຊາຍຂອງເຈົ້າເຣມາລີຢາໄດ້ຂຶ້ນເປັນກະສັດປົກຄອງອານາຈັກອິດສະຣາເອນ. ເພິ່ນໄດ້ປົກຄອງຢູ່ທີ່ນະຄອນຊາມາເຣຍເປັນເວລາຊາວປີ.

28ເພິ່ນໄດ້ເຮັດບາບຕໍ່ສູ້ພຣະເຈົ້າຢາເວ ໂດຍປະພຶດຕາມແບບຢ່າງອັນຊົ່ວຮ້າຍຂອງກະສັດເຢໂຣໂບອາມລູກຊາຍຂອງເນບັດຜູ້ທີ່ນຳພາອານາຈັກອິດສະຣາເອນຕົກໃນບາບ.

29ໃນຄາວທີ່ເຈົ້າເປກາໄດ້ເປັນກະສັດແຫ່ງອິດສະຣາເອນນັ້ນ ຕີກະລາດປີເລເສ ກະສັດແຫ່ງອັດຊີເຣຍໄດ້ຢຶດເອົາເມືອງຕ່າງໆດັ່ງນີ້: ອີໂຢນ, ອາເບັນເບັດມາອາກາ, ຢາໂນອາ, ເກເດັດ, ຮາໂຊ, ເຂດແດນທັງໝົດຂອງກີເລອາດ, ຄາລີເລ ແລະເນັບທາລີ ແລະໄດ້ນຳເອົາປະຊາຊົນໄປເປັນຊະເລີຍທີ່ອັດຊີເຣຍ.

30ໃນຣາຊການປີທີຊາວຂອງເຈົ້າໂຢທາມ ລູກຊາຍຂອງເຈົ້າອຸດຊີຢາກະສັດແຫ່ງຢູດາຍ; ເຈົ້າໂຮເຊອາລູກຊາຍຂອງເອລາໄດ້ກະບົດຕໍ່ກະສັດເປກາລູກຊາຍຂອງເຣມາລີຢາ. ລາວໄດ້ສັງຫານເພິ່ນ ແລະຕັ້ງຕົນເອງຂຶ້ນເປັນກະສັດປົກຄອງແທນ.

31ສິ່ງອື່ນທີ່ກະສັດເປກາໄດ້ກະທຳແມ່ນໄດ້ຖືກບັນທຶກໄວ້ໃນ ປື້ມປະຫວັດສາດຂອງບັນດາກະສັດແຫ່ງອິດສະຣາເອນ.

32ໃນຣາຊການປີທີສອງຂອງເຈົ້າເປກາລູກຊາຍຂອງເຈົ້າເຣມາລີຢາກະສັດແຫ່ງອິດສະຣາເອນ; ເຈົ້າໂຢທາມລູກຊາຍຂອງເຈົ້າອຸດຊີຢາໄດ້ຂຶ້ນເປັນກະສັດປົກຄອງອານາຈັກຢູດາຍ

33ເມື່ອເພິ່ນອາຍຸໄດ້ຊາວຫ້າປີ ແລະໄດ້ປົກຄອງຢູ່ທີ່ນະຄອນເຢຣູຊາເລັມ ເປັນເວລາສິບຫົກປີ. ແມ່ຂອງເພິ່ນຊື່ວ່າເຢຣູຊາລູກສາວຂອງຊາດົກ.

34ກະສັດໂຢທາມໄດ້ປະພຶດຕາມແບບຢ່າງຂອງກະສັດອຸດຊີຢາພໍ່ຂອງເພິ່ນ ໂດຍເຮັດໃນສິ່ງທີ່ພຣະເຈົ້າຢາເວພໍໃຈ.

35ແຕ່ເພິ່ນຍັງບໍ່ໄດ້ທຳລາຍບ່ອນຂາບໄຫວ້ພະຂອງຄົນຕ່າງຊາດ ແລະປະຊາຊົນຍັງສືບຕໍ່ຖວາຍເຄື່ອງບູຊາແລະເຜົາເຄື່ອງຫອມຢູ່ທີ່ນັ້ນ. ກະສັດໂຢທາມໄດ້ເປັນຜູ້ສ້າງປະຕູວິຫານຂອງພຣະເຈົ້າຢາເວດ້ານເໜືອ.

36ສິ່ງອື່ນທີ່ກະສັດໂຢທາມໄດ້ກະທຳແມ່ນໄດ້ຖືກບັນທຶກໄວ້ໃນ ປື້ມປະຫວັດສາດຂອງບັນດາກະສັດແຫ່ງຢູດາຍ.

37ໃນຣາຊການຂອງກະສັດໂຢທາມ ພຣະເຈົ້າຢາເວໄດ້ສົ່ງເຈົ້າເຣຊິນແຫ່ງຊີເຣຍກັບເຈົ້າເປກາລູກຊາຍຂອງເຣມາລີຢາແຫ່ງອິດສະຣາເອນ ມາໂຈມຕີອານາຈັກຢູດາຍເປັນຄັ້ງທຳອິດ.

38ກະສັດໂຢທາມໄດ້ຕາຍໄປ ແລະຖືກຝັງໄວ້ໃນອຸບໂມງແຫ່ງກະສັດໃນເມືອງຂອງດາວິດ. ແລ້ວເຈົ້າອາຮາດລູກຊາຍຂອງເພິ່ນກໍຂຶ້ນເປັນກະສັດປົກຄອງແທນ.

← Chapter 14 Jump to: Chapter 16 →