2 Kings 24

Lao Bible 2012 (ພຣະຄຳພີສັກສິ)

← Chapter 23 Jump to: Chapter 25 →

1ໃນຂະນະທີ່ເຈົ້າເຢໂຮຍອາກິມເປັນກະສັດ ເຈົ້າເນບູກາດເນັດຊາກະສັດແຫ່ງບາບີໂລນໄດ້ບຸກຮຸກຢູດາຍ ແລະກະສັດເຢໂຮຍອາກິມໄດ້ຖືກບັງຄັບໃຫ້ຍອມຢູ່ພາຍໃຕ້ການປົກຄອງຂອງເພິ່ນ ເປັນເວລາສາມປີ ແລ້ວເພິ່ນກໍໄດ້ກະບົດ.

2ພຣະເຈົ້າຢາເວໄດ້ສົ່ງກອງທັບຊາວບາບີໂລນ, ຊີເຣຍ, ໂມອາບ ແລະອຳໂມນ ມາຕໍ່ສູ້ກະສັດເຢໂຮຍອາກິມເພື່ອທຳລາຍຢູດາ ຕາມຖ້ອຍຄຳທີ່ພຣະເຈົ້າຢາເວໄດ້ກ່າວໄວ້ ຜ່ານທາງພວກຜູ້ທຳນວາຍຜູ້ຮັບໃຊ້ຂອງພຣະອົງ.

3ເຫດການນີ້ໄດ້ເກີດຂຶ້ນຕາມຄຳສັ່ງຂອງພຣະເຈົ້າຢາເວ ເພື່ອກຳຈັດປະຊາຊົນຢູດາໃຫ້ພົ້ນຈາກສາຍຕາຂອງພຣະອົງ ເພາະການບາບທັງໝົດທີ່ກະສັດມານາເຊໄດ້ເຮັດນັ້ນ

4ແລະໂດຍສະເພາະແລ້ວ ຍ້ອນເພິ່ນໄດ້ຂ້າຄົນທີ່ບໍ່ມີຄວາມຜິດ ຈົນຖະໜົນນະຄອນເຢຣູຊາເລັມນອງໄປດ້ວຍເລືອດ. ພຣະເຈົ້າຢາເວບໍ່ອາດຍົກໂທດໃຫ້ກະສັດມານາເຊໃນເລື່ອງນີ້ໄດ້.

5ສິ່ງອື່ນທີ່ກະສັດເຢໂຮຍອາກິມໄດ້ກະທຳແມ່ນໄດ້ຖືກບັນທຶກໄວ້ໃນ ປື້ມປະຫວັດສາດຂອງບັນດາກະສັດແຫ່ງຢູດາຍ.

6ກະສັດເຢໂຮຍອາກິມໄດ້ຕາຍໄປ; ແລ້ວເຈົ້າເຢໂຮຍອາກິນ ລູກຊາຍຂອງເພິ່ນກໍໄດ້ຂຶ້ນເປັນກະສັດປົກຄອງແທນ.

7ກະສັດເອຢິບບໍ່ໄດ້ຍົກທັບຂອງເພິ່ນອອກຈາກປະເທດເອຢິບອີກ ເພາະດຽວນີ້ກະສັດແຫ່ງບາບີໂລນໄດ້ຄອບຄອງເຂດແດນທັງໝົດທີ່ເຄີຍເປັນຂອງປະເທດເອຢິບ ຕັ້ງແຕ່ແມ່ນໍ້າເອີຟຣັດຈົນເຖິງຊາຍແດນເຂດເໜືອຂອງປະເທດເອຢິບ.

8ເຈົ້າເຢໂຮຍອາກິນໄດ້ຂຶ້ນເປັນກະສັດແຫ່ງຢູດາຍເມື່ອເພິ່ນອາຍຸໄດ້ສິບແປດປີ ແລະໄດ້ປົກຄອງຢູ່ທີ່ນະຄອນເຢຣູຊາເລັມເປັນເວລາສາມເດືອນ. ແມ່ຂອງເພິ່ນຊື່ວ່າ ເນຮູຊະຕາ ລູກສາວຂອງເອນນາທານຊາວນະຄອນເຢຣູຊາເລັມ.

9ກະສັດເຢໂຮຍອາກິນໄດ້ເຮັດບາບຕໍ່ສູ້ພຣະເຈົ້າຢາເວ ຕາມແບບຢ່າງພໍ່ຂອງເພິ່ນ.

10ໃນຣາຊການຂອງເພິ່ນນັ້ນໄດ້ມີກອງທັບບາບີໂລນ ຊຶ່ງບັນຊາການໂດຍພວກນາຍທະຫານຂອງກະສັດເນບູກາດເນັດຊາ ໄດ້ຍົກທັບມາໂຈມຕີນະຄອນເຢຣູຊາເລັມແລະປິດລ້ອມເມືອງໄວ້.

11ໃນຂະນະທີ່ເມືອງຖືກປິດລ້ອມຢູ່ນັ້ນ ກະສັດເນບູກາດເນັດຊາໄດ້ມາທີ່ນະຄອນເຢຣູຊາເລັມ.

12ກະສັດເຢໂຮຍອາກິນພ້ອມທັງແມ່, ພວກລູກຊາຍ, ພວກນາຍທະຫານ ແລະພວກຂ້າຣາຊການປະຈຳວັງກໍພາກັນຈຳນົນຕໍ່ກະສັດແຫ່ງບາບີໂລນ. ໃນຣາຊການປີທີແປດຂອງກະສັດເນບູກາດເນັດຊາ ເພິ່ນໄດ້ຈັບເອົາກະສັດເຢໂຮຍອາກິນໄປເປັນຊະເລີຍ

13ແລະທັງໄດ້ກວາດລ້າງເອົາຊັບສົມບັດທັງໝົດໃນວິຫານຂອງພຣະເຈົ້າຢາເວ ແລະໃນຣາຊວັງ ໄປທີ່ນະຄອນບາບີໂລນ ຕາມທີ່ພຣະເຈົ້າຢາເວໄດ້ກ່າວໄວ້ ກະສັດເນບູກາດເນັດຊາໄດ້ທຸບເອົາເຄື່ອງໃຊ້ທັງໝົດທີ່ເປັນຄຳ ຊຶ່ງກະສັດໂຊໂລໂມນໄດ້ເຮັດໄວ້ໃນພຣະວິຫານຂອງພຣະເຈົ້າຢາເວ.

14ກະສັດເນບູກາດເນັດຊາກວາດຕ້ອນເອົາຄົນໄປເປັນຊະເລີຍ ມີດັ່ງນີ້: ປະຊາຊົນເຢຣູຊາເລັມ, ພວກເຈົ້ານາຍທັງໝົດໃນວັງ ແລະພວກຊົນຊັ້ນຜູ້ມີຄວາມຮູ້ສູງທຸກຄົນ, ທັງໝົດມີຈຳນວນສິບພັນຄົນ. ເພິ່ນຍັງໄດ້ກວາດເອົາພວກຄົນງານທີ່ມີຝີມືດີ ພ້ອມທັງພວກຊ່າງເຫລັກໄປດ້ວຍ; ແລະໄດ້ປະແຕ່ຄົນຍາກຈົນເທົ່ານັ້ນໄວ້ໃນຢູດາຍ.

15ແລ້ວກະສັດເນບູກາດເນັດຊາກໍໄດ້ຈັບເອົາກະສັດເຢໂຮຍອາກິນ ໄປເປັນຊະເລີຍທີ່ນະຄອນບາບີໂລນພ້ອມທັງແມ່ຂອງເພິ່ນ, ພວກເມຍ, ພວກຂ້າຣາຊການ ແລະບັນດາຊົນຊັ້ນຜູ້ມີຄວາມຮູ້ສູງຂອງຢູດາຍ.

16ກະສັດເນບູກາດເນັດຊາໄດ້ກວາດເອົາຄົນສຳຄັນໄປທີ່ນະຄອນບາບີໂລນ ມີດ້ວຍກັນທັງໝົດເຈັດພັນຄົນ ແລະພວກທີ່ມີຝີມືດີໜຶ່ງພັນຄົນ ຊຶ່ງລ້ວນແຕ່ເປັນຄົນແຂງແຮງ ແລະເປັນທະຫານໄດ້ທັງນັ້ນ.

17ຕໍ່ມາ ກະສັດເນບູກາດເນັດຊາໄດ້ແຕ່ງຕັ້ງມັດຕານີຢາ ລູງຂອງເຢໂຮຍອາກິນ ໃຫ້ເປັນກະສັດປົກຄອງອານາຈັກຢູດາຍ ແລະໄດ້ປ່ຽນຊື່ໃຫ້ເພິ່ນໃໝ່ວ່າ ເຊເດກີຢາ.

18ເຈົ້າເຊເດກີຢາຂຶ້ນເປັນກະສັດແຫ່ງຢູດາຍ ເມື່ອເພິ່ນອາຍຸໄດ້ຊາວເອັດປີ ແລະໄດ້ປົກຄອງຢູ່ທີ່ນະຄອນເຢຣູຊາເລັມເປັນເວລາສິບເອັດປີ. ແມ່ຂອງເພິ່ນຊື່ວ່າຮາມູຕານ ລູກສາວຂອງເຢເຣມີຢາຊາວເມືອງລິບນາ.

19ກະສັດເຊເດກີຢາໄດ້ເຮັດບາບຕໍ່ສູ້ພຣະເຈົ້າຢາເວຕາມທີ່ກະສັດເຢໂຮຍອາກິມໄດ້ເຮັດ.

20ພຣະເຈົ້າຢາເວໄດ້ໂກດຮ້າຍປະຊາຊົນເຢຣູຊາເລັມແລະຢູດາຢ່າງໜັກ; ສະນັ້ນ ພຣະອົງຈຶ່ງຂັບໄລ່ພວກເຂົາໃຫ້ໜີພົ້ນຈາກສາຍຕາຂອງພຣະອົງ.

← Chapter 23 Jump to: Chapter 25 →

Recommended Reading

Commentary 2 Kings Commentaries → Devotional 2 Kings Devotional Guide → Get This Bible Lao Bible (ພຣະຄຳພີສັກສິ) Study Bible →