2 Kings 22

Lao Bible 2012 (ພຣະຄຳພີສັກສິ)

← Chapter 21 Jump to: Chapter 23 →

1ເຈົ້າໂຢສີຢາຂຶ້ນເປັນກະສັດປົກຄອງອານາຈັກຢູດາຍ ເມື່ອເພິ່ນອາຍຸໄດ້ແປດປີ. ເພິ່ນໄດ້ປົກຄອງຢູ່ທີ່ນະຄອນເຢຣູຊາເລັມເປັນເວລາສາມສິບເອັດປີ. ແມ່ຂອງເພິ່ນຊື່ວ່າເຢດີດາ ລູກສາວຂອງອາດາຢາຊາວໂບຊະກາດ.

2ກະສັດໂຢສີຢາເຮັດໃນສິ່ງທີ່ພຣະເຈົ້າຢາເວພໍໃຈ; ເພິ່ນເຮັດຕາມແບບຢ່າງຂອງກະສັດດາວິດບັນພະບຸລຸດຂອງເພິ່ນ ໂດຍເຊື່ອຟັງຢ່າງເຄັ່ງຄັດກົດບັນຍັດທັງໝົດຂອງພຣະເຈົ້າ.

3ໃນຣາຊການປີທີສິບແປດຂອງກະສັດໂຢສີຢາ ເພິ່ນໄດ້ໃຊ້ເລຂາທິການ ຊາຟານລູກຊາຍຂອງອາຊາລີຢາ ແລະຫລານຊາຍຂອງເມຊຸນລຳ ໄປທີ່ວິຫານຂອງພຣະເຈົ້າຢາເວ ໂດຍສັ່ງວ່າ,

4“ຈົ່ງໄປຫາມະຫາປະໂຣຫິດຮິນກີຢາ ແລະໃຫ້ເພິ່ນລາຍງານກ່ຽວກັບເງິນທີ່ພວກປະໂຣຫິດປະຈຳໜ້າທີ່ໃນທາງເຂົ້າວິຫານຂອງພຣະເຈົ້າຢາເວໄດ້ເກັບຈາກປະຊາຊົນ.

5ຈົ່ງບອກເພິ່ນເອົາເງິນໃຫ້ບັນດາຄົນງານ ຜູ້ທີ່ຮັບຜິດຊອບສ້ອມແປງວິຫານຂອງພຣະເຈົ້າຢາເວ.

6ພວກເຂົາຕ້ອງຈ່າຍເງິນນີ້ໃຫ້ແກ່ພວກຊ່າງໄມ້, ພວກກໍ່ສ້າງ, ພວກຊ່າງກໍ່ດິນເຜົາ ແລະຊື້ໄມ້ ແລະຫີນສຳລັບການສ້ອມແປງວິຫານ.

7ພວກທີ່ຮັບຜິດຊອບວຽກງານນັ້ນເປັນຄົນສັດຊື່; ສະນັ້ນ ຈຶ່ງບໍ່ຈຳເປັນໃຫ້ພວກເຂົາເຮັດບັນຊີການເງິນ.”

8ຊາຟານໄດ້ນຳເອົາຄຳສັ່ງຂອງກະສັດໄປບອກມະຫາປະໂຣຫິດຮິນກີຢາ; ແລ້ວເພິ່ນກໍບອກຊາຟານວ່າ ເພິ່ນໄດ້ພົບປື້ມກົດບັນຍັດໃນວິຫານຂອງພຣະເຈົ້າຢາເວ. ເພິ່ນໄດ້ເອົາປື້ມນັ້ນໃຫ້ຊາຟານອ່ານ.

9ຊາຟານໄດ້ກັບຄືນມາລາຍງານຕໍ່ກະສັດວ່າ, “ພວກຜູ້ຮັບໃຊ້ຂອງທ່ານໄດ້ເອົາເງິນໃນວິຫານຂອງພຣະເຈົ້າຢາເວ ໃຫ້ແກ່ພວກຄົນງານທີ່ຮັບຜິດຊອບໃນການສ້ອມແປງແລ້ວ.”

10ຕໍ່ມາ ຊາຟານໄດ້ກ່າວຕໍ່ໄປວ່າ, “ມະຫາປະໂຣຫິດຮິນກີຢາໄດ້ເອົາປື້ມຫົວນີ້ໃຫ້ຂ້ານ້ອຍ.” ແລ້ວຊາຟານກໍໄດ້ອ່ານກົດບັນຍັດໃນປື້ມນັ້ນສູ່ກະສັດຟັງ.

11ເມື່ອກະສັດໄດ້ຍິນເນື້ອຄວາມໃນປື້ມນັ້ນ ເພິ່ນຈຶ່ງຈີກເຄື່ອງນຸ່ງຂອງຕົນດ້ວຍຄວາມໂສກເສົ້າເສຍໃຈ

12ແລ້ວເພິ່ນໄດ້ອອກຄຳສັ່ງແກ່ມະຫາປະໂຣຫິດຮິນກີຢາ, ອາຮີກຳລູກຊາຍຂອງຊາຟານ, ອັກໂບລູກຊາຍຂອງມີກາອີຢາ, ຊາຟານ ເລຂາທິການ ແລະອາສາອີຢາ ຜູ້ລໍຮັບໃຊ້ຂອງກະສັດ. ຄຳສັ່ງນັ້ນມີຂໍ້ຄວາມດັ່ງຕໍ່ໄປນີ້:

13“ຈົ່ງໄປປຶກສາພຣະເຈົ້າຢາເວແທນເຮົາ ແລະປະຊາຊົນຊາວຢູດາທຸກຄົນ ກ່ຽວກັບຄຳສັ່ງສອນໃນປື້ມນີ້. ພຣະເຈົ້າຢາເວໂກດຮ້າຍພວກເຮົາ ເພາະປູ່ຍ່າຕາຍາຍຂອງພວກເຮົາບໍ່ໄດ້ປະຕິບັດຕາມຖ້ອຍຄຳທີ່ໄດ້ມີຂຽນໄວ້ໃນປື້ມນີ້.”

14ປະໂຣຫິດຮິນກີຢາ, ອາຮີກຳ, ອັກໂບ, ຊາຟານ ແລະອາສາອີຢາ ໄດ້ໄປປຶກສາຜູ້ທຳນວາຍຍິງຄົນໜຶ່ງຢູ່ທາງເຂດໃໝ່ຂອງນະຄອນເຢຣູຊາເລັມຊື່ວ່າ ຮຸນດາ. (ຜົວຂອງນາງຮຸນດາຊື່ວ່າຊານລູມ ລູກຊາຍຂອງຕິກວາ ແລະຫລານຊາຍຂອງຮາກຮາ; ຊານລູມເປັນຜູ້ຮັກສາເສື້ອຄຸມປະຈຳພຣະວິຫານ.) ຄົນເຫຼົ່ານີ້ໄດ້ເລົ່າເຫດການສູ່ນາງຟັງ.

15ແລະນາງໄດ້ບອກພວກເຂົາວ່າ ພຣະເຈົ້າຢາເວ ພຣະເຈົ້າຂອງຊາດອິດສະຣາເອນໄດ້ກ່າວດັ່ງນີ້ວ່າ: ຈົ່ງບອກຄົນທີ່ໄດ້ໃຊ້ພວກເຈົ້າມາຫາເຮົາວ່າ,

16ພຣະເຈົ້າຢາເວໄດ້ກ່າວດັ່ງນີ້: “ເຮົາຈະລົງໂທດນະຄອນເຢຣູຊາເລັມພ້ອມທັງປະຊາຊົນທຸກຄົນໃນເມືອງ ຕາມທີ່ມີຖ້ອຍຄຳຂຽນໄວ້ໃນປື້ມທີ່ກະສັດຢູດາຍໄດ້ອ່ານນັ້ນ.

17ພວກເຂົາໄດ້ປະຖິ້ມເຮົາ ແລະໄປຖວາຍເຄື່ອງບູຊາແກ່ບັນດາພະອື່ນ ຊຶ່ງເຮັດໃຫ້ເຮົາໂກດຮ້າຍໃນທຸກສິ່ງ ທີ່ພວກເຂົາໄດ້ເຮັດດ້ວຍມືຂອງພວກເຂົານັ້ນ. ຄວາມໂກດຮ້າຍຂອງເຮົາລຸກຂຶ້ນຕໍ່ສູ້ນະຄອນເຢຣູຊາເລັມ ແລະຈະບໍ່ດັບລົງ.

18ແຕ່ສຳລັບກະສັດຢູດາຍທີ່ໄດ້ໃຊ້ພວກເຈົ້າໄປຖາມພຣະເຈົ້າຢາເວ ເຈົ້າທັງຫລາຍຈົ່ງກ່າວດັ່ງນີ້ວ່າ, ພຣະເຈົ້າຢາເວ ພຣະເຈົ້າຂອງຊາດອິດສະຣາເອນກ່າວວ່າ, ‘ດ້ວຍຖ້ອຍຄຳທັງຫລາຍທີ່ເຈົ້າໄດ້ຍິນ

19ເພາະເຈົ້າໄດ້ຍອມຟັງແລະເຈົ້າໄດ້ຖ່ອມຕົວຕໍ່ໜ້າພຣະເຈົ້າຢາເວ ເຈົ້າຈີກເຄື່ອງນຸ່ງຂອງເຈົ້າແລະຮ້ອງໄຫ້ ເມື່ອເຈົ້າໄດ້ຍິນເຖິງການຂູ່ເຂັນ ທີ່ເຮົາຈະລົງໂທດນະຄອນເຢຣູຊາເລັມ ແລະປະຊາຊົນໃນເມືອງ. ເຮົາຈະເຮັດໃຫ້ເມືອງນີ້ເປັນໜ້າຢ້ານກົວ ຄືເປັນບ່ອນທີ່ຄົນຈະໃຊ້ຊື່ເມືອງນີ້ເປັນຄຳສາບແຊ່ງ. ແຕ່ເຮົາໄດ້ຍິນຄຳພາວັນນາອະທິຖານຂອງເຈົ້າ ພຣະເຈົ້າຢາເວກ່າວດັ່ງນີ້.

20ເພາະສະນັ້ນ ການລົງໂທດທີ່ເຮົາກຳລັງຈະນຳມາສູ່ນະຄອນເຢຣູຊາເລັມນີ້ ຈະບໍ່ມາເຖິງຈົນກວ່າເຈົ້າຈະຕາຍໄປ. ເຮົາຈະໃຫ້ເຈົ້າຕາຍໄປຢ່າງສະຫງົບສຸກ.”’ ແລ້ວຊາຍເຫຼົ່ານັ້ນກໍນຳເອົາຖ້ອຍຄຳນີ້ໄປບອກກະສັດໂຢສີຢາ.

← Chapter 21 Jump to: Chapter 23 →

Recommended Reading

Commentary 2 Kings Commentaries → Devotional 2 Kings Devotional Guide → Get This Bible Lao Bible (ພຣະຄຳພີສັກສິ) Study Bible →