2 Kings 21

Lao Bible 2012 (ພຣະຄຳພີສັກສິ)

← Chapter 20 Jump to: Chapter 22 →

1ເຈົ້າມານາເຊໄດ້ຂຶ້ນເປັນກະສັດແຫ່ງຢູດາຍ ເມື່ອເພິ່ນມີອາຍຸໄດ້ສິບສອງປີ ແລະໄດ້ປົກຄອງຢູ່ທີ່ນະຄອນເຢຣູຊາເລັມເປັນເວລາຫ້າສິບຫ້າປີ. ແມ່ຂອງເພິ່ນຊື່ວ່າ ເຮັບຊີບາ.

2ກະສັດມານາເຊໄດ້ເຮັດບາບຕໍ່ສູ້ພຣະເຈົ້າຢາເວ ໂດຍປະພຶດຕາມແບບຢ່າງອັນໜ້າກຽດຊັງ ຂອງຊົນຊາດທີ່ພຣະເຈົ້າຢາເວໄດ້ຂັບໄລ່ອອກໄປຕໍ່ໜ້າປະຊາຊົນອິດສະຣາເອນ.

3ເພິ່ນສ້າງບ່ອນຂາບໄຫວ້ພະຂອງຄົນຕ່າງຊາດຂຶ້ນໃໝ່ ທີ່ກະສັດເຮເຊກີຢາພໍ່ຂອງເພິ່ນໄດ້ທຳລາຍໄປແລ້ວນັ້ນ; ເພິ່ນສ້າງແທ່ນບູຊາສຳລັບຂາບໄຫວ້ພະບາອານ ແລະສ້າງຮູບຂອງເຈົ້າແມ່ອາເຊຣາດັ່ງເຈົ້າອາຮາບກະສັດແຫ່ງອິດສະຣາເອນໄດ້ເຮັດມານັ້ນ. ກະສັດມານາເຊຍັງໄດ້ຂາບໄຫວ້ຕາເວັນເດືອນດາວອີກດ້ວຍ.

4ເພິ່ນໄດ້ສ້າງແທ່ນບູຊາຕ່າງໆ ເພື່ອຂາບໄຫວ້ຮູບພະຂອງຄົນຕ່າງຊາດໄວ້ທີ່ວິຫານຂອງພຣະເຈົ້າຢາເວ ບ່ອນທີ່ພຣະເຈົ້າຢາເວບອກວ່າ, ໃນນະຄອນເຢຣູຊາເລັມເຮົາຈະໃຫ້ນາມຊື່ຂອງເຮົາສະຖິດຢູ່.

5ເພິ່ນຍັງໄດ້ສ້າງແທ່ນບູຊາຕ່າງໆ ເພື່ອຂາບໄຫວ້ຕາເວັນເດືອນດາວໃສ່ເດີ່ນທັງສອງແຫ່ງທີ່ວິຫານຂອງພຣະເຈົ້າຢາເວ.

6ເພິ່ນໄດ້ຖວາຍລູກຊາຍຂອງຕົນໃຫ້ເປັນເຄື່ອງຖວາຍບູຊາ. ເພິ່ນທຳພິທີຖາມສິ່ງສັກສິດ ແລະຝຶກເວດມົນກະຖາ ແລະປຶກສາ ພວກໝໍດູແລະໝໍຜີ. ເພິ່ນໄດ້ເຮັດບາບຢ່າງໃຫຍ່ຫລວງຕໍ່ສູ້ພຣະເຈົ້າຢາເວ ແລະເຮັດໃຫ້ພຣະອົງໂກດຮ້າຍ.

7ເພິ່ນຕັ້ງຮູບເຈົ້າແມ່ອາເຊຣາໄວ້ຢູ່ໃນວິຫານ ຊຶ່ງເປັນບ່ອນທີ່ພຣະເຈົ້າຢາເວໄດ້ກ່າວໄວ້ກັບກະສັດດາວິດ ແລະກະສັດໂຊໂລໂມນລູກຊາຍຂອງເພິ່ນວ່າ, “ໃນນະຄອນເຢຣູຊາເລັມນີ້ ຄືທີ່ວິຫານນີ້ ເປັນບ່ອນທີ່ເຮົາໄດ້ເລືອກເອົາຈາກເຂດແດນທັງໝົດຂອງຊາວອິດສະຣາເອນສິບສອງເຜົ່າ ເພື່ອໃຫ້ນາມຊື່ຂອງເຮົາສະຖິດຢູ່ຕະຫຼອດໄປ.

8ຖ້າປະຊາຊົນອິດສະຣາເອນຈະເຊື່ອຟັງຄຳສັ່ງທຸກຂໍ້ຂອງເຮົາ ທັງຖືຮັກສາກົດບັນຍັດທັງໝົດທີ່ໂມເຊຜູ້ຮັບໃຊ້ຂອງເຮົາໄດ້ມອບໃຫ້ພວກເຂົາ; ເຮົາຈະບໍ່ໃຫ້ພວກເຂົາຖືກຂັບໄລ່ອອກໜີໄປຈາກດິນແດນ ຊຶ່ງເຮົາໄດ້ມອບໃຫ້ພວກປູ່ຍ່າຕາຍາຍຂອງພວກເຂົານັ້ນ.”

9ແຕ່ປະຊາຊົນຢູດາບໍ່ໄດ້ເຊື່ອຟັງ ແລະກະສັດມານາເຊຍັງໄດ້ນຳພວກເຂົາເຮັດການບາບອັນໜັກໜ່ວງ ກວ່າພວກຊົນຊາດທີ່ພຣະເຈົ້າຢາເວໄດ້ທຳລາຍຕໍ່ໜ້າປະຊາຊົນອິດສະຣາເອນ.

10ພຣະເຈົ້າຢາເວໄດ້ກ່າວຜ່ານທາງພວກຜູ້ທຳນວາຍຜູ້ຮັບຜູ້ຮັບໃຊ້ຂອງພຣະອົງວ່າ,

11“ກະສັດມານາເຊໄດ້ເຮັດສິ່ງທີ່ໜ້າກຽດຊັງເຫຼົ່ານີ້; ເປັນສິ່ງທີ່ຊົ່ວຮ້າຍຫລາຍກ່ວາຊາວການາອານໄດ້ເຮັດ; ລາວໄດ້ນຳປະຊາຊົນຢູດາໃຫ້ຕົກໃນບາບ ດ້ວຍການສ້າງຮູບເຄົາຣົບຕ່າງໆ.

12ສະນັ້ນ ພຣະເຈົ້າຢາເວ ພຣະເຈົ້າຂອງຊາດອິດສະຣາເອນ ຈຶ່ງຈະນຳຄວາມພິນາດມາສູ່ນະຄອນເຢຣູຊາເລັມ ແລະອານາຈັກຢູດາຍ ແລະຜູ້ໃດທີ່ໄດ້ຍິນກ່ຽວກັບການນີ້ກໍຈະຕົກສະເງີ້.

13ເຮົາຈະລົງໂທດນະຄອນເຢຣູຊາເລັມ ດັ່ງທີ່ເຮົາໄດ້ເຮັດຕໍ່ນະຄອນຊາມາເຣຍ, ຕໍ່ກະສັດອາຮາບແຫ່ງອິດສະຣາເອນ ແລະຕໍ່ພວກລູກຫລານຂອງລາວ. ເຮົາຈະກວາດລ້າງປະຊາຊົນທີ່ນະຄອນເຢຣູຊາເລັມໃຫ້ໝົດກ້ຽງໄປ ໃຫ້ສະອາດດັ່ງຈານທີ່ເຊັດໃຫ້ແຫ້ງແລະຂວໍ້າໄວ້.

14ເຮົາຈະປະຖິ້ມພວກທີ່ຍັງມີຊີວິດຢູ່ ແລະຈະມອບພວກເຂົາໄວ້ໃນກຳມືຂອງເຫຼົ່າສັດຕູ ຜູ້ທີ່ຈະຮົບຊະນະພວກເຂົາ ແລະຈະປຸ້ນສະດົມດິນແດນຂອງພວກເຂົາ.

15ເຮົາຈະເຮັດສິ່ງເຫຼົ່ານີ້ຕໍ່ປະຊາຊົນຂອງເຮົາ ເພາະພວກເຂົາໄດ້ເຮັດບາບຕໍ່ສູ້ເຮົາ ແລະເຮັດໃຫ້ເຮົາໂກດຮ້າຍ ຕັ້ງແຕ່ຄາວທີ່ພວກປູ່ຍ່າຕາຍາຍຂອງພວກເຂົາໄດ້ອອກມາຈາກປະເທດເອຢິບ ຈົນເຖິງທຸກວັນນີ້.”

16ກະສັດມານາເຊຂ້າຄົນທີ່ບໍ່ມີຄວາມຜິດຢ່າງຫລວງຫລາຍ ຈົນວ່າຖະໜົນຕ່າງໆທີ່ນະຄອນເຢຣູຊາເລັມນອງໄປດ້ວຍເລືອດ; ເພິ່ນໄດ້ກະທຳການນີ້ຕື່ມໃສ່ກັບການນຳພາຊາວຢູດາໃຫ້ຂາບໄຫວ້ຮູບເຄົາຣົບ ອັນເປັນເຫດໃຫ້ພວກເຂົາເຮັດບາບຕໍ່ສູ້ພຣະເຈົ້າຢາເວ.

17ສິ່ງອື່ນທີ່ກະສັດມານາເຊໄດ້ກະທຳຕະຫລອດທັງເລື່ອງການກະທຳບາບຂອງເພິ່ນ ແມ່ນໄດ້ຖືກບັນທຶກໄວ້ໃນ ປື້ມປະຫວັດສາດຂອງບັນດາກະສັດແຫ່ງຢູດາຍ.

18ກະສັດມານາເຊໄດ້ຕາຍໄປພ້ອມກັບປູ່ຍ່າຕາຍາຍຂອງເພິ່ນ ແລະໄດ້ຖືກຝັງໄວ້ໃນສວນຂອງຣາຊວັງ ຄືສວນຂອງອູຊາ. ແລ້ວເຈົ້າອາໂມນ ລູກຊາຍຂອງເພິ່ນກໍຂຶ້ນເປັນກະສັດປົກຄອງແທນ.

19ເຈົ້າອາໂມນເປັນກະສັດແຫ່ງຢູດາຍ ເມື່ອເພິ່ນອາຍຸໄດ້ຊາວສອງປີ. ເພິ່ນປົກຄອງທີ່ນະຄອນເຢຣູຊາເລັມເປັນເວລາສອງປີ ແມ່ຂອງເພິ່ນຊື່ວ່າເມຊຸນເລເມດ ລູກສາວຂອງຮາຣຸດຊາວເມືອງຢົດບາ.

20ກະສັດອາໂມນໄດ້ເຮັດບາບຕໍ່ສູ້ພຣະເຈົ້າຢາເວ ເໝືອນກັນກັບກະສັດມານາເຊພໍ່ຂອງຕົນ.

21ເພິ່ນໄດ້ຮຽນເອົາແບບຢ່າງນຳພໍ່ຂອງເພິ່ນ ແລະຂາບໄຫວ້ຮູບເຄົາຣົບທີ່ພໍ່ຂອງເພິ່ນໄດ້ຂາບໄຫວ້.

22ເພິ່ນປະຕິເສດພຣະເຈົ້າຢາເວ ພຣະເຈົ້າຂອງປູ່ຍ່າຕາຍາຍຂອງເພິ່ນ ແລະບໍ່ເຊື່ອຟັງຄຳສັ່ງຂອງພຣະເຈົ້າຢາເວ.

23ບັນດາຂ້າຣາຊການຂອງກະສັດອາໂມນໄດ້ວາງແຜນກະບົດຕໍ່ເພິ່ນ ແລະໄດ້ຂ້າເພິ່ນເສຍຢູ່ໃນວັງ.

24ແຕ່ຊາວຢູດາຍໄດ້ຂ້າພວກທີ່ເປັນກະບົດຕໍ່ກະສັດອາໂມນ ແລະແຕ່ງຕັ້ງເຈົ້າໂຢສີຢາລູກຊາຍຂອງເພິ່ນໃຫ້ຂຶ້ນເປັນກະສັດປົກຄອງແທນ.

25ສິ່ງອື່ນທີ່ກະສັດອາໂມນໄດ້ກະທຳແມ່ນໄດ້ຖືກບັນທຶກໄວ້ໃນ ປື້ມປະຫວັດສາດຂອງບັນດາກະສັດແຫ່ງຢູດາຍ.

26ກະສັດອາໂມນໄດ້ຖືກຝັງໄວ້ໃນສວນຂອງອູຊາ; ແລ້ວເຈົ້າໂຢສີຢາລູກຊາຍຂອງເພິ່ນກໍຂຶ້ນປົກຄອງແທນ.

← Chapter 20 Jump to: Chapter 22 →

Recommended Reading

Commentary 2 Kings Commentaries → Devotional 2 Kings Devotional Guide → Get This Bible Lao Bible (ພຣະຄຳພີສັກສິ) Study Bible →