2 Kings 16

Lao Bible 2012 (ພຣະຄຳພີສັກສິ)

← Chapter 15 Jump to: Chapter 17 →

1ໃນຣາຊການປີທີສິບເຈັດຂອງເຈົ້າເປກາລູກຊາຍຂອງເຣມາລີຢາ ກະສັດແຫ່ງອິດສະຣາເອນ; ເຈົ້າອາຮາດລູກຊາຍຂອງເຈົ້າໂຢທາມໄດ້ຂຶ້ນເປັນກະສັດແຫ່ງຢູດາຍ

2ເມື່ອເພິ່ນອາຍຸໄດ້ຊາວປີ ແລະໄດ້ປົກຄອງຢູ່ທີ່ນະຄອນເຢຣູຊາເລັມ ເປັນເວລາສິບຫົກປີ. ເພິ່ນບໍ່ໄດ້ປະພຶດຕາມແບບຢ່າງອັນດີງາມຂອງກະສັດດາວິດ ບັນພະບຸລຸດຂອງເພິ່ນ, ແຕ່ເພິ່ນໄດ້ກະທຳໃນສິ່ງທີ່ພຣະເຈົ້າຢາເວ ພຣະເຈົ້າຂອງເພິ່ນບໍ່ພໍໃຈ

3ແລະປະພຶດຕາມແບບຢ່າງຂອງບັນດາກະສັດແຫ່ງອິດສະຣາເອນ. ເພິ່ນໄດ້ເຜົາແມ່ນແຕ່ລູກຊາຍຂອງຕົນເອງຖວາຍບູຊາແກ່ບັນດາຮູບເຄົາຣົບ ໂດຍຮຽນເອົາແບບຢ່າງຂອງປະຊາຊົນທີ່ພຣະເຈົ້າຢາເວໄດ້ຂັບໄລ່ອອກໜີ ໃນຄາວທີ່ຊາວອິດສະຣາເອນໄດ້ບຸກໜ້າເຂົ້າມານັ້ນ.

4ກະສັດອາຮາດຖວາຍເຄື່ອງເຜົາບູຊາ ແລະເຜົາເຄື່ອງຫອມໃນບ່ອນຂາບໄຫວ້ພະຂອງຄົນຕ່າງຊາດ ຢູ່ເທິງພູເຂົາແລະຢູ່ໃຕ້ຮົ່ມໄມ້ທຸກຕົ້ນ.

5ກະສັດເຣຊິນແຫ່ງຊີເຣຍ ແລະກະສັດເປກາລູກຊາຍຂອງເຣມາລີຢາແຫ່ງອິດສະຣາເອນ ໄດ້ໂຈມຕີນະຄອນເຢຣູຊາເລັມ ແລະລ້ອມເມືອງໄວ້ ແຕ່ກໍຊະນະກະສັດອາຮາດບໍ່ໄດ້.

6ໃນເວລາດຽວກັນນັ້ນ ກະສັດແຫ່ງເອໂດມ ໄດ້ຕີເອົາເມືອງເອລາດຄືນມາໄດ້ ແລະໄດ້ຂັບໄລ່ຊາວຢູດາທີ່ອາໄສຢູ່ໃນບ່ອນນັ້ນອອກໄປ. ຊາວເອໂດມໄດ້ຕັ້ງຖິ່ນຖານຢູ່ໃນເມືອງເອລາດ ແລະຍັງອາໄສຢູ່ໃນທີ່ນັ້ນຈົນເຖິງທຸກວັນນີ້.

7ແລ້ວກະສັດອາຮາດກໍສົ່ງຄະນະທູດໄປຫາກະສັດຕີກະລາດປີເລເສ ກະສັດແຫ່ງອັດຊີເຣຍໂດຍມີຖ້ອຍຄຳດັ່ງນີ້: “ຂ້າພະເຈົ້າຄືຜູ້ຮັບໃຊ້ທີ່ສັດຊື່ຂອງທ່ານ ຂໍທ່ານກະລຸນາມາຊ່ວຍກູ້ເອົາຂ້າພະເຈົ້າ ຈາກອຳນາດຂອງກະສັດແຫ່ງຊີເຣຍ ແລະກະສັດແຫ່ງອິດສະຣາເອນ ທີ່ກຳລັງໂຈມຕີຂ້າພະເຈົ້າແດ່ທ້ອນ.”

8ກະສັດອາຮາດໄດ້ເອົາເງິນກັບຄຳຈາກວິຫານຂອງພຣະເຈົ້າຢາເວ ແລະຄັງຂອງຣາຊວັງ ແລະສົ່ງໄປເປັນຂອງຂວັນໃຫ້ແກ່ກະສັດແຫ່ງອັດຊີເຣຍ.

9ເພື່ອຕອບຄຳຂໍຮ້ອງຂອງກະສັດອາຮາດ ກະສັດຕີກະລາດປີເລເສໄດ້ຍົກທັບໄປຕໍ່ສູ້ນະຄອນດາມັສກັດ, ຢຶດເອົາເມືອງ, ຂ້າກະສັດເຣຊິນ ແລະຈັບເອົາປະຊາຊົນໄປເປັນຊະເລີຍທີ່ເມືອງກີຣະ.

10ເມື່ອກະສັດອາຮາດໄປທີ່ນະຄອນດາມັສກັດ ເພື່ອພົບກະສັດຕີກະລາດປີເລເສ ເພິ່ນໄດ້ເຫັນແທ່ນບູຊາຢູ່ທີ່ນັ້ນ ຈຶ່ງສົ່ງແບບແທ່ນບູຊາພ້ອມທັງລາຍລະອຽດທຸກຢ່າງ ໄປໃຫ້ປະໂຣຫິດອູຣີຢາ.

11ດັ່ງນັ້ນ ອູຣີຢາຈຶ່ງສ້າງແທ່ນບູຊາຄ້າຍຄືກັນ ແລະໄດ້ສ້າງໃຫ້ສຳເລັດກ່ອນທີ່ກະສັດອາຮາດກັບຄືນມາ.

12ເມື່ອກະສັດອາຮາດໄດ້ກັບຄືນມາຈາກນະຄອນດາມັສກັດ ເພິ່ນກໍເຫັນວ່າແທ່ນບູຊາໄດ້ສ້າງສຳເລັດແລ້ວ;

13ສະນັ້ນ ເພິ່ນຈຶ່ງເຜົາສັດຖວາຍ ແລະຖວາຍພືດຜົນເປັນເມັດທີ່ເທິງແທ່ນບູຊານັ້ນ ແລະໄດ້ຖອກເຫຼົ້າອະງຸ່ນພ້ອມທັງເລືອດເປັນເຄື່ອງຖວາຍບູຊາຂອງຕົນເອງໃສ່ເທິງແທ່ນນັ້ນ ເພື່ອຄວາມສາມັກຄີທຳ.

14ສ່ວນແທ່ນບູຊາທອງສຳຣິດທີ່ຖືກອຸທິດຖວາຍແກ່ພຣະເຈົ້າຢາເວ ແມ່ນຕັ້ງຢູ່ລະຫວ່າງແທ່ນບູຊາຂອງເພິ່ນແລະວິຫານຂອງພຣະເຈົ້າຢາເວ; ສະນັ້ນ ກະສັດອາຮາດຈຶ່ງໄດ້ຍ້າຍແທນບູຊານັ້ນ ໄປຕັ້ງໄວ້ຢູ່ທາງຂ້າງເໜືອຂອງແທນບູຊາຂອງເພິ່ນ.

15ແລ້ວເພິ່ນກໍໄດ້ສັ່ງປະໂຣຫິດອູຣີຢາວ່າ, “ແຕ່ບັດນີ້ໄປ ໃຫ້ເຈົ້າໃຊ້ແທ່ນບູຊາໃຫຍ່ຂອງເຮົານີ້ສຳລັບການເຜົາຖວາຍບູຊາໃນຕອນເຊົ້າ ແລະການຖວາຍພືດຜົນເປັນເມັດໃນຕອນແລງ, ສຳລັບເຄື່ອງບູຊາພືດຜົນເປັນເມັດຂອງກະສັດແລະຂອງປະຊາຊົນ ແລະສຳລັບການຖວາຍເຫຼົ້າອະງຸ່ນຂອງປະຊາຊົນ. ໃຫ້ນຳເອົາເລືອດສັດທຸກໂຕທີ່ຖືກຖວາຍເປັນເຄື່ອງບູຊາຖອກໃສ່ເທິງແທ່ນບູຊານີ້. ສ່ວນແທ່ນບູຊາທີ່ເປັນທອງສຳຣິດນັ້ນ ຈົ່ງປະໄວ້ໃຫ້ເຮົາເພື່ອໃຊ້ຖວາຍບູຊາສິ່ງສັກສິດ.”

16ອູຣີຢາໄດ້ປະຕິບັດຕາມຄຳສັ່ງຂອງກະສັດທຸກປະການ.

17ກະສັດອາຮາດໄດ້ມ້າງກວຽນທອງສຳຣິດ ແລະໄດ້ຍ້າຍຂັນໃຫຍ່ລົງຈາກກວຽນ. ເພິ່ນຍັງເອົາອ່າງທອງສຳຣິດອອກຈາກຫລັງງົວທອງສິບສອງໂຕ ແລ້ວເອົາໄປຕັ້ງໄວ້ຢູ່ເທິງຮາກຖານທີ່ເຮັດດ້ວຍຫີນ.

18ເພື່ອເຮັດໃຫ້ກະສັດແຫ່ງອັດຊີເຣຍພໍໃຈ ກະສັດອາຮາດຍັງໄດ້ຍ້າຍທີ່ຕັ້ງບັນລັງຂອງກະສັດແລະປິດທາງເຂົ້າສ່ວນຕົວ ທີ່ກະສັດໃຊ້ເຂົ້າໄປໃນວິຫານຂອງພຣະເຈົ້າຢາເວນັ້ນເສຍ.

19ສິ່ງອື່ນທີ່ກະສັດອາຮາດໄດ້ກະທຳແມ່ນໄດ້ບັນທຶກໄວ້ໃນ ປື້ມປະຫວັດສາດຂອງບັນດາກະສັດແຫ່ງຢູດາຍ.

20ກະສັດອາຮາດໄດ້ຕາຍໄປແລະຖືກຝັງໄວ້ໃນອຸບມຸງແຫ່ງກະສັດທີ່ເມືອງຂອງດາວິດ. ແລ້ວເຈົ້າເຮເຊກີຢາລູກຊາຍຂອງເພິ່ນກໍຂຶ້ນເປັນກະສັດປົກຄອງແທນ.

← Chapter 15 Jump to: Chapter 17 →

Recommended Reading

Commentary 2 Kings Commentaries → Devotional 2 Kings Devotional Guide → Get This Bible Lao Bible (ພຣະຄຳພີສັກສິ) Study Bible →