Leviticus 15

Lao Bible 2012 (ພຣະຄຳພີສັກສິ)

← Chapter 14 Jump to: Chapter 16 →

1ພຣະເຈົ້າຢາເວໄດ້ມອບລະບຽບການໃຫ້ໂມເຊແລະອາໂຣນດັ່ງຕໍ່ໄປນີ້:

2ຈົ່ງກ່າວແກ່ປະຊາຊົນອິດສະຣາເອນວ່າ, ເມື່ອຜູ້ໃດຜູ້ໜຶ່ງມີນໍ້າໜອງໄຫລອອກມາຈາກຮ່າງກາຍ ສິ່ງທີ່ໄຫລອອກມານັ້ນກໍເປັນມົນທິນ

3ບໍ່ວ່າໄຫລອອກມາຈາກອະໄວຍະວະລັບຫລືໄຫລອອກມາຄ້າງຢູ່ທາງໃນກໍຕາມ.

4ຕຽງຂອງຄົນນັ້ນທີ່ໃຊ້ນອນຫລືໃຊ້ນັ່ງຕ້ອງຖືວ່າເປັນມົນທິນ.

5ຜູ້ໃດກໍຕາມທີ່ແຕະຕ້ອງຕຽງນອນຂອງລາວ ຕ້ອງຊັກເຄື່ອງນຸ່ງຫົ່ມຂອງຕົນແລະໃຫ້ອາບນໍ້າຊຳລະຮ່າງກາຍ ແລະລາວຍັງເປັນມົນທິນຈົນຮອດຄໍ່າ.

6ຫລືຜູ້ໃດທີ່ນັ່ງເທິງສິ່ງທີ່ລາວໄດ້ນັ່ງ ຕ້ອງຊັກເຄື່ອງນຸ່ງຫົ່ມຂອງຕົນແລະໃຫ້ອາບນໍ້າຊຳລະຮ່າງກາຍ ແລະລາວຍັງເປັນມົນທິນຈົນຮອດຄໍ່າ.

7ຜູ້ໃດກໍຕາມທີ່ແຕະຕ້ອງຄົນທີ່ມີສິ່ງໄຫລອອກນັ້ນ ຕ້ອງຊັກເຄື່ອງນຸ່ງຫົ່ມຂອງຕົນ ແລະອາບນໍ້າຊຳລະຮ່າງກາຍ ແລະລາວຍັງເປັນມົນທິນຈົນຮອດຄໍ່າ.

8ຖ້າຜູ້ທີ່ມີສິ່ງໄຫລອອກ ຖົ່ມນໍ້າລາຍຖືກຜູ້ທີ່ບໍ່ເປັນມົນທິນຕາມກົດບັນຍັດ; ຜູ້ຖືກນໍ້າລາຍນັ້ນຕ້ອງຊັກເຄື່ອງນຸ່ງຫົ່ມຂອງຕົນ ແລະໃຫ້ອາບນໍ້າຊຳລະຮ່າງກາຍ ແລະລາວຍັງເປັນມົນທິນຈົນຮອດຄໍ່າ.

9ອານໃສ່ຫລັງສັດຫລືບ່ອນນັ່ງໃດໆທີ່ຄົນມີສິ່ງໄຫລອອກນັ່ງ ຕ້ອງໃຫ້ຖືວ່າເປັນມົນທິນ.

10ຜູ້ໃດຜູ້ໜຶ່ງທີ່ແຕະຕ້ອງບ່ອນນັ່ງຂອງຄົນທີ່ມີສິ່ງໄຫລອອກ ກໍເປັນມົນທິນຈົນຮອດຄໍ່າ. ຜູ້ໃດຜູ້ໜຶ່ງທີ່ຫາມສິ່ງທີ່ລາວໄດ້ນັ່ງ ຕ້ອງຊັກເຄື່ອງນຸ່ງຫົ່ມຂອງຕົນ ແລະອາບນໍ້າຊຳລະຮ່າງກາຍ; ແລະລາວຍັງເປັນມົນທິນຈົນຮອດຄໍ່າ.

11ຖ້າຜູ້ທີ່ມີສິ່ງໄຫລອອກມານັ້ນ ແຕະຕ້ອງຜູ້ໃດຜູ້ໜຶ່ງ ໂດຍບໍ່ໄດ້ລ້າງມືເສຍກ່ອນ; ຜູ້ທີ່ຖືກແຕະຕ້ອງນັ້ນຕ້ອງຊັກເຄື່ອງນຸ່ງຫົ່ມຂອງຕົນ ແລະອາບນໍ້າຊຳລະຮ່າງກາຍ ແລະລາວຍັງເປັນມົນທິນຈົນຮອດຄໍ່າ.

12ຜູ້ມີສິ່ງໄຫລອອກມາແຕະຕ້ອງໝໍ້ດິນທຸກໜ່ວຍນັ້ນຕ້ອງໃຫ້ທັບຖິ້ມໝົດ ແລະເຄື່ອງຄົວກິນທີ່ເຮັດດ້ວຍໄມ້ຕ້ອງໃຫ້ລ້າງດ້ວຍນໍ້າ.

13ຫລັງຈາກຊາຍຄົນນັ້ນດີຈາກອາການມີສິ່ງທີ່ໄຫລອອກມາແລ້ວ ລາວຕ້ອງລໍຖ້າອີກເຈັດວັນຈຶ່ງຊັກເຄື່ອງນຸ່ງຫົ່ມ ແລະອາບນໍ້າຊຳລະຮ່າງກາຍຢູ່ໃຕ້ບໍ່ທີ່ມີນໍ້າໄຫລ ແລ້ວລາວກໍຈະໝົດມົນທິນຕາມກົດບັນຍັດ.

14ໃນວັນທີແປດ ລາວຈະຕ້ອງເອົານົກເຂົາຫລືນົກກາງແກສອງໂຕ ໄປທີ່ທາງເຂົ້າຫໍເຕັນບ່ອນຊຸມນຸມຕໍ່ໜ້າພຣະເຈົ້າຢາເວ ແລະມອບນົກນັ້ນໃຫ້ປະໂຣຫິດ.

15ຝ່າຍປະໂຣຫິດຈະຖວາຍນົກໂຕໜຶ່ງໃນສອງໂຕນັ້ນ ເພື່ອເປັນການລຶບລ້າງບາບ ແລະໂຕໜຶ່ງອີກເພື່ອເຜົາຖວາຍບູຊາດ້ວຍໄຟຕໍ່ໜ້າພຣະເຈົ້າຢາເວສຳລັບຊາຍຄົນນັ້ນ. ປະໂຣຫິດຈະເຮັດພິທີຊຳລະລາວໃຫ້ໝົດມົນທິນຕາມກົດບັນຍັດ ຍ້ອນມີສິ່ງໄຫຼອອກນັ້ນ.

16ເມື່ອຊາຍຜູ້ໜຶ່ງມີນໍ້າກາມໄຫລອອກ ລາວຕ້ອງອາບນໍ້າຊຳລະຮ່າງກາຍ ແລະລາວຍັງເປັນມົນທິນຈົນຮອດຄໍ່າ.

17ສິ່ງໃດສິ່ງໜຶ່ງທີ່ເຮັດດ້ວຍຜ້າຫລືດ້ວຍໜັງທີ່ນໍ້າກາມເຮ່ຍໃສ່ນັ້ນ ຕ້ອງລ້າງດ້ວຍນໍ້າແລະຍັງເປັນມົນທິນຈົນຮອດຄໍ່າ.

18ຫລັງຈາກສົມສູ່ກັນແລ້ວ ທັງຜູ້ຊາຍແລະຜູ້ຍິງຕ້ອງອາບນໍ້າ ແລະທັງສອງຍັງເປັນມົນທິນຈົນຮອດຄໍ່າ.

19ເມື່ອຜູ້ຍິງເປັນປະຈຳເດືອນ ນາງຍັງເປັນມົນທິນຢູ່ເຈັດວັນ. ຜູ້ໃດຜູ້ໜຶ່ງທີ່ແຕະຕ້ອງນາງ ກໍຈະເປັນມົນທິນຈົນຮອດຄໍ່າ.

20ສິ່ງໃດກໍຕາມທີ່ນາງໃຊ້ນັ່ງຫລືໃຊ້ນອນໃນໄລຍະເປັນປະຈຳເດືອນນັ້ນ ແມ່ນເປັນມົນທິນ.

21ຜູ້ໃດຜູ້ໜຶ່ງທີ່ແຕະຕ້ອງຕຽງນອນຂອງນາງຫລືສິ່ງທີ່ນາງໄດ້ນັ່ງ ຕ້ອງຊັກເຄື່ອງນຸ່ງຫົ່ມແລະອາບນໍ້າຊຳລະຮ່າງກາຍ ແລະລາວຍັງເປັນມົນທິນຈົນຮອດຄໍ່າ.

24ຖ້າຊາຍຄົນໃດສົມສູ່ກັບນາງໃນໄລຍະທີ່ເປັນປະຈຳເດືອນ ຊາຍຄົນນັ້ນກໍຕິດແປດກັບຄວາມບໍ່ສະອາດຂອງນາງ ແລະເປັນມົນທິນຢູ່ເຈັດວັນ ແລະຕຽງທີ່ລາວໃຊ້ນອນກໍເປັນມົນທິນດ້ວຍ.

25ຖ້າຍິງຄົນໜຶ່ງມີເລືອດໄຫລອອກຫລາຍວັນ ນອກຈາກໄລຍະທີ່ນາງເປັນປະຈຳເດືອນ ຫລືຖ້າເລືອດນັ້ນຍັງໄຫລ ກາຍໄລຍະເປັນປະຈຳເດືອນຕາມປົກກະຕິ; ຍິງຄົນນັ້ນກໍເປັນມົນທິນຕາບໃດທີ່ເລືອດຍັງໄຫລອອກມາ ເໝືອນກັນກັບໄລຍະທີ່ນາງເປັນປະຈຳເດືອນ.

26ຕຽງທຸກໜ່ວຍທີ່ນາງໃຊ້ນອນ ແລະທຸກສິ່ງທີ່ນາງໃຊ້ນັ່ງໃນໄລຍະນັ້ນ ແມ່ນເປັນມົນທິນໝົດ.

27ຜູ້ໃດຜູ້ໜຶ່ງທີ່ແຕະຕ້ອງສິ່ງເຫຼົ່ານັ້ນ ກໍເປັນມົນທິນ. ລາວຕ້ອງຊັກເຄື່ອງນຸ່ງຂອງຕົນພ້ອມທັງອາບນໍ້າຊຳລະຮ່າງກາຍດ້ວຍ ແລະລາວກໍຍັງເປັນມົນທິນຈົນຮອດຄໍ່າ.

28ຫລັງຈາກເລືອດເຊົາໄຫລແລ້ວ ນາງຕ້ອງລໍຖ້າອີກເຈັດວັນ ແລ້ວນາງກໍຈະບໍ່ເປັນມົນທິນຕາມກົດບັນຍັດ.

29ໃນວັນທີແປດ ນາງຈະຕ້ອງນຳນົກເຂົາຫລືນົກກາງແກສອງໂຕມາໃຫ້ປະໂຣຫິດທີ່ທາງເຂົ້າຫໍເຕັນບ່ອນຊຸມນຸມ.

30ປະໂຣຫິດຈະຖວາຍນົກໂຕໜຶ່ງເພື່ອລຶບລ້າງບາບ ແລະໂຕໜຶ່ງອີກເພື່ອເຜົາຖວາຍບູຊາດ້ວຍໄຟ. ປະໂຣຫິດຈະເຮັດພິທີຊຳລະນາງໃຫ້ໝົດມົນທິນຕາມກົດບັນຍັດຕໍ່ໜ້າພຣະເຈົ້າຢາເວ.

31ພຣະເຈົ້າຢາເວໄດ້ສັ່ງໂມເຊໃຫ້ເຕືອນປະຊາຊົນອິດສະຣາເອນ ກ່ຽວກັບການເປັນມົນທິນຂອງພວກເຂົາ; ເພື່ອພວກເຂົາຈະບໍ່ໄດ້ເຮັດໃຫ້ຫໍເຕັນສັກສິດຂອງພຣະອົງ ທີ່ຕັ້ງຢູ່ກາງຄ້າຍດ່າງພອຍ. ຖ້າພວກເຂົາເຮັດໃຫ້ຫໍເຕັນດ່າງພອຍ ພວກເຂົາຈະຕ້ອງຖືກຂ້າ.

32ອັນນີ້ແມ່ນລະບຽບການກ່ຽວກັບຜູ້ຊາຍທີ່ມີນໍ້າໜອງໄຫຼອອກຈາກຮ່າງກາຍ ຫລືມີນໍ້າກາມໄຫລອອກ, ກ່ຽວກັບຜູ້ຍິງເມື່ອເປັນປະຈຳເດືອນ ຫລືຜູ້ຊາຍທີ່ສົມສູ່ກັບຜູ້ຍິງທີ່ເປັນມົນທິນຕາມກົດບັນຍັດ.

← Chapter 14 Jump to: Chapter 16 →