Leviticus 18

Lao Bible 2012 (ພຣະຄຳພີສັກສິ)

← Chapter 17 Jump to: Chapter 19 →

1ພຣະເຈົ້າຢາເວໄດ້ກ່າວແກ່ໂມເຊວ່າ,

2“ໃຫ້ບອກປະຊາຊົນອິດສະຣາເອນວ່າ, ເຮົາແມ່ນພຣະເຈົ້າຢາເວ ພຣະເຈົ້າຂອງພວກເຈົ້າ.

3ຢ່າເຮັດຕາມຮີດຄອງຂອງປະຊາຊົນຊາວເອຢິບ ບ່ອນທີ່ຄັ້ງໜຶ່ງນັ້ນພວກເຈົ້າເຄີຍໄດ້ອາໄສຢູ່; ຫລືເຮັດຕາມຮີດຄອງຂອງປະຊາຊົນທີ່ການາອານ ບ່ອນທີ່ເຮົາກຳລັງນຳພາພວກເຈົ້າເຂົ້າໄປ.

4ຈົ່ງເຊື່ອຟັງກົດບັນຍັດຂອງເຮົາ ແລະເຮັດແຕ່ສິ່ງທີ່ເຮົາໄດ້ສັ່ງພວກເຈົ້າໄວ້ເທົ່ານັ້ນ. ເຮົາແມ່ນພຣະເຈົ້າຢາເວ ພຣະເຈົ້າຂອງພວກເຈົ້າ.

5ຈົ່ງເຮັດຕາມຮີດຄອງແລະກົດບັນຍັດທີ່ເຮົາໄດ້ມອບໃຫ້ພວກເຈົ້າ; ການປະຕິບັດຕາມຄຳສັ່ງດັ່ງກ່າວນີ້ເປັນການຊ່ວຍຊີວິດຂອງພວກເຈົ້າເອງ. ເຮົາແມ່ນພຣະເຈົ້າຢາເວ.

6ຢ່າສົມສູ່ກັບຍາດຕິພີ່ນ້ອງຂອງຕົນ ເຮົາແມ່ນພຣະເຈົ້າຢາເວ.

7ຢ່າເຮັດໃຫ້ພໍ່ຂອງຕົນຕ້ອງອັບອາຍຂາຍໜ້າ ໂດຍສົມສູ່ກັບແມ່ຂອງຕົນ. ຢ່າເຮັດໃຫ້ແມ່ຂອງຕົນຕ້ອງອັບອາຍຂາຍໜ້າ.

8ຢ່າເຮັດໃຫ້ພໍ່ຂອງຕົນຕ້ອງອັບອາຍຂາຍໜ້າ ໂດຍສົມສູ່ກັບເມຍຄົນອື່ນໆຂອງເພິ່ນ.

9ຢ່າສົມສູ່ກັບເອື້ອຍ ຫລືນ້ອງສາວຂອງພວກເຈົ້າ ເພາະນາງກໍໄດ້ໃຫຍ່ຂຶ້ນຮ່ວມເຮືອນດຽວກັນກັບພວກເຈົ້າ.

10ຢ່າໄດ້ສົມສູ່ກັບຫລານສາວຂອງຕົນ; ອັນນີ້ແມ່ນການອັບອາຍຂາຍໜ້າທີ່ສຸດ.

11ຢ່າສົມສູ່ກັບເອື້ອຍຕ່າງພໍ່ ຫລືຕ່າງແມ່; ນາງແມ່ນເອື້ອຍຂອງພວກເຈົ້າຄືກັນ.

12ຢ່າສົມສູ່ກັບປ້າຫລືອາ ບໍ່ວ່າຈະເປັນນ້ອງ ຫລືເອື້ອຍຂອງພໍ່ ຫລືນ້ອງຫລືເອື້ອຍຂອງແມ່ພວກເຈົ້າກໍຕາມ.

14ຢ່າສົມສູ່ກັບເມຍຂອງລຸງ ເພາະນາງເປັນປ້າຂອງພວກເຈົ້າເອງ.

15ຢ່າສົມສູ່ກັບລູກໃພ້

16ຫລືກັບເອື້ອຍໃພ້ ຫລືກັບນ້ອງໃພ້ຂອງຕົນ.

17ຢ່າສົມສູ່ກັບລູກສາວ ຫລືຫລານສາວຂອງຍິງທີ່ຕົນໄດ້ສົມສູ່ຢູ່ຮ່ວມກັບນາງ; ພວກເຂົາອາດເປັນພີ່ນ້ອງຂອງພວກເຈົ້າກໍໄດ້. ການກະທຳເຊັ່ນນັ້ນເປັນການຜິດຊາຍຍິງ ທີ່ຮ່ວມພໍ່ແມ່ດຽວກັນ.

18ຢ່າໄດ້ເອົາເອື້ອຍຫລືນ້ອງເມຍ ມາເປັນເມຍຂອງພວກເຈົ້າ ຕາບໃດທີ່ເມຍຂອງຕົນຍັງມີຊີວິດຢູ່.

19ຢ່າສົມສູ່ກັບຍິງທີ່ເປັນປະຈຳເດືອນ ເພາະວ່ານາງເປັນມົນທິນຕາມກົດບັນຍັດ.

20ຢ່າສົມສູ່ກັບເມຍຂອງຄົນອື່ນ; ຕາມກົດບັນຍັດແລ້ວຈະເຮັດໃຫ້ຜູ້ນັ້ນເປັນມົນທິນ.

21ຢ່າຖວາຍລູກຂອງພວກເຈົ້າ ເປັນເຄື່ອງມືໃນການຂາບໄຫວ້ພະໂມເລັກ ເພາະມັນນຳຄວາມເສື່ອມເສຍມາໃຫ້ນາມຊື່ຂອງພຣະເຈົ້າຂອງເຈົ້າ, ເຮົາແມ່ນພຣະເຈົ້າຢາເວ.

22ຊາຍຢ່າໄດ້ສົມສູ່ກັບຊາຍ ເພາະການກະທຳເຊັ່ນນີ້ພຣະເຈົ້າກຽດຊັງທີ່ສຸດ.

23ຊາຍກໍດີຫລືຍິງກໍດີ ຢ່າໄດ້ສົມສູ່ທາງເພດກັບສັດ; ເພາະການເຮັດຢ່າງບ້າຄັ່ງເຊັ່ນນີ້ ພາໃຫ້ພວກເຈົ້າເປັນມົນທິນຕາມກົດບັນຍັດ.

24ຢ່າປະພຶດຕົນໃຫ້ເປັນມົນທິນໂດຍກະທຳສິ່ງເຫຼົ່ານີ້ ເພາະວ່າຄົນບໍ່ນັບຖືພຣະເຈົ້າທີ່ເຮົາຂັບໄລ່ອອກໄປຕໍ່ໜ້າພວກເຈົ້າ ກໍໄດ້ປະພຶດຕົນໃຫ້ເປັນມົນທິນໂດຍວິທີນີ້.

25ການກະທຳຂອງພວກເຂົາເຮັດໃຫ້ດິນແດນເປັນມົນທິນ; ສະນັ້ນ ເຮົາຈຶ່ງລົງໂທດດິນແດນນັ້ນ ໂດຍເຮັດໃຫ້ເປັນສ້ຽນໜາມຕໍ່ຄົນທີ່ເຄີຍຢູ່ອາໄສ.

26ພວກທີ່ໄດ້ຢູ່ໃນດິນແດນກ່ອນພວກເຈົ້າໄດ້ເຮັດແຕ່ສິ່ງເບື່ອໜ່າຍ ເຮັດໃຫ້ດິນແດນເປັນມົນທິນ ແຕ່ພວກເຈົ້າຢ່າໄດ້ເຮັດສິ່ງເຫຼົ່ານັ້ນ. ພວກເຈົ້າທຸກຄົນ ບໍ່ວ່າຄົນອິດສະຣາເອນຫລືຄົນຕ່າງດ້າວກໍຕາມທີ່ອາໄສຢູ່ກັບພວກເຈົ້າ ຕ້ອງຢຶດຖືກົດບັນຍັດແລະຂໍ້ຄຳສັ່ງທັງຫລາຍຂອງເຮົາ.

28ແລ້ວດິນແດນນີ້ກໍຈະບໍ່ເປັນສ້ຽນໜາມຕໍ່ພວກເຈົ້າ ດັ່ງທີ່ເຄີຍໄດ້ເປັນມາ ຕໍ່ພວກບໍ່ນັບຖືພຣະເຈົ້າ ທີ່ເຄີຍອາໄສຢູ່ທີ່ນັ້ນກ່ອນພວກເຈົ້າ.

29ພວກເຈົ້າກໍຮູ້ແລ້ວວ່າຜູ້ໃດກໍຕາມທີ່ເຮັດສິ່ງເບື່ອໜ່າຍເຫຼົ່ານີ້ ຈະບໍ່ໄດ້ມີຊື່ວ່າເປັນປະຊາຊົນຂອງເຮົາອີກຕໍ່ໄປ.

30ເຫດສະນັ້ນ ຈົ່ງເຊື່ອຟັງຂໍ້ຄຳສັ່ງທີ່ເຮົາໃຫ້ພວກເຈົ້າ ແລະຢ່າເຮັດຕາມຮີດຄອງຂອງປະຊາຊົນ ທີ່ໄດ້ອາໄສຢູ່ໃນດິນແດນນີ້ກ່ອນພວກເຈົ້າ ແລະຢ່າເຮັດໃຫ້ພວກເຈົ້າເປັນມົນທິນ ໂດຍປະຕິບັດຕາມຮີດຄອງເຫຼົ່ານັ້ນ. ເຮົາແມ່ນພຣະເຈົ້າຢາເວ ພຣະເຈົ້າຂອງພວກເຈົ້າ.”

← Chapter 17 Jump to: Chapter 19 →