Acts 1

Mossi Moore (KÃAB-PAALGÃ KOE-NOOGO)

Jump to: Chapter 2 →

1Teofill, mam dẽenem sebrã pʋgẽ, mam wilga bũmb nins fãa a Zezi sẽn sɩng n maan la b zãms nebã,

2hal tɩ ta daar ning bãmb sẽn zẽk n kẽng arzãna. Sẽn deng a Zezi sẽn na n zẽke, b kõo b tõodã tẽn-tʋmdb nins bãmb sẽn tũusã, ne Sɩɩg-sõng pãnga.

3A Zezi namsgã zugẽ, b maana bũmb wʋsg n na n wilg b karen-biisã tɩ b vɩɩme. A Zezi puka b meng ne tẽn-tʋmdbã rasem pis-naase, n gom ne bãmb Wẽnnaam soolmã yelle.

4Daar a yembre, a Zezi da zĩ ne tẽn-tʋmdbã n dɩtẽ, la b yeel-b lame yaa: Da zãag-y ne Zeruzalɛm ye. Pa-y be n gũ bũmb ning m ba sẽn da kãabã, kũun ning mam sẽn da gom ne yãmb a yellã.

5Bala, a Zã ra lisa nebã koomẽ. La yãmba, rasem bilf sã n paase, yãmb na n paama lisg Sɩɩg-sõng pʋgẽ.

6La tẽn-tʋmdbã sẽn da tigim taabã soka a Zezi yaa: Zu-soaba, yaa moasã la y na n deeg Israyɛl soolmã n lebs-ba?

7A Zezi leok-b lame yaa: Ka be ne yãmb tɩ bãng wakate la sasa ning m ba sẽn yãk ne noor ning b sẽn tarã ye.

8La Sɩɩg-sõng sã n wa yãmb zutu, y na n deega pãnga, la yãmb na n yɩɩ mam kaset dãmb Zeruzalɛm, la Zude soolmã fãa, la Samari, la hal tɩ ta dũni tɛk fãa.

9A Zezi sẽn gom a woto n sɛ, b zẽkame tɩ nebã get-ba. La sawadg lilla a Zezi tɩ nebã ka le ne-b ye.

10La bãmb sẽn da ket n get yĩngr wakat ning a Zezi sẽn zẽkdã, haya! Raop a yiib sẽn yer fu-peels waa n yalsa bãmb sɛɛgẽ

11n yeel-b yaa: Galile neba, yaa bõe tɩ y yas n get yĩngri? Zezi kãngã Wẽnnaam sẽn zẽk tɩ b yi yãmb sʋk to-to n kẽng arzãn tɩ yãmb yã wã, b na n lebg n waa a woto bala.

12Dẽ, tẽn-tʋmdba yii tãng ning sẽn boond tɩ Oliiv tɩɩs tãngã n sig n leb Zeruzalɛm. Tãngã zãrem ne Zeruzalɛm zemsa vʋʋsg daar kẽnd bala.

13La bãmb sẽn ta Zeruzalɛm, b rʋʋ yĩngr doogã, zĩig ning bãmb sẽn minim n sigdã. Dag n yaa a Pɩyɛɛr ne a Zã la a Zak la a Ãndre la a Filip la a Toma la a Bartelemi la a Matye la a Alfe biig a Zak la a Sɩmo sẽn ya Zelot ne a Zak biig a Zuud.

14Bãmb fãa lagma taab ne yam a yembr n kẽngd taoor n pʋʋsd daar fãa, ne pagbã, la a Zezi ma a Maari ne a Zezi ma-biisã.

15Badaare, a Pɩyɛɛr yika a ba-biis a taabã sʋka, la b sõorã da taa neb koabg la pisi, n yeel yaa:

16M saam-biisi, ra yaa tɩlɛ tɩ bũmb ning Sɩɩg-sõng sẽn da gom ne a Daviid noor tɩ b gʋls gʋls-sõamyã pʋsẽ, n deng n togs t'a Zudaas na n lʋɩɩ neb taoor tɩ b wa n yõk a Zezi wã paam pidsgu.

17A Zudaas ra yaa tõnd sullã ned a yen, la a ra paama a pʋɩɩr ne tõnd tʋʋmdã.

18La rao-kãng rɩka ligd ning a sẽn paam a yel-wẽndã poorẽ wã n da pʋʋgo, la a lʋɩɩme t'a zugã reng taoore, t'a pʋgã pusg t'a yãadã yʋlʋm.

19La Zeruzalɛm tẽngã neba fãa wʋma bõn-kãnga. Rẽ n kɩt tɩ b pʋd pʋʋgã yʋʋr ne b buudã goam tɩ "Hakeldama" sẽn dat n togs tɩ zɩɩm pʋʋgo.

20Mik b gʋlsa yɩɩn-sõamyã sebr pʋgẽ n yeel yaa: Bɩ a yirã lebg raboogo, tɩ ned ra zĩnd be ye. La tɩ ned a to reeg yẽ tʋʋmdã. 21-22 Rẽ wã, tɩ d gẽes neb nins sẽn zĩnd-b ne tõnd wakat ning Zu-soab a Zezi sẽn dag n tar tõnd n kẽnd la b watẽ, sẽn sɩng ne wakat ning a Zã sẽn lis bãmbã n tãag daar ning Wẽnnaam sẽn zẽk bãmb n bas tõndã sʋka, n yãk ned a yembr t'a naag tõnd n kɩs a Zezi vʋʋgrã kaseto.

21Bãmb wilga neb a yiibu: A Zozɛf b sẽn boond t'a Barsabas la b boondẽ me t'a Zustus ne a Matyaas.

22Dẽ, bãmb fãa pʋʋsa a woto: Zu-soaba, yãmb sẽn mi neba fãa sũyã, wilg-y ned ning yãmb sẽn yãk bãmb b yiibã sʋka,

23t'a kẽ tʋʋmdã pʋgẽ, n yɩ tẽn-tʋmd n led a Zudaas zĩigẽ, t'a basame n kẽng zĩig ning sẽn segd ne-a.

24Bãmb maana bãnde n na n yãk ned a yembre, la bãndã yõka a Matyaas. La yẽ naaga tẽn-tʋmdb piig la a yembrã sullẽ.

Jump to: Chapter 2 →