Acts 23

Mossi Moore (KÃAB-PAALGÃ KOE-NOOGO)

← Chapter 22 Jump to: Chapter 24 →

1A Poll gesa kaoreng yɛl-bʋ-kaoodbã n yeel yaa: M saam-biisi, mam kẽna Wẽnnaam taoor ne sũur kaset sẽn ya sõama hal tɩ ta rũnna.

2La maan-kʋʋd kãsem a Ananiyas yeelame tɩ neb nins sẽn pẽ a Pollã wẽ a noorã.

3Dẽ, a Poll yeela yẽnda yaa: Pʋ-libsem soaba, Wẽnnaam na n wẽe yãmba. Yãmb zĩndame n na n kao mam bʋʋd wa sẽn zems ne tõogo, la y kɩɩs tõogã n yet tɩ b wẽ maam.

4Neb nins sẽn da be be wã yeela a Poll tɩ Wẽnnaam maan-kʋʋd kãsem la yẽ tʋʋsda.

5La a Poll yeelame yaa: M saam-biisi, mam da ka mi tɩ yaa maan-kʋʋd kãsem ye, bala, Wẽnnaam gʋls-sõamyã yeelame tɩ: "Ra gom f tẽng neb naab wẽng ye."

6La a Poll sẽn mi tɩ nebã sẽn tigma kẽer yaa Saduusẽ-dãmba tɩ kẽer ya Fariisẽ-dãmbã, a zẽka a koɛɛg kaoreng yɛl-bʋ-kaoodbã sʋk n yeele: M saam-biisi, mam yaa Fariisẽ, la m yaa Fariisẽ biiga. Yaa mam sẽn tẽed tɩ kũum vʋʋgr beene wã yĩng n kɩt tɩ b bʋʋd mam bʋʋdo.

7La a Poll sẽn yeel gom-kãnga, Fariisẽ-dãmbã ne Saduusẽ-dãmbã sɩngame n wẽ nokoɛɛma ne taaba, la nebã welga taaba.

8Sɩd me, Saduusẽ-dãmbã yetame tɩ kũum vʋʋgre, wall malɛka wall Sɩɩg ka be ye. Tɩ Fariisẽ-dãmba yaool n yetẽ tɩ bõn-kãens fãa beeme.

9La bʋr-kãseng yikame, la tõog karen-saam-dãmb kẽer sẽn be Fariisẽ-dãmba sullẽ wã yikame n kɩɩs ne pãng n yeel tɩ bãmb ka yã bõn-wẽng ne rao-kãngã ye, la tɩ tõeeme tɩ yaa sɩɩg wall malɛk n gom ne-a.

10La nokoeemdã sẽn lebgd wʋsgã, tɩ sodaas tusr naabã zoet rabeem tɩ nebã na n wa tae a Poll n tõsã, a yeela sodaasã tɩ b sig nebã sʋk n tall a Poll n wa gãosgã pʋga.

11La yʋng ninga sẽn pʋgdã, Zu-soaba vẽnega b meng ne a Poll n yeel-a yaa: keng f pɛlga, tɩ bõe, yaa tɩlɛ tɩ f kɩs mam kaset Rom tẽng me wala fo sẽn kɩs mam kaset Zeruzalɛma.

12La beoogã sẽn vẽege, Zuif-rãmba yẽsa ne taab n yãk yam n wẽen tɩ b ka na n dɩ wall b yũ, sã n ka tɩ b kʋʋ a Polle.

13Neb nins sẽn yẽs ne taab n wẽena sõor yɩɩda pis-naase.

14Bãmb kẽng n tɩ yãa maan-kʋʋdbã kãsem-dãmb ne kãsem-dãmbã n yeel-b yaa: Tõnd wẽename tɩ d ka na n lemb dɩɩbo, sã n ka tɩ d paam n kʋʋ a Polle.

15Dẽ yĩngã, bɩ yãmb ne kaoreng yɛl-bʋ-kaoodba fãa kos sodaas tusr naabã tɩ b wa ne a Poll y nengẽ, wa y rat n baoo n bãnga yẽnda yellã n paase. La rẽ tɩ tõnd mensa seglame n na n kʋ-a t'a nan ka ta ka ye.

16La a Poll tão biig wʋmame tɩ b set n dat n kʋʋ a Polle, la a kẽnga gãosgẽ wã n tɩ kẽ be n togs a Poll.

17Dẽ, a Poll boola sodaas koabg naab a yembr n yeel-a t'a tall bi-bɩ-kãng n kẽng sodaas tusr naabã nengẽ, tɩ bala, a tara koɛɛg n dat n togs-a.

18Sodaas koabg naabã peega biigã n kẽng sodaas tusr naabã nengẽ n yeel yaa: Bi-bɛɛg a Poll boola maam n kos-m tɩ m tall bi-bɩ-kãngã n wa y nengẽ t'a tara koɛɛg n dat n togs-yã.

19La sodaas tusr naabã gãda bi-bɩ-kãng nug n yi kɛɛng n sok-a tɩ yaa bõe la a tar n dat n togs yẽnda.

20Bi-bɩɩgã leokame yaa: Zuif-rãmba lagma taab n dat n kos yãmb tɩ y tall a Poll n wa kaoreng yɛl-bʋ-kaoodbã taoor wala b rat n leb n sok n bãnga yẽnda yellã n paase.

21Ra kelg-y-b ye, bala, bãmb sʋka neb sẽn yɩɩd pis-naas n segend bẽdg a Poll yĩnga, la b yãka yam n wẽen tɩ b ka na n dɩ wala b yũ sã n ka tɩ b kʋ a Polle. Bãmb seglame n sɛ moasã n gũud yãmb sẽn na n yet tɩ bũmb ninga.

22Sodaas tusr naabã keooga bi-bɩɩgã n yeel-a: Ra togs ned bũmb ninga fo sẽn togs maama ye.

23Dẽ poore, sodaas tusr naabã boola sodaas kobs nanams a yiib n yeel yaa: Segl-y sodaas kobs-yi la wed-rʋʋdb pis-yopoe, ne kãn-tãoodb kobs-yi tɩ yʋngã wakat a wɛ sasa, y na n kẽnga hal Sezaare.

24La y segl wiid me sẽn na n zombg a Poll n tall-a n kẽng Gʋvɛrneer a Feligs nengẽ tɩ bũmb ra maan-a ye.

25La yẽ gʋlsa sebr n yeel a woto:

26Maam a Kolood Liziyaas n pʋʋsd Gʋvɛrneer sõng a Feligs.

27Zuif-rãmbã ra yõka rao-kãngã n da na n kʋ-a, la mam sẽn wʋm tɩ yẽ yaa Rom nedã, mam waa ne sodaas n fãag-a.

28La mam sẽn dat n bãng sẽn ya bũmb ninga yĩng la Zuif-rãmbã rõt yẽnda wã, m tall-a lame n kẽng b kaoreng yɛl-bʋ-kaoodbã taoore.

29La mam mikame tɩ b sẽn dõt yẽnda wã yaa nokoɛɛm sẽn kẽed ne bãmb mens tõoga yell wɛɛngẽ, la rao-kãngã ka maan bũmb sẽn zems tɩ b kʋ-a wall b kẽes-a bi-bees roog ye.

30Dẽ, mam sẽn wʋm tɩ Zuif-rãmbã setame n dat n kʋ-a wã, mam tʋm-a-la yãmb nengẽ tao-tao la m yeela a rõatbã tɩ b wa yãmb taoor n togs b koɛɛgã. Wẽnd-na sõnge.

31La sodaasã peega a Poll ne yʋng n tall-a hal n ta Ãntipatiris wa b sẽn da yeel bãmbã.

32La vẽkembeoogo, sodaas nins sẽn kẽn ne nao wã lebg n leba gãosgẽ wã n bas wed-rʋʋdbã tɩ b tall a Poll n looge.

33Bãmb sẽn ta Sezaare, b kɩsa Gʋvɛrneerã sebrã la b ning a Poll yẽ nugẽ.

34Gʋvɛrneerã sẽn karem sebrã n sɛ, a soka a Poll a sẽn yit soolem ninga. La yẽ sẽn wʋm t'a Poll yita Silisi soolem,

35A yeelame t'a rõatbã sã n wa n wa, a na kelg-a. La a yeelame tɩ b kẽes a Poll Herood na-zakẽ wã n gũ-a.

← Chapter 22 Jump to: Chapter 24 →