Acts 14

Mossi Moore (KÃAB-PAALGÃ KOE-NOOGO)

← Chapter 13 Jump to: Chapter 15 →

1A Poll ne a Barnabas tũu taab n kẽ Zuif-rãmba karen-doog a yen pʋg sẽn be Ikoniyom, la b gomame n tõog tɩ Zuif-rãmba wʋsg ne Gɛrk-rãmba lebg tẽedba.

2La Zuif-rãmb nins ka tẽ wã rãmba bu-zẽmsã n kɩt tɩ b sũyã sãam ne karen-biisã.

3A Poll ne a Barnabas paa Ikoniyom n kaoose. A Poll dãmb daag n kɩsa sɩd ne Zu-soabã n gomd ne pɛl-kɛgenga. La Zu-soaba kɩsa bãmb bark goama a Poll dãmb sẽn moondã kaseto n kõ bãmb pãn-tõog tɩ b maan bãna la bõn-yɛɛsds ne b nusi.

4La tẽnga neba welga taaba, tɩ kẽer ra be Zuif-rãmba poorẽ la kẽer ra bee tʋmtʋmdba poorẽ.

5La bu-zẽmsa ne Zuif-rãmba la b nanamsa sɩngame n segl b mens n na n maan a Poll dãmb wẽnga, n dat lob bãmb kug n kʋ.

6La a Poll ne a Barnabas sẽn bãnge, b zoeeme n kẽng Listr ne Dɛrb tẽnsã, sẽn be Likaoni soolma, la tẽns a taab sẽn pẽ be.

7La b moona koe-noogã beene.

8Dao a ye n da be Listr t'a nao ki t'a ka tõe n yik ye. Yẽ sẽn dogã tɛka, a yaa põore la a zɩ n tõog n kẽn ye.

9Yẽ ra kelgda bũmb ninga a Poll sẽn togsdã. La a Poll ges-a lame n bãng t'a tara tẽeb n tõe n paam maagre.

10A Poll Zẽka a Koɛɛg n yeel rao wã t'a yik n yals a nao wã zugu. La rao wã yɩɩ yagbgo n yik n sɩng kẽna.

11Neb kʋʋnga sẽn yã bũmb ninga a Poll sẽn maana, b zẽka b koees n yeel ne Likaoni-rãmba goam tɩ yaa Wẽnnaam dãmb n dɩk yĩns n sig n wa bãmb sʋka.

12B pʋda a Barnabas yʋʋr t'a Zees la b pʋd a Poll t'a Hɛrmes sẽn dag n ya yẽnda n gomda yĩnga.

13Wẽnnaam ning sẽn boond tɩ Zeesã pʋʋgã roog rag n bee tẽnga noore, la zees maan-kʋʋdã baoo tɩ-puud n wʋg n pid lols yubli n tall-b n wa tẽnga yoy n dat tɩ neb kʋʋngã lagem yẽnda tɩ b maan maoong n kõ a Poll ne Barnabas.

14La tʋmtʋmdb a yiibã sẽn wʋm bõn-kãnga, b kẽesa b fut n wudg n kẽ kʋʋngã sʋk n kelem n yeel yaa:

15Daopa, yaa bõe tɩ y maand a woto? Tõnd me yaa ninsaalb wa yãmb bala. Tõnd moonda yãmb koe-noog n yet-y tɩ y bas wẽnd-naands-kãens sẽn ka tar yõoda la y wẽnemd n sak Wẽnnaam ninga sẽn vɩ wã la sẽn naan yĩngr la tẽnga la ko-kãsenga ne bũmb nins fãa sẽn be b pʋgẽ wã.

16Yʋʋm sẽn looge, Wẽnnaam sẽn vɩ wã basa buudã fãa tɩ b maan b yam daabo.

17La baoosgo, Wẽnnaam maana kaset n wilg-b tɩ bãmb beene n mam neer n kõ yãmb saaga t'a niid tɩ sẽoog ne bõn-bɩʋʋng beẽ tɩ rɩɩb sekd yãmb n pids y sũyã ne sũ-noogo.

18Baa ne gom-kãensã, yɩɩ toog ne tʋmtʋmdbã tɩ b tõog tɩ neba ra maan maoong n waoog-ba.

19La Zuif-rãmb n yi Ãntiyos ne Ikoniyom n wa n rãmb nebã tɩ b lob a Poll kuga. La b sẽn tẽed t'a kiime wã, b vuuga yẽnda n yiis tẽngã pʋga.

20La tẽedba gũbga a Poll la a leb n yikame n kẽ tẽnga pʋga. La vẽkembeoogo, a Poll ne a Barnabas kẽnga tẽnga a yen sẽn boond tɩ Dɛrb.

21La bãmb sẽn moon koe-noogã tẽng pʋga, b paamame tɩ neb wʋsg lebg karen-biisi. La a Poll ne a Barnabas lebg n leba Listr ne Ikoniyom la Ãntiyos yɛsa.

22Bãmb belsa tẽedba sũyã n paas-b raood n sagl-b tɩ b yals tẽeba pʋg kãenkãe n yeel-b yaa: Yaa tɩlɛ tɩ tõnd paam namsg wʋsg n yaool n tõog n kẽ Wẽnnaam soolme wã.

23A Zezi tẽedba sẽn be zĩig ninsã fãa, a Poll dãmb yãka kãsem-dãmb n kõ-ba. La bãmb loee noor n Pʋʋs n dɩk-b n bas Zu-soab ninga bãmb sẽn tẽ a soaba nugẽ.

24La a Poll ne a Barnabas pɩʋʋga Pisidi soolem n kẽng Paamfili soolem.

25Bãmb moona Wẽnnaam koɛɛgã Pɛrz n yaool n kẽng Atali.

26Bãmb kẽ koom-koglg tẽn-kãng n leb Ãntiyos, yaa tẽng ninga b sẽn dag n ning b zut bark tɩ b maan tʋʋmd ning bãmb sẽn maana.

27La b sẽn ta Ãntiyos b tigma a Zezi tẽedba fãa n togs-b Wẽnnaam sẽn tall bãmb n maan bãmb bũmb nins fãa wã. La sẽn yɩ to-to tɩ Wẽnnaam pak sor tɩ bu-zẽmsa me tõe n tẽ wã.

28La a Poll dãmb paa be ne tẽedbã n kaoose.

← Chapter 13 Jump to: Chapter 15 →