Acts 8

Mossi Moore (KÃAB-PAALGÃ KOE-NOOGO)

← Chapter 7 Jump to: Chapter 9 →

1La a Soll da gesame t'a Etɛn kʋʋbã zemsame.

2Nin-sõamyã rɩka a Etɛn n mum la b yãba wʋsg yẽ kũuma yĩnga.

3La a Soll da namsda tẽedbã wʋsgo. Yẽ ra kẽeda rot pʋs fãa n yõgd raop la pagb n kẽesd-b bi-bees roogẽ.

4Dẽ, b sẽn sãeeg neb ninsã da kẽngda zĩig zĩig n moond koe-noogã.

5A Filip kẽnga Samari na-tẽngã n tɩ moon Kirist koɛɛgã be.

6Neb kʋʋngã sẽn wʋmd la b yãt a Filip sẽn maand bõn-bãna, bãmb naaga taab n kelgd bũmb ninga yẽ sẽn togsdã neer neere.

7Tɩ bõe, zin-dẽgd wʋsg ra kelemda ne pãng n yit n basd neb nins b sẽn da tarã. La koms-rãmb wʋsg ne wobs me ra paamda maagre.

8La sũ-no-kãseng zĩnda tẽn-kãng pʋga.

9Dao a yen yʋʋr sẽn boond t'a Sɩmo n da zoe n deng n be tẽn-kãng me pʋga n maand tɩt n yɛɛsd Samari nebã. A ra yeta a meng tɩ nin-kãsenga.

10La sẽn sɩng ne nin-tals la nin-kãsems fãa ra kelgda yẽnda neere n yetẽ tɩ rao-kãng yaa Wẽnnaam pãnga. Tɩ yaa pãng ninga b sẽn boond tɩ pãn-kãsengã.

11Nebã ra kelgda yẽ neere, tɩ bõe, yaa daar zãr la a maand a tɩɩmã n yɛɛsd bãmba.

12La neba sẽn tẽ a Filip sẽn moond Wẽnnaam soolem koe-noogã la a Zezi Kirist yʋʋrã, b raop la b pagb sak n deega koom lisgu.

13A Sɩmo menga tẽeme n deeg koom lisg n kell n pa ne a Filip la a sẽn yãt bõn-yɛɛsdsã ne bõn-bãn kãsemsã sẽn maandã, a yɛɛsame.

14Tẽn-tʋmdbã sẽn be Zeruzalɛmã sẽn wʋm tɩ Samari nebã reega Wẽnnaam goama, b tʋma a Pɩyɛɛr ne a Zã bãmb nengẽ.

15A Pɩyɛɛr ne a Zã sẽn ta Samari b pʋʋsa tẽedbã yĩng tɩ b reeg Sɩɩg-sõngo.

16Bala, Sɩɩg-sõng nan zɩɩ n sig bãmb ned ba a yen zug ye. Bãmb da paama koom lisg bal ne zu-soab a Zezi yʋʋre.

17Dẽ, a Pɩyɛɛr ne a Zã tika tẽedba ne b nusi, la b reega Sɩɩg-sõngo.

18A Sɩmo sẽn yã tɩ wakat ning tẽn-tʋmdbã sẽn tikd tẽedbã ne b nusã b reegda Sɩɩg-sõngo, yẽ waa ne ligd n na n kõ a Pɩyɛɛr ne a Zã.

19Yẽ yeel-b lame yaa: Kõ-y maam me pãn-kãnga tɩ mam sẽn na n tik ned ning fãa ne m nusi, bɩ a reeg Sɩɩg-sõngo.

20La a Pɩyɛɛr yeela yẽnda yaa: Bɩ f ligdã naag foom n sãam, fo sẽn tẽed tɩ ligd tõe n daa Wẽnnaam kũunã yĩnga.

21Fo ka tar pʋɩɩr yel-kãnga pʋgẽ ye. Tɩ bõe fo sũurã ka tɩrg Wẽnnaam taoor ye.

22Dẽ yĩnga, bɩ f tek yam n bas f tags wẽnsã n pʋʋs Zu-soabã tɩ sã n tõe bɩ f paam sugr kũun tags kãnga sẽn be fo sũurẽ wã yĩnga.

23Tɩ bõe, mam neeme tɩ sũ-toog n tar foo tɩ f ya yel-wẽna yamba.

24A Sɩmo yeel-b lame yaa: Yãmb mens pʋʋs Zu-soabã mam yĩnga, tɩ bũmb nins yãmb sẽn yeelã ba a yen da paam maam ye.

25La a Pɩyɛɛr ne a Zã sẽn kɩs kaset la b moon Zu-soabã koɛɛg n sa, b lebg n leba Zeruzalɛm. La b sẽn wa n dabdã, b moona koe-noogã Samari tẽn-bõones wʋsg pʋse.

26La Zu-soabã malɛk goma ne a Filip n yeel-a t'a yik n kẽng wĩndgã goabg n tũ sor ningã sẽn yit Zeruzalɛm n dabd Gaza, n ya weoog sorã.

27A Filip yikame kẽng tao-tao. La rao a yen sẽn ya zu-soab n yit Etiyopi sega yẽ sorã zugu. Rao-kãng yaa Etiyopi rĩm-poaka, Kãndaas ligd gũuda, yẽ ra waa Zeruzalɛm n na n pʋʋs Wẽnnaam.

28La yẽ ra lebg n kuiisame, a ra zĩi a wiid voatɩɩr pʋg n karemd Wẽnnaam no-rɛɛs a Ezayi sebre.

29La Sɩɩg-sõng yeela a Filip t'a kẽng n kolg voatɩɩrã.

30Yẽ wudg n kolgame, la a wʋma Etiyopi rao wã sẽn da karemd Wẽnnaam no-rɛɛs a Ezayi sebre, t'a Filip sok-a t'a wʋmda a sẽn karemda võor sɩda?

31Tɩ raowã leok tɩ yẽ na n yɩɩ wãn n tõog n wʋm a võor tɩ sã n ka ned n bilg n kõ-a. La a boola a Filip t'a wa kẽ voatɩɩrã pʋg n zĩnd ne yẽnda.

32Rao wã sẽn da karemd zĩig ninga gʋls-sõngã pʋgẽ wã ra yeta a woto: B waa ne bãmb wala b sẽn wat ne pesg kʋʋb zĩigẽ, la wala pe-bil sẽn ka yaagd a noor a wõrsdã ye.

33B sẽn paoog bãmba pʋgẽ, b ka kao b bʋʋd tɩrg ye. Ãnna n na n tõog n wilg bãmb sẽn bas b poorẽ? Bala, b yiisa bãmb vɩɩm dũniyã zug ka.

34Ligd-gũudã yeela a Filip yaa: M Bõosdame tɩ y togs maam. Yaa ãnna yell la Wẽnnaam no-rɛɛsã sẽn gomd a woto wã? Yaa b meng yell bii, bɩ yaa ned a to yelle?

35Dẽ, a Filip sɩnga ne gʋls-sõngã zĩ-kãng n moon yẽnda a Zezi koe-noogã.

36La bãmb sẽn ket n kẽnda, b waa n taa koom zĩigẽ. La ligd-gũudã yeelame yaa: Ad koom, bõe n gɩdg maam ne koom lisgu?

37A Filip yeel-a lame t'a sã n tẽ ne a sũurã fãa, a tõe n paama koom lisgu. La a leokame tɩ yẽ tẽedame t'a Zezi Kirist yaa Wẽnnaam Bi-ribla.

38Dẽ, a kɩtame tɩ voatɩɩrã yalse. La a Filip ne ligd-gũudã tũu taab n sig n kẽ koome wã. La a Filip lisa yẽnda.

39La bãmb sẽn lebg n yi koomã pʋgẽ, Zu-soabã Sɩɩg rɩka a Filip n looge, la ligd-gũudã ka le yãnd-a ye. La a leb n dɩka a sor ne sũ-noogo.

40La b yãa a Filip Azot. La yẽ moona koe-noogã tẽns nins fãa yẽ sẽn tũ wã, halɩ n tɩ ta Sezaare.

← Chapter 7 Jump to: Chapter 9 →