Acts 12

Mossi Moore (KÃAB-PAALGÃ KOE-NOOGO)

← Chapter 11 Jump to: Chapter 13 →

1La wakat kãng sasa, rĩm a Herood sɩngame n nams a Zezi tẽedba kẽere.

2Yẽnda kɩtame tɩ b kʋ a Zã ba-biig a Zak ne sʋʋga.

3La yẽ sẽn yã tɩ bõn-kãng taa Zuif-rãmba yam, a kell n kɩtame tɩ b yõk a Pɩyɛɛr. Rag n yaa bur sẽn ka rã-bɩll kibs daare.

4Herood sẽn yõk a Pɩyɛɛr n kẽes bi-bees roogẽ, a kɩtame tɩ sodaas piig la a yoob gũ a Pɩyɛɛr n dees taab naas-naase, n dag n tagsdẽ tɩ zʋʋg-n-basã kibs sã n loog bɩ a yiis-a n kao a bʋʋd neba nifẽ.

5Dẽ, bi-bees roogã pʋgẽ b ra gũuda a Pɩyɛɛre. La a Zezi tẽedba rag n pʋʋsda Wẽnnaam ne b sũur fãa a Pɩyɛɛr yĩnga.

6Yʋng ninga sẽn deng a Herood sẽn na n yiis a Pɩyɛɛr n kao a bʋʋdã, gũudba rag n bee bi-bees rooga noor n gũudẽ la b ra balga a Pɩyɛɛr ne bãens a yiib t'a gãe pʋgẽ. Sodaas a yiib tẽn-sʋka.

7Tao-tao bala, Zu-soaba malɛk puka a menga la vẽenem n yãg bi-bees roogã pʋgẽ. Malɛkã wẽe a Pɩyɛɛr lʋgr n nek-a n yeel-a yaa: Yik tao-tao. La bãensa lʋɩɩme n bas a Pɩyɛɛr nusã.

8Dẽ, malɛka yeela a yẽnda t'a sẽb a sẽbdgã la a wid a neooda. A Pɩyɛɛr maana a woto. La malɛkã yeel-a lame t'a rɩk a fuugã n yeelg n tũ yẽnda.

9A Pɩyɛɛr tũu malɛkã n yi, la a ra ka tagsd tɩ bũmb ninga malɛkã sẽn moonda yaa sɩd ye. A ra tagsdame tɩ yẽ yãa vẽnegre.

10La bãmb sẽn loog pipi gũudã ne yiib soabã n ta kʋleng ninga sẽn teesd tẽngã n pag ne kutã, kʋɩlen-kãng paka a toor bãmb taoore. La b yiime n kẽng n dɩk sorã, la tao-tao bala, malɛkã loog n bas yẽnda.

11Dẽ, a Pɩyɛɛr yam vẽnegame t'a bãng bũmb ning sẽn maana. La a yeelame yaa: Moasã, mam bãnga sɩd-sɩd tɩ yaa Zu-soabã n tʋm malɛk t'a fãag maam Herood nugẽ la na bũmb ning fãa Zuif-rãmba sẽn da rat n maan maama.

12A Pɩyɛɛr sẽn tagse, a kẽnga a Maari yiri. Yaa a Zã b sẽn boond t'a markã ma. La neb wʋsg n dag n tigim taab beene n pʋʋsdẽ.

13A Pɩyɛɛr wẽe rignoor ninga b sẽn kẽeda kʋɩlengã, la tʋmtʋmd poak a yen yʋʋr sẽn boond t'a Rood kolgame n na n kelge.

14La yẽnda bãnga a Pɩyɛɛr koɛɛgã la a sũurã yɩɩ noog t'a bas kʋɩlengã pakr n wudg n leb pʋgẽ n tɩ togs t'a Pɩyɛɛr n wa n be rignoorẽ wã.

15Bãmb yeela yẽnda t'a lebgame. La tʋmtʋmd-poakã kell n baas n yeelame tɩ yẽ sẽn yetã yaa sɩda.

16Dẽ, b yeelame tɩ yaa a Pɩyɛɛr malɛka. La wakat kãnga, a Pɩyɛɛr dag n ket wẽeda kʋɩlengã. La b sẽn yaool n pake, b yãa a Pɩyɛɛr la b yɛɛsame.

17A Pɩyɛɛr Zãasa bãmb ne nug n na n kɩt tɩ b sĩndi. La a Pɩyɛɛr togs-b-la Zu-soabã sẽn maan to-to n yiis yẽnda bi-beesa roog pʋgẽ. La a yeel tɩ b tɩ togs a zak ne ba-biis a taabã bõn-kãnga. Dẽ, yẽ yiime n kẽng zĩig a to.

18La beoogã sẽn vẽege, rãmbg kãseng n yik sodaasã sʋka, b sẽn dag n dat n bãng a Pɩyɛɛr sẽn be zĩig ninga yĩnga.

19Herood kɩtame tɩ bao a Pɩyɛɛr, la b ka yãnd-a ye. A kɩtame tɩ b kao gũudba bʋʋdo, la a kõ noor tɩ b kʋ-ba. Rẽ zugẽ, Herood yii Zude n kẽng Sezaare n tɩ pa be wakat bilfu.

20Herood sũur puuga wʋsg ne Tɩɩr la Sɩdõ nebã. Nin-kãensa zemsa taab n na n kẽng Herood nengẽ bãmb yãga zood ne sõgen ning sẽn manegd rĩma roogã, la b waa Herood nengẽ n na n bao tɩ laafɩ zĩnd bãmb ne rĩma sʋka, sʋka, bala rĩma soolma n dag n dɩlg bãmb tẽngã.

21Daar ninga Herood sẽn yãkã sẽn ta, a yeelga a naam fut n zaoond a naam geer zug n gom gom-bɛd neba taoore.

22La neba kelmame n yeel tɩ yaa wẽnd n gom, tɩ ka ninsaal n goma ye.

23La wakat kãng bala, Zu-soaba malɛk wẽe Herood yẽ sẽn dɩk Wẽnnaam waoogrã n kõ a mengã yĩnga. La zũnzũi n dɩ-a t'a ki.

24Wẽnnaam koɛɛga ra saagdame n yɩɩd pĩnda.

25La barnabas ne a Soll sẽn maan b tʋʋmd Zeruzalɛm n sɛ, b peega a Zã b sẽn boond t'a Mark n lebg n wa Ãntiyos.

← Chapter 11 Jump to: Chapter 13 →